The National Assembly of Seychelles

  • Increase font size
  • Default font size
  • Decrease font size

Tuesday 7th June, 2016

E-mail Print PDF

NATIONAL ASSEMBLY OF SEYCHELLES

Tuesday 7th June, 2016

The Assembly met at 9am

National Anthem

Moment of Reflection

Mr Speaker in the Chair

 

 

MR SPEAKER

Bonzour tou bann Manm Onorab, bonzour Minis ek son delegasyon.

Bonzour tou bann dimoun ki pe ekout nou dan lakour.  Ozordi nou annan avek nou Minis pou Lagrikiltir ek Lapes.  Msye Wallace Cosgrow ki pe vin reponn plizyer kestyon konsernan son Minister.

Me avan ki nou fer li mon oule senpleman enform Lasanble lo en sanzman fondamantal ki’n arive dan Lasanble Nasyonal li menm.  Le 30 Me mon ti ganny en let sorti kot Dirizan Zafer Gouvernman, Mademoiselle Marie-Antoinette Rose, ki ti pe enform mwan ki i pe servi son privilez anba Lartik 81(1,2) Konstitisyon pou li resign koman en Manm Parlman.  Ki fer ki otomatikman Onorab Rose i osi aret vin Leader of Government Business.

Le 1 Zen, mon’n ganny en let sorti kot Prezidan Larepiblik ki an akord avek Seksyon 3 A, (3).  National Assembly Members Emolument (Amendment) Act, 2004 i pe apwent Onorab Charles De Commarmond koman nouvo dirizan Zafer Gouvernman dan Lasanble Nasyonal.

Donk a parti le 1 Zen Onorab De Commarmond i the new Leader of Government Business. Felisitasyon Onorab.

 

(Applause)

 

MR SPEAKER

Prezan nou ava pran nou bann kestyon  Nou a komans avek kestyon 34 par Onorab Meggy Marie.

 

HON MEGGY MARIE

Mersi Mr Speaker.

Bonzour Minis ek ou delegasyon.  Bonzour tou Manm Onorab e tou zabitan ki a lekout.

Pou komanse mon a dir felisitasyon Onorab De Commarmond pou son nouvo post.

Mr Speaker, eski Minis i kapab donn detay nou Lasanble, si i dan plan son Minister pou revwar posibilite lease bann plot later dan distrik Anse Aux Pins pour bann zabitan ki anvi fer devlopman lagrikiltir.

Mersi Mr Speaker.

 

MINISTER WALLACE COSGROW

Mersi Mr Speaker.

Bonzour Mr Speaker, bonzour tou bann manm Onorab.  Bonzour tou bann dimoun ki pe ekoute lo radio ozordi.

Mr Speaker, an se moman napa okenn later Lagrikiltir dan distrik Anse Aux Pins ki pe ganny administre par Lazans Lagrikiltir.  Me si a longer ditan i annan okenn dimoun ki idantifye okenn later dan sa distrik.  Lazans an konsiltasyon avek Minister Litilizasyon Later ek Lakaz i kapab fer bann demars e prosedir neseser pou konsider alokasyon.

Pou note i annan an se moman 5 dimoun dan distrik Anse Aux Pins ki’n fer laplikasyon pou en morso later lagrikiltir.  Zot non i lo waiting list e zot pou ganny konsidere dan lezot distrik kot i annan bann later lagrikiltir available.

Mersi.

 

MR SPEAKER

Okenn siplemanter Onorab.

 

HON MEGGY MARIE

Wi, Mr Speaker.

Mr Speaker, an vi larepons Minis, Minis eski ou Minister in fer en levanter lo lakantite later lagrikiltir ki annan Mahe, Sesel pou fer devlopman lagrikiltir e konbyen ki pe byen ganny servi e konbyen ki pa pe ganny servi at the maximum.

Mersi Mr Speaker.

 

MINISTER WALLACE COSGROW

Mersi Mr Speaker.

Mr Speaker, nou dan prosedir, nou deza annan en proze on going avek FAO.  Nou dan prosedir pe fer en levanter tou bann later lagrikiltir lo Mahe, Praslin ek La Digue pou nou konn total kantite later lagrikiltir ki nou annan e osi konnen lakantite ki pe ganny servi.  Swa servi o maksimonm, swa servi par bout.  Me nou dan prosedir pe fer en levanter ki petet by lannen prosenn a kapab konplete.

Mersi bokou Mr Speaker.

 

MR SPEAKER

Onorab Murielle Marie

 

HON MURIELLE MARIE

Mersi Mr Speaker.

Bonzour a tous.  Mr Speaker, baze lo repons Minis, eski Minis i kapab donn nou en statistics konbyen dimoun ki fer laplikasyon dan Sesel pou later lagrikiltir e an vi Polisi i dir ki ou bezwen servi 80 poursan later lagrikiltir.  Ki mekanizm i annan an plas pou son Minis pou kapab cancel lease sa bann dimoun swa pou retir zot lo later.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab pou ou kestyon nou annan nou pour lemoman 121 dimoun ki lo waiting list pou later lagrikiltir e sa i dan diferan distrik.  Nou annan prosedir pou retir dimoun lo later ki pa pe prodwir 80 poursan parey nou demande.  Me pour lemoman prosedir i en pti pe long akoz nou donn bann reminder. Ki arive par fwa, souvandfwa en dimoun ou donn li reminder, i ale i plante, apre serten letan i tonm ankor, ou donn li ankor en reminder. I ale i plante, so i en pti pe difisil pou kapab zis retir dimoun koumsanmenm.

Me selman nou pe sey vwar bann nouvo mekanizm, nouvo fason pou nou kapab akseler sa process.  Nou okouran ki i annan serten landrwa, par egzanp kot dimoun pe servi sa sityasyon pou zot kaba zwe ek later lagrikiltir.  So nou pe vwar bann nouvo demars ki mannyer nou kapab deal avek sa.

Mersi.

 

MR SPEAKER

Onorab Leader Lopozisyon, kestyon 35.

 

HON FRANCESCA MONNAIE

Mersi Mr Speaker.

Bonzour Mr Speaker, Minis, tou Manm.  Bonzour tou sa ki a lekout.  Permet mwan Mr Speaker, pou dir en pti mo Onorab De Commarmond.

 

MR SPEAKER

Non, nou dan Question Time.  Petet apre Question Time.

 

HON FRANCESCA MONNAIE

Mon ti a voudre zis felisit li pou son...

 

MR SPEAKER

Ok, ou kapab felisit li, setou.  Mersi.

 

HON FRANCESCA MONNAIE

Felisitasyon Mr Decommarmond et Dieu beni.

Pour Minis, eski Minis i kapab dir avek Lasanble si i annan okenn plan pou bann peser ek planter, ki vi vann zot prodwi obor semen vizavi vye Sant Sosyal English River?

 

MINISTER WALLACE COSGROW

Mersi Mr Speaker.

Mersi Onorab.  Onorab nou annan en plan standar pou konstriksyon bann Bazar dan bann distrik, parey ki’n fer Roche Caiman, tou dernyerman Anse Royale.

Nou annan en plan LA River Anglais, me selman nou an konsiltasyon avek Minister Devlopman Later pou ganny en lokasyon apropriye dan zot plan devlopman later pou sa distrik, pou nou fer sa konstriksyon.

An vi ki Bidze 2016 in fini ganny aprouve, nou pa’n kapab allocate finansman pou sa proze san ki nou kapab konfirm en teren pou sa proze.  Nou pe swete ki nou a ganny alokasyon en teren byento koumsa nou a kapab met finansman pou konstrir sa Bazar dan Bidze 2017.  Me selman, in short nou annan en plan pou peser avek planter ki vann zot prodwi dan bor semen La River Anglaise.

 

MR SPEAKER

Okenn siplemanter.  Non.  Wi Onorab Vidot.

 

HON KEVIN VIDOT

Thank you Speaker, bonzour.

Bonzour tou dimoun dimounki a lekout.

Mr Speaker, eski Minis i kapab dir nou si napa plan ki’n deza egziste pou La River Anglaise an term ekstansyon Bazar orizinal la Selwin, Selwin Clerk ki pou kapab enkorpor osi nou bann planter avek nou bann peser La River Anglaise anliny i avek sa gran progranm grater Victoria.

Mersi bokou.

 

MINISTER WALLACE COSGROW

Mersi Mr Speaker, mersi Onorab.

Onorab Sir Selwin Selwin Clerk nou annan plan renovasyon pou fer serten pti ekstansyon dan main market li menm.  Dan Bazar annex nou osi annan plan pou nou extend li en pti pe plis avek petet en devloper prive pou extend li en pti pe plis pou annan plis stall, e bann stall en pe pli modern dan sa ki nou apel annex Bazar. So i a ava annan lespas evantyelman pou cater pou bann dimoun ki dan larezyon.  Larezyon anvil mon pe dir e ki zot a kapab ganny bann fasilite pli o nivo pou zot kapab vann zot bann prodwi.

Mersi.

 

MR SPEAKER

Onorab Monnaie, kestyon 36.

 

HON FRANCESCA MONNAIE

Mersi Mr Speaker.

Eski Minis i kapab enform sa Lasanble, ki plan Gouvernman i annan pou fer ki bann Lagreman Lapes Ton ki nou sinyen avek bann diferan partner Linyon Eropeen, i vin pli transparan e anmenn plis benefis pour Seselwa.

Mersi.

 

MINISTER WALLACE COSGROW

Mersi Mr Speaker, mersi Onorab.

Mr Speaker, dernyen Protokol Lapes ki’n ganny sinyen avek Linyon Eropeen pou lapes Ton dan nou delo ti ganny sinyen an 2013 e ti vin an operasyonnel an 2014.

Sa lagreman ki pou en period 6an pou reste valid ziska le 17 Zanvye 2020.  Kot i konsern transparans dan negosyasyon bann lagreman lapes.  Tou bann negosyasyon i ganny fer par Gouvernman ek partisipasyon bann Manm Board Lotorite Lapes ki osi annan reprezantan bann Lasosyasyon Peser e bann reprezantan bann biznes prive.

Tou lakor lapes ki ganny negosye i osi ganny prezante ek Lasanble Nasyonal pou laprouvasyon aven ki i kapab vin ofisyel pou enplimantasyon.  Nou pou osi pibliy sa lagreman lo sit web SFA parey bann ki nou’n pibliye oparavan.

An plis Linyon Eropeen i annan en prosedir egzizan ki asire ki i annan la transparans ek bonn gouvernans dan egzekisyon sa fon ki enplimant bann progranm devlopman.

An se ki konsern plis benefis pou Seselwa, anba sa lagreman Linyon Eropeen in donn Sesel 2.5 milyon Ero par an pou sa prosen 4an koman en don dedye pou siport nou Sekter Lapes isi Sesel.  Se sanmenm sa fon ki nou servi pou fer bann lenfrastriktir parey bazar.  Amelyorasyon e devlopman por lapes.  Met bann loan favorab pour peser kapab aste zot bato e lekipman.  Asiste lekol maritim kot anba sa fon zot in ganny en bato pou fasilit bann etidyan fer zot kour.

Nou osi ede finans kour Liniversite Sesel an relasyon ek bann kour dan domenn lapes.  Asiste biro standar ek lekipman.  Finans bann kour e devlopman kapasite nou bann syantis lokal e aletranze.  Ensi ki sirveyans nou zone maritim kont lapes ilegal.

Mersi Mr Speaker.

 

MR SPEAKER

Okenn siplemanter.

 

HON FRANCESCA MONNAIE

Mersi Mr Speaker.

Minis dan sa lagreman, eski bann Seselwa i annan plas lo sa bann bato Ton ler zot lo lanmer silvouple.

 

MINISTER WALLACE COSGROW

Mersi Mr Speaker, mersi Onorab.

Wi bann seselwa i annan plas pou travay lo sa bato Ton letan zot bato Ton i pe operate lo lanmer.

Mersi.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.

Bonzour tou dimoun.  Felisitasyon Onorab De Commarmond pou ou nouvo pos.

Mr Speaker, dan sa Protokol, Lartik 18, Seksyon 7 i koz lo kontra pou bann maren, i koz garanti peyman sekirite sosyal, lasirans lavi, peyman dan ka maladi, peyman dan fon pansyon e i asir osi larzan minimonm ki ganny preskrir par ILO.

Eski Minis i kapab dir sa Lasanble, nou bann maren, si SFA i annan en sistenm monitoring pou fer sir ki tou bann keksoz dan sa kontra pe ganny onore.

Mersi.

 

MINISTER WALLACE COSGROW

Mersi Mr Speaker, mersi Onorab.

Onorab SFA i annan en sistenm monitoring pou bann maren ki travay lo bann bato ton.  E mon asire ki zot sistenm monitoring i fer sir ki sa bann Lalwa, sa bann Lord pe ganny mentenir.  Si par kont i annan sityasyon kot sa pa pe ganny mentenir i annan mekanizm anba Lalwa Sesel pou kapab deal avek sa bann sityasyon, akoz apre tou sa bann bato i annan ki fly paviyon Sesel.

Mersi.

 

MR SPEAKER

Onorab Samson.

 

HON DEREK SAMSON

Bonzour Mr Speaker, mersi.

Mr Speaker, mon ti a kontan demann Minis si i dan lentere son Minister pou osi dan lavenir elarzi negosyasyon, malgre ki nou konnen ki se Minister Lanvironnman ki dan bann size konservasyon pou elarzi lagreman ki petet Linyon Eropeen i kapab donn nou en pti pe plis sipor lo konservasyon nou bann lespes maren ki pli tar nou konnen i vin dan benefis lapes kot nou kapab ganny en pe plis dan losean.

Mersi Bokou.

 

MINISTER WALLACE COSGROW

Mersi Mr Speaker, mersi Onorab.

Onorab, zisteman dan le fitir mannyer nou pe vwar lapes Ton ale, nou anvi en lapes Ton ki en pe pli soutenab e alors definitivman mon krwar dan lefitir dan bann lagreman ki nou negosye nou pou enkli sa konponan soustenabilite avek proteksyon osi dan nou bann lagreman.

Mersi.

 

MR SPEAKER

Onorab Pillay.

 

HON SEBASTIEN PIALLAY

Mersi Mr Speaker.

Mr Speaker, mon ti a kontan demann Minis si i ti kapab eksplik nou en pti pe ki bann benefis direk ki Sekter Lapes Artizanal i gannyen atraver sa progranm avek Linyon Eropeen e si atraver sa progranm zot pa kapab osi enkorpor serten eleman ekspertiz teknik pou ede dan bann sirkonstans kot bann kominote peser artizanal pe rankontre serten defayans par egzanp avek sanzman klima pou regarde ki mannyer zot kapab asiste sa bann kominote an vi lenportans sosyoekonomik sa bann kominote par egzanp parey dan distrik Glacis.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab parey mon’n eksplike en pti pe oparavan, sa grant ki Linyon Eropeen i donn SFA, i donn Gouvernman Sesel.  I al plis ou mwen anver devlopman lapes artizanal.  I annan tout en seri benefis, dan sans kot par egzanp ice. Par egzanp dan devlopman por lapes, par egzanp bann resers ki ganny fer.  Tousala i plis ou mwen gid towards devlopman lapes artizanal.

So, i plis ou mwen pou devlop sa Sekter e fer li agrandi.  Alors mazorite sa grant i ganny servi pou devlopman sa Sekter.  E nou kapab gete dan lefitir ki mannyer nou kapab elarzi sa ki nou fer ek sa grant pou kapab kouver en pe plis bann lezot areas, par egzanp ki ou’n mansyonnen.

Me selman pour lemoman mazorite sa grant i al anver Sekter Lapes Artizanal.

Mersi.

 

MR SPEAKER

Onorab Bresson.

 

HON GALEN BRESSON

Mersi Mr Speaker.

Bonzour tou dimoun.  Mr Speaker, eski Minis i kapab eksplik sa Lasanble, in koz lo sa grant.  Eski i kapab donn en bilan konkret grant, nou’n fini depi 2014, nou pe servi lagreman in tick in ziska 2020.  Kwa ki’n ganny fer ek sa grant ki nou’n gannyen, nou’n resevwar.  E ki i annan dan progranm ziska 2020 si progranm in fini ganny fer.  Ki konkret ki bann dimoun ki pe ekoute, ki bann peser artizanal ki pe ekoute i kapab konnen e espere dan bann distrik.

Mersi Mr Speaker.

 

MINISTER WALLACE COSGROW

Mersi Mr Speaker, mersi Onorab.

Onorab mon pa pou annan tou dan mon latet la ki bann plan ki sa grant i servi pou fer.  Me sa grant parey mon’n dir i en larzan ki ganny donnen anyel e progranm i ganny fer anyel.  So pour sak lannen i annan en progranm baze lo bezwen, bann bezwen Sekter ki’n ganny idantifye.

Mon a donn ou enn de legzanp bann keksoz ki’n ganny fer.  Par egzanp pour le moman dan distrik Bel Ombre i annan Building Processing ki pe ganny konstrir, i annan kot i debark pwason ki annan en proze tre byento nou pe al demare pou agrandi kot i debark pwason pou kapab deservi plis peser Bel Ombre.  I annan bann lezot proze ankor, par egzanp proze processing Providance, i annan Bazar Anse Royale e lezot ankor ki sa grant in ganny servi pou kapab fer devlopman lapes.

Nou annan bann lezot proze ankor ki an kour pou sa lannen, me mon kapab provide Lasanble avek tou lalis proze ki annan pou sa lannen.  Me parey mon’n dir sa bann proze i ganny plan lo en baz anyel.  Progranm i ganny fer anyel baze lo demann bann diferan distrik, diferan bezwen peser.

Mersi bokou.

 

MR SPEAKER

Onorab De Commarmond.

 

HON CHARLES DECOMMARMOND

Mersi Mr Speaker, bonzour Mr Speaker.  Bonzour Minis, bonzour tou dimoun ki a lekout.

Mr Speaker, dan lagreman lapes Ton avek Linyon Eropeen, ki relasyon Sesel i annan kot i konsern by catch.

Mersi bokou.

 

MINISTER WALLACE COSGROW

Ok, mersi Mr Speaker.

Mersi Onorab.  Ler ou dir mwan relasyon an term by catch.  Si mon konpran ou pe dir ki sa by catch i ganny fer avek.  Ok, sa by catch parey tou lezot pwason ki vin lo bato Ton.  Vi ki sa bato, sa lakonpannyen i annan en lagreman e i pey en license pou li lapes dan delo Sesel, sa by catch i vin komodite sa bato.  Alors ler by catch i ariv ater, sa bato i prensipalman servi Ton e sa by catch i la koman en keksoz siplemanter lo son bato.  So normalman sa by catch i ganny vann avek bann operater biznes ki servi by catch pou fer bann processing.

Par egzanp Sesel isi konmela nou annan 2, ki pe aste sa bann by catch, zot pe process li e zot pe fer met valer avek, zot pe par egzanp fer pwason sale, fer bann lezot keksoz ankor avek.  E zot pe eksporte ouswa zot pe vann lo marse lokal.

I osi annan en group dimoun ki pe servi sa by catch, bann ki en pti pe pa lo nivo pou servi koman labwet pou peser.  So peser i ganny labwet e i osi annan bann lezot biznes ki benefisye avek.  Akoz kantmenm dir, sa pwason i ankor bon e nou kapab met bann valer azoute avek.

So i annan bann biznes ki profit lo pou servi pou fer processing e eksporte e i annan bann biznes ki vann lokal e i annan peser osi i benefisye.  So en pti pe kwa, ki mannyer by catch i ganny servi isi.

Mersi.

 

MR SPEAKER

Bon kestyon 37, Onorab Bernard Arnephy.

 

HON BERNARD ARNEPHY

Mersi Mr Speaker.

Bonzour Mr Speaker, bonzour Minis ek ou delegasyon.  Bonzour tou Koleg Onorab e tou dimoun ki a lekout.

Mr Speaker, avek rezilta sa letid lo devlopman Sekter Lagrikiltir dan pei e bann aksyon ki pou swiv, eski Minis i kapab eksplik nou Lasanble, kan nou pou war sa sityasyon move akse avek lenfrastriktir, sirtou semen ki deservi bann laferm ganny adrese.

Mersi Mr Speaker.

 

MINISTER WALLACE COSGROW

Mersi Mr Speaker.

Mersi Onorab.  Mr Speaker, sa letid lo devlopman Sekter Lagrikiltir ti terminen an Fevriye 2016 e rapor in konplete pou Gouvernman aprouve e ganny finansman.  Anba sa letid nou’n idantifye e propoze pou ki 27 morso semen i ganny swa repare oubyen konstrir dan 9 distrik lo Mahe e Praslin.  An total nou’n idantifye pou fer 12.26 kilomet semen.  Sa bann semen pou deservi laferm ki deza egziste parey Onorab in fer resorti e osi i a permet nou met plis later a dispozisyon nouvo envestiser ki’n pare pou pran lagrikiltir koman en biznes.

Mr Speaker ti a bon fer note ki an se moman nou napa finansman en totalite pou fer tou sa semen, me pour le moman nou annan proze Klisa ki pe siport serten sa bann rekomandasyon dan sa letid.  Serten morso semen pou ganny finanse anba sa proze.

Mersi.

 

MR SPEAKER

Okenn siplemanter.

 

HON BERNARD ARNEPHY

Mersi Mr Speaker.

Mr Speaker, eski Minis i kapab dir ek nou Lasanble baze lo sa letid e letid ki zot in fer lokalman, konbyen pou kout Gouvernman ansanm avek sipor ki i gannyen avek bann partner pou kapab anmenn sa bann lenfrastriktir kot bann dimoun e an vi ki distrik Anse Boileau i enn bann distrik ki annan en gran konsantrasyon fermye e kot napa ase lenfrastriktir, eski Anse Boileau pe ganny kouver dan sa travay.

Mersi.

 

MINISTER WALLACE COSGROW

Mersi Mr Speaker.

Mr Speaker, an tou sa 27 ki mon’n dir pou kout Gouvernman apepre en pti pe plis ki R2.8 milyon e Anse Boileau i ganny kouver dan sa bann proze.  Annefe Anse Boileau i annan  detrwa semen ki ganny semen ki ganny kouver dan sa proze.  Apepre en 4/5 semen ki ganny kouver dan sa proze.  En pe gran, osi ti pti osi.

Mersi.

 

MR SPEAKER

Onorab Pool.

 

HON ANDRE POOL

Mr Speaker, mersi.

Mr Speaker, eski Minis i kapab dir nou si dan sa progranm ki i fek anonse dan son larepons, zot pe osi fer provizyon ki apre konstriksyon sa bann semen pou ki i annan en progranm maintenance pou fer sir ki sa bann semen i kapab kontinyelman deservi sa bann fermye.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab wi, definitivman nou depann Bidze tou le lannen pou nou kapab maintain bann lenfrastriktir avek semen lagrikiltir.  Otan ki Bidze i available nou pou touzour fer fason pou nou amelyor e gard sa bann semen lagrikiltir dan leta konvenab ki kapab ganny servi par bann fermye.

Souvandfwa i annan bokou semen lagrikiltir, semen ki dan bann rezyon lagrikiltir me ki pa neseserman ganny deservi zis par lagrikiltir.  I annan bokou landrwa ki lakaz rezidansyel osi in antre e ansanm avek SLTA enn ler bann proze i ganny konsevwar e SLTA osi i donn en koudmen pou repar en pe bann semen ki al dan bann zone lagrikiltir me ki pa neseserman ganny servi zis par fermye.

So ,nou annan plan e nou annan bann proze  ki pou amelyor bann semen lagrikiltir e kontinyen maintain bann semen lagrikiltir dan bann diferan landrwa ki mon’n mansyonnen.

Mersi.

