The National Assembly of Seychelles

  • Increase font size
  • Default font size
  • Decrease font size

Tuesday 24th May, 2016

E-mail Print PDF

NATIONAL ASSEMBLY OF SEYCHELLES

Tuesday 24th May, 2016

The Assembly met at 9am.

National Anthem

Moment of Reflection

Mr Speaker in the Chair.

 

 

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Bonzour tou bann ki pe ekout nou dan lakour.

A en dernyen moman, nou’n bezwen fer en sanzman dan nou Order Paper, an vi trazedi ki’n arive avek lafanmir Minis Lionnet ki ti sipoze vin reponn plizyer Kestyon, me malerezman i pa pou kapab fer li ozordi.

Alors nou pou al direkteman lo bann Urgent Questions par Minis Finans e Lekonomi Ble.

Me avan nou fer li, mon ti a voudre, lo lapar Lasanble Nasyonal, pas mon kondoleans senser avek Minis Lionnet e lafanmir.

Nou ava komans avek premye Kestyon Irzan par Onorab Mirena Souris.  Onorab.

 

HON MIRENA SOURIS

Mersi Mr Speaker.

Bonzour Mr Speaker, bonzour Minis.  Bonzour tou Manm Onorab, enkli zabitan Beau Vallon.

An vi gran demann e plizyer Meeting avek bann Kontrakter, eski Minis Finans i kapab eksplik sa Lasanble, akoz ki LWMA pa ankor ogmant larzan bann pti Kontrakter, pou zwenn minimum wage parey Minis in dir dan son Diskour Bidze lannen pase?

Mersi Mr Speaker.

 

MINISTER JEAN-PAUL ADAM

Bonzour Mr Speaker, bann Leaders dan Lasanble, bann Manm Onorab e tou dimoun ki pe swiv nou deba.  E mersi bokou pour sa kestyon.

E avan ki mon reponn sa kestyon, mon ti ava kontan osi azout mon lavwa pou prezant nou kondoleans avek lafanmir mon koleg Minis Lionnet.

Mr Speaker, an sa ki konsern logmantasyon dan minimum wage, Gouvernman in fer tou provizyon neseser, pou asire ki tou bann pti Kontrakter ki depan lo bann Kontra sorti kot Gouvernman, i ganny sa logmantasyon neseser pou zot kapab pey zot lobligasyon vizavi zot bann anplwaye.  Nou ava note ki depi sa lanons kot in annan sa logmantasyon, Minister Finans e an kolaborasyon avek bann lezot Minister ki pe ofer oubyen ki pe pey sa bann servis, in zwenn avek bokou sa bann diferan pti Kontrakter e par egzanp, meeting in fini ganny fer avek nou bann Kontrakter kot i konsern Minister Ledikasyon, kot i konsern Devlopman Kominoter, kot i konsern bann Lazans Sekirite bann Cleaning Agencies e tou ba bann diferan groupman, nou’n fini asire ki zot in resevwar sa logmantasyon dan peyman, anliny avek Bidze.

Menm prensip i osi aplik pour bann diferan Kontrakter ki kouver anba bann Kontra LWMA.  I annan en travay ki aktyelman Minister Finans pe fer ansanm avek LWMA, pou asire ki nou kapab zwenn avek sa bann Lazans Sekirite, ganny lalis bann dimoun ki anploye, pou nou kapab konnen egzakteman konbyen anplwaye par egzanp zot annan e alor fer sa pli bon analiz lo zot bann kou e fer sir ki sa larzan i ganny peye dan en fason ki korek.  Sa i form par bann prosedir ki deza an kour, me mon oule asir sa Lasanble ki resours neseser pe ganny met a dispozisyon, pou asire ki tou sa bann Kontrakter i ganny peye parey in prevwar.

Mersi Mr Speaker.

 

MR SPEAKER

Okenn siplemanter?

 

HON MIRENA SOURIS

Mersi Mr Speaker.

Mr Speaker, an vi larepons Minis, eski sa bann Kontrakter:- Minis i garanti nou ki sa bann Kontrakter pou ganny back date pour mwan Avril, an vi ki zot pa ankor resevwar e deplis, eski Minis i kapab dir ek sa Lasanble si i dan manda LWMA pou tir en Kontrakter lo son site pou met en lot e pey sa lot Kontrakter plis ki sa Kontra orizinal?

Mersi.

 

MINISTER JEAN-PAUL ADAM

Mersi Mr Speaker e mersi Onorab.

Mon kapab asir sa Lasanble ki provizyon pou ganny fer pou back date pour mwan Avril akoz Lalwa lo saler minimonm in pran lefe an Avril.  Alor, nou pou fer sir ki tou Kontrakter i ganny zot peyman, anliny avek zot bann lobligasyon vizavi zot bann anplwaye e sel keksoz ki nou bezwen atire, akoz Gouvernman byensir nou pa donnen bann blank cheques. Nou bezwen fer sir ki sa larzan ki nou pe donnen i koresponn avek depans sa Lazans e depans sa bann Kontrakter.

Pour sa dezyenm parti kestyon.  I en keksoz ki konsern Polisi, lafason ki LWMA i fer zesyon son bann Kontra e mon konnen ki i annan serten provizyon dan sa bann Kontra pou netwayaz kot letan en dimoun i pa:- letan enn sa bann Kontrakter i pa an konformite avek sa bann provizyon dan Kontra ki serten aksyon i kapab ganny pran, enkli anmenn en lot Kontrakter.

Bon.  An sa ki konsern bann lapel ki kapab ganny fer akoz parfwa i difisil pou fer byen sa assessment si sa Kontrakter in fer byen son travay oubyen non.  Minister Lanvironnman mon konnen pe fer serten travay pou revwar en pti pe lafason ki sa i ganny regarde.  Me i enportan ki i annan sa mezir verifikasyon e osi kot en Kontrakter i pa performen, ki i annan en serten mezir ki ganny met an plas ki i pa zis ganny peye menm si i pa fer louvraz.  Mon krwar tou dimoun i kler ki sa i en eleman enportan.

Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.  Bonzour Minis, bonzour tou dimoun.

Mr Speaker, an vi ki LWMA i resevwar en sonm ase sibstansyel e zis lannen pase ti resevwar R151 milyon, 434 mil, eski Minister Finans pe mazin fer en audit appraisal konpreansiv lo sa Lazans, pou asire ki Gouvernman, ler i pe depans sa larzan avek bann Kontrakter, nou pe ganny valer pour larzan e ki sa travay ki sipoze ganny fer pe fer according to sa lenvestisman ki pe ganny mete dan sa Lazans ?

Mersi.

 

MINISTER JEAN-PAUL ADAM

Mersi bokou Mr Speaker e mersi Onorab.

Gouvernman i touzour fer bann verifikasyon kontinyel lo bann diferan Lazans, an sa ki konsern en odit spesifik lo LWMA i pa forseman lo azanda, selman vi ki sa in ganny leve la, i en keksoz ki petet Gouvernman i kapab konsidere an konformite avek swe Lasanble, me ki mon ti a voudre zis dir ki Gouvernman, atraver sa bann diferan Lazans, i osi pe fer sir ki i pe donn loportinite bann diferan pti biznes Seselwa pou kapab devlope.  E bokou sa larzan, sa sonm ki en sonm tre enportan, i annefe ganny re envestir dan bann pti biznes akoz se bann larzan ki ganny peye atraver bann Kontra.  Me nou pran an kont sa sizesyon ki’n ganny fer par Onorab, ki nou regard en odit, pou fer sir ki i annan valer pour larzan e nou koman en Gouvernman, nou kontinyen reste angaze, pou fer sir ki nou servi sa loportinite pou nou distribye larises dan nou pei, atraver sa bann fason travay ki se pa zis gouvernman ki fer tou keksoz, me nou fer li atraver bann pti biznes ki ganny sa bann lopo+rtinite.

Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.

Mr Speaker, si ou permet mwan, mwan osi mon ti a kontan eksprim mon kondoleans, de lapar tou Manm dan Lasanble Nasyonal lo kote Parti Mazoriter, avek Minis Lionnet, nou koleg e osi Onorab Fideria, nou koleg ki’n perdi son manman li osi semenn pase.

Mr Speaker, mon kestyon i koumsa.  Eski etandonnen ki i korek ki lannen pase Lasanble Nasyonal in vot R151 milyon pour LWMA e osi dan Bidze Siplemanter nou’n vot R13 milyon.  Eski Minis i kapab donn nou Lasanble en garanti ki i pou revwar detay Kontra sa bann pti Kontrakter, pou fer sir ki sa bann Kontra i an konformite avek tou lezot Kontra bann pti Kontrakter dan lezot Minister?

Mersi.

 

MINISTER JEAN-PAUL ADAM

Mersi Mr Speaker e mersi Leader Zafer Gouvernman.

Nou ava servi en pti pe sa premye loportinite kot sa travay pe ganny fer, pou revwar par egzanp bann diferan:- pour sa bann diferan Kontrakter donn nou lenformasyon lo kantite dimoun ki zot anploye eksetera, pou nou osi vwar sa bann kondisyon ki sa bann Kontrakter pe travay ladan e kot i neseser, fer sa revizyon pou adres okenn konsern ki zot annan.  Mon krwar tou Seselwa i apresye sa servis ki zot fer e ki zot ofer, pou fer sir ki nou lanvironnman i reste prop e Gouvernman pou kontinyen servi sa mekanizm pou nou devlop sa lespri lantreprenarya parmi nou bann pti biznes e osi anmenn en servis anver pep Seselwa.

Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Mr Speaker, bonzour Minis, bonzour tou dimoun ki a lekout.

Mr Speaker, eski Minis i kapab eksplik nou Lasanble, baze lo bann larepons ki in donnen, ki mannyer zot pou fer sa peyman sa larzan pour sa bann pti Kontrakter LWMA, kan i annan telman disparite dan lafason ki zesyon bann Kontra i ganny fer, par egzanp ou vwar ou en gran semen parey Sans Soucis, depi kot National House ziska Sans Soucis, sa dimoun i ganny li sepa R77 mil par mwan e sa pti bout kot round about ziska kot Lasanble isi, i ganny R75 mil.  Prezan ou vwar serten Kontrakter ki anploy kekfwa 2 boug.  Mon pa dir 2 zonm baka ki mannyer.  Konmsi 2 boug la, la, la koumsa, apre en lot kekfwa ki pli serye, ki anploy detrwa dimoun o mwan, dan en fason en pe pli permanant.  Sa i en pwen.

Dezyenm keksoz.  Akoz ki netwayaz bann semen segonder pa ganny fer lo en baz 2, 3 oubyen 4 mwan, konmsi olye tou le mwan.  Koumsa avek pli pti gin larzan oubyen menm kantite larzan, nou kapab netway plis semen e konmsi ki LWMA i a fonksyonn dan en fason pli efektiv e pli korek?

Mersi bokou Mr Speaker.

 

MINISTER JEAN-PAUL ADAM

Mersi Mr Speaker e mersi Onorab pour sa pwen ek sa sizesyon.

An sa ki konsern metod kalkilasyon lo lafason ki bann Kontra i ganny allocate, i annan en kalkilasyon aktyelman ki ganny fer baze lo longer semen, baze lo bann inputs lakantite travayer, mendev eksetera.  In deza ganny met lo mon latansyon osi par serten Manm dan sa Lasanble, ki i annan konsern ki sa sistenm petet i pa osi ideal ki nou ti ava swete.  Gouvernman i pran an kont sa bann diferan sizesyon e nou pou kontinyen vwar si i annan fason ki nou kapab fer sa kalkilasyon ki en pti pe pli fasil premyerman pour bann Kontrakter konpran zot menm.

E sa dezyenm sizesyon ki ou’n fer, ki bann semen segonder petet i ganny netwaye mwen regilyerman, me ki permet plis zefor ganny mete lo sa ki nou apel petet bann hotspots.  Bann landrwa ki en pti pe pli an bezwen pour netwayaz pli regilye.  E mon konnen ki Minister Lanvironnman pe fer en analiz dan sa konteks e Minister Finans, nou an kontak avek Minister Lanvironnman byensir, pou nou vwar ki sa i ganny met an aplikasyon, dan en fason ki alafwa, siport devlopman sa bann pti Kontrakter e asire ki nou ganny en pli bon servis, an sa ki konsern bann kominote.

Mersi Mr Speaker.

 

MR SPEAKER

Bon, si napa okenn lezot, nou al lo dezyenm kestyon ......,  Ti annan?  Ou konnen, annou lev nou lanmen ler kestyon prensipal in fini ganny ……  Nou lev nou lanmen a-tan.

So, mon pou proceed avek dezyenm kestyon.  Onorab Kevin Vidot.

 

HON KEVIN VIDOT

Bonzour, mersi Mr Speaker.  Bonzour Minis e tou Manm Onorab.  Tou sa bann dimoun ki pe ekoute.

Mr Speaker, eski Minis i kapab dir ek sa Lasanble, konbyen letan i pou pran pou Minister Finans donn en direktiv kot Departman Registrar pou retir Stamp Duty lo bann Seselwa ki pe aste en morso later ou lakaz pour premye fwa, anliny avek Lanons Prezidan Michel dan son Ladres Leta Lanasyon sa lannen?

Mersi Bokou.

 

MINISTER JEAN-PAUL ADAM

Mersi Mr Speaker e mersi Onorab.

Parey Prezidan ti anonse dan son Diskour Leta Lanasyon, Gouvernman in fer sa provizyon pou nou retir Stamp Duty lo bann dimoun ki pe aste later pour la premyer fwa e sa i an bi pou nou permet plis Home Ownership parmi Seselwa e fer li en pti pe pli abordab e kree plis loportinite osi dan Sekter Prive, pa zis atraver sistenm Land Bank, pou dimoun kapab servi bann later ki dan fanmir e devlop sa dan en fason pli koeran.  E mon krwar ki deza depi ki sa Lanons in ganny fer, en kantite dimoun in vin devan.

Mr Speaker, pou nou fer sa lamannman, i annan en nesesite pou nou fer en lamannman dan Lalwa e sa, Minister Finans in deza an kominikasyon avek Biro Attorney Zeneral.  E sa i pou permet sa examption ganny fer dan en fason otomatik, letan nou konnen ki en dimoun i en first time owner.  Me an-a-tan-dan, Minister Finans in komans met an aplikasyon sa egzanpsyon, baze lo Seksyon 47 Lalwa, ki donn pouvwar Minister ki responsab pour Finans, atraver en lord, retir sa lobligasyon pou pey Stamp Duty lo en serten kategori dimoun.  E sa i anliny avek sa Polisi ki nou’n anonse.  Alor depi ki nou’n met sa Polisi an aplikasyon e an-a-tan-dan ki sa lamannman i ganny fer dan Lalwa pou fer li otomatikman, nou Minister pe fer sa bann prosedir neseser.  An mwayenn, i pe pran apepre en 2 semenn pou nou kapab process sa laplikasyon me i vre ki parfwa in ariv serten mal konprenezon, kot parfwa petet dimoun pa’n ekrir dan sa fason ki i ti sipoze ekrir e sa in met en serten retar.  E dan serten lezot ka, kot Gouvernman i bezwen verifye si vreman sa dimoun i premye fwa i pe aste en later, dan serten ka sa in pran en pti pe plis letan ki sa, me an mwayenn i pe pran 2 semenn e nou apresye en kantite ki dimoun pe servi sa loportinite.  E nou apresye osi bann Avoka ki pe ensiste pou met sa bann ka lo nou latansyon e vi ki nou la dan Lasanble, i en loportinite osi pou nou klarifye sa prosedir, an a-tan-dan ki sa Lalwa i ganny amande atraver Biro Attorney Zeneral, prosedir se ki en dimoun ki annan en demann pou li fer en waver dan son Stamp Duty akoz i pe aste later pour la premyer fwa.  I bezwen ekrir Minis Finans pou demann sa waver.  E sa prosedir savedir se ekrir en let adrese lo Minister Finans, ki demann en waver son Stamp Duty lo baz ki i en first time buyer pour sa bout later.  I bezwen donn detay sa bout later e osi detay sa dimoun avek ki i pe aste e osi bann lezot detay kot i konsern sa tranzaksyon.

Alor Mr Speaker, mon remersye zot pou donn mwan sa lokasyon pou klarifye sa e mon demann tou dimoun ki annan en laplikasyon pou swiv sa prosedir.

Mersi bokou.

 

MR SPEAKER

Okenn siplemanter?

 

HON KEVIN VIDOT

Yes Mr Speaker, mersi.

Mr Speaker, eski Minis i kapab dir nou konbyen Seselwa i ekspekte benefisye atraver sa waver ou sa Stamp Duty, anliny selman la avek bann dimoun ki pou benefisye avek en Land Bank.  An vi ki bann dimoun Land Bank i sipoze en first time owner, eski i napa en lot prosedir pli fasil, pli direk, an vi ki nou konnen Gouvernman i selman asiste en dimoun ki pa’n zanmen ganny asiste oparavan, ki sa i ganny waver pli fasil ki zis senpleman ekrir en let?

E dezyenmman, kan eski nou ekspekte ki sa Lalwa omwen i vin devan Lasanble, pou nou kapab fer lamannman ki lo la pli vit posib silvouple?

Mersi.

 

MINISTER JEAN-PAUL ADAM

Mersi Mr Speaker e mersi Onorab.