 

MR SPEAKER

Onorab Jasmin.

 

HON JENIFFER JASMIN

Mersi Mr Speaker.

Bonzour tou dimoun.  Mr Speaker, an vi lenportans Sekter Lagrikiltir, eski Minis i kapab dir nou si son Minister i annan en plan kou a lonterm pou vwar finansman a sa Sekter pou akse bann lenfrastriktir ki annan en lenpak lo bann prodwi agrikol.  Ki plan ou Minister pour a lonterm.

Mersi.

 

MINISTER WALLACE COSGROW

Sorry, Onorab si mon konpran byen ou kestyon ou pe demande ki plan Minister a lonterm pou adres bann lenvestisman dan lagrikiltir.  Ok, mersi.

Onorab nou annan sa ki nou apel SNIP, in short.  I nou plan lenvestisman dan Sekter Lagrikiltir ki nou’n fini met an plas e in fini ganny met devan Gouvernman.  In fini ganny met devan bann diferan partner dan Sekter Lagrikiltir, lokal e osi enternasyonal.  Nou plan i elabore, i byen detaye e nou konnen kote nou anvi arive pou sa prosen 5an.

So, nou anmenn en plan la e nou bezwen prezan finansman sorti diferan kote.  Ki swa Gouvernman, ki swa prive, ki swa bann partner enternasyonal.

Nou deza annan par egzanp EFAD ki en partner ki ed nou e ki’n donn Gouvernman en loan tre konsesyon pou nou kapab fer serten devlopman.  E zisteman sa proze Klisa i baze lo loan ki nou’n gannyen avek IFAD. Nou annan FAO osi ki ed nou en kantite avek bann grants pou bann technical assistant tou le lannen.  E nou depan osi lo Bidze Gouvernman e bann lenvestisman prive.

So nou annan en plan elabore, detaye lo devlopman lagrikiltir Sesel.

Mersi.

 

MR SPEAKER

Kestyon 38, Onorab Marc Volcere.

 

HON MARC VOLCER

Mersi Mr Speaker.

Bonzour tou Koleg Manm, bonzour Minis ek ou delegasyon.

Mr Speaker, mon ti a kontan demann Minis kwa ki ou Minister pe fer, pou relev lagrikiltir lo Praslin.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Mr Speaker, Minister Lagrikiltir atraver Lazans Lagrikiltir i annan plizyer aktivite e sistenm ki’n ganny met an plas pou ede relev devlopman lagrikiltir lo Praslin e sa i comme swivan.

Lazans pe anmenn aktivite resers pli pre avek fermye par enplimant resers e rezilta resers lo zot laferm.

Premye faz en proze drenaz ki deservi bann later lagrikiltir in kouver en pti pe plis ki en kilomet drenaz.  Sa bann drenaz i deservi 13 fermye dan rezyon Amitié avek Zalouzi.  Nou’n agrandi store pou ogmant kapasite stokaz bann antran lo nou store lagrikiltir Amitié.  Nou pe osi met an plas en sistenm pou asire napa okenn mankman bann antran lo Praslin.

Lannen pase en nouvo baraz delo in ganny konstrir Cap Sanmi, son dezyenm faz se konstriksyon en rezervwar e sa pou deservi 9 fermye dan sa rezyon Cap Sanmi.

Kot D’or later ex Don Joe in ganny re demarke e re alokasyon avek 9 fermye e sa lannen Lazans pou enstal sistenm irigasyon e planifye sistenm drenaz dan sa landrwa.  Nou pe repar e fer nouvo sistenm pou deservi bann later lagrikiltir Amitié e Zalouzi.  Nou pe espekte ki dezyenm faz sa proze i a ganny konplete sa lannen.

Ansanm avek bann partner kle nou’n osi idantifye serten nouvo morso later e nou’n fer rekomandasyon pou zot ganny release avek lagrikiltir, parey Fond Azor e Amitié.

Lazans Lagrikiltir pe fer en legzersis pou revwar tou later lagrikiltir ki’n ganny allocate lo Praslin e leta prodiksyon lo sa bann later.  Rekomandasyon pou ganny fer lo pli bon fason anmenn logmantasyon prodiktivite lo sa bann later lagrikiltir.

Akse avek manze zannimo in amelyore lo Praslin apre ki Lazans pe lwe son batiman pou permet en fourniser stok manze pou fourni bann fermye lo Praslin.

Lazans pe osi fer demars pou anploy ankor en zofisye ki pou baze lo Praslin.  Mon espere ki avek sa bann mezir nou a vwar plis prodiksyon lo bann laferm Praslin.

Mersi Mr Speaker.

 

MR SPEAKER

Onorab okenn siplemanter.

 

HON MARC VOLCERE

Mersi Mr Speaker.

Mr Speaker, mon ti a kontan demann Minis lo kote resours imen.  Mon’n tann ou koz zis lo en extension officer.  Eski ou santi avek sa bann nouvo keksoz ki ou pe met an plas eski zis en dimoun i pou sifi pou cater pou Praslin an zeneral.

E dezyenmman lo kote elevaz zannimo, ok.  So Praslin in vreman desann en kantite lo sa kote.  Ki ou Minister pe fer ansanm avek bann fermye, petet pou ankouraz zot oubyen pou met bann fasilite an plas ki ava ankouraz zot pou retourn dan sa domenn ki Praslin i kapab prodwi son prop lavyann.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab sa zofisye extension ki nou pe al anploye la tre byento.  Sa pou nou aksyon dan limedya.  Me dan medium term parey nou dir nou anvizaze revwar osi Praslin pou annan petet en zofisye ki kordin loperasyon Praslin, parey nou ti annan en pe letan pase.

Tre probab nou pou bezwen inisyalman en zofisye sorti Mahe ki ava kapab revwar en pti pe loperasyon Praslin e o fiy anmezir ki keksoz i amelyore nou a kapab petet vwar si i annan en kandida Praslin ki kapab pran sa pozisyon.  Me selman sa ki mon’n dir la i en pozisyon dan limedya pou nou kapab rezourd en pti pe problenm.  Me apre nou pou anvizaze revwar resours imen kot i konsern Praslin.

E an term livestock i vre ki livestock prodiksyon zannimo in tonm en pe Praslin.  Pou diferan rezon.  I annan par egzanp rezon avek akse avek marse e lezot ankor.

Me parey Mahe, nou pe ankouraz bann fermye livestock.  I annan ki deza pe fer, i annan ki pe fer ase byen.  Nou pe sey ankouraz bann fermye livestock pou zot re pran avek bann konsesyon ki nou deza annan ki’n deza egziste.  Nou pe sey ankouraz zot pou zot repran e nou vwar ki marse li menm i pe pick up en pti pe e nou annan bann partner ki ed nou.  Par egzanp STC ki pe pran, malgre pa en kantite me selman i pe pran lavyann avek fermye.

So avek tou sa bann keksoz nou pe sey met ansanm, pe sey revwar ki mannyer nou kapab fer Sekter livestock pick up lo Praslin.

I enportan akoz Pralin li menm i en pti pe izole lo son kote e si i ariv okenn keksoz, pou sekirite alimanter Praslin i enportan ki zot osi zot kapab prodwi zot prop zannimo pou kapab konsonmen.

Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.

Mr Speaker, eski Minis i kapab dir ek sa Lasanble si i annan en resers serye ki’n ganny fer lo Praslin pou konn vre lakoz ki lagrikiltir in desann lo zil e si osi Minis sot in rankontre bann fermye lo Praslin pou ganny en pti pe zot pwennvi pou zot partisipe dan nouvo plan pou kapab lev lagrikiltir lo Praslin.

Mersi Mr Speaker.

 

MINISTER WALLACE COSGROW

Mersi Mr Speaker.

Mr Speaker, an term resers, napa okenn resers ki’n ganny fer.  Me selman nou koze ek fermye Praslin.  Mwan souvandfwa mon’n vizit Praslin, mon’n koz ek detrwa fermye Praslin, lezot zofisye osi.  CEO Lazans.  PS nou vizit Praslin, nou koz ek fermye Praslin e i annan diferan rezon.  Diferan rezon akoz petet lagrikiltir in tonbe Praslin.  Enn bann rezon prensipal ki mwan mon krwar e ki nou krwar dan Minister se ki bokou bann dimoun ki ti plante avan.  Bann dimoun ki ti lo bann blok Praslin zot nepli plante.  E petet zot bann dimoun ki’n swiv zot, zot bann fanmir ki’n swiv zot apre pan neseserman pran lagrikiltir koman en metye.

So sa i enn benn rezon e i osi annan serten rezon, par egzanp petet nou lo kote Gouvernman nou pa’n kapab donn sa soutyen, an term par egzanp annan bann inputs available pou zot kapab servi.  Petet i annan serten issue avek later.  Me selman tousala nou pe revwar, nou pe sey revwar ki mannyer nou kapab amelyore pou ki fermye Praslin i tourn dan prodiksyon.

Akoz mwan mon rapel en bann letan pase, mon ti ankor bokou pli pti.  Ler paran i tournen sorti Praslin i desann avek bann gro, gro tant legim.  So nou anvi ki Praslin i retourn ankor parey i ti ete avan.  E nou pe sey tou nou mye pou Praslin kapab tourn parey i ti ete avan.

Mersi Mr Speaker

 

MR SPEAKER

Onorab De Commarmond.

 

HON CHARLES DECOMMARMOND

Mersi Mr Speaker.

Mr Speaker, eski Minis i kapab eksplik nou Lasanble, ki mannyer son Minister pe fer pou redwir kou depans, savedir over head coat pou bann fermye dan lagrikiltir lo Praslin avek bi fer desann pri zot prodwi pou konsonmater kapab ganny en pli bon deal e an menm tan eski fermye lo Praslin pou kapab osi aste zot later lagrikiltir parey serten lo Mahe e apre kapab re vann avek etranze.

Mersi.

 

MINISTER WALLACE COSGROE

Mersi Mr Speaker.

Mersi Onorab.  Onorab mon a komans reponn sa kestyon par dir ki deza later lagrikiltir lo Mahe, Praslin ek La Digue i ganny least si mon met li koumsa a en to tre emosyonnel pou fer sir ki depans overhead sa fermye i pa monte.  Sa i lo Mahe, Praslin e La Digue.  Partou ki annan later lagrikiltir.

Nou sey nou mye pou anmenn bann prodwi kot bann fermye a en pri tre abordab.  Nou’n agrandi nou store pou nou kapab stok plis, pou nou kapab transport plis.  Pou ki sa bann prodwi i kapab vin pli abordab pou fermye lo Praslin.

Nou donn osi bann servis ekstansyon malgre i annan serten difikilte, me nou donn osi servi ekstansyon pou ki fermye pa bezwen deplase al fer bann gran, gran depans zis pou zot kapab al solve serten problenm.  Nou donn serten servis lo sa kote.

An sa ki konsern aste later lagrikiltir, Polisi Gouvernman Onorab se ki later lagrikiltir pa ganny vann e i ganny lease a bann fermye ki swa Praslin, ki swa Mahe e ki swa lo La Digue e i Polisi Gouvernman pou lease later lagrikiltir e non pa vann.

Mersi bokou.

 

MR SPEAKER

Kestyon 39 Onorab Sultanne Jacqueline.

 

HON SULTANNE JACQUELINE

Mersi Mr Speaker.

Mr Speaker, eski Minis i kapab eksplik sa Lasanble, ki plan son Minister i annan pou boost up son resours imen dan bann Sekter kle parey extension officer e irrigation officer.

Mersi Mr Speaker.

 

MINISTER WALLACE COSGROW

Mersi Mr Speaker. Mersi Onorab.

Mr Speaker, swivan en revi fonksyonnel pou lagrikiltir ki ti ganny fer an 2014, ti annan serten rekomandasyon ki ti sorti for konsernan Sekter Lagrikiltir.  Avek led FAO Gouvernman ti fer sa revi pou reorganiz e restriktir Lazans Lagrikiltir pou ki son manda i pli kler e  nou ti revwar fonksyon e striktir sa Lazans.

Lazans Lagrikiltir i merit konsantre lo lenplimantasyon Polisi, laplikasyon e ranforsman Lalwa.  Resers, amelyor bio security.  Ranforsman kapasite resours imen, kontribye dan_____e teknik dirab pou en devlopman dirab dan Sekter Agrikol dan pei.

Pou realiz son manda, Lazans Lagrikiltir pou ganny restriktire an 3 nouvo divizyon.  Bio Security Division, Crop Research and Livestock Division, Livestock Research and Development and Veterinary Services Division and Seksyon Ladministrasyon, Finans e Resours Imen.

Pou parti sa legzersis i osi annan mezir pou re deplwayman bann staff dan bann Seksyon kot zot abilite i pli adapte e an plis fer plis formasyon pou nou staff e sa i enkli bann zofisye ekstansyon e irigasyon.

An gro, lobzektif sa remaniman se pou anmenn en servis pli pwent a lobzektif devlopman Sekter Agrikol e asir plis lefikasite dan sa servis.

Mersi Mr Speaker.

 

MR SPEAKER

Okenn siplemanter Onorab Jaqueline.

 

HON SULTANNE JACQUELINE

Mersi Mr Speaker.

Mr Speaker, etan donnen ki serten pti fermye pe trouv zot avek bokou defi an se moman pou reste prodiktiv e soutenab.  Eski Minis i kapab dir dan limedya eski i pe konsider met plis resours imen pou asire ki i annan swivi avek bann later ki’n ganny donnen avek bann dimoun pou devlopman e prodiktivite lagrikiltir pou ranforsi sa Polisi ki reprodiksyon prodiktivite lagrikiltir i ganny fer dan sa dele letan ki ganny spesifye par Polisi.

Mersi Mr Speaker.

 

MINISTER WALLACE COSGROW

Mersi Mr Speaker.

Mersi Onorab.  Onorab wi, nou pe gete dan limedya pou nou kapab met en pe plis, sirtou zofisye ekstansyon pou kapab asiste plis.  Zofisye ekstansyon e resers pou kapab asiste plis bann fermye lo teren.

So i dan plan Lazans pou kapab anmenn sa pli bon servis anver bann fermye.  So i dan nou plan e nou annan Bidze e post pou anploy detrwa extension officer’s ankor.

Mersi bokou.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.

Mr Speaker, eski Minis i kapab dir ek nou Lasanble si bann extension officer pe zwen en rol proaktiv pou ankouraz otan fermye posib pou pran en lasirans lo zot laferm an vi ki zot in ganny afekte en kantite avek flooding.  E an menm tan ki rol ankor bann extension avek bann irrigation officer pou asire ki problenm delo, problenm irigasyon i pa ganny koze par serten dimoun.  Par egzanp bann ki dan leo, i afekte bann ki par anba akoz zot fer bann sistenm dominer avek sistenm delo e bann ki par anba i soufer.  Parey Anse Boileau, Hermitage pe arive an se moman.

Mersi.

 

MINISTER WALLACE COSGROW.

Mersi Mr Speaker.

Mersi Onorab.  Onorab i rol extension officers avek irrigation officers pou zot kapab advice sa bann fermye lo pli bon fason ki an aryer pou maintain zot laferm dan en fason ki zot avoid flooding.  E bann extension officers avek irrigation officers mon konnen dan bokou ka zot sey zot mye, me par ler serten difikilte teren, landrwa mannyer i ete, i annan landrwa ki difisil pou avoid serten lokazyon flooding.

E si i annan sityasyon kot i annan serten fermye ki pa pe korpere e ki pe petet parey ou pe dir fer bay avek sistenm irigasyon ki annan, then met a latansyon nou Minister ouswa Lazans e nou, nou ava get dan sa bann sityasyon, nou ava deal avek.

Mersi bokou.

 

MR SPEAKER

Onorab Volcere.

 

HON MARC VOLCER

Mersi Mr Speaker.

Mr Speaker, avek sanzman klima ki lemonn e Sesel pe fer fas avek.  Eski Minis i kapab dir nou si nou pou annan bann zofisye kalifye ki ganny training en pe dan sa domenn pou kapab advice nou bann fermye korekteman lo bann desizyon.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Mr Speaker, pou dir ki nou bann zofisye i vreman kalifye, mon pa pou kapab dir nou zofisye i vreman kalifye pou sa.  Me selman sa ki mon konnen, poudir nou bann zofisye i ganny training.  Sa ki nou apel on the job training dan diferan domenn.

So zot annan serten nosyon dan sa bann keksoz.  Zot annan serten nosyon par egzanp an term sanzman klima, bann diferan keksoz ki arive an rezilta sanzman klima e ki mannyer lo nivo lagrikiltir zot devret pe deal ek sa bann keksoz.

So zot annan serten training. Me petet i demann plis ankor.  Akoz de pli anpli nou pe vwar poudir lagrikiltir as usual nepli marse.  So pou bezwen bann nouvo fason fer, nouvo fason eksplike pou nou kapab pratik lagrikiltir isi Sesel.  Souvandfwa nou vwar bann letan kot lapli pa sipoze tonbe, me i pe tonbe.  Bann nivo delo ki pe monte, salinite, tousala.  So nou bann zofisye i annan serten bagaz, me selman i demande ankor plis bagaz pou zot kapab ed nou bann fermye.

Mersi.

 

MR SPEAKER

Bon kestyon 40, Onorab Andre Pool.

 

HON ANDRE POOL

Mersi Mr Speaker.

Mr Speaker, mon kestyon se pou demann Minis responsab pour Lapes si i kapab eksplik nou Lasanble, kwa ki pe ganny fer pou siport plis nou Sekter Lapes isi Sesel.

 

MINISTER WALLACE COSGROW

Mersi Mr Speaker.

Mersi Onorab.  Mr Speaker, nou lapes côtier in preski satire pou serten lapes e nou bezwen fer sir ki sa i en lapes ki reste soutenab e nou toultan kapab annan nou bann pwason koray e kazye ki tradisyonnelman nou bann Seselwa i kontan manze.  Enkli nou bann lezot pwason parey Bourzwa, Vyey eksetera.

Nou annan ankor en gran potansyel pou devlope, agrandir nou lapes Ton domestik e pou sa nou kontinyen ankouraz e fasilit devlopman ek lenvestisman lapes Ton par nou bann Seselwa.  Pou fer ki zot prodwi i ganny pli bon pri lo marse e osi kree plis lanplwa an relasyon ek lapes, nou pe met an dispozisyon bann biznes lokal, processing plant kot zot a kapab fer bann prodwi valer azoute pou vann lokalman e osi pou eksportasyon kot zot kapab.

Sa i enkli devlopman bann processing plant Providance in ganny atribye ek bann endividi ek biznes lokal ki’n komans fer zot bann enstalasyon pou zot komans vin operasyonnel byento.  Nou pe osi konstrir bann processing plant Bel Ombre pou desantraliz en pe sa bann aktivite.

Bann lezot proze lenfrastriktir ki nou’n fer e pe kontinyen fer pou siport Sekter Lapes i bann Bazar dan bann distrik.  Nou’n ogmant kapasite ice plant Providance, Port Artizanal anvil e Praslin e byento travay a konplete lo sa ice plant adisyonnel Bel Ombre.

Nou’n fer bann lezot lenfrastriktir pou fasilit debarkasyon pwason e store pou bann peser stok zot bann zouti lapes dan bann distrik parey Cascade, Anse Aux Pins e en nouvo Bazar Anse Royal.

Nou annan plan devlopman pou en nouvo Bazar La Digue e osi fasilite ice.  E osi pou amelyor bann fasilite lo Praslin kot bann peser i anbark zot ice e debark zot pwason.

Nou osi pe met an mars en mekanizm pou donn peser en pli bon akse ek bann pti lekipman lapes ki zot bezwen.

Lo kote endistriyel nou pe fasilit devlopman lo Ile Du Port kot pou annan aktivite lie ek lapes Ton.  Kot bann Seselwa in envestir dan bann aktivite pou siport bann bato lapes Ton endistriyel par anmenn bann servis pli pre ek landrwa kot sa Lendistri i baze.

Lenvestisman dan bann processing plant endistriyel kot ankor i annan lenvestiser Seselwa, an partenarya Gouvernman ek Sekter Prive dan bann model PPP. En lasose 425 met longer pe fini konstrir e en nouvo lasose i deza an operasyonnel pou retir en pe konsesyon lo lasose endistriyel e por komersyal.

En group lenvestiser ki pe osi konstrir en cold store pou Ton lo Ile Du Port pou met a laporte nou bann peser artizanal ek semi endistriyel ice avek zot lenstalasyon pou ede deservi sa bann peser e tir en pe presyon lo nou demann ice.

Tou sa bann devlopman ki mon’n mansyonnen pou osi ede kree plis lanplwa e fer bann prodwi a baz Ton vin pli aksesib lo nou marse lokal.  Me nou bezwen pran kont ki tou devlopman ki nou fer nou bezwen mazin soustenabilite pou ki nou kapab kontinyen zwir bann resours lapes a lavenir.

Mersi Mr Speaker.

 

MR SPEAKER

Onorab Pool.

 

HON ANDRE POOL

Mersi Mr Speaker.

Mr Speaker, eski Minis i kapab enform nou Lasanble, sa progranm desantralizasyon ki in eksplike an se ki konsern bann sipor lozistik pou bann peser.  Eski i osi pe pans etablir en progranm sibvansyon pou kapab permet ki pri sa bann materyo debaz, mon kapab dir pou bann peser i vin pli abordab pou zot kapab aste.

E dezyenmman eski Mini si kapab eksplik nou ki relasyon travay Lendistri Lapes, son Minister i annan avek bann akter dan Lendistri lapes.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab deza Gouvernman i annan en progranm sibvansyon pou tou bann lekipman lapes ki bann peser i servi.  E sa ti komanse depi 2004 anba Agriculture and Fisheries Incentive, Act.  Ti annan tout en levantay sibvansyon ki enkli depi bennzin, rediksyon tax lo bann capital equipment ki zot servi e lezot ankor.  So i deza annan en progranm sibvansyon pou bann zouti lapes ki peser i servi.

An term relasyon avek bann biznes dan Sekter Lapes, Minister e osi atraver SFA nou annan en bon relasyon avek bann biznes dan Sekter Lapes.  SFA i annan en bon relasyon avek par egzanp sirtou bann Lasosyasyon Peser.  La mon kapab nonm par egzanp Fishing Boat Owners Association ki zot osi pa form par lo Board SFA e i annan bann diferan keksoz ki SFA i fer pou siport sa Lasosyasyon e bann lezot Lasosyasyon peser an zeneral.

So an gro SFA e Minister i annan en bon lantant ek mazorite bann biznes ki operate dan Sekter Lapes isi Sesel.

Mersi.

 

MR SPEAKER

Onorab Maria-Payet.

 

HON MARIA PAYET-MARIE

Mersi Mr Speaker.

Mr Speaker, mon ti a kontan demann Minis, in koz lo amelyor bann fasilite pou bann peser.  Ki plan son Minister pou amelyor fasilite oubyen lenfrastriktir pou bann peser Anse Etoile e osi pou ankouraz plis zenn pou pran en karyer dan Sekter Lapes e osi mon ti a kontan demann Minis responsab ki son Minister pe fer, Minis responsab pou Lapes.  Pou siport e ankouraz plis Lasosyasyon Peser pou formen dan bann distrik ki pa annakor deza formen.

Mersi Mr Speaker.

 

MINISTER WALLACE COSGROW

Ok, mersi Mr Speaker.

Mr Speaker, Anse Etoile i annan 2 kominote peser.  I annan en ki Anse Etoile menm avek enn ki baze en pe dan kontour obor Old People’s Home.  E mon’n vizit tou lede kominote peser.  Resaman mon’n vizit tou lede.  Mon’n ganny dyalog avek zot.  Sa bann ki La Retrait laba, zot annan en pe konsern konsernan bann lenfrastriktir, ki mannyer zot debark zot pwason, ki mannyer zot aprovizyonn zot bato.  E nou pe fer serten letid ansanm avek MLUH, akoz mon konnen poudir Gouvernman i annan en pli gran plan devlopman pou sa rezyon.  Me nou pe fer serten letid dan limedya pou gete ki mannyer nou kapab amelyor zot lavi dan sa rezyon la.

Nou pe plan pou nou re fouy la pas ki ti la, me selman ki’n bloke avek letan.  Nou pe rod en fason ki mannyer nou kapab build en pti landrwa kot zot kapab anbark zot bann aprovizyonnman e osi debark zot pwason.  Souvandfwa zot vin tar dan lannwit parey zot in eksplik mwan.  E petet en landrwa kot zot kapab store zot bann lekipman.

An se ki konsern peser Anse Etoile, Anse Etoile li menm kot Bazar, nou annan bann fasilite e nou ti fer meeting resaman zot e nou ti fer sorti serten issues ki nou’n pran an kont e pou nou amelyore.  Par egzanp sirtou bann fasilite ki nou’n deza mete me selman ki pa pe byen ganny maintain.  Nou pe rod en fason ki mannyer nou kapab re aranz sa bann fasilite e kit li dan en pli bon leta.

E sa bann proze osi ki MLUH pe fer avek nouvo semen ki pou konekte Nor avek larestan Mahe i annan serten dredging ki pe ganny fer e laba osi MLUH pou met available bann bout later pou ki peser i kapab ganny en pli bon fasilite, pli gran fasilite.

So, all in one, peser Anse Etoile, La Retraite nou annan detrwa keksoz dan plan pou zot sa lannen e lannen prosen osi.

E an se ki konsern ankouraz bann zenn.  Minister avek SFA e menm osi Lekol Maritim in train en kantite bann zenn pou antre dan Sekter Lapes.  Me petet mannyer Sekter i ete ki nou pa pe vwar ase zenn ki antre dan sa Sekter.  Petet i bezwen annan plis incentive pou zenn kapab antre dan sa Sekter e la mon pe enplor petet bann biznesmenn, bann dimoun ki dan sa Sekter pou zot met a loportinite bann zenn pou vwar sa Sekter en pti pe pli atraktan e pou zot kapab antre ladan.

Osi an se ki konsern Lasosyasyon peser, ki mannyer nou ed bann Lasosyasyon peser.  SFA dan son Bidze Linyon Eropeen anyel i annan lasistans ki i donn bann Lasosyasyon ki deza pe donn bann Lasosyasyon par egzanp FDOA, Peser Bel Ombre e lezot Lasosyasyon osi ankor ki pe ganny asiste avek serten lasistans avek SFA,

So nou asiste bann Lasosyasyon, ki swa finansyel ou teknik.

Mersi.

 

MR SPEAKER

Onorab Souris

 

HON MIRENA SOURIS

Mersi Mr Speaker.

Mr Speaker, baze lo repons e anvi gran demann pou konsonm plis protein dan la baz pwason e par nou popilasyon e demann ki Sekter Tourizm i pe demann, eski Mini si kapab eksplik sa Lasanble ki plan son Minister i annan pou soutenir sa demann a lavenir e an term desantralizasyon ki Minister in fek mansyonnen, eski Minis i kapab eksplik sa Lasanble ki plan i annan pou bann peser Beau Vallon.

Mersi.

 

MINISTER WALLACE COSGROW

Mersi Mr Speaker.

Mersi Onorab.  Onorab an se ki konsern pwason, promosyon pwason koman en bon sours protein.  Minister, SFA nou touzour promot pwason, konsonmasyon pwason e me selman i pou depan lo piblik, i pou depan lo affordability pwason pou kapab fer ki sa i vin an realite. Me selman nou ankouraze, nou rod tou sort fason pou nou kapab fer ki pri pwason i reste abordab pou ki Seselwa i konsonm plis pwason.  Akoz nou konnen parey ou’n dir, pwason in ganny prouve koman i pli bon pou nou lasante.

So, nou fer tou bann demars, nou sey met tou bann keksoz an plas, me i pou depan lo piblik pou zot fer zot swa.

An se ki konsern peser Beau Vallon, nou ti annan dan plan pou peser Beau Vallon en slipway lo lans Mar Anglaise.  Slipway i ankor dan plan, me selman nou pe re get posibilite, petet si napa en lot landrwa pou reallocate li akoz sa bout lans kot i ete e petet sa oter ki i pou bezwen monte pou li ariv isi kot semen.

So ansanm avek distrik nou pe gete si nou kapab revwar en lot lokasyon.  Akoz apre ki sa lans ti degrade en pe letan pase nou vwar ki son gradient pou sa slipway sorti dan lanmer pou li mont anler ziska lo semen i riske vin en pti pe enkonvenyan pou bann dimoun ki pe servi lans pou vin lot kote.  Sirtou bann letan kot lans i erode e bokou disab i ale.  Nivo lans avek semen i o.

So, nou annan plan pou peser Beau Vallon.  Me selman nou pou bezwen revwar en pti pe sa lokasyon, si i the best lokasyon pou peser.

Mersi.

 

MR SPEAKER

Onorab Bristol.

 

HON ALDERIC BRISTOL

Mersi Mr Speaker.

Mr Speaker, mon ti anvi demann Minis avek sipor pou Sekter lapes artizanal, eski i annan okenn demars ki pe ganny fer avek Lendistri Touris pou ankouraz z ot pou aste pwason fer avek nou bann pti peser artizanal dan distrik e an relasyon avek sipor ki egziste anba Minister.  Eski bann peser pe byen servi sa bann sipor pou non selman zot benefis, me osi fer sir ki bann benefis pe re tonm lo konsonmater osi.

Mersi Mr Speaker.

 

MINISTER WALLACE COSGROW

Mersi Mr Speaker.

Mersi Onorab.  Onorab an se ki konsern kolaborasyon avek Sekter Touris pour ki bann Lotel, bann Lenstitisyon Touristik i aste plis pwason lokal.  Mon krwar an se moman plis ki zanmen mazorite nou bann peser konmela pe vann zot prodwi avek bann Lotel.

Mon adonn en legzanp, par egzanp nou annan bann lakonpannyen parey ISPC konmela aki pe aste bokou, bokou bann pwason avek peser ki pe transform li dan bann diferan fason e vann pwason dan diferan fason avek bann Lotel, bann restoran e statistik eksport osi pa endik nou ki mazorite nou bann pwason pe ganny eksporte.  Mazorite nou bann pwason pe ganny konsonmen lokalman dan bann Lotel, dan bann lakour.

So, mon krwar plis ki zanmen nou bann pwason ki pe ganny lapes, nou bann peser pe ganny bokou biznes avek bann Lotel, avek bann resortan ek bann lezot Letablisman Touristik.

So, mon krwar i annan loportinite biznes pou ban peser dan sa domenn e osi Onorab nou annan nou bann processing plant ki nou pe met a dispozisyon.  Nou annan Providanse, nou annan Bel Ombre ki pe konstrir e sa in ganny konstrir pou sa purpose.  Pou bann dimoun kapab met valer azoute avek bann pwason, bann prodwi lanmer e ki bann Lotel ava kapab aste.  Ouswa bann Restoran.  Akoz bann keksoz in fini ganny prepare, bokou pli fasil pou zot kapab aste.

So, i annan bokou loportinite dan sa domenn la.  Onorab, sorry, si ou kapab repet ou dezyenm bout kestyon, in sap mwan.

 

HON ALDERIC BRISTOL

Wi Mr Speaker, mon pe demann li an relasyon ek bann sipor ki egziste konmela atraver ou Minister, si bann peser zot pe byen servi sa bann sipor dan en bon fason ki non selman pou anmenn benefis pou zot, me osi i a fer retonbe benefis bann konsonmater osi.

Mersi.

 

MINISTER WALLACE COSGROW

Ok, mersi Onorab.  Zisteman nou donn bokou sipor, nou donn sipor an term bann konsesyon.  Par egzanp bennzin, par egzanp lo bann capital equipment ki zot anmenn dan pei, lo ice, Bazar, diferan sipor.  Par egzanp loan konsesyonnel pou enport bato ek bann lezot lekipman.

So dan bokou lenstans bann peser i servi li byen.  Dan bokou lenstans bann peser i servi sa bann loan, sa bann keksoz konsesyon ki nou met an plas.  Me par egzanp bann fasilite enn ler ki nou met an plas, parey Bazar, souvandfwa nou vwar ki swa sa pti larzan ki nou demande pou peye koman en kontribisyon pou kapab maintain Bazar, souvandfwa se community development ki pe maintain bann Bazar, i pa ganny peye.

Ouswa bann gear store ki nou fer i pa ganny servi lo nivo parey nou ti a kontan i ganny servi.

So, mon ti a kontan enplor avek bann peser ozordi la, bann dimoun ki servi sa bann fasilite ki nou mete pou zot servi li byen, deservi li byen akoz i koute e i enportan ki zot make good use of it akoz otherwise i pou difisil pou nou zistifye dan le fitir pou nou kapab met sa bann lenfrastriktir.

Me selman mon sipoze ki avek tou sa bann lenfrastriktir ki nou mete, tou sa bann keksoz ki nou donnen peser i sipoze kapab.  Nou konnen i pa en louvraz fasil, nou konnen lanmer i souvandfwa i pa fasil pou al lapes.  I pa fasil pou anmenn sa pwason an term, me nou hope ki avek tou sa bann konsesyon, sa bann lenfrastriktir ki nou mete i kapab anmenn en pri pli abordab pou nou bann konsonmater pwason isi Sesel.

Mersi.

 

MR SPEAKER

Bon avek sa nou’n ariv a lafen Question Time.  Mon ti a remersye e eskiz Minis parmi nou.  E nou, nou ava kontinyen avek nou travay.  Nou annan nou 2 First Reading. Mon ti ava ganny sa silvouple.

 

DEPUTY CLERK

This Act maybe cited as the Children (Amendment) Act, 2016.

This Act maybe cited as Elections (Amendment) Act, 2016.

 

MR SPEAKER

Ok.  Nou osi annan 3 Mosyon e sa i swiv lapwentman 2 Anbasader par Prezidan.  E parey Konstitisyon i demande, Lartik 64(1), fodre ki sa lapwentman i ganny aprouve par Lasanble Nasyonal.

E nou ava komans avek premye Mosyon e sa se demann par Prezidan, pou Lasanble Nasyonal aprouv Manmzel Marie-Antoinette Rose koman en Anbasader.  E Mosyon pe ganny prezante par Onorab De Commarmond.

 

HON CHARLES DE COMMARMOND

Mersi Mr Speaker.

Mr Speaker, parey Mosyon i lir:-‘That this Assembly resolves to approve the appointment by the President, of Ms Marie-Antoinette Rose as Ambassador.’

Mr Speaker, Ms Rose pa bezwen okenn lentrodiksyon.  Ms Rose in la dan sa Lasanble avek nou koman Leader Zafer Gouvernman e nou tou nou’n vwar son parkour dan nou pei, son travay ki in fer.  E nou vwar poudir i en zenn madanm dinamik, disiplinen e pli determinen ki zanmen.  Nou vwar poudir Ms Rose i annan en bann kapasite avek li ki nou konnen ki i pou fer tre byen dan sa nouvo responsabilite e dan sa nouvo rol.  Son parkour lavi in fer li vin en madanm ki’n travay en kantite, sirtou dan domenn politik isi dan nou pei.  Son rezilta son travay i pe anmenn li lo en lot nivo kot ozordi dan lemonn aktyel, diplomasi Parlmanter pe pran en lot lanpler.  E son parkour dan Lasanble, i pou ed li en en fason byen, pou kapab desarz sa tel responsabilite pour nou pei.

Il faut dire aussi ki nou swete ki i swiv dan legzanp, dan lepa Anbasader Marie-Pierre Lloyd, ki tou dernyen-man nou’n tande en lot madanm Anbasader ki’n fer tre, tre byen e ki’n vin en legzanp.  In ganny prezante en pri lo nivo laba Langleter.  Be nou swete ki Ms Rose i a osi swiv dan sa lepa e fer nou Lasanble e nou pei fyer.

Nou konvenki Mr Speaker, ki kot i pou ale, kot i pou ganny poste, Ms Rose i pou fer ki diplomasi e Sesel i benefisye atraver sa pei kot i ava ete, sa rezyon kot i ava ete.  Nou demande osi ki ozordi letan nou pe gete, nou bann Anbasader deor, pa tou ki pe donn nou sa feedback ki zot pe fer.  Nou swete alor ki Ms Rose, vi ki li i konpran sa eleman kot i enform nou ki pe arive, transparans.  Pou annan plis transparans, i ava ed nou pou kapab dir ek nou pei kwa, ek nou Gouvernman, kwa ki pe ganny fer kot i ete laba.  I en lot defi ek nou bann Lanbasad.  Souvandfwa bokou Seselwa i pa konnen menm kote tel Lanbasad i ete.  Ki ladres.  Ki sa tel Lanbasad i kapab fer pour son sitwayen.  Sa osi mon ti ava swete ki Ms Rose i vin en legzanp, i gid nou li.  I dir nou lala, Lanbasad kot i pou ete i tel landrwa e ki nou konnen e vwala ki kapab ganny fer pour ki si en Seselwa, en sitwayen i ganny stranded, oubyen menm i anvi zis vwar son Lanbasad kot i ete, ki konmsi i annan sa relasyon.  I pa zis konmsi en kestyon Lanbasad prezan in ganny fer tel landrwa, prezan ou a krwar en louvraz ki tou dimoun pa konnen ki pe pase.

I annan en lot laspe avek nou bann Lanbasad ozordi, ki mon swete Ms Rose i a take note e ki i ava kapab anmenn sa relasyon lo en lot nivo.  Se bann benefis, benefis ki en Lanbasad i kapab tire dan sa pei ou sa rezyon kot i ete, pou kapab anmenn plis prosperite pour nou pei.

En legzanp.  Par egzanp letan ou get sa gro Kontinan Afriken, be en ta larises, nou demann nou lekor kestyon.  La nou’n antre dan COMESA, nou demann nou lekor kestyon.  Nou bann Lanbasad ki dan diferan rezyon Lafrik, nou pa pe ganny ase konmsi lenformasyon, pou konnen kwa, par egzanp napa en ……….. avek zot.  Petet pou konnen kwa ki nou kapab tire de potansyel, de larises, pou kapab anmenn plis benefis pour nou pei.  Menm zafer avek lezot rezyon dan lemonn.  Nou’n koz taler lo lapes dan Linyon Eropeen laba, kwa ki nou dimoun isi i kapab benefisye avek sa ki pe pase, sa ki pe ganny fer atraver nou Lanbasad laba dan Lerop.  So, i sa sinerzi ki nou krwar Ms Rose i bezwen osi pe met devan li letan i pe al pran sa responsabilite nouvo.

Nou swet li tou de bon.  Nou swet li sikse.  Nou dir li reste an kontak.  Reste an kominike.  Reste an koneksyon avek nou pep, avek nou Gouvernman, avek nou Lasanble akoz nou Lasanble i bezwen vwar laba, kwa ki i kapab fer pou kapab ede pou enhance nou Lasanble, pou kapab ed nou dan devlopman, dan lagrandisman, dan latransparans e dan tou bann keksoz ki bon pour nou Lasanble e nou demokrasi isi dan Sesel.

Mr Speaker, pou fini, nou, nou konnen nou annan konfyans ki Ms Rose kot i pou ale i pou fer byen e nou swet li alor tou de bon, bonn sans e nou dir li reste an kontak avek nou.

Mersi bokou Mr Speaker.

 

MR SPEAKER

Bon, okenn ki segonde?

Wi, Onorab Charles.  Ou ti oule entervenir?

 

HON GEOVANA CHARLES

Seconded.

Yes Mr Speaker.

Mersi Mr Speaker.

Bonzour Mr Speaker, tou Manm Onorab e tou dimoun a lekout.

Mr Speaker, ozordi moman apropriye pou nou remersi e felisit enn nou koleg pour son travay tre enportan ki in fer dan nou Lasanble e dan Parti Lepep.  In okip en pozisyon tre enportan dan nou Lasanble, en pozisyon ki pa fasil pou dirize me in en dimoun pasyonnen avek 2 keksoz.  Son Parti e son pei.  In annan en pasyon pou devlop nou Lasanble, kot in travay bokou pou anmenn bann sanzman enportan.

Ne an Zen 1975 Sesel, Ms Rose in annan en Degre dan Letid Kominikasyon.  Ms Rose ti zwenn Sekretarya SPPF an 2011 koman Kordinater Kominikasyon e pli-tar i ti ganny promote pou vin Editer an Sef The People Newspaper, ziska 2009 ler i ti ganny apwente koman CEO Parti Lepep, menm lannen ki i ti osi ganny elekte lo Komite Santral.

Ms Rose ti zwenn Lasanble Nasyonal an 2006 koman en Manm Proporsyonnel e an Mars 2012, i ti ganny apwente koman Leader Biznes Gouvernman dan Lasanble Nasyonal.  Dan son karyer Lezislatif, Ms Rose in enkli son partisipasyon dan plizyer Komite tel ki CPA koman en Manm Egzekitif, Komite Medya, lo Komite Lasirans Gouvernman, Komite Madanm Parlmanter, Komite Reform e Modernizasyon.  Ms Rose in osi partisip dan bokou Konferans e Workshop enternasyonal e diriz plizyer delegasyon ofisyel.

Mr Speaker, Ms Rose, en zenn fanm, in dedye son karyer anver devlopman e modernizasyon politik e politik Parti Lepep.  En fanm ki’n travay pou donn lepep bon lenformasyon.  En fanm ki’n travay dir pour benefis son Parti e pli enportan ankor, en zenn fanm ki’n dedye son lavi ver epanouisman nou pep, atraver son dedikasyon dan travay politik nou pei.

Mr Speaker, mon santi mwan fyer ki ozordi mon kapab felisit Ms Rose pou travay ki in fer e anmenn nou Lasanble e Parti mazoriter kot i ete ozordi.

Mr Speaker, in la kan batay politik dan lepok kot politik ti ganny zize e mezire.  Sa ti dan sa lepok kot fas a nou isi dan sa Lasanble, ti annan en group dimoun ki zot bi sete pou denigre bann Manm Parlman mazoriter e nou Lenstitisyon, pou anpes nou fer nou travay politik nou pei.

Mr Speaker, mon krwar bann ki ti la pou ankor mazinen ler ki reform ekonomik ti’n so e ti’n difisil pou nou bann Manm Parlman Parti Lepep.  Ms Rose in la dan sa lepok difisil.  In debrouye, in tenir, in tenir for.

Mr Speaker, son determinasyon ek son travay dir in ganny rekonpanse.  Ler i ti ganny apwente Leader Zafer Gouvernman, apre Madanm Potter.  Depi Ms Rose in pran labar, in diriz nou sa group mazoriter dan Lasanble.  Mon anvi dir li mersi.  Mersi pou diriz nou, mersi pou tenir lespri Parti Lepep.  Ms Rose in konn fer politik e ozordi pei i bezwen li.  En lot fanm pou kontiny sa menm batay fanm avek menm viger e menm lespri, me safwasi, lo lasenn enternasyonal.  Ms Rose pe al koz pour Sesel.  I pe ogmant poursantaz fanm Sesel e fanm Lafrik dan pran desizyon ki osi konsern fanm e zanfan dan lemonn.  E parey nou tou nou konnen, ler Sesel i koze, lemonn i ekoute.  E la ler Ms Rose pou koze, lemonn pou ekoute.

Mr Speaker, anba sa dernyen travay nob.  En travay ki demann bokou konpetans e ekselans.  En travay ki demann disiplin e bokou devosyon.  En travay ki deplizanpli i demann bokou konprenezon.  An dot mo, en travay ki demann bokou.

Mr Speaker, rol en Anbasader se pou li defann son pei, defann son pep e an menm tan, politik son pei lo en nivo pli o, pli larz.  Se pou li fer tande lavwa nou pei lo nivo mondyal.  Se pou li reprezant nou pep, nou kiltir, nou laspirasyon.  Se pou li al negosye pli bon deal e retourn Sesel avek sa ki pli bon pour Sesel.  Mon napa okenn dout ki Ms Rose pou kapab reprezant nou aletranze e pou fer nou paviyon monte e mon swet li bonn sans e demann li pou reste konekte.  Reste konekte avek Lasanble e konekte avek lepep.

Pou terminen Mr Speaker, mon ti a kontan dir sa.  Ms Rose in demontre son kapasite pou dirize e la ozordi, mon ti a kontan siport son apwentman pour ki i kapab kontinyen annan sa lafors enportan, en lavwa solid dan bann Forum enternasyonal, ki enpakte lo desizyon e direksyon nou pei.  E an siny nou gratitid, mon ti a kontan ankor enn fwa dir li mersi e demann Lasanble pou aklanm li.

 

(Applause)


HON GEOVANA CHARLES

Mersi Mr Speaker.

 

MR SPEAKER

Bon, Onorab Pillay.

 

HON SEBASTIEN PILLAY

Mersi Mr Speaker.

Mr Speaker, mon’n konn Ms Rose isi la, i fer apepre 21an depi ki i ti Politeknik e li sa letan i ti trwazyenm lannen Politeknik e mwan mon ti fek antre dan dezyenm lannen.  Mon’n konn li koman en dimoun tre determinen toultan.  En dimoun ki annan bokou pasyon pour sa ki i fer e enkontronableman, in en dimoun ki’n toultan kontan son pei.  E mon krwar ler en dimoun, nou regard kriter pou apwent en dimoun Anbasader, enn bann keksoz pli enportan ki nou gete se ki mannyer sa dimoun i pare pou reprezant son pei.  E mon napa okenn dout ki Ms Rose i en dimoun ki pou toultan, a tou repriz defann son pei, me osi promouvwar tou sa ki pli byen ek son pei e mon krwar sa i en leson ki bokou nou i bezwen tire.

Ou konnen, parfwa nou pa regard latitid ki nou anmennen anver bann keksoz ki nou fer e si nou napa en latitid pozitiv anver sa ki nou fer, bokou fwa malgre nou annan bonn volonte, sa latitid i met sa bann keksoz ki nou oule fer deryer e nou pa kapab avans pli devan.  E sa ki mon apresye avek Ms Rose, in en dimoun ki’n toultan annan en latitid pozitiv anver sa ki i fer.  In en dimoun ki toultan pasyonnen pou li anmenn son lopinyon devan.  I pa’n zanmen per pou li dir sa ki i panse.  E mon krwar sa i en kalite enportan, ekstrememan enportan dan sa domenn ki i pe al ladan ozordi, kot dan en lemonn kot i annan bokou, bokou, bokou vas et viens, kot globalizasyon pe zwe en rol vreman primordyal, vreman enportan, nou bezwen bann dimoun ki annan sa kapasite pou zot koz lo sa ki zot krwar i byen, ki annan sa latitid neseser, sa latitid pozitiv pou zot kapab fer pase serten pwen, malgre bann pwen kontansye, me selman i bann pwen ki pou ed nou pei pou nou al pli devan.