An sa ki konsern pou fer li pli fasil pour sa request ganny met devan, i annan sa prosedir pou fer en let aktyelman e pour bann proze Land Bank, sa i ganny fer otomatikman akoz verifikasyon, si sa dimoun i en first time buyer, i ganny fer otomatikman par son:- lefe ki i eligible pour Land Bank, sa i vedir ki otomatikman i ganny son waver lo Stamp Duty e sa pe deza ganny met an aplikasyon.  Koman sa laplikasyon i vini, nou fer son waver e napa problenm.  I vre ki i en pti pe pli konplike letan en dimoun pe fer en tranzaksyon kot i konsern en bout later ki pa sorti dan Land Bank akoz parfwa ou bezwen fer en verifikasyon pli aprofondi e pa toultan ki i fasil ganny sa rikord.  Me ziska prezan nou’n reisi ganny sa bann lenformasyon kot i neseser e nou’n kapab fer sa tranzaksyon.  E mon pran not osi sa sizesyon, ki nou fer sa lamannman vin devan Lasanble o pli vit posib.

Mersi.

 

MR SPEAKER

Onorab Fideria.

 

HON EMMANUEL FIDERIA

Mersi Mr Speaker.  Bonzour Minis.

Minis, anba Lalwa parey i ete, ozordi ouswa konmela, waver ouswa egzanpsyon Stamp Duty lo transfer later i ganny aplike dan ka divors ouswa dan ka paran pour zanfan, pour en propriyete ki son valer i R1 milyon.  Ler nou pe koz ozordi, kot nou pe koz first time buyer, nou pe koz Stamp Duty pou ganny wave ouswa ganny egzanpsyon, si sa propriyete son valer pa ariv R2 milyon.  Eski ler sa Lalwa pe ganny revize, zot pou pran an konsiderasyon pou met tousala, pou re-aranz li ansanm?

Mersi.

 

MINISTER JEAN-PAUL ADAM

Mersi Mr Speaker e mersi Onorab.  E mersi pour sa sizesyon.  Mon krwar ki i toutafe rezonnab ki nou regard sa dan lamannman sa Lalwa, ki nou met sa bann diferan provizyon anliny avek kanmarad.  E zis pou rapel akoz nou’n gannyen serten dimoun ki’n demande akoz ki i annan sa limit R2 milyon.  E mon ava rapel ki lentansyon sa provizyon pou waver se pou ed bann endividi ki anvi devlop zot propriyete pour bann rezon rezidansyel.  Setadir, ed bann home owners, ed bann dimoun ki anvi fer bann lakaz e pa bann proze komersyal.  E dan laplipar ka, nou santi ki sa sonm i permet bann dimoun ki dan bann tel sityasyon, kapab fer li.

Mersi bokou Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.

Mr Speaker, parey Prezidan ti fer kler dan son Diskour, sa waver Stamp Duty i pour en lenvestisman ki pe fer dan pep Seselwa, sirtou bann ki pe aste lakaz pour premye fwa, later.  Eski Minis i kapab dir ek nou Lasanble konbyen sa pou kout Gouvernman an mwayenn par an, in terms of pert?

Mersi.

 

MINISTER JEAN-PAUL ADAM

Mersi Mr Speaker e mersi Onorab.

Mon napa sa sif avek mwan imedyatman me byensir e ki mon ava sizere se ki prosennman, mon pou vin ankor devan Lasanble pou nou fer en mizazour an sa ki konsern nou medium term fiscal framework e nou ava kapab sa moman, dir konbyen lavaler bann waver ki nou’n donnen ziska prezan e osi konbyen ki nou pe antisipe.  Me byensir i en sif ki difisil pou antisipe akoz ou pa konnen konbyen dimoun pou vin devan.  Me letan nou’n fer sa analiz lo lentansyon sa Polisi, nou’n santi ki son benefis, setadir pou kree plis loportinite pou dimoun envestir dan lakaz e letan nou regard sityasyon lakaz dan pei, nou krwar i pli enportan pou nou fasilit dimoun pou envestir zot menm e devlop sa bann propriyete, plito ki regard sa larzan sa Tax ki nou ti’n kapab anmase.  E parey nou’n koze, sa bann dimoun ki pe benefisye atraver sa se bann home owners.  E se pa sa vreman sa bi, sa bann dimoun ki nou anvi met en Tax lo zot.  Sa Tax Stamp Duty i vreman la pou aplike lo bann gro proze komersyal e lo bann proze kot dimoun pe servi sa propriyete pou zot mon kapab dir, tir en profi alalonger di-tan.  E nou lentansyon se plito ed bann dimoun ki anvi pour la premyer fwa, konstrir zot prop lakaz.  E mon krwar dan sa ka, sa Polisi i pe marse e pli tar nou ava donn Lasanble en pti pe plis detay lo son lenpak finansyel.

Mersi.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.

Mr Speaker, eski Minis i kapab reasir nou Lasanble e reasir lepep Seselwa ki sa Policy i selman pour Seselwa ki pe aste en later?

Mersi.

 

MINISTER JEAN-PAUL ADAM

Mersi Mr Speaker e mersi Leader Zafer Gouvernman.

Mon oule toutafe reasir sa Lasanble ki sa Polisi i aplik zis pour Seselwa.

Mersi.

 

MR SPEAKER

Bon, nou al lo nou trwazyenm e dernyen Urgent Question e sa se par Onorab Charles de Commarmond.

 

HON CHARLES DE COMMARMOND

Mersi Mr Speaker.

Mr Speaker, swivan sa Kestyon Dirzans dan nou Lasanble Nasyonal resaman, konsernan bann pti vander dan Lavil, eski Minis pour Finans, Komers ek Lekonomi Ble, i kapab konfirm avek nou Lasanble, kan ki son Minister i anvizaze revwar e amann Lalwa e regilasyon Licensing, pou fer li vin pli fasil pour en senp Seselwa vann son de pti prodwi silvouple?

Mersi bokou.

 

MINISTER JEAN-PAUL ADAM

Mersi Mr Speaker e mersi Onorab.

Tou dabor, mon ti ava kontan zis klarifye osi lo lapar mon koleg Minis ki’n deza Minis pour Lenvestisman e Devlopman Lantreprenarya e ki’n deza vin dan Lasanble, pou dir ki Gouvernman pe rod tou fason pou nou sey donn o maximum bann pti antreprener Seselwa, sa loportinite pou zot vann zot marsandiz, me i enportan ki sa i ganny fer dan en kad ki Legal e ki osi pa kree lezot problenm dan nou lasosyete.  E mon krwar i enportan pou note ki dan tou pei dan lemonn, kot i annan bann marsandiz ki ganny vann dan Lavil oubyen ki ganny vann dan semen, ki sa i touzour ganny fer selon en kad spesifik e dan bann landrwa ki dezinyen.  Alor aktyelman, laplipar bann vander ki pe vann dan Lavil oubyen ki pe vann lo bann latab, zot pe fer li anba en License ki apel en License Wholesale.  Strikteman, sa License i vedir ki ou enport keksoz apre ou revann.  E sa License i pa neseserman spesifikman pou etablir en landrwa dan Lavil pou ou vann me ki sa normalman i devret ganny vwar plito anba en License Retail.  Me ki Gouvernman pe fer se nou pe dezinyen, nou pe rod bann landrwa ki apropriye pou bann dimoun fer zot lavant.  Deziny sa bann landrwa.  Si i neseser, met fasilite adisyonnel ki permet sa bann dimoun kapab fer zot lavant e kontinyen avek zot lantreprenarya.  Me mon krwar tou dimoun i rekonnet ki i enportan ki en dimoun i pa kapab zis vin dan en landrwa ki piblik e vann son bann keksoz.  I bezwen ganny fer dan en kad e atraver bann regilasyon.  Alor, nou Minister ki annan responsabilite pour Licensing, nou pe revwar, ansanm avek Minister pour Lenvestisman avek Lantreprenarya, pou nou asire ki sa kad i apropriye.  Parey nou’n dir, nou santi ki sa kad pour retail deza i ofer sa loportinite.  Bokou bann dimoun ki vann dan bann kiosk i deza annan en Retail License, alor i deza annan sa kad ki egziste.  Me nou pou kontinyen etidye si i neseser pou nou fer en kad ki pli spesifik pour bann dimoun ki anvi vann dan Lavil.  Nou ava vwar si sa i neseser, me mon krwar keksoz ki pli enportan, i se sa bann dimoun i al dan bann landrwa ki dezinyen e ki apropriye e ki permet zot ganny akse avek bann kliyan dan en fason ki rezonnab e ki kontribye zisteman anver devlopman nou Lavil e devlopman nou lekonomi.

Mersi Mr Speaker.

 

MR SPEAKER

Onorab De Commarmond, okenn siplemanter?

 

HON CHARLES DE COMMARMOND

Wi Mr Speaker.

Mr Speaker, dapre mon resers, bann dimoun ki pe servi sa metod vann, bann pti vander la, zot pe fer li akoz pri dan laboutik normal i tro o.  Ki ou Minister alor pe fer, pou fer desann pri komodite dan pei an zeneral, pou permet sa keksoz stabiliz son lekor?

Mersi.

 

MINISTER JEAN-PAUL ADAM

Mersi Mr Speaker e mersi Onorab.

Pri lavi byensir i en keksoz ki Gouvernman i toultan fer son maximum pou li sey redwir lenpak pri lavi lo konsonmater.  Nou premye laliny lentervansyon an sa ki konsern pri lavi se atraver STC ki garanti serten pri pour bann komodite de baz letan i fer vini e sa i enkli letan i fer son wholesale avek lezot marsan.  Lezot mekanizm ki nou annan, byensir si nou annan marsan ki pe fer tro bokou profi.  I annan plizyer konplent ki’n ganny mete par egzanp devan Fair Trading Commission e nou konnen osi ki in annan serten case ki’n kapab anmenn rezilta e ki’n fors serten marsan revwar zot stratezi an sa ki konsern pri.

An sa ki konsern bann marsan ki pe vann an deor bann laboutik, nou bezwen rekonnet ki parfwa sa bann dimoun i annan mwens kou tou fason.  Alor i vre ki zot annan mwayen parfwa pou vann li pli bon marse e wi.  Nou kapab ed sa bann dimoun pou ganny sa loportinite pou zot vann me parey mon’n dir deza, i deza dan bann landrwa ki dezinyen e ki apropriye akoz i pa kapab en marsan i deside ki li i pou vann dan en kwen semen, en lot i deside pou vann dan en lot kwen semen e i pou napa lord.  Pou napa en kad ki permet nou osi ed sa bann dimoun pou zot pli byen devlope akoz pou annan finalman, pou annan lager plas lo kote dimoun pou met zot bann marsandiz.  Sa ki enportan se ki i annan en kad e bann landrwa dezinyen, kot sa bann dimoun i kapab vann zot marsandiz e partisip plennman dan lekonomi.

Mersi Mr Speaker.

 

MR SPEAKER

Onorab Maria Payet.

 

HON MARIA PAYET-MARIE

Mersi Mr Speaker.

Mr Speaker, an prenon an kont larepons Minis, mon ti a kontan demann Minis si i annan en resers oubyen letid ki’n ganny fer anliny avek regilasyon, pou ankouraz sa bann pti biznes wholesale pou al vann zot prodwir dan lezot distrik ou lezot rezyon dan pei?

Mersi Mr Speaker.

 

MINISTER JEAN-PAUL ADAM

Mersi Mr Speaker e mersi Onorab.

Toutafe, mon konnen ki Minister ki annan responsabilite pour bann pti biznes, pe travay avek sa bann pti biznes pou donn zot plis loportinite osi atraver bann levennman e osi atraver bann Lafwar e dan bann diferan distrik, pou zot kapab osi anmenn bann marsandiz dan diferan lokasyon.  E sa pou kontinyen ganny devlope.

Mersi Mr Speaker.

 

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.

Mr Speaker, eski Minis i kapab dir nou ki, etandonnen ki bokou pei, avek regilasyon Lasante, Licensing strict, in reisi fer sa ki nou, nou pa ankor kapab fer isi?  Alors, ki ou Minister pe fer, pou regarde ki metod, par egzanp en pei, Sengapour in pran pou fer sir ki nou bann pti dimoun i kontinyen operate, menm si zot annan bann regilasyon lasante ki tre strict?

Mersi.

 

MINISTER JEAN-PAUL ADAM

Mersi Mr Speaker e mersi Leader Zafer Gouvernman.

Se zisteman nou stratezi se dan sa laliny, se pou asire ki sa landrwa i klerman idantifye ki sa bann landrwa i ganny dezinyen klerman pour sa aktivite akoz aktyelman, serten defi ki annan se parey nou’n dir, dimoun i deside lo zot menm, nou pou vann la, nou pou vann la.  Parfwa sa bann landrwa pa apropriye akoz i kree lezot problenm dan sa bann landrwa.  E si ou regard bann pei ki annan bann kad apropriye pour lavant dan Lavil e lavant dan bann landrwa piblik, zot fer li atraver, zot met bann fasilite a dispozisyon e zot osi fer sir ki sa bann landrwa i apropriye.  E se sa ki Gouvernman pe fer aktyelman.  Mon konnen ki Minister konsernen, Minister ki swiv bann zafer bann pti biznes anba Minis Michael Benstrong, pe fer bann konsiltasyon avek sa bann pti biznes, pou idantifye bann landrwa ki apropriye, deziny sa bann landrwa dan en fason permanan, ki nou konnen sa bann landrwa i disponib pour sa bann kalite aktivite.

An plis ki sa, i annan serten landrwa ki kapab ganny met a dispozisyon tanporerman oubyen a en serten moman, Oubyen pandan en serten peryod, pour sa bann kalite lavant.

Mersi Mr Speaker.

 

MR SPEAKER

Onorab Houareau.

 

HON HERBERT HOUAREAU

Mersi Mr Speaker.  Bonzour Mr Speaker, bonzour Minis.

An vi larepons Minis, mon ti a kontan demann Minis, kwa ki son Minister pe fer, pou ankouraz bokou plis street vendor atraver pei e met an plas en sistenm parey Bazar, kot ou annan en dimoun ki pase e fer sa bann dimoun pey en pti larzan sak fwa e sak zour ki zot desann e sa i a permet pou fasilit bokou dimoun desann zour i anvi, kan i anvi, avek sa ki i kapab ofer dan pei, pou met a dispozisyon lapopilasyon?

Mersi.

 

MINISTER JEAN-PAUL ADAM

Mersi Mr Speaker e mon krwar premyerman, nou kapab vwar nou tou, letan nou get dan nou pei ozordi, ki lespri lantreprenarya pe fleri.  I annan en kantite dimoun ki annan en kantite linisyativ e ki zot pe zwir lo loportinite ki nou’n kree dan lekonomi nou pei.  Me parey tou loportinite, si sa loportinite pa tonm anba en regilasyon oubyen tonm anba en kad ki ganny kontrole oubyen ki ganny verifye, menm i kapab kree problenm pour sa bann antreprener zot menm.  E mon apresye sa ki Onorab in dir, se ki zisteman sa ki enportan se ki i annan en kad ki kler.  Sa bann dimoun i kapab vin fer zot lavant dan en fason ki sen e ki lie avek en progranm ki Gouvernman in met devan.  E Gouvernman in deza annan labaz sa progranm, me i pe kontinyen konsilte avek sa bann vander, pou vwar ki bann landrwa ki apropriye.  E parey osi in ganny sizere par Onorab, ki i annan serten kontribisyon zot bezwen fer anver par egzanp sa bann fasilite e osi fer sir ki zot License i an konformite avek sa aktivite ki zot pe fer.  E mon krwar i enportan pour tou biznes dan Sesel, ki nou rekonnet ki zot devlopman pou mars pli byen si sa bann kad i ganny fer dan en fason sistematik e ki tou dimoun i benefisye dan menm fason, atraver laplikasyon sa bann prensip.

Mersi Mr Speaker.

 

MR SPEAKER

Onorab Volcere.

 

HON MARC VOLCERE

Mersi Mr Speaker.

Mr Speaker, mon ti a kontan demann Minis, an vi difikilte ki zot pe gannyen pou vwar bann sit apropriye pour plas sa bann vander, eski son Minister pa pe konsider petet en morso dan Car Park kot Hypermarket STC, an vi sa landrwa i frekante par en kantite dimoun e an vi sa landrwa i frekante par en kantite dimoun e i annan ase, mon mazinen ase lespas dan sa Car Park?

Mersi.

 

MINISTER JEAN-PAUL ADAM

Mersi Mr Speaker e mersi Onorab.  E mersi pour sa sizesyon ki mon ava konsilte en pe pli lwen, pou mwan vwar ki son posibilite akoz i pa byensir depann zis lo Minister Finans.  E nou ava vwar ki bann loportinite pou nou vwar bann diferan landrwa.  Sa sizesyon pour STC mon krwar i ava ganny regarde parey bann lezot landrwa ki osi pe ganny konsidere.  E parey mon’n dir, pou annan bann landrwa ki osi pe ganny konsidere.  E parey mon’n dir, pou annan bann landrwa ki ganny dezinyen dan en fason permanan.  Apre i annan landrwa ki petet a serten peryod i kapab ganny met a dispozisyon.

Me lot keksoz ki mon ti ava kontan dir se ki Gouvernman sistematikman, pe kontinyen envestir par egzanp dan bann kiosk, par egzanp dan bann sant pour bann pti lantrepriz, ki osi donn nouvo loportinite pour bann antreprener ganny bann landrwa pou zot devlop zot biznes e osi annan plis mwayen pou zot vann zot bann prodwi e trouv bann nouvo marse pour zot prodwi e nou pou kontinyen servi sa bann lenvestisman par egzanp atraver Pension Fund, pou nou anmenn plis sa bann fasilite, pou met zot disponibilite avek nou bann antreprener ek nou bann pti biznes.

Mersi Mr Speaker.

 

MR SPEAKER

Onorab Arnephy.

 

HON BERNARD ARNEPHY

Mersi Mr Speaker.

Mr Speaker, an vi ki en kantite diskisyon pe ganny fer lo sa size, Minis in dir nou semenn pase e la Minis Finans pe dir nou.  En kantite diskisyon.  Eski Minis i kapab dir nou ki degre latansyon sa size pe gannyen lo nivo Cabinet, an vi ki i konsern diferan Minister e kan dan en dele letan pli vit posib, nou pou kapab vwar aksyon kot nou vwar en landrwa pour sa bann dimoun kapab stasyonnen e vann zot keksoz, olye konsilte, konsilte, konsilte e kontinyen konsilte?

Mersi Mr Speaker.

 

MINISTER JEAN-PAUL ADAM

Mersi Mr Speaker e mersi Onorab pour sa pwen.

Mon krwar ki Minister avek responsabilite pour pti biznes prosennman pou kapab anmenn sa bann lenformasyon devan e asire ki sa bann biznes konsernen i ganny akse avek landrwa apropriye.  Me i enportan ki sa i ganny fer dan en fason sistematik e dan en fason ki osi pa kree problenm pour bann lezot group dan lasosyete, oubyen bann lezot responsabilite ki Gouvernman i annan vizavi par egzanp zesyon Lavil.  E menm si mon konnen i annan en santiman ki nou bezwen bouz devan avek aksyon, rapidman.  E mwan osi mon krwar ki sa i enportan.  I enportan ki letan aksyon i ganny fer, ki tou dimoun in ganny konsilte e ki tou dimoun i santi wi, sa i rezonnab e byensir petet pa tou dimoun ki pou satisfe me ki sa konsiltasyon apropriye in ganny fer, ki asire ki sa bann pti biznes i kapab konnen osi a lavenir, kote zot kapab fer zot biznes e alor, permet zot pli byen planifye zot lekor.

Mersi bokou.

 

MR SPEAKER

Bon, avek sa nou ariv a lafen Question Time pour ozordi.  E mon ava remersye Minis e ekskiz li parmi nou.

E kant a nou, nou annan ankor en Mosyon e sa Mosyon pou ganny pran par Deputy Speaker.  Donk alor nou pou adjourn pour 5 minit.

 

(BREAK)


 

MR DEPUTY SPEAKER

Bon mon a dir bonzour tou Manm Onorab e tou dimoun ki pe ekout nou.  Nou a kontinyen avek travay ki lo nou Order Paper e mon ava envit Onorab De Commarmond pou prezant son Mosyon.

 

HON CHARLES DECOMMARMOND

Mersi Mr Deputy Speaker.  Mr Deputy Speaker, Mosyon ki devan nou i en Mosyon senp.  Zis mon pe demann MLUH avek Lotorite Plan, Planning savedir pou irzaman, mon ensiste.  Irzaman, sa i bezwen ganny fer vitman pou revwar son Polisi density pou permet plis konstriksyon lakaz.

Mr Deputy Speaker, ki nou oule dir la.  Premyerman i enportan eksplike kisisa sa zafer density la.  Sa Polisi density i vedir ler en dimoun i annan en bout later, sa ki i konstri lo la, savedir sa beton, sa lakaz, nenport konstriksyon.  Miray, nenport kwa ki ou mete lo sa bout later, sa relasyon, sa proporsyon, sa ratio parey nou dir an angle.  Sa poursantaz, sa ki ou mete lo sa later, sa konstriksyon ek sa bout later li menm, se sa ki nou apel sa density ratio oubyen poursantaz.

E prezan avek Land Use Plan.  Land Use Plan li i sa plan ki gid devlopman later, ki sa ki ou fer lo later.  Kote ou fer kwa se soit lo later.  Lo Mahé, lo Praslin, lo La Digue, lo bann zil ki nou annan.  Lo nou teritwar.  Sa Land Use Plan li prezan, an relasyon ek sa density ki nou pe koze, ki sa ki ou metet lo later i varye.  I varye akoz.  E sa zafer density la i enportan ki i annan sa.  Pa krwar konmsi i zis planning in deside mete.  I annan en bann rezon, taler mon a mansyonnen.

Prezan i varye si ou lo Mahe.  Si ou lo Mahe i varye depan lo rezyon, i varye depan lo landrwa e ki sa ki ou pe fer lo sa later.  I baze osi lo sa kalite later.  I baze lo plizyer lezot keksoz.  Apre si ou lo Praslin osi i osi annan son varyans ki i annan e si ou lo La Digue menm zafer.  Alors i annan sa diferan landrwa epi i annan sa diferan rezon ki ou pe fer lo sa later.  Diferan devlopman.

E i enportan ki i annan sa density li.  Akoz pou anpes par egzanp sa ki nou apel over build.  I anpes ou konstri telman an plis lo sa morso later.  I annan sa kestyon density, i osi egziste pou bann rezon prezervasyon, prezerv verdir, pou landscaping e i baze osi lo Regilasyon 21.  Regilasyon Planning.  I baze osi lo relasyon boudry ant sa kare later ek lezot kare later, parcel later ki otour li.  I baze osi lo privacy ant bann kare later e osi ant bann building lo sa kare later. Sa osi i bann rezon sa zafer density i antre.  I baz lo lot keksoz enportan ankor, soak away.  Sa ki nou apel soak away la.  Letan ou annan ou septic tank apre ou soak away. Li osi i annan en relasyon, i annan en zwe pou zwe ek sa zafer density, ek sa zafer kare later ki en dimoun i annan.

I annan drenaz e sa i tre enportan.  Soak away avek drenaz, li menm li i zwe en rol primordyal li.  I en pti pe pli for lo sa kestyon density. Akoz enn, ou bezwen konnen letan ou pe fer devlop en kare later, kote ou met sa desarz e kote ou met drenaz.  Kote delo, akoz delo ler i tonm lo later, sa later i enbib sa delo.  Me letan prezan ou’n konstrir lo la ou’n met beton, sa beton i pa enbib sa delo parey sa later i ete.  Alor i pou run off, i kapab al kree en domaz lo en lot landrwa.  Savedir ou bezwen kapab manage sa delo ki vini.  E sa i en keksoz enportan.  Apre i annan lezot keksoz.  Tipografi, i annan kalite later li menm.  Ensidswit.

Prezan, li Planning, Land Use Plan. Lo la aprezan, diferan landrwa.  Parey mon ti pe dir boner.  I kategoriz li.  I annan landrwa ki high density zone. High density zone li, en kare later letan ou koupe letan arpante i bezwen mwens 400 met kare.  400 met kare e lo la i dir ou kapab devlop 45 poursan sa later.  Ou kapab build lo la.  Ou kapab konstrir lo la 45 poursan si napa sewage connection.  Si i pa konekte avek sewage PUC.  Si i konekte avek sewage PUC, savedir ou kapab devlop lo sa 400 met kare, 50 poursan.

Medium density zone, li ou kapab koup en kare later, savedir ou kapab arpant en kare later 600 met kare minimonm.  E ou build lo la 35 poursan.  Ou kapab kouver sa sirfas later pou 35 poursan si napa sewage PUC.  Si i annan sewage PUC ou kapab kouver ankor en 5 poursan, savedir 40 poursan sa grander later.

Apre i annan low density zone.  Low density zone lo Mahé li i 1200 met kare minimonm.  Letan ou arpant ou later, savedir ou kapab tir en kare later 1200 met kare, pa mwens ki sa.  E ou kapab build lo la 30 poursan.  Ou kapab fer en striktir ki kouver up to 30 poursan si i napa sewage connection ek PUC, si i annan ou kapab build ziska 35 poursan.  Ou kapab kouver sa sirfas later.

Apre i annan osi very low density zone. Li very low density zone ou kapab koup en kare later, savedir ou kapab arpant li 4000 met kare later e ou kapab build lo la, fer en striktir, en devlopman lakaz oubyen en batiman up to 20 poursan sa kouvertir.  Savedir sa 4000 diviz par 5, 1/5, 20 poursan ou, ou kapab konstrir ouswa si i annan koneksyon sewage PUC ou kapab devlop en building lo la up to 25 poursan.  Savedir 1000 met kare.  Sa 3000 mil met kare pa pou ou, pa dir pa pou ou, ou bezwen kit li koumsanmenm.  Sa i en pwen refer sorti.

Praslin li i annan pou li.  Praslin li i 400, 800, 1600 e 4000 met kare.  E prezan li osi sa kestyon land use, sa kestyon density i varye lo later konble ek later pou devlopman touristik.

Later konble li ou kapab koup sa later 400 met kare ou 600 met kare e ou kapab fer striktir lo la up to 60 percent son kouvertir.  Savedir ou kapab build zis a 60 poursan li.  Pou en lakaz parey mon dir taler lo 400 met kare i 45 poursan, si ou lo later konble i 60 poursan.  Si ou pe fer en devlopman touristik lo en later 400 met kare oubyen 600 met kare li ou kapab fer en build, en batiman, striktir lo la up to 90 met kare.  Konpare avek si ou pou fer en lakaz pou ou reste i 45 met kare up to 50 si non koneksyon sewage.

I annan alors sa bann disparite, sa bann diferans ladan.  E parey mon’n dir i annan tou sa bann diferan rezon e rezon prensipal se drenaz ek soak away.

Mr Deputy Speaker, aprezan ki i fer.  En dimoun ki annan en bout later dan sa bann diferan landrwa lo Mahe, Praslin e La Digue.  Dizon en dimoun i dan Anse Royale, i dan Bougenville.  I annan en en gran bout later, prezan i annan li 3 zanfan.  I annan son lakaz lo la.  Zot in ne, grandi e devlope.  Prezan son bann zanfan  gran.  I annan li en gran bout later li.  Prezan dizon i annan li 3000 met kare later anviron or 2500 met kare later.  Aprezan li i annan son lakaz lo la, son bann zanfan in gran.  I oule donn sakenn son zanfan en bout later.  I ale, i rod en arpanter, i vini i koup son later.  Sakenn i ganny en bout 600 met kare fasilman.  Me prezan li planning i gete.  Letan in ariv kot planning i dir be sorry ou pa pou kapab koup sa later dan sa fason pou donn sa 3 zanfan ki ou annan.  Plito dir sa 3 zanfan al kot Gouvernman, Gouvernman i a rod en bout later par la ouswa en landrwa reste pou zot.  Sa paran i ankoler, i pa kontan e sa zanfan osi pa kontan.  I fristre, i fisiter ek Prezidan, ek Gouvernman.  Manke i krwar Gouvernman ek Prezidan ki’n fer sa.  E prezan i pa kapab diviz son later e zot donn li en milyon rezon akoz i pa kapab donn en bout later son bann zanfan.

En lot dimoun i annan en gran bout later, prezan i annan en travayer domestik.  Lontan dan letan lontan ti apel nennenn, la nou dir travayer domestik.  E prezan sa travayer in la, in onnet ek li, in travay byen.  En ta lannen, tou zanfan sa dimoun in grandir la dan lanmen sa dimoun, sa traver domestik e in okip zot byen.  In fer en fantastik travay kot sa msye ouswa sa madanm.

E prezan, letan i annan en gran bout later, sa dimoun ti napa landrwa reste.  Ti konmsi reste kot son fanmir prezan in ganny met deor.  Sa dimoun i dir ok, ou’n fer byen ek mwan, man mon donn ou, mon pa ni vann ou.  Mon donn ou en pti bout later laba dan kwen mon propriyete.  Mon pa kapab donn ou en tro, tro gran bout akoz mon annan bann zanfan.  Mon donn ou en pti bout 400 met kare.  Be i reste anler laba Takamaka li, ouswa Bais Lazare.  Prezan laba i dir ou pou ou koup en bout later fodre i 600 sepa 800 met kare.  I pa kapab 400 met kare, tro pti.  400 met kare sa ou a fer Cascade oubyen an desandans pou al anvil.  Anler laba i 600.

Me mon pa oule donn li 600 oubyen 800.  Ti a voudre donn li 400 met kare, ou krwar sa i rezonnab.  Me ou pa kapab avek sa Polisi density ki mannyer i ete ozordi.  So i annan sa bann lanpesman ki fer ki planning prezan letan sa arpanter.  Ou’n al kot Ah-Kong, dizon arpanter ouswa sepa kote ankor, bann arpanter.  I annan en kantite prive konmela.  Be sa arpanter prezan letan ou’n al kot li, i anvoy son plan ki i pe prepare kot planning e planning letan i ariv laba Lotorite i dir non, pa pou aprouve.  Al kot Gouvernman, dan biro Later.  La ou ale lo en lalis san fins, en lalis ki zanmen ou pou ganny later lo la pou esper later.  Kan si sa Polisi ti’n ganny revwar, i ti pou permet plizyer dimoun ganny li son pti bout later.  Plizyer zanfan, zot paran ti an donn zot en bout later e zot ti an konstrir zot lakaz lo la.

I ti pou fasil, zot al kot Labank.  Pa ni bezwen servi larzan Gouvernman, dir Gouvernman al ed lezot dimoun.  Li i al Labank ek son bout later, i pran en loan ek Labank.  Si i anvi al kot housing osi i kapab vini.  I gannyen, i mortgage sa bout later, i fasil.  I tir en ta presyon e dimoun i aret ankoler, i aret fristre.

Me prezan ki arive.  PUCPUC.  Ou konn li PUC Mr Deputy Speaker.  PUC, li i vini i dir koumsa nou pe devlope.  E sa zafer density lontan ti annan bann rezon.  I annan en listwar sa.  Konmsi sa bann dimoun kot MLUH ki ansarz land use, i pa’n zis en zour reve epi vin fer sa zafer density li.  I annan son listwar sa, ki mannyer in bezwen arive pou met sa bann keksoz.  Prezan PUC li i dir ek bann zafer lino, lalina sepa ki zafer ankor la.  En bann problenm, lasesres, delo.  Bezwen prezerve.  Toulezour i koz lo delo, i byen.  I byen pou fer nou konsyan.  Delo i enportan, se lavi e prezan i dir koumsa pa bezwen gat delo.  I annan bann Polisi PUC osi i drafte bann Polisi.  I dir ek bann dimoun letan ou fer konstriksyon lakaz fer sir ou met dalo pou anmas tou sa delo dalo la, met li dan en container par la dan en keksoz, servi pou ou lakour.  Re gete ki mannyer ou kapab resikle li.  Pa les li ale perdi sa delo.  Fantastik nide PUC i mete.  Fantastik nide.

I dir koumsa fer dren kot ou pou anpes lerozyon, pou konmsi contain sa delo.  Akoz ki arive Mr Deputy Speaker, PUC i very consociate e pe byen edik nou.  Akoz ler sa later ti napa konstriksyon lo la, parey mon ti pe dir boner, i enbib sa delo e i anpes problenm.  I anpes linondasyon and what not.  Prezan letan ou’n konstri, sa delo i vin konsantre e sa run off water la i kapab vin danzere tou.  Letan i konsantre i vin pli for.  I kapab fer en ta destriksyon, fer en ta problenm.  Problenm kot ou menm e kot vwazen e kot kominote.

Now, nou ki nou pe dir ek sa Mosyon.  Sa Mosyon nou pe mete.  Prezan li ler ou al kot planning, ou dir planning be la ki ou’n fer.  Konmsi mwan mon annan mon bout later, mon oule donn mon piti en pti bout, la ou, ou dir mwan non.  Ou konnen ki i dir ou.  Ou dir gete pa dir mwan ki in dir ou, ou ki ou fer, ale rod en second housing loan. Second housing loan i en loan Gouvernman in entrodwir, i dir koumsa si ou annan en later.  Ou papa, ou manman pa oule arpante pou donn ou en bout, selman i donn ou permisyon pou ou konstrir lo la.  Ou ale ou siny en papye, i anrezistre aprezan Gouvernman li i donn ou en loan ki pa en loan normal si ou ti annan ou bout later pou ou menm, selman i ed ou pou ou kapab fer en pti keksoz lo later ou paran pou ou kapab konmsi ganny en pti labri touzour.

Alor i donn ou en loan ki pa grander sa vre loan e ou pa kapab konstri mannyer ou anvi ek sa loan li, selman ou pa bezwen fer en keksoz.  Prezan li planning i dir ou ale, al pran en second housing loan, fer en zafer lo later ou pran.  Ler ou’n fer la vini dir ou le arpante, ou le tir sa kare.  Sa kare i kapab 300 met kare li.  Ou kapab tire.  i kapab 400 li, ou kapab tire.  Dan plas sa 600.  Ou sezi mwan.  Konmsi la vin en problenm ki pa devret vin en problenm.  Tandis ki si i tin les ou tir ou kare avan ou ti pou pli byen ou.  Me i pa les ou, i le sou tir ou kare apre ki ou’n konstrir lo la.  La ou kapab tir kare mannyer ou anvi.  250 met kare, akoz ou lakaz i lo la.  Kantmenm 50 met kare, kantmenm 1 met kare si ou lakaz i 500 santimet kare.  Ou konpran, i anpay zot lekor.