Enn bann keksoz ki mon’n toultan osi apresye avek Ms Rose, se lefe ki i en dimoun ki annan en bon kote imen e ki nou’n toultan koman koleg nou’n toultan travay ansanm tre byen.  E mon krwar sa osi i bann leson ki mon krwar bann Lotorite, bann dimoun dan leadership in vwar serten kalite dan li, ki kapab permet li fer sa travay ki i pe al fer alaoter, ki sa travay i ganny demande pou fer.  E keksoz pli enportan ladan mon krwar, sa ki nou pe witness ozordi i devret en sours lenspirasyon pour tou zenn fiy.  Koman en paran mon annan 2 zanfan, mon annan 2 fiy, mon ti a kontan mon bann fiy i aspire demen pou zot hold higher office or aspire pou zot avans pli devan.  E mon krwar Ms Rose i en legzanp kot si ou mentenir en parkour kot ou regard de lavan, kot malgre ou annan lanbisyon me ou toultan met ou lanbisyon akote, osi annan en lespri poze, en lespri kot ou regard keksoz dan en fason analitik, kot ou pa zis sot lo konklizyon, ou kapab avans bokou pli devan.  E mon krwar sa i enportan akoz ozordi dan en lemonn ki vin pli globalize, nou bann zenn fiy, nou bann zanfan i ganny ekspoze avek bann eleman ki parfwa i pa permet zot avans pli devan akoz zot al tonm dan serten kalite konportman ki parfwa i anmenn plis negativite dan zot lavi, dan plas pozitivite.

E en lot keksoz enportan osi mon krwar ki mon oule soulinyen se ki ozordi, malgre ki nou annan en politik vreman polarize kot nou annan en politik vreman partizan Sesel, en keksoz ki antre nou, nou pa devret zanmen fer se nou pa devret zanmen denigre en lot dimoun.  E nou pa devret zanmen vwar negativite dan en keksoz ki kapab pozitiv.  E mon krwar sa ki mon’n aprann pandan letan ki mon’n dan Lasanble, pandan letan ki Ms Rose in Leader Zafer Gouvernman, in annan en gradual process kot nou’n aprann apresye diverzans lopinyon.  Malgre nou kapab annan en diverzans lopinyon me sa ki reste enkontronab se ki nou tou nou Seselwa e nou kontan nou pei e ler nou vwar enn nou frer e dan sa konteks ki la, enn nou ser avans devan, nou devret proud pou li, nou devret kontan pou li e nou devret donn li tou sa sipor neseser pou li kontinyen avans devan akoz sa i provide en sours lenspirasyon, parey mon’n dir, pour tou bann zenn ki pe grandi, pou vwar ki the sky is the limit, si ou aplik ou lekor dan en fason pozitiv, si ou aplik ou lekor dan en fason kot ou anvi vwar pei avans pli devan.

Mr Speaker mon pa pou long.  I reste mwan pou wish Ms Rose all the best dan son nouvo fonksyon.  Mon napa okenn dout ki i pou perform alaoter ki son fonksyon i demande e ki mon swete ki dan lefitir osi nou ava vwar ankor bann zenn ganny sans ganny propel lo bann nivo pli o e sa i ava montre sa progresyon, sa evolisyon dan leadership ki mon krwar bokou nou i kontan e bokou nou i oule vwar.

Mersi Mr Speaker.

 

MR SPEAKER

Onorab Souris.

 

HON MIRENA SOURIS

Mersi Mr Speaker.

Mr Speaker, koleg Manm Onorab, zabitan Beau Vallon, bonzour.

Mr Speaker, i pa zis en loner me en plezir pou mwan dir enn de mo lo nominasyon Manmzel Marie-Antoinette Rose koman Anbasader.

Koman en Manm Parlman ki’n ganny lasans travay anba son direksyon e koman en fanm, sa i fer mwan fyer.  E zabitan Beau Vallon atraver mwan, i profit sa lokazyon pou felisit Manmzel Rose pour sa gran lakonplisman.

Mr Speaker, Manmzel Roze ki mon dekrir li koman en fanm dinamik e en fanm de karakter kapab, ki non selman teknikman konpetan me pou desarz sa responsabilite, me osi kalifye pour sa pozisyon akoz si i annan en fanm ki’n travay ek lwayote pour son Parti, se pa lot ki li.

Mr Speaker, Manmzel Rose in enspir bokou fanm parey mwan e lezot fanm dan Sesel pou antre dan politik.  Bokou pou dakor ek mwan ki ler zot tann Manmzel Rose koze, sa i fer zot bouze kot zot ete.  An dot mo, zot bezwen ekout li.

Mr Speaker, Manmzel Rose koman en fanm, in prouv son lekor koman en vre leader.  Sa in demontre atraver son rol leadership diran sa senkyenm Lasanble.  Manmzel Rose pandan son karyer politik, in anmenn li pou partisip dan plizyer Misyon aletranze, pou reprezant son pei.  In osi aktiv dan preparasyon plizyer fanm ek zonm politisyen pou partisip dan Eleksyon Parlmanter.  In demontre ki i en vre patriyot.  Manmzel Rose in osi annan en vast training dan Kominikasyon, ki en laspe enportan dan sa rol ki i pe al pran.  Sa bann training in anmenn li dan plizyer pei, kot in ganny bokou leksperyans.

Mr Speaker, parey mon’n dekrir li koman sa fanm de karakter e avek tou sa bann kalite e son personnalite ki i posede, mon napa okenn dout ki Manmzel Rose pou fer en bon travay pou promouvwar diplomasi aktiv pour nou pei e osi lo nivo politik akoz nou pei pe kontinyen devlope e nou sistenm demokrasi politikman pe evolye e nou bezwen reste azour.

Mr Speaker, o non zabitan Beau Vallon, nou swet li bokou sikse.  Antretan, zabitan Beau Vallon i zwenn avek mwan pou remersi Manmzel Rose pour son sipor kontinyel pandan sa dernyen 4an ki in dedye son letan dan nou distrik.

Mr Speaker, avek sa de mo, mon pou siport sa nominasyon.

Mersi.

 

MR SPEAKER

Bon, Onorab De Commarmond.  Right of Reply.

 

HON CHARLES DE COMMARMOND

Mersi Mr Speaker.

Mr Speaker, sa o responsabilite ki i ti’n deza fer isi lokalman, son krwayans e konviksyon dan bann prensip nob ki Sesel pe avanse lo nivo mondyal ozordi.  Onorab Madanm Charles in dir ozordi nou dir li mersi pour sa ki in fer pour nou group isi dan sa Lasanble.  Son kapasite pou dirize, son fransiz e an menm tan, in ganny dekrir par Onorab Souris, koman en fanm de karakter.  En vre Leader.  In byen reprezant nou dan bann diferan Misyon aletranze.  Sa bann diferan kalite ki nou pe asosye avek Ms Rose, i kler poudir i pou anmenn plis sikse pour nou pei.  I kler poudir Prezidan i pe fer en bon swa pou avans Ms Rose dan sa nouvo responsabilite.

Mr Speaker, sa bann sa nouvo responsabilite ki Ms Rose pe gannyen, i pou ed li pour son lavenir.  Son lavenir ki nou konnen i pou retourn Sesel, pou li kapab pran nouvo responsabilite pli larz ankor.  Ler nou pei i annan bann dimoun parey, nou, nou bezwen kontan.  Nou bezwen kontan e dir mersi Senyer pou anmenn bann dimoun parey, pou avans nou pei lo en lot letap pli devan.  Nou Lasanble, nou Party cocus isi dan nou Lasanble i swet li tou de bon parey nou’n dir e ki nou demande ki Bondye i ed li e gid li dan sa nouvo fonksyon e ki i touzour e touzour mazin Sesel dan tou sa ki i fer.

Mersi bokou.  Mon a demann tou dimoun, tou Manm Lasanble isi prezan pou siport son lapwentman.

Mersi.

 

MR SPEAKER

Bon, in ariv ler pou nou vote.

Tou bann ki an faver ki Onorab …..?  Bon, okenn ki kont?

Bon, savedir ki depi ozordi Onorab Rose i en Anbasader.  Madanm ouswa mademoiselle Marie-Antoinette Rose i Anbasader Repiblik Sesel e i reste mwan, lo non Lasanble Nasyonal, pou felisit li e swet li bonn sans dan son nouvo parkour.

Nou ava adjourn ziska 11.05.

 

(BREAK)

 

 

MR SPEAKER

Bon, nou a kontinyen avek nou travay pour ozordi.  Nou annan nou en dezyenm Mosyon pour apwentman en lot Anbasader.  E sa se Onorab former Leader of the Opposition, Mr David Pierre.

Mon ava envit nouvo Leader of Government Business pou prezant son Mosyon.

Onorab.

 

HON CHARLES DE COMMARMOND

Mr Speaker, mersi.

Mr Speaker, sa Mosyon i lir koumsa:-That this Assembly resolves to approve the appointment byen the President, of Mr David Pierre as Ambassador.

Mr Speaker, parey pour Ms Rose, Mr David Pierre is known to our Assembly.  Nou tou nou konn li isi.  I ti Leader Lopozisyon dan nou Lasanble, ziska tou dernyen-man.

Mr Speaker, Sesel i bezwen tou son zanfan e Prezidan dan son sazes, in vwar poudir i annan keksoz ki bon avek Mr Pierre, ki kapab kontinyen benefisye Sesel.  Se osi son parkour ki in fer dan nou Lasanble, menm ki David Pierre in toultan dan Lopozisyon, i pa vedir ki i pa kapab travay pour Sesel.  Se sa nouvo lespri ki nou Lasanble e nou Prezidan osi pe anvoy devan.  Se ki en dimoun, irespektiv son krwayans politik, irespektiv son bann prensip pour li, si en dimoun i annan Sesel aker e i pare pou travay pour Sesel, i pare pou donn koudmen pou fer avanse nou pei e nou Nasyon, then i annan en plas dan nou sosyete, i annan en plas dan gouvernans nou pei.  E mon krwar se dan sa lespri ki Prezidan dan son sazes, i pe apwent, i pe anvoy sa nominasyon apwentman David Pierre koman Anbasader, devan nou Lasanble.

Mr Speaker, mwan personnelman mon konn Mr Pierre en bon pe letan.  Depi ler dan sa dernyen Lasanble, nou’n donn responsabilite Chairmanship FPAC avek Lopozisyon, Mr Pierre in Chairman e mwan mon’n Vis-Chairperson sa Komite.  Sa la kot mon’n vwar osi, kapasite Mr Pierre pou diriz sa Komite e son legzizans, son disiplin, son fason ki i pous keksoz pou ganny fer e fer sir ki i realiz sa ki lo plan, azanda nou Komite.  E in fer ki anba son gidans pandan sa dernyen Lasanble la, ki nou ladan, ki pa ankor fini, i dan listwar nou Parlman, i moman kot FPAC in fer plis Rapor.  Kot FPAC in fer bokou, bokou plis travay e travay serye.  Lenvestigasyon e in anmenn osi anba son gidans, in anmenn FPAC lo en lot nivo ki zanmen Parlman Sesel in deza mazinen.  E anba son gidans osi, FPAC in ganny reprezante dan SADCOPAC e li Mr Pierre, in osi annan en responsabilite lo sa Lorganizasyon rezyonal.

Mr Speaker, koman Trezorye SADCOPAC depi 2014, Septanm, ziska Me 2016, Mr Pierre in konpran e konnen ki lanpler e ki viger sa Lorganizasyon i pe travay lo nivo Lafrik e byensir, son bann menm kalite Lorganizasyon i egziste dan bann lezot rezyon dan lemonn.  E osi, anba gidans Mr Pierre, nou’n fer Annual General Meeting isi Sesel lannen pase, kot nou ti annan nou en kantite reprezantan.  En gro Meeting ki’n anmenn Sesel ankor pli devan lo map enternasyonal e rezyonal.

Sa bann demars ki anba gidans Mr Pierre in ganny fer, i remarkab.  E letan ou get son kapasite osi, Mr Pierre i annan en parkour tre ris dan politik, dan devlopman politik e nou alor konfye li ki i kapab servi sa leksperyans, sa konesans ki i annan, pou kapab osi kontinyen debat e lager pour Sesel e anmenn Sesel pli devan.  Ankor mon dir, no matter ki son krwayans politik, Sesel i bezwen tou son dimoun, tou son bann garson.

Dan sa loptik Mr Speaker, mon anvi selman fer resorti en keksoz.  En pe letan pase, detrwa lannen pase, an fen kont dan sanmenm sa Lasanble, nou ti apwent serten dimoun koman Ambassador at Large. E dimoun ti pe rode akoz Mr Mancham pa ganny apwente Ambassador at Large osi.  Mon pe anvoy en lapel devan.  Letan mon get travay Mr Mancham ki i pe fer pour Sesel, mon dir ki sa statement i pe fer en travay tre nob e tre ris pour son pei e ki li osi petet nou ti kapab, Prezidan ti kapab en zour sey rekonnet sa bann travay e anvoy devan nou Lasanble, en tel keksoz koman Mr Mancham pour Anbassador at Large pour Sesel e mon krwar ti ava en bon lide, dan menm loptik ki la nou pe anmenn Mr Pierre lo sa nivo Anbasader, akoz parfwa ou get serten dimoun ki’n ganny aprouve koman Anbasader, me apre ou pa vwar bokou ki zot fer.  Sa osi i permet nou pou reflesir lo la koman en pei.  Leadership pei i bezwen gete.  Ou apwent en dimoun Anbasader, apre ou pa tann nanryen, ouswa ou pa tro, tro konpran ki i fer.  Sa i fer poz bokou kestyon.  Nou swete alor, Mr Pierre ki pe ganny sa privilez ozordi e ki Lasanble i ava donn li sa sipor, i pa les nou deryer e i onor son responsabilite.  I travay byen.  I parey nou dir bomaten, reste osi konekte avek Sesel.  E pa koman i ale, kote i ale e konmsi ou pa tann li ankor.  Sa nou pou poz kestyon e mwan si mon pou ankor la dan sa Lasanble, mon pou fer tapaz e problenm.  Nou pou bezwen la.  I byen nou pe apwent sa bann keksoz, sa bann dimoun, me osi nou pou bezwen monitor.  Nou pou bezwen pe gete ki zot pe fer.  Si zot pe fer keksoz dibyen pour Sesel oubyen non.  E si i pa pe fer keksoz dibyen pour Sesel, nou pou demann Gouvernman pou vwar dan nou Lalwa, dan nou:-pou get posibilite pou retire.  Ou pa kapab alor nou pe apwente ozordi, apre pa fer nanryen, epi nou kontinyen konmsi nou zis apwente, apwente.

Alor la, mon lans sa lapel avek Mr Pierre, ki i take note sa ki Lasanble pe dir lo li e ki i pa fer Sesel tonm deryer e o kontrer i anmenn Sesel lo en lot nivo.  I donn koudmen pou konstrir Sesel e non pa detrir li, parey serten dimoun parfwa i sey fer.

Avek sa Mr Speaker, nou dir Mr Pierre bonn sans.  Kot ou ganny poste, ouver ou laport avek Seselwa, sirtou nou Lasanble.  Nenport ki, ki ava dan Lasanble, nenport ki Seselwa ki ava vin dan sa landrwa, fer konnen kote ou Biro i ete, kote sa Lanbasad pou ete, donn ladres pour ki dimoun a konnen letan i annan en problenm i ava kapab tap ou laport e ou, ou bezwen fer sir pour Seselwa, ouver ou laport e ou donn sa lasistans ki merite e ou kontinyen promot Sesel e fer ki atraver ou travay, Seselwa e Sesel koman en pei i a benefisye, i ava al pli devan.

Mersi bokou Mr Speaker.  Mon a demann tou Manm pou siport nou.

 

MR SPEAKER

Okenn ki segonn Mosyon?

Bon, Onorab Monnaie.  Ou ti oule entervenir?  Proceed.

 

HON FRANCESCA MONNAIE

Mersi Mr Speaker.

Mr Speaker, Mosyon ki devan nou ozordi, se pou aprouv en apwentman ki’n mete par nou Prezidan, pou apwent Mr David Pierre koman en Anbasader pour Sesel.  Lo sa size, mon annan zis detrwa pti parol pou dir.

An premye, mon dir mersi a mon nivo matirite politik e mersi a common sense e common desencee, ki mon kapab rekonnet ki tou sitwayen i annan en Drwa anba Lalwa, pou rezouir lanplwa e mwan mon pa la pou pas zizman lo en zonm ki’n ganny en lanplwa nenport ki bor, pou anmenn en saler pou soutenir son fanmir.  Mon ti a voudre ki Mr Pierre i pran sa pti parol aker e i anmenn en pli o nivo servis pour son pei dan sa nouvo pozisyon, parey in fer pandan sa 5an.  PDM in toultan la pou servi Sesel e Seselwa.  Sesel i pour Seselwa.  Seselwa i pour Sesel e fotespere ki Mr Pierre i met sa aker dan son louvraz ki i pou fer koman en Anbasader.

Louvraz ki Mr Pierre in fer koman Leader Lopozisyon lokalman e enternasyonalman, in met sa pozisyon Leader Lopozisyon lo en pli o lanpler e donn sa ki vin apre li plis responsabilite e travay pou kit en nivo pli demokratik e pli profesyonnel avek sa tit.  Mon ti a voudre vwar menm devouman sorti kot Mr Pierre, dan sa nouvo pozisyon.  Mr Pierre, anmenn Sesel pli o, travay pour Seselwa, lekspektasyon i pli for lo ou akoz Seselwa i konnen ki ou annan sa kapabilite pou eksed lekspektasyon ki ganny plase lo ou.

Avek tou sa ki ou’n fer, avek ou kapabilite entelektyel, avek ou profesyonnalizm, avek ou diplomasi, mon pou vot an faver sa Mosyon.  E se pour sa rezon Mr Pierre, ki mon swet ou felisitasyon dan ou nouvo post, bonn sans e ki Bondye i a beni ou.

Mersi.

 

MR SPEAKER

Onorab Vidot.

 

HON KEVIN VIDOT

Mersi Mr Speaker.

Mr Speaker, mon konnen bokou dimoun pou pe koz lo kalifikasyon, credential ki i kapab annan pou li pran tel pozisyon.  Me la bomaten mon pa anvi koz lo la.  Mon anvi koz lo Mr David Pierre koman en patriyot.

Sa ki neseser Mr Speaker, pour en Seselwa reprezant son pei, se i devret en patriyot.  Enn ki annan son pei, son pep aker e i pare nenport ki rezon, ki lobstak, pou li toultan debout e defann son pei e pous son pei pli de lavan, Nasyonal e enternasyonalman.

Mr Speaker, Mr Pierre in toultan dir sa ki bon pour Sesel i bon pour son Parti e i bon pour tou Seselwa.  E se sa rezondet ozordi akoz mwan mon’n deside pou mwan pran parol lo son par, pou koz lo son apwentman par Prezidan Michel pou li vin en Anbasader.  En zonm ki krwar sa ki bon pour Sesel i devret bon pour son Parti, malgre i pa dan menm Parti avek mwan, i en zonm ki nou devret valorize e donn li sans pou prouv son lekor, si vreman i anvi vwar sa ki byen pour Sesel e lepep Seselwa.  Mr David Pierre, san okenn dout mon mazinen se avek menm dinamizm, menm lanvi, menm dezir, sey aplik sa bann prensip ki nou toultan koz lo la, la dan Lasanble, i pou senserman fer sa ki byen pour Sesel e lepep Seselwa.  Si Mr Pierre i deside pou li reprezant son pei e Prezidan i krwar dan son kapasite pou li reprezant son pei, mon krwar i devret ganny tou nou sipor e tou nou gidans pou li fer sa ki byen pour Sesel e sa ki byen pour lepep Seselwa.

Dan enn mon bann vizit travay ki nou ti ale Sid Afrik, ki mon ti akonpannyen par Mr David Pierre li menm, pou al adres en size Sid Afrik lo Budget Process e Budget Preparation, mon ti vwar kot Mr Pierre pe vreman debat lo sa ki bon pour Sesel.  I pa ti ezite pou dir kot nou annan defi, me i ti osi senserman dir kot nou ti annan pwen for.  E sa zour ler nou ti pe debat pandan sa semenn laba Sid Lafrik, ki ti fer mwan realize ki i en zonm ki senser dan sa ki i dir.  Wi, kot i mal nou bezwen dir i mal me kot i byen osi, nou bezwen dir i byen.  E kot nou bezwen amelyore pou fer keksoz vin pli meyer, i ti premye pou donn sizesyon ki mannyer sa prosedir i devret ale Sesel, pou fer li vin pli meyer.

Mr Speaker, se avek san okenn dout alors, ki mon mazinen ki en tel zonm, pe enport son kouler politik, pe enport son kouler lapo, pe enport son relizyon, me si i kontan Sesel e si i en vre patriyot, i devret ganny sa loportinite pou servi son pei.

Si okenn dimoun Mr Speaker, i oule fer byen pour Sesel e son pei, personn ou nanryen pa devret vin en baryer pou li vreman servi son pei.  E mwan mon asire, ankor enn fwa mon repete avek nou sipor, avek nou sipor, ki Mr Pierre i kapab fer en travay egzanpler.  E kekfwa i a kapab ouver laport pour lezot parey li ki pa’n siport sa Parti ki mon reprezante dan sa Lasanble, me ki’n ganny loportinite pou li prouv son lekor, i a kapab demontre ki i kapab met son kouler politik akote e pran paviyon Sesel koman son gidans.  Pran nou Lim Nasyonal koman son resi e kontinyen travay pou fer Sesel fyer e pou fer Seselwa fyer.

Se avek sa ki mon deside pou mwan vot an faver sa apwentman.

Mersi bokou.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.

Mr Speaker, sa Mosyon pe demann nou Lasanble pou aprouv apwentman Mr David Pierre koman en Anbasader Sesel, ki’n ganny prezante isi dan sa Lasanble.  I osi reprezant nou avek loportinite pou partaz avek lepep Seselwa nou refleksyon lo rol en Anbasader Seselwa dan sa ‘Nouvo Sesel.’  Egalman, nou osi ava sezi sa moman pou demontre ki mannyer Mr David Pierre i ranpli bann kriter pou deservi sa pozisyon.

Mr Speaker, dan sa dernyen 10an, Sesel in ganny transformen pou vin ‘Nouvo Sesel’ e enn bann eleman sa ‘Nouvo Sesel’ se diplomasi aktif.  Nou pei pe renonmen lo lasenn enternasyonal atraver plizyer linisyativ ki nou pe pran.  Bann rol leadership ki nou pe aksepte e bann pozisyon brav ki nou pe pran lo bann size enternasyonal.

Wi Mr Speaker, Sesel nepli zis en pti group zil ki renonmen koman en destinasyon touristik.  I nepli zis sa pti zil renonmen dan lemonn pour son devlopman imen tre avanse.  Sesel nepli zis sa pei ki renonmen dan lemonn pour son Lendistri Lapes.  Sesel i osi sa pei ki’n diriz en koalisyon enternasyonal dan lalit kont piratri dan lakot Lafrik e dan Losean Endyen.  Semenn pase plis ki 400 delege ti pe asiste Konferans lo piratri isi dan nou pei.  Sa i demontre konfyans ki bann Lorganizasyon Enternasyonal i annan dan Sesel.

Mr Speaker, Sesel in osi zwe en rol enportan pou sansibiliz lopinyon enternasyonal lo size sanzman klima.  En size ki pe met gran latansyon ou konsern lo nivo enternasyonal.  Sesel in osi sa pei ki’n vin en sanpyon mondyal lo size lekonomi ble.

Mr Speaker, Sesel i sa pei ki’n zwe en rol aktif pou trouv en solisyon politik e anmenn en stabilite dan nou rezyon, sirtou an Madagascar.  Sesel i sa pei ki pe zwe en rol aktif dan devlopman Lendistri Lapes an Somali, koman en solisyon dirab pour sa problenm piratri.  Sesel i sa pei ki annan kouraz pou pran bann pozisyon de prensip lo bann konfli, partou atraver lemonn.  An dot mo, Sesel in ganny transformen e redefinir son lapros lo sistenm relasyon enternasyonal e aplik metod diplomasi aktif.