Mwan mon krwar i pa en zafer normal, mwan mon krwar dimoun ki annan bon lespri dan en Minister ki pe run normal e ki pe fonksyonn lo en baz zonm o sant devlopman, ki pe mazin son dimoun avan.  Ki pe fonksyonn dan en sistenm Parti Lepep.  Konmsi i dir lepep i bezwen ganny gete.  Mwan mon krwar si sa i koumsa la, sa kalite Polisi bezwen ganny re gete.  I bezwen ganny re gete.  Akoz ou bezwen fer en keksoz pare e non pa avan, kan ou ti kapab fer li byen fasil, avan.  Ki kalite lespri sa Mr Deputy Speaker.  Sey eksplik mwan ou.

Ou vwar, alors e prezan sa ki mon ti pe eksplike avek PUC annou konekte li ek sa ki nou pe dir lo sa zafer density.  Ki ou fer ou planning,  ler ou pe dir sa dimoun in anmenn son plan, sa arpanter i dir i oule diviz sa later dan sa fason.  Dir li napa problenm, mon pou donn ou kondisyon letan ou pou devlop sa later, ou diviz li ou.  600 met kare, sepa 400 met kare Cascade, sepa kwa.  I ok ou, ler ou fer ou plan lo la ou pou bezwen enkli sa ki PUC pe dir.  PUC in dir byen li, Polisi PUC i bon.  Me ou bezwen met li an ankor avek Polisi devlopman later.  Land Use, MLUH li i bezwen fer sir ki sa plan letan i vin kot sanmenm sa planning ki pe anpes ou ganny sa bout later la.  Ler prezan sa plan i vin kot li la, i bezwen gete li si s aki PUC ti dir ou’n mete.  Si ou plan i annan dalo lo la, e si sa delo pou ganny anmase dan en tenk par la, dan en rezervwar kelkonk, dan en container kelkonk pou ou servi pou aroz ou fler, pou met dan ou toilet, pou met dan isi, pou fer laba, pou lav ou loto, pou fer.  Ou konpran nou devlope ozordi, tou dimoun i annan tou sa bann zafer pou gete ki ou kapab fer ek sa.  E prezan letan ou pe konstrir lakaz li i monte li planning.  I monte i vin gete si ou pe fer tousala.  Si non, i met ou stop notice.  I annan tousala ki mon pe sey dir.

Savedir sa ki mon pe dir tou dimoun i konpran.  Tou dimoun i si i pe ekout mwan la Mr Deputy Speaker, i pou konpran i pou dir Charles, Onorab ou annan rezon ki ou pe dir.  Be si nou dir i byen ou annan rezon ki ou pe dir, akoz Gouvernman.  Akoz nou annan nou en Minister ki li i pa vwar rezon ladan.  Akoz li i bezwen fer keksoz ki lepep i soufer, ki lepep i ankoler.  Lepep i fristre par sa senp keksoz e prezan i tir tou sa fristrasyon lo Prezidan lo bann dimoun.

Mwan on pe dir, se sa rezon mon dir sa Mosyon la pou demann en fason irzan.  Konmsi nou demann Gouvernman, MLUH, Lotorite Plan pou irzaman revwar sa Polisi.  Vitman.  La nou pe koz lo sa Mosyon ozordi.  Mon demann Lasanble, tou dimoun annou vot pou sa Mosyon.  I en bon Mosyon sa.  I siport lepep sa.  Annou vot pou sa Mosyon e koman nou fini Mr Deputy Speaker.  Mon demann nou Lasanble anvoy en not kot Minister konsernen.  Dir sa Minister vwar la ki Lasanble in deside, silvouple regarde pou enplimant li vitman.

Aprezan nou, nou swiv e nou demann Prezidan, li osi konpran ki nou pe diskite, dan Cabinet, the next Cabinet.  Next one, koman i zwenn son bann Minis, i dir ek Minis konsernen la, MLUH. Silvouple sa ki Lasanble in dir la, i korek, i byen, al enplimant li deswit e fer SBC.  SBC ki pe ekout nou la, dir sa ki nou pe dir la.  Poudir vwar la, baze lo Mosyon ki Lasanble in fer, nou, nou pe amann en pti pe nou Polisi.  Nou pa pe fer li konmsi out right, konmsi nou ferm lizye lo tou keksoz.  Non.  Nou pe revwar en pe pou kapab permet lepep, sa senp Seselwa la.  Sa normal dimoun ki annan en bout later ki son paran i oule donn li, sa enn ki son dimoun ki i travay avek i oule donn li en pti kwen laba.  Permet sa bann zafer ganny fer dan en fason nou, nou a bouz en fason pli byen, pli devan, pli vit.

I tir presyon lo Gouvernman sa, i tire Mr Deputy Speaker.  Ki mannyer bann Minister ki sipoze travay ek nou pep, travay dan lentere nou pep pa pe vwar sa.  I dir ou keksoz dan en lot fason.

Mr Deputy Speaker, mon remersi ou pou les mwan prezant sa Mosyon dan nou Lasanble e mon demann tou Manm Lasanble, partisip ladan, vin dir nou ki mannyer Praslin i ete, dir nou ki mannyer LA Digue i ete sa zafer la.  Dir nou dan zot landrwa kot zot sorti, pep ki zot reprezante.  Dir nou ki mannyer i ete, si sa ki mon pe di ri mal dir mwan nou ava konnen i mal.  Si i byen zot osi donn en koudmen dir i byen nou a gete ki mannyer, menm lopozisyon dir nou how that is. So that nou kapab konmsi pas en keksoz ki byen e ki Gouvernman li i egzekit sa.  Annou anvoy en mesaz kler annou dir avek Lotorite aranz sa bann keksoz pou nou pep kapab viv pli byen pou tir presyon lo Gouvernman.  Mersi bokou Mr Deputy Speaker.  Mon demann tou Manm siport, koze e siport sa Mosyon.

Mersi.

 

MR DEPUTY SPEAKER

Bon, Onorab in anvoy son mesaz atraver son  Mosyon.  Okenn Manm ki segonde?  Onorab Volcere.

 

HON MARK VOLCERE

Mr Deputy Speaker, mon ti a kontan segonn Mosyon Onorab De Commarmond e an menm tan dir de mo silvouple.

 

MR DEPUTY SPEAKER

Proceed.

 

HON MARC VOLCERE

Mersi Mr Deputy Speaker.

Mr Deputy Speaker, mon ti a kontan dir de mo lo merit sa Mosyon akoz sa i en size ki konsern osi zabitan mon distrik.  Mr Deputy Speaker, sa size density i en size ki pou bokou letan in annan bokou diskisyon lo la, plizyer zabitan mon distrik e parey ler mon’n ekout Onorab loter Mosyon.  Ler in fer son analiz baze lo lakantite konplent ki nou tande sa size in fini vin en issue Nasyonal.

Mr Deputy Speaker, sa size density oubyen Lalwa lo density mon panse i egziste dan plizyer pei koman en fason pou kontrol konstriksyon pou anpese ki i annan bann lefe advers dan sa landrwa e osi lo lanvironnman e son bann zabitan.

Mr Deputy Speaker, isi Sesel nou osi annan en Polisi ki Gouvern oubyen kontrol, donn gidans lo konstriksyon avek bi anpese ki annan bann konstriksyon ki ganny fer anfen ki kapab vin danzere pou imen li menm.  Sa regilasyon i ganny manage par Lotorite Planning me konsern mazer ozordi oubyen konplent ki ou souvandfwa tande se ki kan Planning Authority pa aprouv en plan pou rezon ki ganny dekrir koman density. I annan bokou konfizyon ler Lotorite Planning pe met anfors sa Polisi.  I annan dimoun ki dir ou i pa vwar rezon det sa Lalwa, parfwa zot vwar bokou konstriksyon dan en serten landrwa e sa i konfiz zot.

Mr Deputy Speaker, popilasyon Sesel pe kontinyen ogmante, lafason ki nou pep pe viv i diferan avek lontan.  Ozordi nou pe vwar bann pti fanmir a en tre zenn az.  Bann zenn adilt i oule kit lakour zot paran pou al viv aryer avek bi kree zot prop fanmir.  Me en keksoz ki pe vin en kontrent ozordi se sa issue lakaz oubyen akomodasyon.  Dan bokou ka menm si sa zenn i oule kit lakour son paran.  Par egzanp pou al viv avek son partner, difikilte ki zot gannyen se akomodasyon.  Akomodasyon i rar e si ou sanse ou nobou bat avek enn son pri i vreman pa abordab.  An dot mo Mr Deputy Speaker, akomodasyon i vreman ser.

Mr Deputy Speaker, nou tou nou konnen ki nou Gouvernman in fer en kantite lo sa size lakaz.  In fer en kantite  lannen apre lannen pou asire ki son pep i viv pli konfortab an metan bann lakaz pli modern a laporte.  Tou le an lannen apre lannen plizyer milyon roupi i ganny envestir dan milye lakaz.

Mr Deputy Speaker, nou Gouvernman i en Gouvernman ki vreman annan sa determinasyon pou asire ki son pep i viv dan dignite.  Me menm ek tousala Gouvernman i konnen ki sa i pa en latas fasil.

An plis ki lakaz Mr Deputy Speaker, Gouvernman tou le an i vann plizyer kare later.  Tousala avek bi pou ed bann ki oule konstrir zot prop lakaz arive fer li.  Gouvernman in osi met plizyer scheme an plas, ankor tousala avek bi pou met plis lakaz a dispozisyon nou bann dimoun.

Mr Deputy Speaker, mon’n tous sa detrwa pwen lo lakaz ako zisteman se sa bi sa Mosyon.  Parey loter Mosyon in dir nou, mon demann MLUH avek Lotorite Plan pou irzaman revwar son Polisi density pou permet konstriksyon plis lakaz.

Mr Deputy Speaker, se sa bi sa Mosyon.  Nou oule vwar konstriksyon plis lakaz zisteman akoz i annan demann pou plis lakaz.  Mr Deputy Speaker, nou Lasanble i santi ki pou nou kapab arive vwar konstriksyon plis lakaz i bezwen annan en revi dan sa Polisi oubyen Lalwa ki gouvern sa size density.

Mr Deputy Speaker, bann ka kot nou vwar sa Polisi aktyel lo density pe afekte oubyen pe anpes konstriksyon plis lakaz pli souvan i relye avek second housing scheme.  En scheme zisteman met an plas par sa Gouvernman pou ed bann fanmir.  La kot en paran i santi ki i annan en morso later ki vid lo son propriyete e i ti a kontan ed enn son zanfan oubyen en son pros pou konstrir son prop lakaz.  Se la ki souvandfwa difikilte i arive.  Kan ki Lotorite Plan i servi sa Polisi density ki dan bokou fwa sa proze pa ganny aprouve.

Mr Deputy Speaker, nou bezwen realize bann benefis ki ler paran i donn son zanfan en morso later.  En lot lavantaz oubyen benefis ler en paran i oule asiste son zanfan avek en morso later.  Mr Deputy Speaker, an donn son zanfan later lo son propriyete pou konstrir son lakaz, sa paran pe osi ed sa zanfan finansyerman oubyen i pe fasilit li pou ganny en lakaz, en twa konvenab lo son latet en pe pli vit.

Nou kapab mazinen Mr Deputy Speaker, si sa zanfan ti bezwen esper Gouvernman pou ganny en kare later, sa zenn ti pou bezwen envestir dan sa kare later.  Swa avek en loan oubyen kek savings ki in fer.  E apre re envestir dan konstriksyon son lakaz.  Sa ti pou pran plis letan pou li kapab ganny ase resours finansyel pou li kapab fer tou lede keksoz alafwa.  Tandis ki ler son paran in donn li en bout later, sa ti pou tir sa burden finansyel pou li envestir dan en kare later.

Alors larzan ki i ti pou met dan sa kare later i kapab met dan konstriksyon sa lakaz.  Sa ti pou san dout en gran led pou sa zanfan.

Mr Deputy Speaker, annou pa les bann bon zes en paran anver son zanfan ton dan delo akoz serten Polisi.

Mr Deputy Speaker, en rezon prensipal akoz mon pou siport sa Mosyon se ki de zour an zour later pe vin pli rar, i pe vin pli ser e sa pe fer ki nou bann dimoun pou ganny difikilte pou kapab aste en kare later pou fer zot lakaz.  Menm pou Gouvernman Mr Deputy Speaker, dan serten distrik i nepli annan ase later pou kapab konstrir lakaz pou zabitan sa bann distrik.  Alors kan nou dan en tel sityasyon, opsyon se pou, nou pou napa lot swa, petet Gouvernman pou bezwen konble.

Gouvernman i pou bezwen al envestir dan konblaz koman en lot solisyon.  Mr Deputy Speaker, en dezyenm rezon akoz mon pou siport sa Mosyon, ler mon pran legzanp lo Praslin nou annan sa Polisi 50 meter contour line.  Sa polisi ki nou pa kapab konstrir dan serten landrwa ki par lao 50 met avek nivo lanmer.  Menm si mon konpran rezon det par deryer sa Polisi, me sa in fer ki in les nou avek mwens later pou konstriksyon lakaz e osi lezot devlopman.  Alor si sa Lalwa lo density i ganny revwar i a permet e donn loportinite pou plis lakaz ganny fer e sa i ava en gran benefis pou zabitan Praslin.

Mr Deputy Speaker, Polisi aktyel lo density in depas son letan.  Avek lagrandisman nou Popilasyon e avek devlopman ki pe arive mon siport demars nou Lasanble atraver Mosyon Onorab De Commarmond pou ki lotorite konsernen i revwar son Polisi lo density.

Avek sa detrwa mo Mr Deputy Speaker, mon pou san dout donn sipor sa Mosyon.

Mersi.

 

ME DEPUTY SPEAKER

Onorab Vangadasamy.

 

HON SHERYL VANGADASAMY

Mersi Mr Deputy Speaker.

Mr Deputy Speaker, Manm Koleg Onorab bonzour.  Mon pa pou tro long lo sa Mosyon me permet mwan pou aport mon soutyen me an menm tan osi pou mon koz en pti pe lo sa Mosyon.

Mr Deputy Speaker, mon reprezant en distrik Mont Buxton ki trouve, parey mon krwar nou tou nou konnen dan sant lavil e ki en distrik ki bokou de fwa mon toultan dir avek later ki limite e osi ki nou’n toultan.  Nou’n deza anmenn en Mosyon oparavan lo fason ki mannyer Gouvernman i kapab revwar e antreprann konstriksyon ouswa allow nou bann dimoun pou kapab konstri lo serten morso later pou kapab ede ki i annan plis konstriksyon dan nou distrik.

Mont Buxton petet dan sa prosen 5 an 10an nou pou vwar nou, konpare avek bann lezot distrik kot bokou nou bann zabitan pou bezwen vwar zot pe sorti an deor distrik, pou zot al reste dan bann lezot distrik vi limitasyon later ki nou annan e osi mazorite later ki ganny vwar dan nou distrik in fini bann later ki prive.

Mr Deputy Speaker, nou osi nou parmi bann distrik ki pe pouse ki nou Gouvernman i konsider vertical extension parey nou dir.  E osi bann nouvo metod konstriksyon pou allow parey loter Mosyon pe dir ki i annan plis devlopman.  Me an menm tan osi mon pou al en pti pe lo sa lot kosyon.  Bomaten dan Lasanble letan Minis in la nou’n koz lo bann pti vander ki pe demann akse ek landrwa pou zot kapab vann.  Nou osi tann osi bann lezot preokipasyon nou Gouvernman ozordi.

Nou’n en pei ki’n devlope en kantite Mr Deputy Speaker, e mwan mon enn ki’n toultan dir sa nou’n bouz bokou e nou ankor pe bouze.  Devlopman i enn, lenfrastriktir ki nou’n kree i enn parmi nou bann reisit ki nou annan ozordi.  E mon krwar nou pep osi, nou demann en kantite osi lo nou Gouvernman osi.  Bomaten nou’n demann landrwa pou nou bann pti vander, nou pe demann plis larzan pou bann pti kontrakter, nou pe demann plis lezot keksoz pou nou Gouvernman fer.  E koman en pti pei avek resours ki limite osi ek en pti Gouvernman, en pti polisyon, en pti pep osi.  Mon krwar nou bezwen osi regard nou, pozisyonn nou en kou.  Osi gete ki egzakteman ozordi i parmi nou bann priyorite ozordi.  Kwa ozordi ki nou vreman vwar, ki vreman esansyel pou nou fer premye, dezyenm, trwazyenm ozordi.

Si ozordi nou pe koz donn plis akse later pou fer plis konstriksyon, plis devlopman.  Nou bezwen mazinen osi poudir nou annan dan lepase, la resaman nou’n deza annan enn de dezas ki’n arive.  Mwan mon en distrik ki ozordi nou pe bezwen bouz 7 a 8 fanmir akoz ros ki pe deboule.  Akoz delo ki’n pase e in kree laport pou ouver pou ros ki’n grennen pou deboule.  E nou pou bezwen tir sa bann fanmir pou protez lavi.  Nou’n fer li 2an pase dan en lot landrwa Lari Angar osi kot osi lateras in grennen avek sityasyon delo e ki nou’n bezwen tir 2 fanmir e Gouvernman abandonn sa morso later akoz sityasyon nou topografi.  Sityasyon delo e osi nou menm nou koman en distrik, koman en pei mannyer nou ete.

Mwan, lo sa laliny ki mon konpran loter Mosyon e mon osi mon pou donn li sipor akoz mon krwar poudir wi i annan nouvo metod, nouvo fason fer ki mannyer nou kapab amelyor sa sityasyon.  Petet i demann en pe plis inovasyon, i demann en pe plis konsiltasyon, i demann en pe plis koze.  Petet sa Lalwa osi, nou bezwen mazinen osi Town and Country Planning Act i ankor 1972, i pa ankor ganny anmennen devan sa Lasanble, dan new modern Law ki pou egziz nouvo fason fer.  Ki pou donn planning petet en nouvo souf, pou li kapab bouze, sa nouvo kad legal pou li bouze.  Petet sa nou devret pe demann Cabinet pou pous en pti pe pli devan.  Ki sa nouvo Lalwa i vin en pti pe pli vit, me selman letan i vin en pti pe pli vit i vin dan en fason ki byen, ki’n byen ganny gete, ki’n byen ganny kalkile.

Land Use Plan ki dernyen fwa ti annan en case devan Lakour, ki in ganny en bout in ganny rezete dan en serten sans.  Me sa osi nou bezwen dir dimoun, i normal dan okenn sosyete, dan nenport ki pei i annan bann kad lagal.  I annan bann regilasyon legal ki mannyer pou nou kapab regulate fason ki devlopman i ganny fer.  Regulate ki konstriksyon i ganny ferbyen.  Ki i ganny fer byen, ki i an faver sa dimoun ki owner sa propriyete, ki li i santi pe rezouir son propriyete.  Me osi pe ganny fer ki pa pe afekte lezot propriyete lezot dimoun e osi ki devlopman pe ganny fer ki i pa pe destabiliz en pti pe, pa zis nou devlopman me osi lanatir ouswa lanvironnman sa kominote ouswa sa landrwa ki pe fer devlopman.  I bezwen annan en fine balance between devlopman ki nou, nou anvi fer e osi en fine balance between sa ki nou, nou anvi vwar dan nou pei e osi pou evite ki bann dezas natirel ouswa bann lezot dezas i vin an rezilta sa.

Mr Deputy Speaker, mwan mon krwar planning son sityasyon se ki i get bokou bann plan, planning i sa lorgann ki get bann plan lakaz li. Me an menm tan osi mwan mon krwar nou, avek sa sityasyon ki’n mete son konsern ki i pe donn sa dansite se akoz i water drain off. Konsern avek kantite devlopman ki ou kapab fer lo sa later, se nou konsern ki pou arive ek sityasyon delo.  Ou bezwen kit en serten lespas pou delo ganny landrwa pase.  Petet sa ki nou bezwen pe rode.  Ki an menm tan nou anvi ki i annan plis devlopman, me rod solisyon pou nou vwar kote 1. Sa delo i sorti, 2. Kote nou pou zet sa delo.

Ozordi planning i bezwen asire ki letan mwan mon pe fer mon lakaz, mon bezwen asire ki mon dalo lo mon lakaz.  Me an menm tan ki mon asire mon annan dalo, ou bezwen pe dir mwan, be advice mwan kote ki mon pou fer sa dalo pase ouswa sa delo ki pe zete pou ale.  Mon krwar this is the issue ki ozordi ou pe vwar sa poursantaz ki pe ganny mete lo bann later i enn parmi bann issue. Se kote lespas pou donn delo, ouswa lespas pou permet ki i annan serten lespas pou delo pase.  Ozordi mwan, mon annan en sit anler Mt. Signal ki in ganny fer, lakaz in ganny fre lo delo.  Me ozordi i ne konsern pou nou.  I en konsern pou nou akoz delo ozordi i rod fason pou li pase ozordi e prezan ozordi nou bezwen trouv solisyon pou sa delo.

Me sa ki mon pa anvi vwar se ki nou vwar letan nou pe koz en ka irzan, nou pe anmenn devan Gouvernman.  Me i bezwen enn ki nou pe fer li byen, ki nou pe balans devlopman e osi nou pa pe vwar son refoulman apre.

Mr Deputy Speaker, mwan mon krwar planning ansanm ek bann lezot lazans, letan nou pe dir donn dimoun plis sans devlop zot later, me get byen drenaz.  Travay ek bann Minister konsernen, ek bann Lazans konsernen. Ok.

Onorab Arnephy i anvi donn son zanfan son bout kare later pou fer en dezyenm, en trwazyenm lakaz.  Nou napa okenn konsern avek sa.  Me onorab Arnephy ansanm avek bann lezot Lazans i bezwen asire ki dan sa area, si i annan en drenaz, ki mannyer i pou met son delo ki pou tonm dan sa drenaz.  Ki pou fasilit, ki sa delo i annan en landrwa pou li ale.  Mon krwar sa i en pti pe konsern ki letan nou pe pouse, nou bezwen asire ki bann lezot Lazans konsernen ansanm avek Lotorite Planning i pe fer sa travay dan en fason ki byen.  Ki dalo pe ganny mete, drenaz osi e menm bann landrwa, bann lakaz ozordi.  Pa tou dimoun ozordi ki plante an deor son lakour.  I annan dimoun ki betonnen.  I betonn the whole area an deor son lakour.  E prezan letan i betonnen li, sa delo ki pa naba ouswa kot i sorti i napa landrwa pou pase.  Alors otomatikman i desann, i al lo lot propriyete son kanmarad ki koz en lot danze pou son kanmarad.

Mon krwar dan loptik, letan nou pe pouse ki dansite o ganny revwar.  Me nou pe pouse ki kad planning i ganny revwar, son Lalwa i ganny revwar.  Bann Lazans konsernen parey ki asiz lo sa bann board i pa zis vwar sa plan dir ok, ba annou donn 35 poursan. Me i vwar solisyon.

Mon krwar nou bezwen pouse osi ki Lotorite Planning i komans osi, mon krwar zot in komans fer, me selman i kapab pli souvan.  Zot apel sa en pre planning assessment.  Ki avan ler en dimoun i angaz li dan fer en plan, avan ler nou dir en dimoun non pou en keksoz.  Si i anvi donn son zanfan en dezyenm morso later, si i anvi konstri lo son morso later.  Sa leta konsiltasyon, counseling, koz ek sa dimoun pou vwar en meyer solisyon dan plas ki nou zis dir li non.  Mon krwar sa i en pti pe osi ki nou bezwen antreprann en pti pe, kot i annan plis sa kominikasyon, sa konsiltasyon ant bann lazans konsernen e osi Lotorite Planning e osi sa dimoun ki avan fer devlopman dan son propriyete e osi dan son distrik osi.

Mr Deputy Speaker, lo sa not mwan mon konpran loter Mosyon, mon pou donn li en sipor akoz mon distrik nou napa later me an menm tan osi koman en distrik osi pe ganny afekte avek en bon pe lezot fenomenn natirel osi prenan an kont avek sours delo.  Mon pou osi pouse ki si nou pe demann sa, ki Town and Country Planning Act i vin an fors, i ganny revwar.  Me selman enn ki bon, enn ki byen e osi Land Use Plan i ganny fer byen.  E dimoun i konpran ki i bezwen annan, me selman byen ki i pa abiz drwa sa dimoun pou rezouir son propriyete. Me osi ki asire ki lezot propriyete i ganny proteze e lezot dimoun i ganny proteze dan zot devlopman i ganny proteze.  E osi ki bann Lazans konsernen, nou get plis en pti pe sa sityasyon kote delo pou pase, sa water drain off parey nou apele e drenaz ek bann lezot pti keksoz ki pa pe ede pou fer sa sityasyon amelyore.

Lo sa not Mr Deputy Speaker, mon pou aport mon soutyen pou sa Mosyon.

Mersi.

 

MR DEPUTY SPEAKER

Bon avek sa nou a pran en break e Lasanble i a re zwenn 11er bomaten.

 

(Break)

 

MR DEPUTY SPEAKER

Bon nou a kontinyen avek nou deba lo Mosyon table par Onorab De Commarmond e mon envit Onorab Souris.

 

HON MIRENA SOURIS

Mersi Mr Deputy.  Mr Deputy, Mosyon table par Onorab De Commarmond i ariv devan nou Lasanble a en moman kot i en size ki pe preokip bokou zabitan Beau Vallon e lepep Seselwa.

Demann pou lakaz ek later ozordi i en konsern pou bokou fanmir.  Bokou zabitan dan tou distrik omwen pe esper pou ganny allocate ek en lakaz ouswa en morso kare later.  Dan en lot kote lakantite later ek lakaz ki Gouvernman i kapab donnen i sirpas sa bann demann ki nou annan ozordi.  Sepandan Mr Deputy, Gouvernman Parti Lepep in toultan konsyan bezwen son pep e ankor se sa ki dan manifesto 2015 Prezidan Michel.  Paz 11 i dir, mon site’ nou pou fer plis konblaz pou fer provizyon lenfrastriktir neseser pou bann devlopman fitir enkli lozman.  Nou dan prosedir pou finaliz en master plan pou litilizasyon later’ fin sitasyon.

Mr Deputy, en Land Use Plan i neseser pou kontrol devlopman e osi pou anpes konfli.  Sa land use plan i servi koman en dokiman lonterm, koman en gid pou sa Minister lo lokasyon e dimansyon later.  sa i demontre ki Gouvernman Parti Lepep i konsernen e i annan en plan a lonterm pou zwenn demann nou pep atraver sa land use plan.

Mr Deputy, lartik 26 nou Konstitisyon i dir ki mon site ‘ every person has a right to property and for the purpose of this article the right includes the right to acquire, own, peacefully enjoy and dispose of property either individually or in association with others’ fin sitasyon.

Mr Deputy, Mosyon devan nou Lasanble pe demann MLUH avek Lotorite Plan pou irzaman revwar son Polisi density pou permet plis konstriksyon lakaz.  Merit sa Mosyon i kler akoz ozordi plizyer rezyon i ganny klasifye parey i trouve dan sa land use Plan sa dokiman.  Tel parey mon distrik Beau Vallon i tonm dan sa medium density ki vedir ki devlopman i kapab ganny fer a 35 poursan e 40 poursan i devlopman i kapab ganny fer si i konekte avek sewage e sub divizyon i apepre 600 met kare.  Tel parey loter Mosyon in fer mansyonnen.

Mr Deputy, bokou fanmir i rankontre problenm avek sa grander 600 met kare.  Souvandfwa en paran i annan en morso later e anvi plizyer demann pou later zot deside donn en kare later zot zanfan e la kot zot rankontre problenm e difikilte avek sub divizyon.

Mr Deputy, dan lot senaryo en paran i aste en bout kare later ek Gouvernman e anvi ki i annan zanfan i deside diviz sa kare later.  Me an vi ki napa sa 600 met kare, sa divizyon pa pe kapab ganny fer.  Me tandis ki si sa menm paran in fini konstri lo sa later, sa i permet li pou divize.

Kestyon ozordi se kan en dimoun in pran en loan, lipotek in ganny mete antye lo sa later.  Eski i pou posib pou diviz sa later an vi sa lipotek.  Sa i anmenn ankor en lot kontrent.  Alors Mr Deputy ki rekour sa paran i annan.

Deplis parfwa sa menm zanfan i donn sa paran lanmen kontribye pou pey sa morso kare later.  Bokou fwa sa i anmenn fristrasyon akoz sa zanfan i tourn an ron vi ki posibilite pou sa menm zanfan ganny asiste vitman pa pe posib.

Nou pei pe devlope, vit e fason fer keksoz pe sanze e modernize.  Nou bann Polisi osi merit ganny revize.  I neseser pou ki nou fasilit e adapte bann prosedir kan fodre.

Mr Deputy, Mosyon devan nou Lasanble i kler anvi sa gran demann pou lakaz ouswa later.  Bokou fanmir ti a swete ed zot zanfan ouswa fanmir dan sa fason pou retir presyon lo Gouvernman.  Deplis later pe diminyen de zour an zour.  E later prive i vin pli ser pou bann fanmir ordiner.

Ozordi dan Sesel nou pe dir ki nou bezwen gard lafanmir ansanm e nou konnen ki lafanmir se pilye nou sosyete.  Mr Deputy, tou fanmir i swete ganny son prop lakaz pou fer grandi son zanfan dan son fason.  Avek problenm density plizyer fanmir i bezwen deplase pou al Perseverance oubyen dan lezot distrik.  Menm zot war zot pe fer depans an plis olye reste lo later lafanmir ki pa bezwen peye.

Par kont i annan serten ki napa swa, zot bezwen reste tou ansanm kot souvandfwa i anmenn diskord parmi lafanmir e sa i aport lefe lo laprantisaz zanfan dan lekol.  Bann tel konsekans ki nou pa pe realize.

Mr Deputy, reste obor fanmir i anmenn kantite zwa de viv e sipor moral.  Deplis sa i anmenn bokou benefis an term finansyel e dekouraz labsans dan travay e osi ogmant prodiktivite.  Sa dan li menm i ede pou ogmant valer lafanmir e anmenn plis linite e larmoni.

Mr Deputy, dan sa konteks ki sa Mosyon i ganny son merit, ki mon pou dakor avek loter Mosyon, mon demann MLUH avek Lotorite Plan pou revwar sa Polisi density. An menm tan mon rekomande ki PUC i bezwen fer en letid aprofondi pou vwar fason pou kapab konekte bann lakour lo sewage system ki a ede redwir problenm denisty.  Sa pou permet e fasilit lavi sa bann fanmir dan mon distrik e osi lezot fanmir dan nou pei Sesel ki pe ganny afekte par sa Polisi.

Mr Deputy, mon pou aport sipor pou sa Mosyon.

Mersi.

 

MR DEPUTY SPEAKER

Onorab Arnephy.

 

HON BERNARD ARNEPHY

Mersi Mr Deputy Speaker.

Bonzour Mr Deputy Speaker, bonzour tou dimoun.  Mr Deputy Speaker, sa Mosyon ki Onorab De Commarmond in prezant devan nou Lasanble, evantyelman ki bann pwen konsern pou ganny met devan Gouvernman i en tre bon Mosyon.  En tre bon Mosyon dan lesans kot ozordi nou pe koz en kantite lo meyer servis.  Service delivery e sa en koze ki nou’n koz en kantite lo la.  Prezidan dan son Ladres Leta Lanasyon in met en kantite lanfaz lo la e nou konnen poudir ozordi dan bann Minister, dan bann Departman i annan en kantite defayans pou adrese e larealite i reste ki kot Lotorite plan i enn sa bann landrwa kot i still annan an kantite konsern e nou koman bann MNA’s nou fer fas avek sa toulezour akoz konsern bann dimoun.  Dimoun i call nou pou rod serten leklersisman, serten direksyon pou zot kapab ganny solisyon pou zot bann issues.

So mon santi ki sa Mosyon i enn ki timely akoz i pou evantyelman fer sa Lotorite realize poudir avek modernite, avek sanzman dan lafason fer keksoz nou osi nou bezwen aziste nou e fer ki nou rann lavi nou bann dimoun pli fasil.

E en pwen ki mon krwar i enportan ki viz ver sa Mosyon se ki Prezidan ti dir dan son Diskour ki koman nou Gouvernman, nou reste angaze pou nou asire ki bann Polisi i ankouraz tou fanmir Seselwa pou evantyelman annan zot prop lakaz.  E ozordi lafason ki keksoz i ete e nou vwar ki sa i pa touzour fasil akoz i annan difikilte.

Mr Deputy Speaker, ozordi i reste lefe ki i annan en kantite presyon lo Gouvernman pou donn later dimoun e menm pou kapab asiste dimoun avek lakaz, social housing.  E dan bann distrik parey in ganny dir, i annan bann distrik ki son topografi pa permet pou annan ase later pou kapab allocate avek dimoun.  Me malgre i annan serten distrik ki annan otan later, me pou en rezon ouswa en lot lafason ki sa bann later i ganny pre allocate, ouswa i ganny allocate i pa permet otan teren pou konstriksyon rezidansyel.

E la mon oule fer referans avek mon distrik Anse Boileau ki en gran distrik an term siperfisi, i annan en kantite later.  me malerezman in ganny demarke koman en distrik agrikol e kot en kantite later i ganny rezerve koman later lagrikiltir e later rezidansyel li menm li i limite.  Alors dan sa konteks mon mazinen ki si Lotorite Planning, Gouvernman ansanm avek tou lezot Lotorite.  PUC, bann Service Providers, nou bezwen revwar en pti pe lafason ki nou fer en keksoz.  E parey bann lezot Koleg in dir, mon pa pou repete.  Ozordi i annan en kantite fanmir ki annan son later, paran ki annan son teren ki ti a kontan sub divide pou li donn son zanfan en bout pou konstriksyon.  Me sa i pa touzour fasil akoz sa bann siperfisi requirement ki zot pe demande.