Mr Speaker, ‘Nouvo Sesel’ se Sesel avek en nouvo lanbisyon.  En Sesel pli determinen pou re-pozisyonn li e ranpli en nouvo rol dan sa monn.  Sa nouvo lanbisyon e rol selman i kapab ganny akonplir atraver diplomasi aktif ki leadership nou pei in adopte.  Me diplomasi aktif i ganny definir koman lenplimantasyon politik etranzer en pei i ganny karakterize efektivman dan sirkonstans kot bann Profesyonnel i la pou egzekit li.

Mr Speaker, savedir nou diplomasi i akoz nou annan bann diplomat ki pa zis asize dan bann biro e esper loportinite.  Zot bezwen oubyen kontinyen pe inove, pran loportinite ki zisteman dan sa konteks ki apwentman Mr David Pierre e Ms Rose koman nouvo Anbasader, i ganny trouve dan sa vre sans.  Mr Pierre in entrodwir sistenm ledikasyon ki Gouvernman Parti SPUP, SPPF, Lepep in etablir lo later Sesel, pe enport ki kous sosyete ou sorti ladan, disiplin e travay dir i fer ou reisir.

Mr Pierre in fer son letid NYS, pli tar Politeknik, pli tar al fer son letid Liniversite Lostrali, kot in ganny li en Bachellor’s Degree.  In retournen pou vin ansenny bann zanfan Seselwa, kot sa lepok bokou bann graduates ti pe ganny en-fliyanse pou reste Lostrali pou teach.  Me koman en patriyot, i ti retournen kot in travay plizyer lannen pour Minister Ledikasyon.

Mr Speaker, nou tou nou konnen ki pli tar Mr Pierre in zwe en rol tre aktiv dan politik Sesel.  In pran par dan plizyer Eleksyon e tou dernyen-man, i ti Leader Lopozisyon isi dan nou Lasanble.  Ozordi Prezidan Michel pe demann nou senkyenm Lasanble pou apwent 2 Leader ki ti la ek nou.  Set avek fyerte ki mon’n swazir pou koz lo non Mr David Pierre.  Dan son parkour dan sa Lasanble, in zwe en rol koman en vre Leader Lopozisyon.  Kritike ler i mal, siporte ler i byen.  Son pli gran parol, sa ki bon pour Sesel ek Seselwa, mon pou donn mon sipor.  Sa set en patriyot.  I pa en ipokrit e rezon fondamantal akoz mon dir Prezidan in fer en bon swa pou propoz Mr David Pierre avek nou, akoz i ranpli avek bann bon fason fer keksoz.  Ler i krwar dan en keksoz, i travay lebra kase pou li reisir.

Mr Speaker, apwentman Mr Pierre osi i en mesaz for ki nou pe anvoy avek lazenes Seselwa.  Mon anvi dir avek bann zenn pou vwar apwentman Mr David Pierre koman en legzanp.  Sesel i en pei ki ofer loportinite pour son zenn ki travay dir.  Mon demann avek tou zenn pou fer parey Mr Pierre.  Pou pran zot letid serye, travay avek modesti e kontinyen touzour dan lentere Sesel.

Finalman, mon osi sezi sa loportinite pou swet Mr Pierre e Ms Rose tou de bon, sikse e determinasyon dan tou sa ki zot fer pour Sesel.  Mon konnen e nou tou dan Sesel nou konnen ki i pa en latas fasil.  Atraver nou bann diplomat, Sesel i bezwen kontinyen navige dan en fason smart.  Nou bezwen kontinyen pourswiv nou lavwa pour ki bann pti leta zil i ganny plis valorize e pran nou plas akote bann pli gran pei, tout an rekonesan nou spesifisite dan sa lemonn, avek bi e posibilite zwir bann loportinite dan nou zefor pou ofer pep Seselwa touzour sa ki meyer.

Finalman Mr Speaker, Gouvernman i bezwen donn bann Anbasader tou bann sipor neseser, ki zot kapab asir en o nivo fonksyonnman lo Lanbasad an deor Sesel.

Mersi Mr Speaker, mon pou vot an faver sa apwentman Mr Pierre.

Thank you very much.

 

MR SPEAKER

Onorab Ghislain.

 

HON CHANTAL GHISLAIN

Mersi Mr Speaker.

‘Nou pei i bezwen tou son zanfan.’  Parol Prezidan James Alix Michel, o-kour son Diskour a lokazyon son linogirasyon koman Prezidan Larepiblik Sesel le 24 Me 2011.

Mr Speaker, mon’n komans avek sa sitasyon, pour benefis tou bann ki kontan koz lo viktimizasyon pour rezon zot krwayans politik.  Mr David Pierre i en Lopozisyon.  Savedir i pa Parti Lepep.  Me par lao tou, i en Seselwa.  Alors, i son Drwa lezitim pou travay pour Sesel e pour Seselwa.  Sesel in touzour ganny vwar koman en pei avek en nivo tolerans ki depas tou.  Kot blan ou nwanr, oubyen ki kouler ou lapo, krepi ou drwat, oubyen ki tekstir ou seve, Katolik ou Mizilman, oubyen menm pe enport ou krwayans relizye, Lepep ouswa SNP, oubyen pe enport ou krwayans politik, nou tou ki leve anba sa soley Sesel i ganny aksepte.  Me i annan en pe letan deza e pli ale i pe vin pli evidan, kot Seselwa mon Nasyon in pri dan en lasenn lanmertim, rankin ek laenn.  Si en zenn fiy son lapo i nwanr, i pa kapab vin Anbasader pour Sesel.  Kot si son lapo i nwanr alors, zot napa lentelizans e zot napa labote.  Sa i bann parol ki Lopozisyon pe dir ozordi.  Si ou siport Lopozisyon me selman ou napa menm azanda ou lanbisyon ki zot, ou pa en Lopozisyon e ou pe ganny akize koman ou pe siport Parti o-pouvwar.

Mr David Pierre in mon koleg dan sa Lasanble pour sa dernyen 5an.  Koman en zonm ki’n debout lo sa lot kote latab, in zwe son rol koman en zonm ki malgre son lopinyon politik opoze kont mwan, zanmen en sel fwa mon’n antann li dan son bann deliberasyon, denigre okenn Seselwa e pandan tou son bann voyaz kot in al reprezant nou pei aletranze e reprezant nou Lasanble, i pa’n zanmen profite pou mal-koz Sesel, konpare avek en serten dimoun dan son prop Parti oparavan, ki ti pe profit voyaz ki Lasanble Nasyonal in anvoy li lo la, pou al kot Linyon Eropeen e dir tap Sesel kot i fermal.  E sa bann menm dimoun ozordi, apre ki zot in mont an piblik e maltret Seselwa koman bann pa konpran e ki Tanzanian e Mozambique, dimoun i pli konpran ki nou isi Sesel.  Bann dimoun otour ses zans i devret pli per akoz zot pa zanmen konnen keler zansla pou lans lo zot, si zanmen zot deside defye zot.  Mon demann mon lekor e tou Seselwa i devret pe demann zot lekor sa kestyon.  Akoz laenn i okip telman en gran plas dan sa zwe?

Mr Speaker, mon demann mon lekor kot nou pei pe ale koman en pei.  Bann Profesyonnel zot devret per pou koste o-bor ses zans, ou menm siport zot akoz si zanmen zot ganny kriye pou travay dan Gouvernman pou deservi sa pep e zot pei e zot pa fer sa ki Lopozisyon i dir zot fer, zot pou ganny griye vivan.

Mr Speaker, mon dir sa akoz mon konnen ki la deza Mr David Pierre pe ganny masakre, maltrete pli ba ki later, zis akoz in deside swazir en politik san vyolans e pare pou travay ansanm avek Parti o-pouvwar, pour en Sesel pli meyer.  Minis Alain St Ange osi in pas ladan menm.  Ler i ti fek ganny apwente koman Minis, tou sa bann zoli mo felisitasyon ti sorti dan zot labous.  Me koman i fer en bon travay ki kont zot azanda sabotaz tou, detri tou, swa ki pa dan zot faver ou menm ki dan zot pti lespri zot pe vwar ki i zis an faver Parti Lepep, olye mazin an faver Sesel e Seselwa, la zot komans kras zot bann venen, maltrete e triy sa bann dimoun anndan deor, siporte e enstige par zot Leader.

Mr Speaker, la zis semenn pase in ariv avek Sef Ziz.  Apre tou sa kantite lardon ki zot in anvoye zis akoz sa pozisyon Sef Ziz Sesel in touzour ganny okipe par etranze, Prezidan Michel in apwent en Seselwaz, Madanm Mathilda Twomey e nou tou nou konn sa madanm tre byen.  Tou dimoun ti felisit li e dir ki anfen, Prezidan Michel in ganny kouraz pou apwent en Seselwa ki pa sorti dan menm Parti avek li, pou okip plas siprenm en Lenstitisyon enportan, en lot lebra Gouvernman.  Me sete avek degou ki zot in pyetin lo sa madanm, zis akoz son zizman ti en zizman zis e enn ki fair, ki pa’n dan faver politik en dimoun ki’n swazir Palais de Justice koman son Day Care Centre.  Ozordi sa madanm i bezwen dezart son lakour, zis akoz zot bann menas ensinifyan, ensilte li, al ziska menm kras avek li Anvil.  Tou sa pa ti pou arive si ou, Mr Wavel Ramkalawan e Mr Jean-Francois Ferrari pa ti mont lo en stage devan en lafoul pou sifoke.  E a sak bout fraz, zwe sanson pil lo li.  Pourtan, M’aitre Georges ti’n son lavey aswar dan Kwen Legal lo SBC, praise e siport lentegrite Lakour, an di-z-an ki Lakour konmela i vreman en endepandan e pas zizman kont Gouvernman kan i fodre.  E ou Mr Derjacques koman Avoka, ki ou’n fer, aplodir ou osi?  Madanm Antao, ki ou’n fer?  Les 2 zonm pyetin lo en lot fanm parey ou?  Proverb i dir, pa zanmen tenny labouzi ou prosen zis pou fer sa ki pour ou briy pli kler.  Mon santi ki zot reste trankil akoz zot tou zot annan menm azanda.  Tir Prezidan Michel e Parti Lepep o pouvwar, me pli gro danze se sakenn antre zot, zot annan zot prop azanda personnel.  E sa la ki aprezan ki lager pou deklare antre zot.  E ou Mr Ramkalawan, mon espere ki koman en Prêt, ou’n kapab realiz ou lerer e demann lekskiz ou prosen.  Oubyen ou pe esper ou PPB pou zwe sent nitouche, bat ou pti lizye devan camera e demann pardon parey ou ti fer Desanm.

Mon bann frer e ser koleg, sa i pa gou.  Mwan mon vwar sa i pa ni gou ditou.  In en akt plito degoutan.  Zot napa respe pour personn e pour okenn Lenstitisyon dan sa pei.  Wi, mon annan en lapo ki nwanr.  Mwan osi mon nwanr e ou osi ou nwanr.  Me diferans ant mwan ek ou se ki ou pe siport en Lopozisyon ki pe montre de zour an zour, bann akt rasis kont lezot dimoun ki annan kouler lapo nwanr.  Bann ki osi dekrir nou bann dimoun koman mazanbik.

 

(Interruption)

 

MR SPEAKER

Onorab, Onorab.  Relevance, relevance, right.

 

HON CHANTAL GHISLAIN

Mr Speaker, mon senpatiz avek sa madanm akoz premyerman i en fanm, enn kouraze ki pa’n zanmen per pou debout e defann sa ki i krwar ladan.  Mon’n temwanny sa o-kour deba pou ekrir nou Konstitisyon.  Eski ou pe dir mwan si Madanm Twomey in montre ledwa Prezidan Rene, Prezidan Michel parey ou’n dir, ozordi i pa devret montre ledwa Mr Ramkalawan?  Eski sa zafer rann en zizman san lafreyer e san faver i aplik zis pour serten kategori dimoun?  Mon pli gro kestyon se ki ou lakoler avek sa madanm?  Eski vreman akoz i pa’n deklar ou Prezidan Sesel ouswa akoz en zafer personnel ki ou ti’n perdi kont sa madanm?

 

(Interruption)

 

MR SPEAKER

Onorab, relevance.  Onorab, relevance.  Nou pe apwent en Anbasader.  Mr David Pierre.  Ok.  So, retourn lo Mosyon devan nou.

 

HON CHANTAL GHISLAIN

Mr Speaker, ozordi nou senserman krwar e realize ki tou Seselwa, en pep, en Nasyon ki pe viv e kontinyen viv o-bor kanmarad pour plizyer lannen ankor e ki nou pou otomatikman annan lanmor si nou pa viv dan lape, olye kiltiv laenn, revanz e rankin kont kanmarad, ennsezour nou pou pler sa kantite lanmor letan nou pe komans kont lekor nou bann frer e ser Seselwa par grap.

Mr Speaker, permet mwan konklir sa sitasyon Prezidan Michel o-kour son diskour ki i ti fer alokasyon son Linogirasyon le 24 Me.  ‘Napa plas dan sa nouvo Sesel pour divizyon, pour tirayman, pour rankin, laenn oubyen zenofobi.  Plis ki zanmen, nou pei i bezwen tou son zanfan.  Nou bezwen zonm ek fanm bonn volonte pou sirmont tou lobstak devan nou.  Nou bezwen met nou diferans politik e ideolozik de-kote pou nou fer progrese nou pep.  Ler in arive pou nou aret melanz politik dan tou sa ki nou fer.  Ler in arive pou nou konsider nou frer ek ser ki pa partaz menm lopinyon ki nou, koman nou lennmi me koman en Seselwa ki pe osi kontribye anver lavenir nou pei, menm si nou reste adverser politik.  Adverser kot i konsern serten keksoz me i osi en koleg avek ki nou kapab travay.  En frer e ser Seselwa ki kapab partaz ansanm e ki kapab korpore pour dibyen nou pei.  Nou bezwen nou tou dan en zefor solidarite Nasyonal e dan en lespri Linite Nasyonal, koste zepol ansanm e travay dan en sel bi.  En meyer lavenir pour nou nouvo Sesel.  Mon sipliy tou Seselwa pou ralye otour sa koz, met Sesel avan tou.  Travay dan diversite nou diferans, travay dir pour en meyer lavenir nou Sesel.  Mon fer lapel avek osi Lopozisyon pou zwenn dan sa latas.  Mon repete.  Napa plas pour nou pti pei beni pou divizyon.  Annou travay ansanm pour en meyer lavenir pour nou pei Sesel.  Sesel i bezwen tou son zanfan.’

Mr Speaker, fen sitasyon.  Mr David Pierre, nou pa partaz menm ideolozi politik me par lao tou, nou partaz menm pei e menm Nasyonalite.  Si nou’n kapab koman paran, konfye nou zanfan dan ou lanmen pour son ledikasyon, ozordi mon pa vwar li mal pou nou kapab osi konfye nou pei aletranze dan ou lanmen.  Sesel in donn ou lezel, prezan anvole.  Anvol pour Sesel e pa en sel moman, bliy sa Sesel ki’n donn ou nesans, ki’n bers ou.  Zis pa fer Sesel plere kot ou pe ale akoz se mon zanfan, zanfan mon vwazen, zanfan mon frer e ser Seselwa ki pou plere.

Mersi Mr Speaker.

 

MR SPEAKER

Bon, Right of Reply.  Onorab De Commarmond.

 

HON CHARLES DE COMMARMOND

Mersi Mr Speaker.

Mr Speaker, ou vwar sa sityasyon ki mon ladan avek nouvo responsabilite, i fer ki mon annan 2 kalite rol.  E mon swete dimoun i konpran mwan byen.

Enn, Biznes Gouvernman devan Lasanble mwan ki bezwen anmennen.

Lo lot kote, i annan sipor mon group, Party cocus e mon Parti e mon pep ki’n elekte mwan i kapab parfwa pa tonm nen an nen avek sa ki Gouvernman i oule fer.  E mon swete ki tou lede group i konpran mwan dan mon responsabilite.  Savedir, Gouvernman i konpran mwan rol, mon responsabilite koman en Manm Lasanble e lo lot kote, piblik ki’n elekte mwan, i osi konpran letan mon bezwen anmenn pour en Zafer Gouvernman devan nou Lasanble.

Mr Speaker, avek Mosyon ki devan nou, in ganny dekrir dan plizyer fason ki Mr Pierre, en garson tre entelizan, en patriyot ki’n dir ki sa ki bon pour Sesel i bon pour PDM, i bon pour son Parti.  E mon oule osi dir poudir i byen letan nou get dan nou pei, nou get byen.  I annan osi patriyot dan nou pei ki pa’n byen ganny rekonnet, parey la pei pe get Mr Pierre.  E mon note an pasan ki i enportan ki Leadership pei i take note sa bann keksoz koumsa.

Lavi dan Sesel Mr Speaker, i ranpli avek sirpriz.  La nou vwar osi dan nou pei ozordi, nou pe apwent Leader en parti dan Lopozisyon koman en Anbasader e nou vwar poudir dan menm pei, i annan Anbasader ki ozordi i Leader serten Parti Lopozisyon.  I montre ou ki kalite dinamik ki annan la devan nou.

Having said that Mr Speaker, i enportan kantmenm ki nou dir mersi sa ki pei i fer pour nou.  E mon swete ki Mr Pierre, dan sa nouvo responsabilite, i pran not de tou sa e ki nou swet li byen, bonn sans, prosperite e ki Bondye osi i gid li pou fer sa ki byen pour nou pei e nou pep.

Mersi e mon demann tou dimoun, tou Manm pou vot lo sa Mosyon.

 

MR SPEAKER

Bon, in ariv ler prezan pou nou pran en vot.

Tou bann ki an faver?  okenn ki kont?

Bon, inanim.

Donk depi ozordi, ofisyelman Mr David Pierre i en Anbasader Repiblik Sesel.  E i reste mwan o non Lasanble Nasyonal, pou mwan felisit li e swet li bonn sans dan son nouvo parkour.

I reste nou ankor en apwentman pou nou aprouve me ler mon get lakantite dimoun ki’n lev lanmen pou koze, mon krwar mon pou adjourn e nou ava zwenn 2er pou nou pran trwazyenm apwentman.

 

(LUNCH)


MR SPEAKER

Bon, nou a kontinyen avek nou travay pour apre midi e nou annan en trwazyenm lapwentman ki bezwen ganny aprouvasyon Lasanble Nasyonal. E sa se apwentman Komisyoner Polis.  Anliny avek Lartik 161 nou Konstitisyon, Prezidan i bezwen ganny laprouvasyon Lasanble pou finaliz apwentman Komisyoner Polis e mon a envit Onorab De Commarmond, Leader of Government Business pou prezant son Mosyon.

 

HON CHARLES DE COMMARMOND

Mersi Mr Speaker.

Mr Speaker Mosyon i lir koumsa – that this Assembly resolves to approve the  appointment by the President of Mr Reginal Elizabeth as Commissioner of Police.

Mr Speaker, mon panse ler mon’n tann nouvel ki’n pase midi, dan Televizyon, petet la nou pa ti devret ni menm koz lo sa Mosyon, akoz medya in fini deklare ki sa msye i Komisyoner Lapolis san aprouvasyon Lasanble.  Mon dir sa akoz si Lasanble la i deside otreman?  Ki pou arive? Konmsi enn ler fodre pa ki nou step lo lipye kanmarad.  Medya petet i devret annan en respe pour Lasanble – esper Lasanble fer son bout travay avan ki li i pronons son lekor lo la.

Mr Speaker, Mr Elizabeth pou Komisyoner Lapolis – nou, nou konn Mr Elizabeth tre byen. Mwan mon konn li akoz en moman donnen menm mon’n travay en pti akote li – mon pa’n en Polisye, me selman mon ti pe enstrir Ledikasyon Politik sa letan kot Lapolis,  dan training ek Polisye ki pe fer training e menm serten lezot – sak fwa ti annan en cohort la pou training, mon ti pe ed zot avek Ledikasyon Sivik si oule apel li.  E mon’n konn li akoz i ti pe ansarz en letan laba kot Fingerprint; en dimoun ki’n fer tou son letan dan Lapolis mon krwar in konn - plis ki 40an, en bon pe lannen – kantite lannen.  E sa in bezwen fer li konn Lapolis kan mannyer i marse.  Mon’n ekout son Interview lo Radyo tre resaman e mwan mon satisfe ki nou bezwen donn en dimoun en sans.  Prezidan dan son lasazes in donn sans Mr Elizabeth, pou prouv son lekor avek sa nouvo responsabilite.   Nou bezwen vwar – ou konnen ti kapab al rod en etranze; ti kapab al rod en lot dimoun dan lezot landrwa.  I annan ti’n fann rimer; menm pou rod en dimoun dan Larme ankor pou anmenn kot Lapolis.  Me Mr Elizabeth in la dan Lapolis e i byen ki zot in promot li.  E si ou get son CV, in fer diferan parkour, diferan grad alor i – e diferan Seksyon osi dan Lapolis, savedir i pou konnen kan mannyer i pou kapab donn Lapolis.

E nou profite pou remersye Komisyoner ki pe ale – or ki’n fini ale Komisyoner Ernest Quatre.  Mr Quatre osi in donn tou.  I osi en dimoun ki’n dan Lapolis mon krwar tou son lavi – lavi travay ki in fer dan Lapolis; menm son laz Retirement in vini, Lotorite i dir li - pa al konmela reste nou ankor bezwen ou – in esey son mye.  Mwan mon krwar Komisyoner Quatre in sey son mye pour kapab esey fer Lapolis marse.  Me ki swa Komisyoner Quatre, ki swa pou Mr Elizabeth kan menm zot a kapab annan en tre bon lentansyon pou fer Lapolis marse e al  pli devan pou nou pep kontan, zot pa pou reisir si ou annan telman eleman negativite dan en Lorganizasyon parey Lapolis.   Akoz Lapolis ozordi, i domaz sa sityasyon ki i ladan – pa akoz i kapab dimoun ki kapab travay, me akoz latitid dimoun – latitid Zofisye ki pa anvi travay – ki anvi zis met retar dan progre ki Lapolis in oule fer.  Alor ou kapab ganny ou en nouvo Komisyoner, i kapab sorti menm dan Lesyel. Si ler i vin la lo Later pou fer Lapolis marse isi Sesel la, ou ganny ou sa bann dimoun ki zot, zot annan plan kan mannyer  pou fer zot kalite reform, i pa pou ed ou dan sa parkour.  So, ou pou annan diferan kalite plan; dimoun i met diferan baryer pou anpes son kanmarad or anpes en Lorganizasyon marse.

Alor mon ti ava kontan ler nou pe wish Mr Elizabeth sikse, bonn sans dan son travay, nou pe dir li ouver son lizye, nou pe dir li pran aksyon – nou pe dir li nou Lapolis ozordi i bezwen sitan sanzman ladan.  I bezwen ler par egzanp, la i pe sanz li i pe vin nouvo la – i nouvo, i bezwen al sanz lezot Zofisye dan lezot landrwa kot i fodre sanze.  Pa bezwen per, nou Lasanble i pe siport li e therefore li al fer sa ki neseser pou anmenn en Lapolis ki lepep pe rode.  Lepep i anvi en Lapolis ki i a kapab rely lo la; ki i kapab santi li safe dan son pei – ki i kapab konmsi dormi anpe – ki i kapab vreman letan i annan en vol i konnen ki sa dimoun i ganny tyonbo vitman ; letan i annan aksidan i ganny lasistans irzan, vitman. E vwala ki kalite Lapolis nou oule.  Alor nou demann li pou li al fer sa bann sanzman neseser.

Ou pa kapab ganny ou Mr Speaker, Lapolis ki pa pe train ase.  Nou, nou krwar ozordi nou Lapolis i bezwen plis training. Pou ou met Lord ek Disiplin dan Lapolis, i en nesesite – i en nesesite mon dir.  Lord ek Disiplin i bezwen komans par Lapolis epi i ava desann i avan zwenn tou popilasyon.  Alor i bezwen  training. Nou demann Mr Elizabeth - nouvo Komisyoner Lapolis nou pe aprouve la, pou li deswit organiz en bon pe training pour bann dimoun, dan en fason - akoz letan mon get son laz mwan, i pa pou kapab la pour en ta letan li, ou konpran?  Me savedir i bezwen  prepar dimoun.  I son rol koman Komisyoner pou li fer sir ki Lorganizasyon i fer en bon preparasyon, pour ki demen nou pa bezwen kler avek tors pour al rod en lot Komisyoner.  I ava annan en bon pe dimoun kalifye, grade e kapab pou kapab pran enn nenport ladan pou fer Komisyoner Lapolis;pou fer nou Lapolis al pli devan.

Nou demann li pou li kapab devlop en sistenm, en fason pou ganny plis Stasyon Lapolis, akoz nou popilasyon in grandi li.  Mon’n ekout yer lo Televizyon - en pti progranm, Mr Speaker, en pti progranm par Istoryen Mr Mathiot,  e ki dir nou poudir depi an 1902, ti annan 12 Stasyon Lapolis dan Sesel – an 1902.  Ozordi nou 2016 i ankor annan 12, Mr Speaker.   I ankor annan 12 si  nou pa kont Headquarters Lapolis, apre Cascade in fermen, Lapolis son Stasyon in kraze - in fermen. I reste 12.  Epi nou SSU, PSSW li i pa ladan; nou pa kont li koman Stasyon Lapolis pour lemoman ziska ler i ava prononse.  So, i reste 12.  Kote depi 1902 ziskan ozordi, kot nou’n arive?  Nou demann li Mr Elizabeth – nouvo Komisyoner ki nou pe aprouve, nou dir li irzan – dan en fason irzan i bezwen koz ek Lotorite pou kapab -  kot i annan nesesite, par egzanp kot mon konnen i annan Cascade li menm - nou annan Pointe Larue kot i annan bokou problenm sosyal e nou bezwen en Stasyon Lapolis la.  En Stasyon Lapolis ki efektiv, ki fer marse.  Alor nou demann li  - si ou kalkile depi Mont Fleuri, lot Stasyon ou al zwenn Anse Aux Pins.   Tou sa bout Les Mahe la kot toultan nou’n for, kot toultan i annan plis problenm sosyal, li menm li landrwa ki ankor napa Stasyon Lapolis.  This is unfair.  I unfair e nou, nou Lasanble nou pe demande ki Gouvernman i gete sa rezyon.  Pa les sa rezyon an aryer, pa les sa rezyon akoz son popilasyon pe monte la – nou annan nouvo distrik Roche Caiman ki’n ganny kree dan sa rezyon an menm tan e Stasyon Lapolis pa’n ganny kree.  So, sa mesaz for, mesaz serye ki nou pe anvoy avek nouvo Komisyoner.

Nou pe dir osi Mr Speaker, nouvo Komisyoner petet i sanse la – mwan si mon reste dan sa Lasanble, next time nou pe al demann pour –akoz la petet letan in kourt, pa’n ganny letan – next time nou pe demann pou amann Standing Order, in future e nou dan Parti Lepep ler nou pou retourn dan sa Lasanble avek en mazorite, nou pou demann pou amann Standing Order ki whoever nou pou apwente la - Komisyoner Lapolis, demen i kapab Minis, sa bann dimoun parey la,  nou pe demande pou li vin dan Lasanble pou li vin reponn en pe kestyon – nou pou demann li en pe kestyon.  La in sanse la – keksoz in pas en pe vit mon pa’n ganny sans.  Mon pe anvoy sa mesaz pour ki nou konnen kote nou pe ale ek nou Lasanble la.  Pa vwar li konmsi soz Mr Speaker, akoz fek apwente LGB, solman sa bann direksyon la, nou Lasanble nou bezwen bouze dan sa direksyon.

E Mr Speaker, ou vwar dan Lapolis nou bezwen plis latransparans – plis transparans.  Kan dernyen fwa ou ti tande – pourtan nou’n tyonbo – kan mannyer apele?  Nou tyonbo Pirates la en – Pirat; nou’n tyonbo Zarm.  Nou Lapolis li i focal point pour bann zafer Small Arms; pour bann zafer Zarm ki  tyonbo avek dimoun, ki pa rikorde dan lalis bann Zarm ofisyel pour Leta Seselwa.  Nou focal point anba Nairobi Protocol – be pourtan nou tyonbo Zarm ek sa bann dimoun, me ki arive avek?  I devret pe ganny detri sinon ou bezwen donn avek Lorganizasyon ki baze an Lafrik, pour zot kapab detri. E nou bezwen dir - nou ti tyonbo 10 fizi – nou ti aret bann dimoun nou’n anmas 10 fizi. E sa 10 fizi nou pa kapab detrir nou isi, nou napa lekipman.  Nou’n anvoy laba – lala nou pe anvoye, medya i filmen – nou’n donn tel Lorganizasyon, Nairobi laba pour zot detrir.  I bezwen ganny fer sa.  Drog nou pa satisfe.  Ou tann in anmase – dimoun in arete ek Drog epi in perdi.  Be montre nou en kou kot pe detri – be pa detri en kou sa? Ler ou  anmase egzibit epi letan sa dimoun i kondannen me ki in fer avek sa Drog ki reste?  Nou bezwen pli serye ki sa e nou pe anvoy en mesaz for avek nou  Komisyoner Lapolis.  I bezwen met son lipye ater.  E i bezwen, medya i vin filmen sa.  I filmen i montre piblik.  I montre lepep - lala Drog nou’n arete ek tel bato – lala tousala i ankor pakte e nou pe brile or nou pe zet dan lanmer. E i vwar pe zet dan lanmer.  Sa ki anvi en pe i ava al dan lanmer i ava al serse, me i bezwen ganny montre kot pe detri sa bann keksoz.  Pa pou kapab kontinyen tolere sa kalite latitid, sa kalite sityasyon ki annan dan nou Lafors Lapolis.  Si i pou koumsa la, be plito napa Lapolis – sakenn i fer son Lapolis li menm.

Mr Speaker, ozordi dan nou pei ler nou pe sey met lord,  i annan en bann senaryo ki arive – en bann senaryo kot - la nou tande resaman la mon’n- lo Facebook ou vwar partou menm Chief Justice! Kote dan en pei – lekel sa pei ki Chief Justice - en dimoun i kraz lo Chief Justice? Lapolis pa tyonbo sa dimoun?  Napa okenn aksyon? Be nou’n fini bite! Be anmas sakenn son zafer al kot li! Be Mr Speaker, i pa posib sa.  Alor nou demann nouvo Komisyoner Lapolis koman i vini, al rod li sa dimoun la ki’n kras lo Chief Justice la, al aret li.  Si i vre al rod li aret li.  Nou pa pou kapab kontinyen toler sa kalite keksoz.  Mwan mon napa problenm ek dimoun ki oule rasanble.  Nou annan Lalwa anba lekel sa bann zafer ou kapab fonksyonnen.  E annou perform dapre Lalwa.  Annou mars dapre Lalwa.  Nou tou nou koze i bezwen annan Lord ek Disiplin, selman nou pa oule fer?

Lapolis alor nou pe lans en lapel ek nouvo Komisyoner, nou, nou dernyen li, nou pe siport li be li i bezwen deliver. I bezwen deliver akoz si i pa deliver, nou, nou pou kestyonnen e nou, nou pou dir  si fodre sa voyaz, nou ava dir ek Gouvernman – sa Komisyoner ki nou’n apwente la pa bon, ou tire.  Nou kapab dir, nou Lasanble a dir.  E mon krwar sa direksyon ki  nou pou bezwen ale dan sa pei, akoz nou pa kapab kontinyen tolere.  So, nou bezwen nou tou en pe pli serye.

Mr Speaker, dan nou Lapolis ozordi, nou annan  etranze.  Mon napa problenm avek etranze mwan.  Etranze letan nou anploy en etranze dan nou pei, se pou fer ladiferans.  En etranze i bezwen montre en lot nivo.  I bezwen montre sa Lorganizasyon poudir i vo lapenn al rod li kot i ete pou vin donn en koudmen dan nou pei; sansan nou servi sa ki nou, nou annan.  Dan Lapolis la, pa pou kapab annan etranze ki ganny li manman ta larzan lafen dimwan ek nou pti Polisye li i pa pe ganny much – i pa pe ganny ase e prezan nou pa pe vwar  rezilta travay sa bann etranze.  Alor nou pe demann li nouvo Komisyoner, ale al fer bouze sa bann etranze – fer travay e deliver travay.  Nou oule vwar.  E letan i pe fer progre la, i ale i dir SBC vini, vin filmen progre pou fer lepep tande ki pe arive ek son Lapolis.

Mr Speaker, ler mon pe koz koumsa, mon pe osi dir ki Lapolis i en Lorganizasyon ki bezwen ganny gete byen li.  E nou pe anvoy en lapel ankor ek nouvo Komisyoner.  Nou pe dir li vwar letan i ariv lafen lannen la – nou tande Prezidan i ale i pas kot Larme, i al get son bann Solda.  Fantastik e nou dir lala en bon Prezidan ki nou annan.  I get byen son bann Solda ensidswit.  Nou, nou demande ki Komisyoner i  travay close ek Prezidan e i dir Prezidan lafen lannen ou osi vin koup en gato kot Lapolis.  I vre i annan Minis ki pe get Lapolis.  Nou napa problenm ek sa nou.  I vini ansanm, Prezidan ek Minis.  Lapolis osi ti a kontan vwar son Prezidan vin kot li.  Alor i ava annan en gro gato - ava vini Prezidan, Komisyoner, son Minis i a koupe ek son Gard,  ek son Zofisye zot ava  kontan zot osi.  E an menm tan nou demann Komisyoner al get kondisyon travay, kondisyon saler – kondisyon saler bann Zofisye Lapolis.  En Zofisye Lapolis letan i donn tou son donnen, ler i retire, parey li menm li Komisyoner dan en pe letan i pou al retire, ler i pou retire ki  i pou gannyen sa pti pansyon ki pe donnen la?  I bezwen annan en bon pansyon.  Dan tou pei dimoun i annan – Lapolis letan i retire, i annan en pansyon ki fer ou santi poudir wi ti vo lapenn pour mwan sakrifye mon lekor pour mwan vin en Police Officer.  Police Officer i pa parey sa boug laba ki pe fer nenport ki travay li.  Son travay i pli riske.  Son travay i pli nob.  I pli enportan.  I annan en ta risk ki en Zofisye Lapolis i pran e sa i bezwen ganny rekonpanse dan en serten fason. So, si i pa pe tro konnen kan mannyer  pou fer, i normal anba vot ki nou Lasanble nou donn Lapolis i a kapab rod Konsiltan pou guide li.  I enportan akoz i pa pou kapab fer tousala li menm.  I normal sa, i en imen li osi.  I bezwen rod Konsiltan pou guide li e pou kapab vwar ki best kondisyon  ki sa Zofisye Lapolis letan i a fini la, i dir, wi ti vo lapenn mon’n en Zofisye Lapolis – en Police Officer.  E an menm tan i a donnen - letan i la, la i ava donn the best ki i kapab.  I a ede pou enhance nou Lapolis.  I ava anvi – letan ou dir li i annan training la, i ava anvi fer sa training. Letan ou dir li i annan aksyon, i ava anvi fer sa aksyon.  Letan ou vwar li ou dir li i annan voler la tyonbo, i ava tyonbo voler akoz i konnen li, poudir i annan rekonpans pou li.  I konnen li letan i fini la i pa pou parey sa dimoun ki pe fer en senp travay laba kot sepa Ledikasyon kot sepa lot, lot, lot – ouswa kot Lasose.  Konmsi pou li  son travay la, i a vwar li  dan son fason pou li enportan e i pou respekte  - i a donn li, i a deliver. Sa bann keksoz la  nou pe dir ek nouvo Komisyoner ale al fer.  I bezwen ganny fer dan nou pei, sa bann zafer.  Si i pa fer la, i pou fer ki nou Lapolis la bann dimoun ki travay ladan, bann Zofisye la, i pou kontinyen ankoler.  I pou kontinyen pa kontan.  E ler i pa kontan, i ankoler, i fristre ek tou dimoun, i fristre ek nou Lasanble. I dir nou ki ti met sa Komisyoner la.  i fristre ek Prezidan akoz Prezidan ki’n apwent; ki in mete la i dir appointment by the  President.

Ou vwar Mr Speaker, so sa ki nou pe dir, i pa keksoz enposib sa.  I keksoz posib i demann lavolonte.  I demann lorganizasyon.  I demann dimoun ki believe dan sa ki nou pe dir.

So, vwala mesaz ki nou, nou pe anvoy avek nou  Konmisyoner Lapolis pour ki i fer ki pep Seselwa, i feel happy dan son pei.  I feel secure dan son pei.  I santi li byen en an sekirite e i kapab osi epanouir dan en fason korek.

Avek sa Mr Speaker, mon a remersye ou e mon a demann nou Lasanble pou siport sa Mosyon.

Mersi.

 

MR SPEAKER

Bon, okenn ki segonde?

 

HON JEOVANA CHARLES

Seconded Mr Speaker.

 

MR SPEAKER

Ok. Onorab zis pou les ou konnen ki napa nanryen ozordi anba nou Standing Order ek nou Rules of Procedure Komite, ki anpes nou konstitye dan en Komite e call in en Nominee pou Commissioner Police, Minis nenport kwa e kestyonn li e apre nou rezwenn dan Sesyon Plenyer e fer en deba lo la.  Nou kapab fer li ozordi si nou oule.  Petet  i zis ki nou napa sa tradisyon. Ok, Onorab Charles ou annan lentansyon koze, ouswa…?

 

HON JEOVANA CHARLES

Yes, Mr Speaker.

 

MR SPEAKER

Proceed.


HON JEOVANA CHARLES

Mersi Mr Speaker.

Mr Speaker, Mosyon devan nou pe demann nou Lasanble, pou aprouv lapwentman Mr Reginald Elizabeth koman Komisyoner Lapolis.

Wi, Mr Speaker, lapwentman Mr Elizabeth i vin a en moman kot Lapolis pe pas atraver en transformasyon profon, ki annan pour bi donn sa Lafors en nouvo direksyon e e donn lepep Seselwa  en nouvo lespwar dan  nou Lapolis.

Mr Speaker, mon realize ki responsabilite en Komisyoner Lapolis, pou fer li fer sir ki lepep Seselwa i viv dan lape ek sekirite - ki nou ganny sa ki meyer. I vreman dir ozordi fas a sa kantite defi ki sa Lafors pe fer fas avek.  Mr Elizabeth, in fer en long karyer dan Lafors Lapolis.  In okip plizyer pozisyon dan Lafors.  Mon swete ki sa ki in aprann atraver son travay, atraver travay ki in fer dan Lafors, sa ki in aprann i ava ede pou li desarz son responsabilite koman en Komisyoner lo en o nivo, ki a fer Sesel e tou Seselwa fyer.

En keksoz ki konsern mwan par kont Mr Speaker,  i pandan sa bann dernyen lannen, mon’n remarke ki bokou zenn ki’n rantre dan Lapolis zot in kite, zot in ale.  Mr Speaker, sa i trakas mwan i se ki dan Lapolis, mon ti ava kontan vwar ki atraver travay ki bokou bann zenn in fer dan Lafors, sa bann zenn ava ganny en loportinite, pour zot si oule, devlop en karyer dan Lafors.  Mon ti a kontan trouve ki a lavenir, nou annan bann zenn ki’n komans dan Lakademi Lapolis ki’n travay pour en kantite letan, ki’n develop son karyer dan Lapolis ki nobou vwar en karyer kle devan li dan son travay e servi sa bann loportinite ki i a gannyen pour li kapab ariv lo  sa nivo kot li osi, i a ganny en loportinite pou pran bann pozisyon kle dan Lafors.

Mr Speaker, sa ki mon ti a kontan vwar  dan Lapolis se ki sa Lafors i organiz li dan en fason ki lazenes Seselwa, i kapab travay devlop son karyer e apre sa arive, ganny enn loportinite pou ariv lo en nivo profesyonnel.  Zot a devlop zot karyer dan diferan laspe e Divizyon dan Lafors Lapolis.

Mr Speaker, mon swe par kont se vwar en Lapolis ki kapab reentrodwir sa Community Policing ki ti’n deza komanse Roche Caiman e ki ti pe mars tre byen avek lekspertiz neseser. En reorganizasyon striktir rezyonal efikas avek lantrennman neseser, avek bi pou donn plis lotonomi e pouvwar plis accountability lo nivo rezyonal; revwar sistenm Bit ek Patrol pli efikas dan Victoria  e dan distrik, pou kapab ranforsi vizibilite Lapolis avek bi pou dekouraz delenkans  e vol partou.  Revwar zot striktir Ran an akor avek grander nou Lafors Lapolis isi Sesel e pou swiv par Letablisman en sistenm Performans evalyasyon ki pou ankouraz devlopman, sirtou bann zenn rekrite e determin fitir promosyon ki pou baze strikteman lo performans e merit, ki ava servi pou ankouraz bann zenn pou reste e kontinyen zot karyer dan Lafors Lapolis, pour ki zot osi en zour ranplas tou sa bann etranze ki swadizan pe fer en diferans dan nou pei.

Mr Speaker, Mr Elizabeth in servi 43an dan  nou Lafors  Lapolis e in reste touzour    lwayal dan son karyer malgre   bokou defi ki nou konnen ki  Lapolis in rankontre dan son  parkour,.  En karyer ki’n  permet li grandi e akimil konesans ek leksperyans atraver bann diferan Ran ki in okipe depi 1973 ziska ler i  ti zwenn sa Lafors ziska son apwentman koman Asistan Komisyoner Lapolis - en pozisyon ki i ti pe okipe ziska son apwentman koman Komisyoner.

Mr Speaker, lo sa not sa ki reste pour mwan fer, se zisteman pran sa loportinite  pour swet Mr Elizabeth tou de bon dan son travay ki i pe al fer e parey mon’n dir Bon Kouraz; e mon swete ki i ava fer Sesel loner atraver son travay e anmenn keksoz ki ava bon e pli meyer pour Sesel e lepep Seselwa.

Mr Speaker, mon ti a kontan pran sa lokazyon osi, pour mwan remersi Ex-Konmisyoner Quatre ,pour son bon travay, son travay dir ki in fer e swet li en Bon Retret.  Mr Quatre, mersi bokou.

Mr Speaker, an termin-an mon ti a kontan dir ki mon pou donn tou mon sipor sa Mosyon.

Mersi Mr Speaker.

 

MR SPEAKER

Onorab Vengadasamy.

 

HON SHERYL VENGADASAMY

Mersi Mr Speaker.

Bonn apre midi Mr Speaker.  Bonn  apre midi tou Manm koleg Onorab.

Mr Speaker, koman en Ex-Zofisye Lapolis dan sa  Lasanble, permet mwan komans mon lentervansyon lo remersye Mr Quatre Komisyoner prezan e aktyel pour lemoman, pour son devouman, pour son devosyon e son long servis dan Lafors Lapolis.

Mr Speaker, mon’n toultan dir dan sak mon deliberasyon e mon’n toultan enn ki’n koz touzour e pou toultan koz pour Lafors Lapolis.  (1) Akoz mon’n deza enn manm sa Lafors.

Lafors Lapolis i reste – i annan en plas spesyal dan mon leker.  I mon premye profesyon e mon’n toultan dir i mon premye lanmour.  Mon’n donn 8an mon lavi – mon lazenes depi laz 19an sa Lafors.  In en landrwa mazer ki’n form mwan.  In donn mwan Disiplin, Ladrwatir e konn fason travay.  Mon’n menm travay anba Mr Quatre e osi Mr Elizabeth ozordi ki mon pe al siport son nominasyon.  Koman en Ex-fanm dan- Liniform, mon santi, mon merit koz lo sa nominasyon. Premyerman (1) lo Lafors Lapolis.

Lafors Lapolis i enn ki ganny mandate anba Konstitisyon pou asir sekirite entern toulezour nou pei; kot i merit annan Lord ek Lape – kot Drwa tou sitwayen i merit ganny respekte, kot vyolasyon Lalwa i merit ganny deal avek parey Lalwa i preskri e lazistis ganny servi; kot manda  detekte Krim i merit mars kotakot avek mekanizm pou anpes oubyen act as a deterrent pou komet krim; kot langazman e partenarya ek piblik i primordyal ek li;  kot Service without fear, favor affection or ill will, i ganny onore.  Ozordi i annan bokou e divers persepsyon lo nou Lafors Lapolis – en lekspektasyon piblik ki vreman o, konportman e profesyonnalizm nou bann Zonm ek Fanm  dan-Liniform, osi responsabilite sa ki ansarz e diriz Lafors.  Lafors Lapolis ozordi i demann en nouvo souf.  Nouvo Lalwa pou regularize son fonksyonnman.  En Police Force Act ki toultan depi sa dernyen 4an nou pe demande ki pli modernize, e pli a nouvo lekspektasyon e osi fonksyonnman nou nouvo Lafors. En nouvo lenerzi, en nouvo fason fer – en sanzman limaz pozitif nou Lafors Lapolis.

Mr Speaker, Lapolis i merit adopte en lapros – en public-friendly approach.  Dernyerman mon ti Swaziland e mon ti vreman enpresyonnen par zot Lafors Lapolis.  Zot Zofisye, zot premye keksoz ki zot ti annan se fason koze ek zot piblik.  Letan en Zofisye i aret en manm piblik lo semen pour en vyolasyon trafik, son premye keksoz i ti dir en bonzour, i ti entrodwir son lekor e i ti annan en very friendly approach avek son piblik - an tout rekonesan ki sa manm piblik in komet en lofans, me an tout rekonesan ki i son devwar pou li edik sa manm piblik – pou li koz ek li e  osi pou donn li sa sans osi pou li reazir e osi pou li konn en pti pe kwa k,i pe pase.

Mr Speaker, ozordi Lafors  Lapolis i enn ki parey Onorab Charles in dir, in toultan dan en serten sans reste parey.  Ou pou pas kot bann Stasyon ozordi, ou pa pou vwar bokou devlopman.  Ou a vwar Mont Fleuri wi, i pe ganny re-aranze.  Anse Aux Pins ki ti sipoze ti pe komans reorganize, ziska prezan nou pa ankor vwar li  materyalize.  Me Santral, Kordgard Santral i ankor parey.  Kordgard Anse Royale i ankor parey.  Kordgard Beau Vallon i ankor parey.  Kordgard Glacis i ankor parey.  Mon pe demande avek sa nouvo Komisyoner Lapolis, ki nou Gouvernman e nou tou, nou pran, nou revwar en pe nou lenportans nou Lafors.  Sa mon pe dir avek tou senserite avek tou lonnekte koman enn sa Ex-Fanm dan-Liniform.

Mr Speaker, Lafors Lapolis i reste sa Lafors ki mon pou toultan dir i premye Lafors dan okenn pei demokrasi.  I asir sekirite entern en pei e son sans, son vre valer i merit ganny donnen, pa zis dan Bidze, me osi par rekonnet osi sa bann landrwa ki sa bann Zonm ek Fanm pe travay, zot resours ki zot bezwen.  Donn zot sa lapresyasyon.  Donn zot sa valer; montre zot poudir ki wi letan ou en Zofisye Lapolis an menm tan ki ou, ou drwa respe sa sitwayen Seselwa, me sa sitwayen osi i drwa ou sa respe.  Nou merit revwar nou bann Lalwa ki out of date. Ozordi nou Lafors, nou Komisyoner pa merit vwar li koman zis i enn ki son kad Lalwa, ki fer sir ki dimoun i konport li dapre Lalwa.  Me i osi merit pe pous ek Gouvernman bann landrwa kot i santi poudir Lalwa in ler pour nou revwar.