Me the good thing about tousala se ki ankor nou Gouvernman, nou kontinyen rod fason pou nou asiste nou dimoun.  Atraver HFC par egzanp.  Ok, nou vwar poudir loan ki nou donne pou fer konstriksyon, swa en lakaz proper, ouswa anba second housing nou kontinyen vwar pou fer sir ki i pli abordab e son quantum i bokou pli o.  e sa i ganny fer par Gouvernman.  Me lot kote i annan serten Departman dan Gouvernman ki i met serten retar.  Akoz.  Ozordi bomaten en paran i deside pou li donn son zanfan permisyon pou li fer konstriksyon lo son later.  me vi ki sa later pa kapab sub divide, so sa dimoun i entitle pou en second housing loan par egzanp, permission to build.  E mwan dan mon distrik personally mon’n rankontre en kantite cases, ok. Kot mon mazinen lezot distrik osi kot en kantite  zanfan in ganny asiste anba second housing e ler i vwar poudir son konstriksyon in fini.  Ler i deside pou li rezouir son konstriksyon, vwar la kot problenm i arive ek paran.  E paran i demann li pou sorti lo son propriyete.  E i annan bann keksoz, genuine e s ai kree en kantite lenkonvenyans pou sa dimoun ki’n pran sa loan menm pou sa dimoun ki’n lend li sa loan. So mon mazinen si ti annan en sub division kot sa dimoun i annan son dokiman legal dan son anmenn sa ti pou fasilit bokou keksoz.  Akoz you never know ki arive demen.  Ozordi ou byen avek ou paran.  Demen i ariv en konfli e ou lo son propriyete malgre ou konstriksyon pou ou, ler i dir ou sorti ale, ou napa swa.  E i annan bann cases ki’n arive e nou, nou bezwen deal avek sa.

Mr Deputy Speaker, en lot konsern ki mon konnen i en konsern Gouvernman, konsern Lotorite se sa sistenm running water avek sewage ki en konsern in terms of density.  So nou donn dimoun permisyon pou konstrir, kote nou met bann lenfrastriktir.  Me mon krwar nou bezwen bouze avek modernite.  Nou bezwen rod bann fason pli inovativ.  PUC i invest en kantite dan bann lenfrastriktir.  Elektrisite, sewage and so on.  E mon krwar it’s high time, si nou anvi tir serten presyon lo bann fanmir, lo Gouvernman and so on nou bezwen komans invest dan bann sewage treatment plant dan bann distrik, dan bann rezyon, dan bann housing estate.

E mon krwar sa i en solisyon long term.  Malgre i pou kout Gouvernman en pe larzan, mon krwar dan son long term planning PUC i bezwen mazin investment adekwat dan bann sewage treatment plant.  E sa i pou fer ki i pou retir sa presyon ouswa  i pou tir en pe sa restriksyon kot mon konpran par fwa konsern lotorite planning.  Ok, so ou pou donn dimoun permisyon pou konstrir dan en density ki ase konzeste, ouswa ase anfermen.  Kote bann sistenm pou ale.  So mon mazinen si nou annan bann central plant i pou ede pou adres sa konsern.

Mr Deputy Speaker, en lot pwen ki nou fer fas avek en kantite koman bann leaders dan distrik.  Se ozordi nou annan en kantite draft’s man ki malonnet.  Sa i en fe ankor kot en dimoun i annan son pti morso teren pou li konstrir, i deside pou li rod en draft’s man pou fer son plan.  Sa dimoun i vin vizit son landrwa e sa dimoun li i napa okenn konesans dan plan and so on.  So i espekte en draft’s man fer en louvraz ki byen pou li.  Get son topografi later, get son kondisyon later ki mannyer i ete pou kapab fer son plan.

Be ou vwar bokou ka kot sa dimoun i fer en plan e ler i submit avek Lotorite Planning, planning i donn refusal, i p adonn laprouvasyon akoz petet lafason ki sa plan in ganny konsevwar, in ganny devlope.  I pa adapte avek sa teren.  E ou vwar sa dimoun i bezwen go back.  Swa menm dimoun pou re design en lot plan, ouswa rod en lot dimoun e sa i costly pou sa dimoun.   E mon krwar la nou pe demann en lapel an relasyon ek sa Mosyon.  Ok, bann regilater i bezwen asire.  Mon konnen ki serten travay ki’n ganny fer pou asire ki bann drafts man sirtou zot travay dan en fason pli onnet.

bokou i fer li byen, me i annan serten Ki malerezman zot malonnet.

E en lot pwen konsern ankor ki mon ti  kontan met devan lotorite konsernen, Gouvernman.  Se ki en kantite fwa bann later ki Gouvernman i allocate ek nou dimoun.  En dimoun i pas en kantite mizer par fwa pou li kapab fer en search pou li ganny en mors later.  e ler i trouv sa morso later i fer son laplikasyon e i ganny allocate avek sa bout later.  e ler i ganny allocate avek sa bout later in pare pou li fer son devlopman rezidansyel, ki ou vwar.  Planning e bann lezot lotorite i dir li poudir sa landrwa i pa fit and proper pou li fer sa devlopman.

But then Mr Deputy Speaker, why in the first place ki ou ti vann sa dimoun sa bout later kan ou ti konnen poudir swa i tro obor en larivyer, whatever pou li kapab fer son devlopman.  So mon krwar tousala nou’n koz sours fristrasyon dimoun.  Sa i bann keksoz ki fer dimoun fristre.

Ok, dimoun i fristre, dimoun i blanm Prezidan, i blanm Gouvernman.  Me souvandfwa sa i lafot bann teknisyen, mon pa konnen si zot fer ekspre pou fer Gouvernman ganny blanmen, pou fer dimoun fristre.  So dan sa loptik mon ti a kontan ki nou bezwen re vizit en pe dan nou bann departman.  Regard en pe travay ki sa bann teknisyen pe fer.  Eski zot pe fer en travay dan lentere lepep, dan lentere nou dimoun, dan lentere nou piblik e zot pe fer travay dapre plan sa Gouvernman.

So mon krwar i bann konsern ki nou bezwen regarde si nou anvi adres sa bann pwen ki Onorab De Commarmond i anvi put forward atraver son Mosyon.

E finalman Mr Deputy Speaker, mon mazinen koman en Gouvernman nou devret pli forward looking.  Pli forward looking dan lesans kot nou bezwen bouz en pti en pe avek keksoz.  La nou pe koz lo Town and Country Planning Act ki date depi 1972.  Ok, mon krwar ozordi nou annan sa kapasite pou nou kapab anmenn bann lezislasyon modern.  Ok, bann lezislasyon modern ki pou kapab fasilit devlopman, plis devlopman.  Plis konstriksyon dan nou pei.  E la mon pe met lanfaz sirtou lo konstriksyon rezidansyel.

Ozordi bokou dimoun i krwar poudir sa fardo pou nou kapab donn dimoun lakaz i reste zis lo Gouvernman.  Non, i pa zis ne konsern Gouvernman sa.  I konsern nou tou.  I konsern bann fanmir ki annan propriyete, ki annan teren.  I konsern bann biznes prive, partnership ant prive ek Gouvernman.  Tousala si nou zwenn ansanm mon krwar keksoz pou bouze.  M epou sa bann keksoz kapab bouze nou bezwen fer sir nou annan bann lezislasyon ki senp, ki fasilit keksoz, ki pa anmar lanmen dimoun.  E si sa i arive nou pou vwar poudir disi 2, 3, 4 lannen en kantite problenm lakaz ki nou pe fer fas avek ozordi.  Mon pe koz lo lakaz akoz sa Mosyon i vize ver plis devlopman lakaz.  Nou pou kapab adres en kantite sa bann problenm Mr Deputy Speaker.

Alors parey Onorab De Comarmond, loter Mosyon in dir.  Mon ti a kontan, mon osi mon siport li, pou ki dek ki nou fini avek sa Mosyon.  Bann pwen ki’n ganny sorti, bann sizesyon, bann konsern i ganny met a latansyon Lotorite konsernen malgre nou konnen poudir Mosyon i pa neseserman biding, me ki bann konsern i ganny met a Lotorite Konsernen e ki tre byento nou vwar serten aksyon ki pou fasilit bann prosesis, bann prosedir pou nou kapab vwar plis devlopman.  Sirtou devlopman  rezidansyel dan nou pei, dan bann distrik.  Distrik ki swa i low, medium, high density. Me nou konnen poudir ozordi tou distrik i annan demann pou lakaz e Gouvernman i reste angaze pou li asiste otan ki i kapab. M e nou bezwen realize osi, realistik poudir tou sa zafer pa kapab tonm lo ledo Gouvernman.  Setaki i annan son rol pou li zwe dan sa demars.  Avek sa enn, realistik poudir tou sa zafer pa kapab tonm lo ledo Gouvernman.  Setaki i annan son rol pou li zwe dan sa demars.  Avek sa enn de mo Mr Deputy Speaker, mon pou aport mon siport total pou sa Mosyon.

Mersi.

 

MR DEPUTY SPEAKER

Onorab Monnaie.

 

MR DEPUTY SPEAKER

Onorab Monnaie.

(Interruption)


HON FRANCHASCA MONNAIE.

Mersi Mr Deputy.

Sa Mosyon ki devan nou ozordi, pour nou demann Lotorite Plan pou irzaman revwar son Polisi Density, pou permet plis konstriksyon lakaz, ki enportan.  Plis konstriksyon lakaz i en nesesite, me i osi neseser pou fer sir ki bann servis esansyel i ganny regarde.

I annan bokou lakaz ki’n ganny fer e en kominote i elve en sou-distrik, i vin en kominote, me difikilte ki sa bann kominote i fer fas avek, nou devret met li anba konsiderasyon.

An fer plis lakaz nou bezwen vwar ki Planning i bezwen annan en vizyon pou sak distrik.   Se en mank vizyon dan Planning ki fer blanm sorti kot nou popilasyon, tonm e ganny plase lo sa Gouvernman, e par konsekans ganny plase lo Parti Lepep.

Ler en Departman i fail, Parti Lepep i ganny blanm.  Vizyon Planning pou bann distrik, i devret pe ganny update lo en nivo anyel pou zot pa vin date e reste realistik.

Legzanp ki mon ti a voudre eksplik avek, se en senp sityasyon La Gogue.  En madanm son lakaz i ganny flooded ler lapli i tonbe akoz semen i par lao li.  E par konsekans sa lavalas delo, i kontiny son larout dan lari son vwazen ki sitye par anba li.  Mon koz vizyon akoz si Planning ti annan en vizyon, i ti pou vwar ki desarz delo lapli pou lav later sa madanm e son fondasyon si en semen i pas par lao son later san okenn drenaz.

En lot issue Polisi dan Planning an relasyon avek oter en lakaz ki en fanmir ti a voudre azoute, me akoz later i limite, zot in deside azout sa lakaz an o. Ki arive avek Planning? Ler ou dir nou pa kapab fer en lot lakaz par devan nou anvi met li anler – parey Mont Buxton i ete, zot napa later, zot bezwen mont anler.  Parey La Gogue i ete, parey Maldive i ete kot napa later, zot bezwen mont an o.  Ki Planning pou dir lo la?

Mon a donn zot en pti sityasyon ki’n arive Bel Ombre.  Mon ti prezan, personnelman, ler Planning ti vizit en fanmir e zot ti ganny dir ki lakaz letaz zot anvi konstrir pa kapab ganny konstrir akoz i bar view sa enn ki par lao li.  E zis en pti lesplikasyon, sa fanmir ti anvi mont anler osi an azout-man ki ti napa ase later, i ti anvi mont an o – li i ti anvi azout son bout anler, akoz sa enn ki par devan li ti’n ganny drwa fer lakaz letaz e mont an o e pe bar son view.

Mon Kestyon avek bann Policy Planning, se eski zot swazir lekel ki zot pou fer mont anler?  Eski zot swazir lekel ki zot pou aplik sa bann Polisi?

Mon pwen Mr Depite Speaker, louvraz Planning se pou zot anforsi zot Polisi.  Be silvouple pa zwe lapreferans e fer zot Polisi aplik pour tou.

Oter en building Rezidansyel, sa Polisi i devret ganny revi.  An plis ki drenaz, semen, lalimyer lo semen i annan sityasyon lasesres e fasilite delivre delo kot bann lakaz, tousala i devret ganny konsidere ler nou pe mazin Polisi Density pou azout plis lakaz, pou konstrir plis lakaz, nou devret annan ankor bann lezot Lorganizasyon, bann lezot Departman ki zwenn ansanm e fer en vizyon pour sak distrik.  Ler nou pe fer plis konstriksyon, nou pa kapab zis dir annou fer plis konstriksyon annou azout lakaz, annou fer lakaz, solman nou pa kapab revwar bann lezot Polisi; nou pa kapab revwar sityasyon bann Lazans, Lanvironnman, PUC, Cable & Wireless?

Nou konnen poudir ouswa parey Airtel, or whatsoever ki vini apre, Desarz ki, zot pa kapab zwenn e fer en plan pou en distrik.  I annan bann distrik isi ki Cable pa arive, kot Airtel pa arive, kot laliny pa arive, kot drenaz - kot drainage pa ganny enplimante profesyonnelman i ganny fer byen.  Sa i bann keksoz ki i pa sipoze difisil pou Management lo kote konstriksyon lakaz dan sak distrik.

Pou terminen Mr Deputy, mon ti a voudre dir ki konstriksyon lakaz i en nesesite dan nou sosyete.  Letan date bann Polisi  ki ti la avan sa zenerasyon in komanse, avan bann nouvo zenerasyon i vini, nou bezwen revwar sa bann Polisi pour nou moderniz li, pour nou update li. Annou pa zis update en Polisi, sanz zis enn, me regard an tou bann larestan ki kapab ganny afekte.

E en pti keksoz an plis, ki mon ti a voudre azoute – dan Density, zot Polisi e dan kontinyasyon devlopman nou pei, regard bann sou-distrik, azout Laboutik, lo zot bann plan, akoz mwan mon konn dimoun ki bezwen pran bis pou zot al dan en laboutik dan bann sou-distrik.

Mersi Mr Deputy Speaker.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.  Mr Deputy Speaker Polisi aktyel i dir ki Planning Authority i permet ki pou subdivide en later, fodre ki tou le de later pa mwens ki 400 met kare.  E dan leka ki sa later i mwens ki 400 met kare, Lotorite Planning pa pou donn ou permisyon pou fer en lakaz lo sa later.

Mr Deputy Speaker, sa Mosyon table par Onorab De Commarmond, i merit laprouvasyon Lasanble Nasyonal, akoz par lefe ki nou pe swiv sa Polisi parey i ete la, i pe anmenn avek li plizyer kontrent e konsern e ki nou pe ganny demande par manm piblik pou met devan, pour ki Minister e Lotorite konsernen a pran kont e osi pran serten aksyon osito posib.

Permet mwan Mr Deputy Speaker, alors pou met devan serten kontrent aktyel, ki’n ganny met a mon latansyon par manm piblik dan mon vizit door to door ki mon’n fer, ki pe fas avek problenm vizavi sa Polisi koman i ete ozordi.

Par egzanp, Mr Deputy Speaker, en paran ki anvi son zanfan i reste o bor li, avek li, ed li ziska ki in vye ou nepli kapab, pe vwar ki malerezman sa zanfan pa pou kapab ganny son prop kare later anba sa Polisi aktyel.

En lot kontrent Mr Deputy Speaker, se problenm avek sa zafer zeritye, kot nou vwar plizyer zeritye ki vin reklanm later.

Mr Deputy Speaker, Kestyon se akoz ki Planning Authority, ki’n donn ou permisyon pou fer ou lakaz lo sa pti bout mwens ki 400 met kare e ki apre sa menm Lotorite, pa pe permet ou subdivide ler ou fer sa.

E ki ou vwar Mr Deputy Speaker? Ou vwar ki sa dimoun ki anvi fer en lakaz lo later zeritye, kot in ganny permisyon pou batir, i end up avek en loan amount ki mwens ki i kapab ganny pou konstrir son lakaz.  E par lefe ki later pa pou li, i vwar alors ki HFC, par egzanp, pa pe kapab donn li plis ki R400 mil anba 2nd Housing Loan Scheme.

Me selman Mr Deputy Speaker, pou lakaz ki ou pe fer lo sa later e prezan ki ou lakaz i pour ou e ki lakaz ou paran i vin ansanm lo en sel parsel later, i vedir ki tou sa later i pou ou zeritye.

Mr Deputy Speaker, e prezan sa ki enteresan ek tou sa, se dizon demen ou paran i ferm lizye, an vi ki ou paran ki’n donn ou permisyon pou fer ou lakaz, ou  souvandfwa vwar zanfan vin reklanm zot par atraver zeritye, akoz zot osi form parti sa propriyete pou tou zeritye.

E sa Mr Deputy Speaker, i fer  ki souvandfwa  nou pe vwar bokou konfli oubyen sityasyon kot apre ler paran in mor, ou menm avan zot lanmor, problenm i komans lev-e kot nou vwar divizyon dan fanmir.