Lalwa Trafik i en  landrwa mazer ki nou merit revwar.  Ozordi nou vwar Gard lo semen toulezour, zot pe asir en Lalwa Trafik ozordi ki date depi 1972 e ki pa an lakordans avek nou semen – i pa an lakordans avek motoris ki pe servi.  Ozordi nou vwar Traffic Light - dimoun i servi li left, right and centre.  Zebra Crossing i servi li left, right and centre.  Ozordi nou vwar scooter, nou vwar moter.  Onorab Vidot ti koz lo la dan son Speech Bidze.  Nou vwar scooter nou vwar moter. Me nou pa vwar Lalwa ozordi ki pe mars kotakot avek bann nouvo sanzman.  Dan Bidze pei nou’n vwar Gouvernman in met en sonm larzan pour Drive Racing. Me ozordi Lafors Lapolis nou pa ankor kapab, come up avek en bon solisyon pour nou bann zenn ki kontan sa koman en Sport. E dan pa zis tay deryer zot, wi zot pe komet en lofans, mon totalman dakor, me  an menm tan osi pous ek Gouvernman poudir be sa nou ganny sa problenm tou le Vandredi.  Nou ganny sa problenm tou le Sanmdi  e lala ki nou, nou panse koman en Zonm ek Fanm-dan-Liniform ki merit ganny fer (1)  akoz nou rol primordyal se pour sov lavi – se pou sov lavi e pou protez propriyete – lala ki nou, nou panse ver demokrasi modern, dan en sosyete modern ki merit ganny fer ek sa bann tel zenn ki annan sa tel pasyon, sa tel dezir.

Ozordi nou koz dimoun anbelir zot lakour an met nouvo rido tou le 6 mwan, be en loto i osi parey.  Ozordi i annan en lanmour ek pasyon enorm pou sanzman alloy ring ,pou met nouvo masin – me nou vwar en Lafors Lapolis ozordi ki letan i vwar ou pase ek en tint, i dir ou poudir wi, i kont Lalwa, li menm li i pa konnen ki son Lalwa i dir e an menm tan osi li menm li i merit kosyan poudir, be this is the modern day of thinking. Eski nou merit revwar ouswa pous pou Minis pou dir - be non lemonn i egzize ozordi ki i annan transpor ki antre avek serten kouler tint ozordi e ki nou, nou fer dan sa? E ki nou, nou fer pour nou ankouraz sa pasyon nou pep, me an menm tan asire ki nouvo Lalwa i egzize, ki zot pa pe kas Lalwa me nouvo Lalwa i mars kotakot ek devlopman lemonn – i mars kotakot.  E sa ki Lafors Lapolis i merit pe look up too. Sa ki i merit pe fer dan sa prosen 3an/4an.  En Lapolis modern en Lapolis bouze – en Lapolis vibran – en Lapolis inovatif – en Lapolis ki think outside of the box, Mr Speaker.

Ozordi Lapolis i merit zwe en rol pli edikatif.  Nou sipoze annan – dernyen fwa letan mon ti ankor dan Lafors, nou ti annan nou Public Relations Officer; nou ti annan nou en Gazet ki dan Lafors nou ti annan, ti sorti tou le 15 zour, me sa pa merit reste zis within the Force, i merit sorti an deor Lafors ozordi.  Pa bokou bann manm piblik ozordi ki konnen kwa ki en lofans, kwa ki pa en lofans, kwa ki i pe ekspekte ek son Lafors – ki lofans ki i merit al kot Kordgard ouswa ki lofans ki merit reste kot li.  Mon krwar Lafors Lapolis i merit sorti pli for ki sa pou  edik nou pep lo en kantite keksoz ozordi.  E pran li koman enn nou latas anba Prevention of Crime - pran li koman enn nou latas primordyal.

Mr Speaker, mon pa pou kapab pa koz lo Lafors si mon pa pou koz lo Disiplin.  I annan 2 Lafors dan pei. I annan Lafors Ladefans ek Lafors Lapolis.  I vre par ler nou dir ki Lafors Lapolis pa pe ganny byen gete, ouswa pa pe ganny respekte me par ler osi nou bezwen kestyonn nou lekor from within. Kwa ki nou pe fer pour nou merit ganny sa respe.  Kwa ki nou bann Zofisye Lapolis nou merit pe fer pour nou merit ganny sa respe.

Mon rapel mwan letan mon ti antre, Mr Speaker, an 2000 mon ti ganny – mon pou apel sa  en leson tre, tre for 1an Lakademi lo Disiplin e bann pinisyon vreman, vreman fermal, ki ozordi in fer mwan sa madanm ki mon ete ozordi. E mon ti annan en fason mannyer mon ti met mon liniform.  Ti annan en fason mannyer mon ti pey mon seve.  Ti annan en fason mannyer mon ti adres mon Siperyer.  Ti annan en fason mannyer mon ti adres en Manm Parlman.  Ti annan en fason mannyer mon ti debout e ti annan en fason mannyer mon ti adres mon manm piblik.  Me ozordi i sagrinan pou vwar poudir ou pas lo semen, i annan serten fason sanze nou Zofisye Lapolis an term zot liniform. Appearance and  bearing ti esansyel.  I pa conducive avek limaz ki nou  ti anvi pour nou Lafors ozordi.  Nou vwar bann madanm Zofisye Lapolis ozordi zot fason sanze  dan-Liniform i pa conducive e nou konportman - nou ti ganny dir poudir  nou en Zofisye Lapolis dan moman letan ki ou sermante, ou pa en Zofisye Lapolis letan ou pe travay shift ouswa letan ou pe travay.  Ou en Zofisye Lapolis 24 hrs a day tou dilon ou lavi ziska ler ou tir sa iniform lo ou e savedir ou konportman dan Stasyon, ou konportman  an deor Stasyon – piblik pe get ou.

E mwan mon krwar poudir nouvo Komisyoner i annan en defi – en defi se pour reentrodwir disiplin e disiplin dan sa Lafors. E mon’n toultan krwar plito nou annan nou 50 Zofisye Lapolis disiplinen, konpetan, kalib, koste ki travay tre byen, ki nou annan nou 100 Zofisye Lapolis ki donn nou latet fermal napa disiplin, napa respe pour piblik, napa respe pour sa liniform e osi pa pe delivre.

Mr Speaker, mwan osi anvi koz ek mon bann Zonm ek Fanm dan-Liniform.  Mon konnen pou annan bokou koze lo nominasyon  Mr Elizabeth koman nouvo Komisyoner, me mon ti a kontan petet koz espesyalman pour mon bann Zonm ek Fanm dan-Liniform.  Zot, zot konn Mr Elizabeth.  I annan serten zot, ki’n travay ek li bokou pli pros. I annan serten zot petet pa’n deza travay avek li.  Mon konnen ki bokou zot serten ti annan serten lekspektasyon ouswa osi ti annan lezot panse dan Lapolis.  Mwan osi konnen poudir dan Lafors  ti annan serten divizyon pandan en serten peryod letan osi; e osi serten fason vwar.  Mon pe koz ek nou bann zonm ozordi poudir si nou anvi vwar sa sanzman dan Lafors, annou komans li pa nou menm.  Zot bann premye – premye bann Konstab, nou bann Lance Kaporal, nou bann Kaporal - zot premye donn sipor nou nouvo Komisyoner Lapolis pou li kapab anmenn sa sanzman.  Zot osi revwar zot menm en pti kou dan sa lenstans, ki zot, zot pe fer – ki nou, nou pe fer pou anmenn nou Lafors pli devan?  Ki nou merit sanze  ek nou menm, pou anmenn nou Lafors pli devan?  Ki mon merit revwar?  Mon konsernen ozordi letan mon vwar enn bann Ex-Zofisye Lapolis pe devwal keksoz ki’n ganny fer dan peryod zot karyer oubliye poudir letan nou ti sermante, nou ti siny en Secrecy Act. Mon pe demande ki Komisyoner i revwar sa. Eski nou oubliy son lenportans?  I zis parey ou antre dan nenport ki louvraz.  Si ou’n siny en Secrecy Act savedir nenport ki keksoz ki ou’n come across within sa peryod letan, i sipoze reste en sekre ant ou ek sa Lorganizasyon ki ou’n sa.  E mwan mon konsernen par sa Mr Speaker, e mon pe demande ki nouvo Komisyoner i met en lanpler lo la, pou edit nou bann Zofisye pou dir - letan nou sermante me osi nou siny en Secrecy Act; e ki son valer sa Secrecy Act Mr Speaker.

Mr Speaker, pou revwar Lapolis an menm tan nouvo COMPOL i annan li en defi, me an menm tan osi i annan li bann Forte.  Nou annan nou en Lafors.  Nou annan bann zonm ek fanm ki kapab e konpetan.  I wi, nou annan serten ki annan serten latitid lesefer ki merit ganny deal avek, me selman nou annan nou en fondasyon.  Nou annan nou en pep Seselwa ozordi ki kantmenm nou annan nou problenm, be selman nou kontan nou pei, nou kontan linite, nou kontan lape, e nou anvi vwar sa.  E nou pare pou donn tou sa sipor nouvo Komisyoner e en nouvo Lafors Lapolis.

Mr Speaker, koman enn mon swe pour sa nouvo COMPOL, se ki nou fer Lapolis vin enn sa Lafors limero (1) dan Sesel ki pour se ki Gouvernman i donn plis resours, plis latansyon pou amelyor nou Lafors – pa zis an term amelyor saler nou bann Zofisye; me osi zot kondisyon travay, zot lanvironnman travay.  Elev nou Lafors, nou bann Kordgard ki’n vye; bann Stasyon ki pti e sere.  Inifye nou bann zonm ek fanm, donn zot plis training. Onorab Charles in fer resorti sa; etabli bann sistenm an plas - bann kriter kler lo Promosyon  ki a evite annan divizyon, e lakoler, fristrasyon dan nou Lafos.  Etablir.  Annou aret met sa bann zafer kot bann Sef nou annan relasyon avek nou bann subordinates apre i zwe en tel konplikasyon letan pe donn promosyon, ouswa pe transfer –ouswa pe isi, pe laba.  Annou elimin sa e evite ki nou Lafos i annan bann tirayman ki kree divizyon. Annou get dan welfare nou bann Zonm ek Fanm dan-Liniform.  Zot sa bann dimoun i lev-e letan nou, nou pe dormi, sa bann dimoun pe travay.  Letan nou, nou pe fete dan 5 Zen, nou pe fete le 18 Zen, sa bann zonm ek fanm pe travay.  Tan ki Street Party pa fini, minwi-1er bomaten zot pa ale, pou fer sir ki tou dimoun i antre se zot sen e sof.  Letan i ariv en lanmor fatal, sa bann dimoun i premye.  E sa bann keksoz ki zot vwar, i bann keksoz ki personn pa pou anvi vwar.  I bann krim, bann sityasyon ki personn pa pou anvi.  Letan sa lekor mor in pouri, in komans dekonpoze pou plizyer zour i byen pi.  Ti annan enn Mont Buxton lot fwa la, premye dimoun ki ale se nou bann  Zofisye Lapolis.  Letan nou kriye i annan lager dan kanton, premye dimoun ki nou kriye se Zofisye Lapolis.  So, annou donn sa bann Zonm – annou get dan zot welfare zot osi.  Zot osi pa zis zot welfare larzan me zot welfare sosyal, emosyonnel e mantal.

Mon pe demande ki sa nouvo Komisyoner i regard sa.  E annan en solidarite nou bann Zonm ek Fanm.  Nou ti sey komans sa dan Lafors Lapolis.  Fodre nou aprann defann nou lekor.  Pa esper piblik defann zot.  Komisyoner fotespere i instill sa.  I pou annan piblik ki pou kritik nou Lafors.  I pa savedir ki tou nou Zofisye i byen fer, me solman  annan en linite, ki letan en Zofisye in mal fer annou deal ek li byen. Annou deal ek li entern-m-an.  Me osi annou osi prezerv li osi ki i konnen poudir - wi, mon’n mal fer me osi annou donn li sa sans, sa valer poudir tou dimoun i fer fot. Annou pa zis krisifye li, ouswa pa zis pous li, ouswa whatever. Donn li en sans me an menm tan osi fer li konpran poudir - be la mon’n mal fer.  Nou ti annan sa o komansman kot nou aprann defann kanmarad. Letan en Gard i ganny bate Anse Royale fodre sa Gard ki Anse Aux Pins i tande poudir son koleg in ganny bate la, in kapab annan sa leker pour li monte pour li al gete ki’n arive avek mon frer ek ser. Koumsa tou Lafors Lapolis dan lemonn i travay - ou tous enn sa Zofisye dan sa liniform, ou pou tous zot tou.

Me annou donn respe nou Zonm ek Fanm dan- Liniform me an menm tan nou osi nou Zonm ek Fanm dan- liniform annou donn nou lekor respe.

Mr Speaker, ekskize nou bezwen annan en Lafors kot  i annan enparsyalite - kot i kle akoz lepep Seselwa pa anvi vwar zis bann uniform bearers me bann uniform bluers osi, kot dele letan risk-on-scene i amelyore sirtou dan bann ka  fatal e trazik.  I fer lapenn pou vwar ki i pran 1erdtan pou Gard ouswa pou Lanbilans attend en scene kot en dimoun lekor in mor i la lo scene e tou dimoun pe pase pe tir portre - pe gete.  Nou ti vwar Minis i vin dan Lasanble lot fwa.  Mon pe demande ki Komisyoner Lapolis bann ti pti keksoz koumsa, i met lanmen ansanm ek son Minis ek bann Minister konsernen, pour zot deal avek enn fwa pour tou; kot nou pa lager lekel si Korbiyar pou pran lekor ouswa si Lanbilans pou pran lekor – enn fwa pour tou i en lekor ki’n mor,  e nou drwa respe sa lekor, nou drwa respe sa manm fanmir; kot sa i ganny met bann diferans koumsa la, nou zwenn ansanm e nou bezwen travay lo la.  Kot vre diferans Mr Speaker, i ganny fer dan la kominote.  Mon dakor avek Onorab Charles. Ozordi Gard i fer patrol.  Annou aret fer patrol dan transpor.  I enportan patrol dan transpor.  Annou sorti,  annou al dan bann pti… ….Annou koz ek nou piblik.  Annou demann li - madanm ki  mannyer ou apele - ou’n vwar en nouvo dimoun ki’n pase isi?  Annou retourn Community Policing parey i i ti ete avan.

Mon dernyen parol i pou lepep Seselwa Mr Speaker.  Nou annan nou ozordi en pep ki vreman beni.  Nou dan en pei ozordi ki napa ni Civil War. I vre nou annan en tansyon politik ki la ki iminan.  I vre nou annan serten keksoz ozordi - nou annan diferans politik.  Me pa sa ki merit fer nou divize koman en pep.  Me an menm tan osi lepep Seselwa, annou donn sipor.  Si nou oule vwar sanzman, mon pou toultan dir vre sanzman i  komans par nou menm.  Alor si  nou oule vwar sanzman dan Lafors Lapolis, annou komans ek nou menm nou lepep Seselwa.  Si nou oule zis Lafors donn nou respe, nou osi annou donn Lafors respe.  Annou konpran poudir sa bann zonm ek fanm i bann imen.  Annou konpran poudir Lafors Lapolis i en Departman parey tou Departman avek son resours limitasyon e osi son problenm.

Annou annan respe for the Rule of Law. Hon De Commarmond in koz lo la taler - en lofans.  In koz lo dimoun in kraz lo sa madanm?  Be lefe ki zot in mont lo son propriyete i en trespas.  Ou napa drwa vin lo mon propriyete san ki mwan mon donn ou permisyon.  Be nou Lafors i bezwen kapab edik dimoun lo bann keksoz koumsa.  Krase i en common assault.  It’s an offence under the Law e nou oule dir lepep Seselwa, i bezwen konpran poudir Lalwa i ganny mete la pour en rezon e nou bezwen respekte Lalwa.  E lapresyasyon sa bann sakrifis ki nou bann Zonm ek Fanm dan-Liniform i fer.  Mon ti a voudre vwar sa ankor ek nou lepep Seselwa e respe pour nou bann Zonm ek Fanm dan- Liniform. E an menm tan nou bann Zonm ek Fanm dan- Liniform i merit koz ek nou pep pli byen.  Nou merit apros nou pep Seselwa pli byen.  Donn en servis nou pep Seselwa ki pli byen.

Lo dernyen not, mon pe lans lapel ek Lafors Lapolis ki i reganny gete – i pli byen ganny get.  Aranz landrwa travay nou bann Zofisye.  Nou leta  Kordgard.  Annou solider ansanm nou bann Zofisye Lapolis.  Inifye.  Annou renouvle nou langazman pour  nou relev Lafors pou servi lepep Seselwa – Service without fear, favor, affection or ill will.

Mersi Mr Speaker.

 

MR SPEAKER

Bon Onorab  Arnephy.

 

HON BERNARD ARNEPHY

Mersi Mr Speaker.

Mr Speaker, mon ti a kontan dir 2 mo lo sa Mosyon prezante par Onorab DeCommarmond.  Premyerman mon ti a kontan remersye outgoing Komisyoner Mr Quatre ki malgre bokou defi ki’n ganny sirmonte apre midi la, mon panse, mwan personnelman mon vwar poudir ki in fer en travay formidab malgre defi pou anmenn Lafors Lapolis kot i ete ozordi,  E mon swete ki nouvo Komisyoner ler i pran Lofis, i ava ride lo sa bann sikse ki Lafors in fer ziska ozordi e anmenn serten nouvo  inovasyon - serten nouvo fason fer pou fer ki nou vwar en future Seychelles Police Force ki bokou pli efektif, bokou pli efikas e ki a lekspektasyon lepep Seselwa.

Parey nou tou nou konnen Lafors Lapolis i la pou li ranforsi Lalwa, bann Regilasyon e asire ki i annan Lord dan pei. Me ozordi avek konzantir politik sirtou, nou vwar poudir nou Lafors i fer fas avek en kantite defi.  Avek nouvo Lalwa ki Lasanble ti vot lo la, kot Lalwa Rasanbleman Piblik, nou vwar poudir petet Lapolis in perdi serten lotorite, serten pouvwar ki i ti annan e sa souvandfwa i donn nou dimoun tandans krwar poudir nou kapab fer nenport kwa.  Ou kapab rasanble wi.  Me ler nou rasanble nou kapab fer nenport kwa, nou kapab dir nenport kwa. Be mon krwar sa  i pa byen pou demokrasi.  I pa byen pour nou pep e i  pa byen pour nou zanfan ki pe grandi.  Ozordi dan pei i annan en kantite move eleman ki pe arive e kot serten dimoun pour zot, zot panse poudir sa i byen e bann manrmay ki grandi ozordi, zot krwar poudir sa pour zot i byen, e pour mwan sa i fer mwan sagren.

Nou pe koz lo Lapolis la -  zisteman Vandredi pase mon witness en sityasyon kot en zanfan Lekol forse dan P2 - dan P3 ki son paran i en Zofisye Lapolis e pti tantin pe ‘Pil lo li  - pe sant ‘Pil lo li.  Be mon demann mon lekor be kot ou’n tann sa?  Bezwen dan lakour parla kot ou’n tann sa.  E i sagrinan.  Kot ozordi en kantite dimoun pe kestyonn Zofisye Lapolis, zot lwayote anver Larepiblik.  Ou lwayote i anver Larepiblik wi, e ou lwayote i anver sa Gouvernman ki o pouvwar - ki ou kontan sa Prezidan, ki ou pa kontan, ou lwayote i merit reste anver sa Gouvernman. E ler ou ti fer Oath of Allegiance, se sa ki ou ti fer koman Zofisye Lapolis.  Me malerezman ozordi nou pe perdi sa e i sagrinan.  I sagrinan e petet mon panse poudir sa i enn bann defi ki nouvo Komisyoner pou bezwen fer fas avek – pou fer zot son bann Zofisye  realize poudir ou dwatet annan en lwayote anver sa Gouvernman ki ou pe travay – ki ou pe deservi.  So, Mr Speaker sa i en premye pwen ki mon ti a kontan fer sorti dan mon lentervansyon.

Dezyenm pwen se ozordi Krim.  Krim in modernize; pa zis dan Sesel – dan larezyon – dan lemonn.  I annan en kantite bann krim ki 20an pase, 25an pase, nou Lafors Lapolis pa ti pe vwar nesesite pou fer fas avek - ozordi nou pe fer fas avek.  Par egzanp nou annan Terorizm.  La zisteman semenn pase mon’n tande Maurice serten lesey latanta dan Kapital Port Louis par serten group.  Sa ki dir demen sa pa pou ariv kot nou?  So, nou bezwen annan en Lapolis - en Lafors Lapolis ki efikas, ki pou kapab fer fas avek sa bann sityasyon.  Ozordi nou pe koz lo Cyber crime par egzanp; dimoun servi mwayen Internet pour zot fer serten aksyon kriminel. E nou an retour nou bezwen fer sir ki nou Lafors Lapolis, nou annan bann Zofisye ki byen train, ki’n ganny formasyon adekwat pour kapab fer sa dan nou Lafors.  E zisteman bomaten, mon pe lir enn bann dokiman ki nou’n ganny prezante avek.  Mon kontan.  I annan en zenn garson, Terrence Bouzin ki ti ansanm avek mwan Australie - fer son letid.  In ganny sans pou li al fer son Masters e ozordi, mon vwar poudir i pe ganny apwente dan serten pozisyon, pou li donn Lafors Lapolis koudmen fer sa bann Deteksyon, Envestigasyon ensidswit.  E mon krwar se sa ki  Madanm Onorab Charles in koz lo la taler - ki mannyer nou ekip nou bann zenn Profesyonnel pour zot kapab fer sa profesyon.  So, mon mazinen poudir sa, it’s a very good move.

Ozordi nou pe koz en kantite lo People Smuggling. Trafik Imen.  Petet pa ankor ariv Sesel as such, me evantyelman avek mouvman ki arive, nou bezwen annan en Lafors Lapolis ki kapab fer fas avek sa bann sityasyon.

Mr Speaker, mon tir sapo avek sa tim dan Lapolis ki’n travay pandan sa 2 dernyen lannen, pou asire ki nou anmenn Lafors lo sa nivo en pti pe pli efikas.  E sa in ede pou anmenn en meyer zimaz pou Lapolis.  E sa nou  pa kapab deny sa.  In ede pou anmenn en meyer zimaz pour nou Lafors Lapolis malgre ki ozordi i annan serten Zofisye ki here and there li, i pe sey tou fason pou li denigre nou Lafors Lapolis.

Lafors Lapolis in anmenn en pti pe plis desantralizasyon; par egzanp servis CID ozordi in desantralize. E sa i en fe ki nou merit aksepte.  Ozordi i annan serten krim ki arive dan bann rezyon - en dimoun i kapab dan en dele letan ase rezonnab ganny en feedback lo progresyon son ka; e sa i avek sa desantralizasyon ki’n arive.  E ankor sa i en move pozitif ki mon mazinen nouvo Komisyoner ki pou vini, i pou bezwen travay pou asire ki sa i ranforsi.

Ozordi Response time ki en Zofisye i response lo en crime scene, malgre i reste defi, nou merit aksepte poudir in improve en kantite. E mwan dan mon distrik mon konnen, akoz mon travay very close avek sa Zofisye ansarz  ok, lo en baz regilye nou kominike.  Mon konnen poudir in improve. E menm manm piblik dan mon distrik ler ou koz avek zot dir ou poudir, in annan en  amelyorasyon.  So, ankor sa nou bezwen donn kredi Lafors Lapolis. Me nou konstate poudir i reste ankor zefor pou mete pou fer li vin pli byen.