Mr Deputy Speaker, alors ki mon pe fer resorti, se ki Planning Authority i devret les ou fer ou lakaz lo en later ki mwens ki 400 met kare menm apre subdivision; akoz Mr Deputy Speaker, parey Onorab Arnephy in fer resorti, si ou’n donn mwan permisyon pou fer sa lakaz, akoz ou pa kapab les mwan subdivide sa later?  Tou mannyer sa lakaz i pou mwan, me par lefe ki ou pe anmar mon lanmen, pour mwan pa kapab subdivide sa later ki pou vin pour mwan, i fer keksoz vin pli difisil.  Me si parkont keksoz ti otreman sa:-

Enn:-mon ti pou kapab ganny en loan pli for ki mon kapab gannyen dapre mon income, ki en loan ki plis ki R400 mil.

E dezyenmman, sa pou fer ki mon pa pou antre dan konfli avek mon frer ek ser, akoz sa morso later i pou mwan.  Me si i kontinyen reste later zeritye kontrerman a sa, mon pou vwar mwan dan problenm.

So, ki mon pe demande alors Mr Deputy Speaker, akoz mon pa pe konpran lozik par deryer sa Polisi an plas, set akoz ki ou Planning Authority, ou a donn mwan permisyon pou konstri lo en bout later ki mwens ki 400 met kare apre subdivision, ki mon paran pa ti pou zanmen kapab divize akoz tou le de nou pa ti pou kapab ganny mwens ki 400 met kare later:- e kot dizon si sa later an total i donn 600 met kare menm kantmenm posibilite pou fer en dezyenm lakaz i la, alor akoz ki ou Planning Authority ou pa oule les mwan fer mon lakaz, lo en sel parsel later san subdivide? Me selman ler pou arive pou subdivide ou a dir mwan, ’Non, mon pa kapab fer li ’.

Mr Deputy Speaker, mon krwar ki sa i en lenzistis, ki mon krwar i devret ganny korize o pli vit posib.  Akoz an fezan sa, mon krwar mon pou kapab anpes en bon pe konfli dan fanmir e pou osi permet dimoun bouze pli vit avek zot proze, pour zot kapab fer en lakaz e konplet zot lakaz korekteman.

Vwala Mr Deputy Speaker, mon kontribisyon lo Mosyon prezante ozordi e osi pwennvi bann dimoun ki mon’n koz avek lo sa Mosyon devan, nou ki sirman mon pou siporte.

Mr Deputy Speaker, mon pou demande parey mon bann lezot koleg Onorab in fer ozordi, ki bann propozisyon e sizesyon ki’n ganny met devan ozordi, i a ganny  pran an konsiderasyon dan en dele letan apropriye, an prenon an kont presyon lo Gouvernman pou satisfer demann pou later ek lakaz ki kontinyelman ogmante:- e kot later pe vin pli rar, me osi pou ankouraz plis devlopman, plis konstriksyon lakaz lo en propriyete prive, ki a permet plis zanfan reste akote zot paran; ki a osi kree en meyer fason viv antre fanmir parey nou ti viv lontan, ki enportan pour nou sosyete.

Mr Deputy Speaker, mon pou siport sa Mosyon.

Mersi.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.

Mr Deputy Speaker sa Mosyon ki devan nou, i enn ki tre trez enportan e i vin a en moman trez – very importunate moment pou nou isi Sesel akoz lafason ki mannyer keksoz pe ale – levolisyon dan lavi Seselwa tou le zour.  Nou pe vwar ki nesesite e bezwen dimoun pou annan en lakaz, pe vin deplizanpli pli prononse.  E se pour sa rezon ki nou bezwen konsider nou bann Polisi ki relye avek lozman, sirtou par lefe ki nou  annan plizyer eleman asosye avek sa Mosyon li menm.

Premyerman nou annan en eleman Konstitisyonalite. En eleman Konstitisyonalite akoz Lartik (26) nou Konstitisyon, i garanti nou drwa a propriyete.  Mon annan drwa pou zwir mon propriyete, premyerman (1).

E dezyenm, Konstitisyon osi i garanti ou en drwa to have a decent shelter. Ok, drwa pou annan en lozman.  Now, si ou pran sa an relasyon avek sa Mosyon, an relasyon avek sa Polisi, pran par egzanp mwan, mon annan en zanfan ki in apply pou en lakaz atraver sistenm – prosedir normal ki annan, me i lo en waiting list e mon annan en bout later la ki mon zanfan i kapab fer en lakaz lo la.  Me an vi Polisi ki mannyer i ete ozordi, mon zanfan pa pe kapab fer sa lakaz, akoz i pa pe ganny approval pou son plan, pour son lakaz ki fer...

So, son bann opsyon ki i annan se (1) i al an deor san approval i fer en lakaz kot apre Planning i vini i kase. E son lot opsyon se esper en lakaz, oubyen se espere pou li aste en bout later lo private market, kot la nou vwar poudir avek spekilasyon ki’n arive lo valer later pandan sa bann dernyen lannen, in fer ki valer later dan bokou landrwa - dan bokou sirkonstans, i an deor mwayen laplipar bann dimoun ki sey aste sa bann later. So, sa i premye konzantir ki ou annan.

Mon annan en dezyenm konzanktir, se en konzanktir Legal.  Konzanktir Legal akoz nou annan en konzanktir ki relye avek Ownership of property. Ozordi par egzanp mwan mon annan en propriyete ki en serten siperfisi.  Mon annan 4 zanfan. Demen en keksoz i arive ek mwan, mon mor.  Mon 4 zanfan i vin bann co-owner sa propriyete ki mon annan e  zot zwir menm drwa egal sa propriyete, par lefe ki zot tou le 4 zot mon bann zanfan.  E si par egzanp a en moman, mon’n donn enn mon zanfan en permisyon pou konstrir lo sa later, i pou anmenn en serten eleman pli tar, kot si mon bann zanfan i deside pou partisyon propriyete kot pou annan serten difikilte, akoz i annan enn ki deza annan en lakaz e sa lakaz in azout valer lo sa propriyete ki zot, zot osi zot en owner.

So, sa issue Legal i en issue trez enportan pou konsidere, dan sa  deba ki nou pe fer e mon pou konnekte tousala ansanm a lafen mon lentervansyon.

Nou annan en lot konponan la e sa se konponan bann rol, ki diferan parti prenon atraver sa ki nou pe diskite, atraver sa size ki pe diskite i annan.  Me menm ou  annan rol Leta atraver son bann azan.  Lazan Leta dan sa sirkonstans se Planning Authority. E li i met an plas bann Regilasyon e bann Polisi ki sipoze pa arbitrer me deal avek sa bann sityasyon sistematikman, dan le mezir ki zot an konformite avek bann Regilasyon ki an plas.

Annou pran en legzanp.  Annou pran bann legzanp ki’n ganny donnen par bann entervenan avan mwan.  Nou’n vwar poudir  i annan bann enkonsistans, dan lafason ki sa Polisi i ganny enplimante dan diferan sirkonstans.  E sa pour mwan i premye Red Flag ki  nou bezwen raise, an relasyon avek sa Polisi as it exists ozordi.  I premye Red Flag akoz si nou vwar poudir i annan enkonsistans dan lenplimantasyon en Polisi, then somewhere, somehow i annan en keksoz ki nou bezwen re- aziste avek sa Polisi pour ki i kapab meet e deal avek bann sityasyon ki come up.

Mon pou donn en legzanp tipik; par egzanp i annan de sirkonstans kot wi, sa Polisi i bezwen ganny met an aplikasyon akoz probableman en konstriksyon ki ganny fer  dan en teren ki siperfisi i tro pti, i pou kree plis problenm oubyen i pou kree plis lenkonvenyans pou bann lezot propriyeter dan sa landrwa, ki i pou kree en dibyen pou en sel dimoun.  Ok? So, i posib ki i annan sa morso, sa laspe avek.

Me, de lot kote osi, ou vwar de sirkonstans kot vizibleman e  lozikman, ler ou pe regarde kot sa konstriksyon pa pou kree okenn nwizans, pa pou kree okenn lenkonvenyans pou lezot propriyeter, me nou pe still maintain ki i annan en Polisi an plas, ki vedir pou sa dimoun pa kapab konstrir.

Annou al dan en pti pe pli in depth avek sa pour nou kapab konpran, ki mannyer prezan sa i vin atraver rol bann endividi dan sa bann sirkonstans.

Premye senaryo Mr Deputy Speaker, e mon konpran akoz Polisi la i bezwen ganny mezire an relasyon avek konteks Legal e legalite desizyon ki ganny fer anba Polisi.

Par egzanp, annou pran en fanmir kot i annan 2 zanfan ki’n ne dan wedlock e 2 zanfan ki’n ne outside wedlock. Ozordi i annan en presyon, pou annan serten lamannman ki ganny fer dan Kod Sivil pour ki, nou enkli as heirs egal, bann dimoun ki’n ne outside wedlock, akoz zot osi zanfan sa dimoun ki ti propriyeter sa landrwa.  E sa i raise en lot issue ankor, kot si nou pa pe pran bann aksyon, bann konsekans, aksyon Legal pli tar, nou pou vwar nou dan difikilte si nou annan en Polisi ki pa meet bann sirkonstans Legal, ki pei pe pas atraver.

E en keksoz ki mon krwar i bezwen ganny fer, e mon apresye ki Zidisyer pe fer zot mye pou endik popilasyon lo la - mon krwar nou dimoun i bezwen ganny edike as to what rights they have an relasyon avek Ownership of property.

E mon soulinyen poudir Ownership of property Sesel ozordi i reste enn bann keksoz pli enportan dan lavi nenport dimoun, akoz tou propriyete i valer. E sa valer asosye ek sa propriyete, se sa ki fer ki nou annan en latasman personnel, emosyonnel avek sa propriyete.

Mon pou donn ou en legzanp tipik e servi lentervansyon entervenan avan mwan, pou met sa an konteks.  Entervenan avan mwan in raise sa pwen kot -  ou bezwen annan en serten siperfisi an met kare pou kapab subdivide en later.  Ok? Prenon an kont par egzanp, mon annan 400 met kare is - mon annan en teren ki mon kapab met en dezyenm lakaz lo la, sa dezyenm lakaz i ganny fer e i annan lezot co-owners. I pou annan tout en Legal gymnastics ki bezwen al ganny fer pour ki sa owner, e parey entervenan in soulinyen oparavan, sa owner ki oule zwir sa lakaz ki li in depanse, pour li kapab actually ganny ownership sa partisyon ou kapab apel li, sa lakaz kot i ete. Akoz tou bann co-owners i annan en equal right lo sa landrwa, malgre ki li in ganny en Permission to Build. E sanmenm sa mon krwar tou dernyerman HFC ti pe ensiste ki sa bann Permisyon to Build i ganny notarized, i ganny anrezistre pour ki pli tar se zisteman i annan sa bann issue ki releve, sa dimoun i ava annan serten dokiman ki kapab siport son laplikasyon, pour li maintain zwisans sa morso propriyete ki li i annan.

E sa, ler nou pran sa  nou met sa an perspektiv, sa i bezwen ganny pran an konsiderasyon, an relasyon avek okenn diskisyon ki nou pou annan, lo sa Polisi ki nou pe diskit lo la ozordi.  I tre trez enportan, akoz souvandfwa nou vwar  poudir difikilte pou en dimoun kapab – par egzanp fer en lakaz, se akoz zisteman i annan sa konplikasyon Legal ki kapab arise, atraver en Polisi ki Gouvernman in kree, atraver en Permisyon ki Gouvernman in kapab donn en dimoun, pour li fer en lakaz ki apre i kree plis diskord dan en fanmir.   So, sa i enn sa morso sa largiman ki nou bezwen konsidere.

En dezyenm  porsyon sa largiman, i konsern par egzanp dan sirkonstans kot ok zistifikasyon ki ganny anmennen pou sa Polisi, i dir ou koumsa poudir dan sa landrwa, pou nou permet en dimoun fer ankor en lakaz, i kree en nwizans, i pou kree konfli.  Me la kot mwan mon konsernen, akoz nou pa kapab servi en Polisi ki aplik dan en sirkonstans kot i riske annan konfli ant en group dimoun, e i aplik egalman dan en sirkonstans kot pou napa konfli ant bann dimoun:-kot tou keksoz i kler, kot sa dimoun i kapab fer son lakaz - son paran in pare pou li.  I kapab en dimoun ki en sole heir ki pou benefisye lakaz son paran, ler son paran i mor, oubyen in komans son  fanmir i oule fer son lakaz akote.

Me nou aplik menm Polisi dan sa sirkonstans.  So, pwen fondamantal ki mon oule fer a sa moman la, se ki, ler nou  aplik sa Polisi i pa kapab arbitrer.  I bezwen dan en fason sistematik kot nou zis sak case lo zot merit ki zot annan.  Rezon akoz, se akoz nou pe koz lo en resours ki limite e i pa pou fasil pou sa dimoun al ganny en lot bout later pour li kapab fer son lakaz.  E se pour sa rezon ki nou bezwen konsider tou posibilite, avan ki nou zis dir met en stanp, ‘Non, sa dimoun pa kapab proceed avek son konstriksyon.’

En lot pwen enportan i konsern sa siperfisi ki nou’n met an plas. Ok, ou donn mwan permisyon pou mwan build en 2nd house, parey entervenan avan mwan in dir, me apre i difisil pour mwan kapab arpant sa landrwa e subdivide . Mon konpran bann konzanktir Legal e se pour sa rezon ki mon pe demande  dan okenn revi Polisi ki ganny fer, nou bezwen osi anmenn son laspe Legal avek, anmenn bann L’Homme De Loi ki travay dan sa domenn, ki eksperyans sa domenn tou le zour, pou donn bann nide konkret, lo lafason ki sa Polisi i kapab pli byen ganny ankre, ganny fer antre dan nou sistenm Legal, pou asire ki demen nou pa kree bann problenm down the line.

Mr Deputy Speaker, i kler ki nou annan en nesesite pour nou revwar sa Polisi, akoz ozordi let’s face it, i pli fasil parfwa osi kot ou annan en zanfan o-bor son paran.  Par egzanp, ozordi nou pe koz lo sa issue Carer, provide Carer pour en manm fanmir.  Me si par egzanp mon kapab fer en lakaz o-bor mon manman e demen okip  mon vye manman, mon la o-bor li, isn’t that better ki demen nou bezwen pas port an port – kaz an kaz pou rod en Carer ki mon vye manman, ok petet avek son serten pti kapris ki i annan akoz son laz, i pa oule nenport ki vin dan son lakour. E konbyen nou ki’n eksperyans sa bann sityasyon?

So, se pour sa rezon ki ler nou regard sa Polisi, nou pa kapab regard li zis dan konteks ki i pe aplike - savedir dan en konteks Devlopman, me nou bezwen regard son bann konteks sos-yo ekonomik, son bann fakter sosyal ki i asosye avek e re-konnekte tousala ansanm, pour nou kapab ganny en meyer Polisi - en pli bon Polisi ki kapab esansyelman respond pli byen avek bezwen nou popilasyon ozordi.

Mr Deputy Speaker, i annan bokou ki nou kapab dir lo sa Mosyon.  I en Mosyon ki vin parey mon’n dir, en moman tre trez enportan.  It’s a very importunate moment pour nou anmenn sa Mosyon akoz  nou annan sa 'will' pour nou regard lafason ki nou pe fer bann keksoz ozordi.

Nou konnen poudir i annan en revi konpreansiv ki’n ganny fer lo nou Civil Code e fotespere sa revi osi pou enkorpor bann eleman an relasyon avek Ownership; e ki nou pou bezwen pran kont ler nou pe prepar okenn Polisi ki relye avek Devlopman Later, akoz i pou relye avek, ki pou konnekte pli tar avek Ownership of property e value added to Property. So, tousala i bezwen ganny met an perspektiv.

Be, one final point Mr Deputy Speaker, mon konnen poudir i annan Leader Lopozisyon in fer referans avek Laplikasyon, Regilasyon arbitrer-man olye sistematikman kot you must have – nou bezwen si nou dir en desizyon i pou sa enn, i bezwen aplik pou tou.

Nou bezwen osi konsider en eleman enportan e sa se sa eleman ki konsern waste water; from gutter to drain par egzanp.  E ozordi en bann problenm ki bokou fanmir pe rankontre se bann konstriksyon ki’n ganny fer kot li par egzanp in ganny demande pour li fer tou keksoz pou mitigate son delo, me en lot konstriksyon pa’n fer menm parey e la li i pe ganny afekte.  Oubyen dan sirkonstans kot 2 konstriksyon pa’n mitigate byen delo e pli tar nou pe ganny bann problenm kot sa pe arive.

Mwan mon ankor pe demande, mon pe request ki Lotorite Planning i bezwen vin pli proactive, kot bann case i ganny anmennen kot zot, dan sirkonstans kot bann dimoun pe eksperyans sa bann problenm - parey dan serten landrwa dan North East Point par egzanp, kot dimoun pe eksperyans sa bann problenm.  Zot bezwen pli proaktif pour zot deal avek sa bann sityasyon e fer sa bann Devloper, once zot in ganny zot ‘go ahead, pou fer sir zot stick to sa bann eleman ki’n ganny mete dan zot plan.  Akoz parfwa ou vwar poudir - as an MNA, mon advocate lo behalf dimoun ki vin kot mwan, ki dir mwan,’ Be mon’n rankontre tel problenm, mon pe sey rod en fason pou resolve li,’ – ou met sa problenm a latansyon Lotorite me it takes very long pour zot kapab come up e deal avek bann sityasyon ki - in the meantime sa dimoun i santi poudir ki, ’I’m all alone.  Person pa pe enterese avek mon problenm.’