Vizibilite dan Lapolis, dan la kominote sa ki nou apel Community Policing.  Mon kontan pou dir ozordi dan mon distrik, in amelyore e mon mazinen serten distrik ankor.  Ok, malgre nou ti a kontan vwar plis patrol apye wi – nou ti a kontan vwar plis Lapolis pe patrole apye, me in annan en improvement dan sa ki nou apel Community Policing.

Mon kontan osi note  poudir Labi. Nou’n koz en kantite lo labi pou transpor Lapolis.  In annan, in annan en amelyorasyon.  In annan en amelyorasyon be sa ki nou ti a kontan vwar, se ki still nou ankor pe vwar poudir Lapolis i ankor pe servi en kantite transpor lwe - bann Car Hires par egzanp.  E nou konnen poudir sa i kout Gouvernman en kantite larzan.  E mwan mon swete vwar ankor dan 2/3an en Lafors Lapolis ki annan son prop fleet transpor, avek en bon progranm mentenans e kot sa  i a fer ki sa kantite larzan ki Lafors pe servi pou li invest dan transpor lwe, sa larzan a ganny servi pou invest dan lezot areas parey in koz lo la - dan bann areas parey Training ….. ensidswit.

Onorab Vengadasamy in koz lo plis Act ki i annan serten provizyon dan sa Act ki outdated. Mon parfetman dakor avek li e mon mazinen poudir nouvo Komisyoner i merit fer sa enn son priyorite pou vwar tou bann konteni, tou bann Regilasyon anba sa Act ki outdated e pou anmenn li azour avek legzizans ozordi.

Mr Speaker, zis pou donn legzanp konkret lo sa ki mon pe fer - zisteman taler mon’n al en pti kou Providence, mon’n park mon transpor e ler mon sorti en dimoun in tap ek mon transpor. Ok, in fer serten domaz.  E mon’n bezwen al kot Lapolis pou al fer en statement e vwala ler ou  involve dan en lensidan aksidan, i annan en slip ki Lapolis i donn ou.  E Lapolis i dir ou, ou oblize siny sa.  E mwan mon’n dir ek sa madanm – sorry mon pa pe sennyen sa - akoz lo la ki i mete; driving negligently, recklessly, dangerously without reasonable consideration for other road users.  So, mon krwar sa mon’n deza anmenn sa en Kestyon dan Lasanble - mon ti demande ki sa nou bezwen aranze sa.  Ok, ou pa kapab fer mwan siny… mwan mon’n park mon loto, mon’n al en pti kou Labank ler mon’n sorti en dimoun in tap lo mwan -  ou dir mwan siny sa mon’n drive recklessly? So, mon krwar i bann keksoz ki nou bezwen desito posib amelyore. E ozordi en kantite Zofisye Lapolis pe dir sa bann dimoun malonnet pou li refiz-e siny sa.  I mete lo la sa Zofisye mon’n al Kordgard Mont Fleuri – mete lo la refuse to sign. Of course mon bezwen refuse to sign akoz the content of sa ki lo la i pa reflekte sa sityasyon ki’n arive. So, sa i en legzanp tipik bann keksoz ki nou Lafors Lapolis  nou bezwen regarde.

Mr Speaker, Lapolis en pe letan  mon nepli vwar - en fason ki ti deter bann dimoun ki ti pe enplike dan bann aksyon kriminel, se ki tou le swar ou ti tann - mon pa konnen si sa i kot Human Rights ki’n aret fer, be mon mazinen ler sa ti pe ganny fer i ti en deterrent pou bann dimoun ki ti involve dan bann aksyon kriminel – kot serten non ti ganny pibliye lo medya Nasyonal – Televizyon menm serten portre ti ganny montre, me pour en pe letan sa in aret mon pa konnen pour ki rezon.  Petet pli tar nou a ganny serten leksplikasyon avek nouvo Komisyoner akoz sa in arete.  Be sa mon mazinen poudir i en fason ki deter serten dimoun pou  kontinyelman komet serten act kriminel kont swa propriyete son prosen, swa kont sa prosen li menm.  So, mon mazinen sa i bann keksoz ki nou bezwen revwar si i annan son merit why not reentrodwir sa zafer.

Pathway progression mon krwar i en lot keksoz ki prezan mon pou dwell lo la, me sa osi i kree serten fristrasyon sirtou parmi nou bann zenn Profesyonnel ki deside zwenn Lafors Lapolis ok – ki annan tou sa kapasite me at a certain point i vwar li i stuck.  So, mon mazinen parey nenport ki Lorganizasyon dan Lapolis osi i merit annan en clear pathway pour lafason ki en dimoun i progrese.  I pa neseserman zis progresyon an term Ran.  Progresyon pa neseserman an term Ran. Progresyon i osi an term ou kapasite pou kapab delivre dan serten area spesifik. Ozordi mon vwar en kantite Zofisye Lapolis ki mon koz avek i dir ou, poudir malgre ou’n ganny train koman en Zofisye Zeneral dan Lapolis me pli tar ou ganny spesyalize dan serten domenn spesifik e once ki ou fer sa spesyalizasyon par egzanp - ou vwar ou, ou ganny met dan en lot Seksyon ki pa neseserman reflekte sa area kot ou train e ou ti kapab deliver pli byen.  So, mon krwar tousala i bann defi ki nouvo Komisyoner i bezwen regard ladan e  fer sir ki nou adrese.

Mr Speaker, mon pwen final se ki ozordi mon ti kontan vwar en Lafors Lapolis profesyonnel dan le sans sa Zonm dan-Liniform.  Ozordi i sagrinan - mon’n study Australie – Australie en Zofisye  Lapolis ler i kit Stasyon si i konnen i pe al dan Bazar pou al fer son shopping, i sipoze tir sa liniform lo li -  i dan son lenz sivil. Ki ozordi nou, nou vwar nou Zofisye Lapolis madanm gro, gro kaba dan zepol, gro, gro sak sorti Bazar pe trenn pwason – i kree en move zimaz lo sa Lafors.  Mon mazinen poudir en Zofisye Lapolis  i sipoze si i dan son liniform, i merit fit and proper. I pa merit pe trenn tou sa bann bagaz avek li akoz i pa reflekte byen e son zimaz li menm. E menm serten sa bann Zofisye zot liniform ok, lafason ki son kondisyon izyenik i pa fer dibyen lizye bann dimoun ki vwar.

So, mon krwar tousala i bann keksoz ki nou merit regard seryezman ladan, si nou anvi ki Lafors i ganny sa status ki i merite.

So, finalman mon ti a kontan Mr Speaker, swet nouvo Komisyoner dek ki i pran Lofis tou le meyer.  Annan en zorey – ekout son bann Zofisye - ekout son bann lantouraz ki travay avek li.  Ekout nou isi dan Lasanble; nou bann propozisyon ki nou fer, pa avek bi pou detri Lafors me avek bi pou ed Lafors kontinyen fer pli byen.  So, si nou kapab pran tousala an kont, mwan mon garanti, mon konvenki ki nou pou annan nou en Lafors Lapolis ki bokou pli efikas – en Lafors Lapolis kot lepep Seselwa pou annan bokou plis konfyans ladan e kot nou kontinyen lo sa progre pou asir plis stabilite pour tou nou dimoun  isi Sesel.

So, avek sa Mr Speaker, mon pou a-port mon sipor lo sa Mosyon.

Mersi.

 

MR SPEAKER

Onorab Payet.

Maria Payet yes eski ou pare?

 

HON MARIA PAYET-MARIE

Mersi Mr Speaker.

Bonn apre midi  Mr Speaker.  Bonn apre midi tou koleg Onorab.  Avek lapwentman en nouvo Komisyoner Lapolis, lekspektasyon piblik i o parey Onorab Vengadasamy in fer resorti.  Piblik i ekspekte pou vwar en sanzman dan lafason ki keksoz i ganny fer, dan en fason ki Lapolis i vin pli efikas e pli efisyan.  Me en keksoz ki nou kapab apresye koman manm piblik, se sa transformasyon ki’n arive avek Lapolis e sa letan Mr Elizabeth ti asistan Komisyoner Lapolis.

Ler nou pe koz lo lakonplisman Mr Speaker, nou vwar dapre statistic ki’n ganny pibliye, ki nivo krim dan nou pei in desann par o mwen 30 poursan depi lannen pase.  Nou’n vwar bokou plis camera dan Lavil e serten lezot landrwa kle ki pe ede pou pli byen kapab detekte bann Act ki kont Lalwa.  Nou’n vwar osi serten renovasyon bann vye Kordgard e osi konstriksyon nouvo Kordgard.  Tousala se pou ede anmenn en nouvo limaz dan Lapolis; e sa ki ti manke pou fer se byensir annan en nouvo Komisyoner Lapolis, ki pou bezwen akonpanny tou sa bann bon sanzman dan sa Lafors.  Mon krwar ki lapwentman en nouvo Komisyoner  Lapolis parey mon’n dir, i sirman anmenn plis lekspektasyon par manm piblik.

Mr Speaker, lekspektasyon manm piblik se byensir service delivery. Konmela ou tann tou sord kalite leokri de lapar nou pep dan tou Sekter Gouvernman konsernan service delivery - e dan Lapolis sa pa en leksepsyon.  Nou’n tande resaman kot Minis Zafer Entern in fer resorti, ki Lapolis pe delivre dan 24erdtan ki tre byen ler nou pe koz lo sa size Service Delivery. Par egzanp rapor aksidan i ganny delivre dan 24er.  Rapor pandan sityasyon ki en manm piblik son lakaz in kase, e son bann byen personnel in vole, sa osi ki ganny fer dan 24erdtan.  Kot en dimoun ki’n perdi swa son paspor ou ID, i kapab osi ganny attend tou dan menm zour.

Mr Speaker, tousala i bann bon nouvel, bann achievements ki nou pe tande dan Lapolis ozordi, e nou pe ekspekte ki nouvo Komisyoner Lapolis i a build lo sa bann bon keksoz ki’n arive pandan sa 1an pou kapab improve service an zeneral ki Lapolis i ofer; e fer ki li koman en Komisyoner Lapolis i ekspekte kontribye pou anmenn plis professionalism dan Lapolis.

Osi Mr Speaker, toultan nou tann manm piblik pe konplet ki plizyer fwa zot ganny dir ki zot case in perdi – pa konnen kot zot case i ete eksetera e sa i rann dimoun fristre.  Mon ekspekte alors ki avek nouvo lapwentman avek nouvo Komisyoner Lapolis, nou kapab vwar sa kontinite e osi plis sanzman vizavi service delivery an zeneral.

Ler mon regard CV Mr Elizabeth, mon vwar ki i en zonm ki’n pas atraver bann training vigoure pandan tou sa lannen depi 1973 ziskan la.  In spesyalize dan diferan Departman dan sa Lafors, espesyalman Departman Forensic. Alor mon ekspekte ki Mr Elizabeth, i a fer li son priyorite pour ki Seselwa i ava ganny  li son  premye e proper Forensic Lab. Sa i en swe pei, akoz?  Akoz souvandfwa  nou vwar ki krim i tarde ganny rezourd oubyen bann sample i pran en bann letan pou anvoy deor e by the time ki i retournen, nou vwar ki i pran bokou letan ankor pour deal avek e sa i fer ki bann fanmir i konfize e fristre.

E mon santi alor, Mr Speaker, ki anvi ki krim in desan par 30 poursan parey mon’n dir oparavan, ki mon ekspekte ki Mr Elizabeth, i kapab instill nou bann Polisye, pour ki zot kontinyen vin bann vre legzanp dan nou sosyete.

Mon dir sa Mr Speaker, akoz menm kantmenm lamazorite Zofisye  Lapolis zot responsab, disiplinen e responsab; menm kanmenm Lapolis  in demontre serten achievements ki mon’n mansyonnen pli boner – menm ki nivo servis an zeneral dan Lapolis pe amelyore, i osi annan serten defayans dan sa Lafors an sa ki konsern Responsabilite, Disiplin e osi Respe pour lezot.  Bann legzanp ki’n ganny mansyonnen par Onorab Arnephy e Onorab Vengadasamy se lafason ki en Zofisye i  konport li ler i pe adres en sitwayen, oubyen i pe deal avek en sityasyon kot Lapolis i bezwen entervenir. E osi lafason ki en Zofisye i portre son lekor dan en landrwa piblik;  koman en Zofisye dan landrwa piblik e osi mank respe pour sa Lafors e osi son liniform.

Mon krwar Mr Speaker, ki nouvo Komisyoner Lapolis, i a sirman travay ansanm avek tou son bann Zofisye - tou son lekip pou ede fer en sanzman pozitif an zeneral dan sa Lafors e kot fodre pran aksyon neseser sa i a ganny fer dan en fason apropriye.  E kot fodre rekonpanse sa osi i a bezwen ganny fer byen.

Mon konvenki Mr Speaker, ki avek son abilite, son leksperyans pandan sa 43an dan Lapolis, mon krwar ki Mr Elizabeth i a kapab delivre pou satisfer lo nivo ki nou pep pe ekspekte e an menm tan evolye an mezir ki Lapolis i evolye.

Mr Speaker, ler mon pe koz lo evolisyon, nou’n aprann resaman ki Minis Zafer Entern in enformen ki Lapolis pe al pli evolye anver Teknolozi.  Mon santi ki Teknolozi i the way forward pour Lapolis. E alor mon ekspekte ki nouvo Komisyoner i embrace sa demars ki pe ganny fer pou fer ki teknolozi i vin sours pou sant devlopman pour Lapolis.

Mr Speaker, pou kapab vin pli profesyonnel vizavi teknolozi, i osi enportan ki bann Zofisye Lapolis i ganny plis motivasyon e permet zot delivre profesyonnelman.  Zot osi bezwen ganny plis training e la parey Mr Onorab De Commarmond in fer resorti, mon a profite pou call lo nouvo Komisyoner Lapolis Mr Elizabeth, pou fer sir ki bann Zofisye Lapolis i ganny tou training neseser, pou fer sir ki zot kontinyen devlope e epanouir pou vin lo sa nivo ki Lapolis i devret arive.

Mr Speaker, mon krwar ki a sa staz, mon a profite pou remersi Komisyoner sortan, Mr Ernest Quatre pour son kontribisyon, son devosyon e travay dir pour Lapolis Sesel pandan sa 49an ki in dan Lafors Lapolis.  E mon swete ki i enjoy byen son retret ki i byen merite – e ki la i ava dormi pli byen e pas plis letan avek son pti zanfan ek son fanmir.  E pou nouvo Komisyoner Lapolis, Mr Reginald Elizabeth, mon swet li bonn sans dan son nouvo responsabilite koman Komisyoner Lapolis Sesel.  Mon santi ki avek tou son abilite e kalite ki i posede e osi avek sipor tou son koleg Polisye, son fanmir e manm piblik an zeneral, i a sirman fer en bon Komisyoner Lapolis; en Komisyoner ki pou travay dir avek devosyon e lwayote anver son travay, son sitwayen e son pei.  Mon swete ki Bondye i gid li e son lekip Lapolis pour ki zot a pli byen delivre e donn en pli bon servis an zeneral tou sitwayen Seselwa. E la Mr Speaker, permet mwan profite avan pou konklir pou profit sa lokazyon pou salye travay dir e kouraz tou bann zonm ek fanm Polisye Sesel.

Mersi Mr Speaker.

 

MR SPEAKER

Onorab Leader Lopozisyon.

 

HON FRANCESCA MONNAIE

Mersi Mr Speaker.

Mr Speaker, pou komanse, mon a dir en gran mersi Mr Quatre pour son kontribisyon e long servis dan Lafors Lapolis.  E pou kontinyen zis 2 pti mo byen sarze - pa pou long.

Fodre note ki en pozisyon Komisyoner Lapolis i pa enn ki devret pran lezer.  An gro lape, sekirite, ranforsi Lalwa e pou reste for e travay for kont Koripsyon pa bann louvraz ki vin fasil.  An plis pou solidifye disiplin dan Lafors Lapolis, pou donn en bon fondasyon, formasyon bann recruits; pou asir en saler rezonnab pour nou bann Zofisye – pou envestir dan lenfrastriktir, dan teknolozi e letid pli avanse pour bann Zofisye i bann antreprann ki bezwen bokou determinasyon, resours e en baz kalib ki mon ekspekte leksperyans Mr Elizabeth i annan.

Lafors Lapolis Sesel i bezwen tou sa e plis.  Mon pou vot an faver sa Mosyon an esper-an e ekspekte-an ki Mr Elizabeth pou kapab delivre sa nouvo souf dan Lafors Lapolis parey ki Seselwa ti a voudre vwar.

Felisitasyon Mr Elizabeth.  Bonn sans e ki Bondye a beni ou.

Mersi.

 

MR SPEAKER

Onorab DeCommarmond.  Right of Reply.

 

HON CHARLES DE COMMARMOND

Mersi Mr Speaker.

Mr Speaker 2 pti koreksyon ler mon komanse.  Mon’n dir ki taler i annan 12 Stasyon Lapolis i annan 14.  Solman le pwen i reste ki depi 1902 ziskan la, napa kantite sanzman.  I annan bokou popilasyon ki’n ogmante e bokou plis problenm me selman lo vizibilite Stasyon Lapolis pa’n ganny ogmante sa kantite.

E dezyenm pwen se ki  ou pe dir nou ki nou kapab demann pou fer Komite Lasanble pour nou apel Komisyoner wi, me mon pe al pli lwen ki sa – mon pe demande ki in future nou fer li in camera. Sa en lot deba pour en lot moman.

Mon apresye bann komanter ki’n fer.  Bann entervenan ki zot in koze lo sa nouvo apwentman Mr Elizabeth.  E mon demande osi detrwa pti keksoz konmsi ki ganny regarde letan Mr Elizabeth i vin koman Komisyoner Lapolis.  Ou konnen Sesel nou annan en bon pe zenn – en kantite zenn e dan Vandredi bann zenn i al la dan lo Ste Anne Jetty pou al de-foule Mr Speaker.  Pour mwan mon vwar li pa normal ler zot ale pou de-foule e prezan ou annan Lapolis ki vin la kot Petrol Station e i veye sa bann dimoun ki sorti laba ler i vin la i aret ou e i fer ou soufle.  Me nou tou nou konnen zot in al de-oule laba zot in pran en pti drink.  Be konmsi akoz zot bezwen…Me mon krwar zot bezwen annan en pe plis fleksibilite pour Vandredi etandonnen sa bann zenn zot bezwen de-foule, sinon nou bezwen rod en lot fason kan mannyer nou kapab accommodate sa bann zenn. Nou bezwen realize Zenn i zenn e nou pou ganny difikilte ek li si nou pa konnen kan mannyer pou mannye li.  Mon krwar mwan Lapolis dan son sazes – avek nouvo Komisyoner i a kapab get dan sa sityasyon dan en fason pli obzektif, pli byen e pli kalm.

I annan en lot issue – i senp – ti pti ki mon ti ava kontan osi Komisyoner Lapolis i take note - se kot i konsern Police Character Certificate. Ou vwar nou pe sey ede pour nou bann zenn, nou bann dimoun koman i sorti dan Prizon ouswa dimoun ki pe rod en dyob – fasilit zot pour zot ganny en louvraz. Me tou landrwa kot zot ale ozordi, i demann zot – or mazorite landrwa – gran mazorite i demann zot police character certificate. Zot napa larzan zot menm, zot pe rod en louvraz e zot bezwen al pey sa kot Lapolis.  Mon ti ava demande e sa kantite larzan ki i koute.  Mon ti a demande ki nou rod en lot fason pour nou apros sa zafer Police Character Certificate ki nou dimoun ki bezwen enn sa pour son travay senp dimoun – konmsi nou pa pe koz – konmsi si i vin pour en lot rezon  i en lot zafer, me pour  senp pou travay kekfwa sa Lorganizasyon i kapab donn li en pti let, i al kot Lapolis i donn li sa police character certificate petet pou nanryen dan en fason koumsa.  E osi ler ou sorti Prizon i devret donn ou sa; akoz Komisyoner Lapolis i kapab waive sa letan ki i donnen – sa 5an ki  Prizon i donnen.  Si ou karakter in bon depi laba e in fer ou sorti  lo la license or whatever be donn ou sa keksoz ki kapab fer ou re-antre, re-entegre dan sosyete korekteman.

En lot keksoz ki mon ti ava kontan met devan, se ki ler mon pe dir par egzanp Cascade Kordgard in kraze  - nou napa e ki nou merit annan enn.  Be ou vwar parey kot PSSW la, Petit Paris kapab la revwar sa Stasyon ki la, la revwar li  ki i kapab pli byen organize pou desarz distrik Cascade e an menm tan Providence.  Providence Industrial Estate i la akote Cascade, in fini vin en nespes Lavil ou kapab dir – en ta dimoun laba dan lazournen sirkilasyon laba trafik i bokou plis ki Anvil me napa ase prezans Lapolis. Nou vwar poudir la pros ek PIE ti ava ede pou desarz osi responsabilite laba.  La i bann pwen ki nou pe met devan.  I en pwen tre, tre enportan.

Nou ti ava demande – me mon konnen sa i en pti baba pour Konmisyoner ki pe vini, se nou pe demann li pou speed up avek negosyasyon pour sa DNA Forensic Lab. Enportan – vreman – vreman enportan pour nou pei, pour lenvestigasyon, pour bann keksoz ganny fer.  Konmela la menm pou Family Tribunal laba, bann dimoun ki vini i dir ou piti pa pou li – me la DNA ava deside – i ava fasil pou fer; i a dir ou si pour ou, si pa pour ou nou a konnen ki mannyer pou deal ek sa bann zafer dan en fason pli vit, pli efikas, pli fasil.  E sa i a tir presyon lo tou dimoun - en fason nou kapab ganny plis letan pou kapab fer en bon travay avek nou Lapolis.

Vwala Mr Speaker, nou swet Mr Elizabeth tou de bon – tou de bon nou krwar dan li, nou krwar ki i kapab deliver, si i organiz li byen e nou demann li pou organiz li byen.  Nou Lasanble i la.  I  kapab konsilte a nenport ki moman ki i anvi en dyalog avek nou e nou krwar - mwan mon ti a li mon ti ava fer sa en pti pe souvan – nou zwenn e nou diskite - nou gete ki sa ki nou kapab a-porte pou li  - ki bann konplent, e kritik e  sizesyon ki nou kapab ansanm diskite pou fer amelyorasyon dan nou sistenm Lapolis, dan nou Lapolis Zidisyer li menm i kapab dan nou Lapolis li menm ki i kapab fer ki alor nou pep i a viv li dan plis sekirite.

Avek sa Mr Speaker, mon  a demann tou Manm nou Lasanble, pou siport sa apwentman.  Kantmenm medya in fini dir, les li me nou’n siport sa apwentman akoz nou krwar i en bon apwentman nou  pour Mr Elizabeth esey desarz sa responsabilite.

Mersi Mr Speaker.

 

MR SPEAKER

Bon, avek sa nou ava pran en vot.  Tou bann ki an faver?  Okenn ki kont? Inanim.

I reste mwan o non Lasanble Nasyonal pour swet Mr Reginald Elizabeth bonn sans, bon kouraz – kantite travay devan li me dan lavi ler ou determinen napa nanryen ki enposib.

I osi reste pou swet Ex-Komisyoner Polis, Mr Ernest Quatre, bonn retret.

Avek sa nou ava adjourn ziska Mardi prosen.

 

(ADJOURNMENT)

Last Updated on Monday, 25 July 2016 13:58