E dernyen pwen lo sa size Mr Deputy Speaker, e sa mon krwar i en pwen ki’n ganny raise par en lot entervenan avan mwan, vi ki nou konnen ok ki siperfisi teren i ti pti  alors en eleman kle dan konstriksyon se - how we deal with waste water?  Akoz nou pa finalman, anmenn  en finalite avek sa problenm e konekte tou nou distrik avek Central Sewage System. Be si nou pa kapab annou move avek towards annan bann substation ki kapab esansyelman deal ek sa sityasyon. Par egzanp ou annan en distrik parey Glacis, par egzanp. Along lakot ou kapab run a pipeI mean ou bezwen kapab konsidere si nou’n kapab konekte Beau Vallon, what’s stopping us from konekte Glacis? I mean sa i pou fer li pli fasil, par egzanp ok, ozordi mon annan en pti siperfisi teren, mon annan en pti bout mon kapab donn mon garson pou fer en pti bedsitter, i kapab ale fer son bedsitter. E i konekte avek Central Sewage System. I pa bezwen worry about waste water. Akoz esansyelman waste water i pou vin en issue, akoz i annan en serten, mon krwar zot apel sa Leaching kot ler lapli i tonbe i lave, i lave, i lave.  Kote sa i al end up? I al end up pli ba dan lay by. I al end up dan larivyer.  I contaminate bann sources. I pa lafot personn, me i presyon ki devlopman i mete e mon konpran lala ou pe dir, ‘Ok, i annan sa presyon’, alors ou limit  dan landrwa kot i annan en high density development; kot ou annan bokou,  bokou lakaz, ou limit i la.  Me ou pa ti bezwen limit li si ou ti annan sa konneksyon to a Central Sewage System. E mon konnen bokou dimoun pe demann sa, pe rod sa, akoz i pou limit presyon ki sa i mete lo later.  E i pou limit sa presyon, kot ou pou bezwen annan en siperfisi teren, ki adequate pou kapab cope pou sa.

Mon pa en eksper dan Planning Mr Deputy Speaker, me lozikman i annan keksoz ki nou bezwen konsidere.  E nou bezwen sey fer en fason pou nou be more proactive. And that’s why sa bann dimoun zot travay kot Planning.  Their role is to come up with the best Policy which meets the need of the population today.  My role is to ask them to come up with that best Policy. My role is not to  make that best Policy, akoz mon pa pou konnen si sa Polisi i pli bon.  I wouldn’t  know the engineering or the constriction implication of the Policy. Me zot, zot konnen and they have to do the utmost to do it. Zot pa kapab - mon anmenn ou lo en site - ou’n vizite ozordi, mon ankor pe esper ou 2 weeks later pou come back pou donn mwan. E sa madanm li, i krwar poudir mwan mon pa enterese avek son problenm.  Non.  I would dearly love pou mwan vini, dir ek sa Devloper, ‘Be ‘ekout en kou Bro, fer ou rigol la.  Met ou rigol byen delo pa al kot sa madanm.’  But I can’t. Mon napa sa pouvwar pour mwan fer li.  That’s why Policymakers must do their utmost and be proactive, to devise Policies.  Let’s not rest on our laurels, poudir sa bann Polisi in servi nou byen for the past 40/50 years e alor zot reste azour ozordi.  Non.  They are not up to date ozordi. They need to be changed. And I’m asking them. E atraver sa Mosyon mon krwar i annan en mesaz kler - I’m asking them, to review this Policy. Sa Mosyon - if only en keksoz sa Mosyon i kapab achieve, se anmenn zot otour latab avek menm bann dimoun Legal, avek bann dimoun dan Trade, dan Konstriksyon, vwar ki mannyer nou kapab come up with the best Policy that deals with not only, the Density issue but the Waste Water issue e tou sa bann lezot nitty-gritties ki nou gannyen an se ki konsern bann issue Planning, ki mon I’m very sure, tou bann MNAs ki la anndan, tou bann Leaders ki la anndan, menm bann Leaders ki pa la anndan zot konnen poudir dimoun i vin kot zot avek plizyer fwa.

Avek sa lentervansyon Mr Deputy Speaker, mou oule dir ki mon pou a-port mon soutyen pour sa Mosyon.  Mon wish bann Zofisye Lotorite Planning, the best of luck dan zot louvraz.  Mon ankouraz zot davantaz pou vin pli proaktif e  pour sey zot mye pour zot kapab donn en servis ki mon konnen zot seye – me sey plis ankor  pou donn en servis ki  popilasyon i ava vwar poudir be, ‘Wow, lala nou pe vwar keksoz pe bouze.’

Mersi Mr Deputy Speaker.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy Speaker.

Mr Deputy Speaker sa deba ozordi bomaten i tre, tre enteresan e i en deba ki mon tre konsernen avek, akoz zisteman koman bann Community Leaders, nou fer fas avek sa bann problenm lo en baz tou le zour.  Bomaten Mr Deputy, nou’n annan 3 urgent questions.

Premye ti konsern Cleaning of Public Places; ki mannyer nou bezwen manage zesyon bann lespas piblik e fer sir ki zot prop, zot annord pou piblik an zeneral.

Dezyenm Kestyon, ti konsern bann, First Time Buyer's konsernan zot property e Trwazyenm Kestyon ti annan pou fer avek Lespas pou donn bann pti dimoun pou zot kapab fer zot biznes.

Tou le 3 – tou le 3 Urgent Question, i lye direkteman avek sa Mosyon ki nou annan apre midi – Ki mannyer nou revwar Polisi pou permet plis devlopman? Tou le 3 Urgent Question, ki montre how topical, how relevant, how urgent, how important sa Mosyon i ete devan azanda bann Manm Lasanble Nasyonal e i devret ete devan azanda Gouvernman.

Ozordi tou dimoun dan Sesel i anvi annan en landrwa – en landrwa pour li  viv avek son fanmir, en landrwa rekreasyonnel pour li zwir avek son fanmir; en landrwa, en lespas piblik pour li servi koman en endividi swa Trotwar, swa Semen, swa Lans; en landrwa biznes pour li kapab devlope.  Tou dimoun dan Sesel i anvi annan en landrwa e sa i akoz natir imen i toultan anvi progrese.  I anvi devlope e ozordi nou dilenm se - dimoun i anvi progress, i anvi devlopman.  E nou annan - e mon kontan deba ki koleg avan mwan in anmennen zisteman lo pwen ki mon ti pou fer resorti, se bann Policymakers, ki zot bann Polisi pa neseserman konekte avek sa legzizans piblik ki annan ozordi.  Pa neseserman dir, wi avek tou legzizans piblik, me konekte e relye avek legzizans piblik ki i annan ozordi.

Mr Deputy, devlopman dan en pei i bezwen kontinyen.  Sesel 10an pase pa ti koumsa.  10an avan i pa ti koumsa e 10an avan sa i pa ti koumsa.  Progre pou kontinyen. Devlopman pou kontinyen.  Konstriksyon pou kontinyen e resours ki nou annan ki limite, ki later, i pou kontinyen reste limite menm si nou pou kontinyen fer konblaz, menm si nou pou kontinyen rod solisyon alternatif.

Le pwen ki mon krwar Mosyon pe sey fer met devan ozordi, se mon krwar enn fwa pour tou annou asize e annou annan en agenda komen e en Polisi kler lo, ki mannyer nou pou tackle sa bann demann ki Seselwa ozordi pe demande.  Si nou pou annan later ki pou limite, e nou konnen sa i en challenge – Leader Lopozisyon in fer sorti en pwen; Vertikal ki mannyer nou deal avek konstriksyon Vertikal.  Si nou konnen ki ozordi dan bann distrik an deor nou Central Business area, nou Lavil, Victoria – bann distrik ki pa Victoria, bann distrik an deor, ki nou konnen dan 10an pou annan en problenm masiv avek demann later, Polisi ozordi i bezwen reflekte sa.  Polisi ozordi i merit pe co-provide bann servis  ki deza i annan sa demann; servis drenaz, servis ki mannyer nou deal avek surface water oubyen Sewer water. Ou konnen e Waste Management. Ozordi nou bezwen pe get sa bann Polisi.

E pli enportan ozordi Mr Deputy, se ki Sesel in angaz li lo en misyon pou annan sustainable development. Nasyon Ini pe dir ki fodre nou annan devlopman ki soutenab avek climate change; nou konnen lapli pe tonm plis, oubyen soley pe tap plis avek climate change.  Nou bezwen annan bann Polisi all the more reason pour nou revwar bann Polisi, akoz sa bann Polisi ki  nou annan ozordi pa neseserman  (1) reflekte demann piblik, me osi dan en fason soutenab.  Soustenabilite se ki PUC enn fwa pour tou i deside konnekte tou dimoun avek en Central System. Sa set en plan soustenabilite.  Soustenabilite ozordi ki Gouvernman in anonse ki nou bezwen bouz lo la, se ki nou annan bann Pano Solar lo bann lakaz, akoz nou konnen a lavenir demann pou plis.  Soustenabilite ozordi, se ki nou annan en management - en zesyon lakot ki rigid, ki dinamik, ki fer sir ki ler nou pe fer devlopman nou lakot, parey i leka Anse Boileau, parey i leka Glacis, mon’n vwar kot bann Peser Glacis pe pas dan pa mal problenm.  Nou lakot i bezwen annan en management enportan.  E ozordi i annan bokou dimoun pou dir egzakteman ki sa bann Polisi  pe fer.  Sa bann Polisi pa pe manage development. Sa bann Polisi pe anpes plis devlopman, akoz nou napa en Polisi ki reflekte demann modern.  I dir ou, ‘Pa fer, pa fer, pa fer.’  Polisi pa fer sa.  Policymakers i devret dir ou ki mannyer ou pou fer, me fer li dan en fason soutenab e non pa, ‘No, you cannot do this, you cannot do this, you cannot do this.’’ E nou Gouvernman pa devret dan biznes pE dir,’ No, you cannot.’ I devret dan biznes pou dir,’ We will look at every possibility pou fer sa arive pour ou.’ Sa i premye pwen, ki mon ti anvi fer resorti dan sa deba.

Dezyenm pwen, se ki Polisi ek Lalwa, i toultan la pou ganny sanze, Mr Deputy e fodre Policymakers pa tret en Polisi koman en pti keksoz dan zot lanmen ki pa kapab ganny revwar e ki pa kapab ganny sanze.  Mon dir sa pa zis konsernan Planning Authority.  Mon dir sa akoz on a daily basis, ler ou pe sey rezourd en problenm pour en dimoun, somewhere in Government en dimoun i dir ou,’ Sa Polisi nou pa kapab fer nanryen lo la.’ E fodre nou aret aksepte sa.  E mon  kontan par egzanp, ki nou Lakour pe komans challenge en pe sa bann pozisyon e i pe fer serten Policymakers, serten dimoun e serten Teknisyen realize poudir me in ler pour ou vwar me si sa problenm i en problenm across the country, i en problenm dan 25 distrik, i en problenm ki aparan pour tou dimoun dan tou nou distrik, there is a real problem. E ou bezwen sanz ou Polisi.  E nou, nou pe egzize ki sa Polisi i sanze, akoz i  pa donn en solisyon soutenab sa problenm ki nou, nou pe fer fas avek dan distrik.  So, annou aret rigid dan lapros ki nou pran anver solisyon.

E en pwen mon krwar ki’n ganny fer resorti, ki mon kontan, ki mon ti’n met la, annou aret tret lepep, nou pep koman en group Homogène, koman en mass an deor.  E annan en Polisi ki kouver tou dimoun.  Mon krwar nou annan plizyer diferan sityasyon ki en dimoun i trouv li ladan; en later zeritye ki bezwen ganny subdivide; en paran ki anvi donn son zanfan en bout later, en Transfer of Ownership; en dimoun ki napa later me i anvi mont vertikal, i annan tou sa bann keksoz ozordi ki nou bezwen egzaminen e annan Polisi ki pa tret dimoun koman en group Homogène. Fodre nou arete tret nou pep koman en group ki parey, tou dimoun i parey, tou zot sityasyon i parey, tou keksoz i parey e alors nou Polisi i iniform pour zot.

Mr Deputy, mon dakor e mon kontan ki sa in ganny fer resorti, fodre ki bann Policies – fodre nou review lezot Polisi ki al avek sa enn.  Mon kontan, Onorab Pillay in fer resorti, nou prensip nou Parti ozordi i dir e nou pe kontinyen dir ki nou kontan ki bann fanmir i reste ansanm.  Nou kontan ki en gran paran i reste o-bor son zanfan.  Sa nou ki  pe dir.  Nou krwar ladan.  Nou’n toultan krwar ladan.  I dir ou, si ou zanfan i annan en dezabilite, oubyen ou bezwen Carer, i la, i pros ek ou.  Culturally it’s good pou nou.  Sosyalman i bon pou nou, me nou Polisi i dir ou, ou pa kapab build o-bor si ou annan 400 met kare.  Ou pa kapab fer en pti lakaz o-bor ou paran, si ou annan zis 400 met kare.  I al kontrerman avek lezot Polisi Sosyal, Ekonomik, Sos-yo Ekonomik e politik Parti Lepep ki nou, nou krwar ladan. Sa bann Polisi i al kontrerman avek en progranm ki nou Parti in anmennen depi 1977 ziska ozordi.  E nou, nou travay isi dan Lasanble, se pou kontinyen promouvwar bann prensip ki nob, ki enportan e ki gard nou sa ki nou ete koman en pep Seselwa; ki gard nou, ki fer sir ki nou pa perdi nou soul in the process of development.

E mon krwar sa i en pwen tre, tre enportan ki Onorab Pillay in fer resorti e ki mon krwar ladan.  Ler nou get Polisi annou aret fer Polisi dan biro.  Annou anmenn li anver nou pep dan kominote.  Annou involve konsiltasyon bokou plis dimoun, ki i pa en Enzenyer, i pa en  Teknisyen, i pa en Arsitek, me i en dimoun ki annan en bon lide.  I pou dir ou laverite e i pou annan en practical solution to the problem.

I osi annan en issue konsernan bann drwa ki dimoun i annan ozordi versus bann Policies. E sa in ganny fer resorti.  Ozordi dimoun i konpran son konsesyon bokou pli byen ki avan - ki byen.  I konpran Lalwa bokou pli byen ki avan e fodre ki nou bann Policies i an a-kor avek bann drwa ki dimoun i annan.  E Onorab Souris in fer sorti en pwen tre enportan se; the right to ownership; to ownership of property; to enjoy your property - to develop, to progress. E nou pa kapab, menm si nou annan bann Polisi ki pe protez that very property, ki pe protez nou pei, ki pe fer nou annan - the water flow i byen, i pa mont lo lakaz personn, i pa fer dega eksetera, ki nou nou’n dakor avek sa e nou pa pe al kont sa bann prensip, selman nou bezwen en bottom line, mon vwar li – mon’n riye ler Onorab De Commarmond i dir, si ou annan 4000 met kare alors ou kapab  devlop zis 30 poursan lo la.  For me it really doesn’t make sense.  Mon ti krwar plis later ou annan, plis ki ou kapab devlope.  Me according to the Policy, plis later ou annan mwens ki ou kapab devlope.

E pour mwan sa i kestyonn, why should I have the property ki mon kapab devlop mwens?  Dimoun i anvi devlop plis e nou annan en Polisi ki fer li devlop mwens.  Pour mwan sa i bezwen ganny revwar, tout an prenon kont ki nou annan bann valer nob, me nou kontinyelman annan.  Nou kontinyelman annan en prensip enportan ki dir ou 50 poursan nou later pou ganny rezerve for future generation’s e pou ganny prezerve.  Sa bann Polisi ki nou pe propoze, sa bann pwen ki nou pe met devan, pa al kontrerman avek sa.  I dir ou, but dimoun ki la ozordi, i anvi zwir son property. I anvi benefisye.  I anvi fer en pti devlopman lo la, eksetera, eksetera.

So, Mr Deputy, sa i bann pwen ki mon ti anvi met devan, akoz really i annan en kantite sa bann Polisi e la nou pe koz lo Planning. Mwan personnelman mon’n annan plizyer diskisyon avek Lotorite Planning, ki mon’n met sa devan zot, akoz the practicality on the ground is very different.

E dernyen pwen mon anvi fer resorti Mr Deputy, nou bann MNA dan Lasanble, nou konnen ki  nou pe koz lo la.  Fodre pa dimoun i krwar nou pa konnen ki nou pe koz lo la.  Nou  konnen ki ozordi i annan en kantite fanmir ki pa kapab devlope, ki pa kapab build, akoz sa bann Polisi pa pe permet li devlope.  Nou konnen.  Nou fer fas avek sa lo en baz tou le zour.  En Teknisyen dan en Minister i  kapab dir ou, be sa i al kontrerman avek sa ki mon pe vwar devan mwan.  Me nou, nou konnen sa i en demann reel ki egziste dan bann distrik, Mr Deputy, nou pa pe demande ki sa Mosyon i zis en Mosyon pe anvoy kot Gouvernman.  Nou pe demande ki Gouvernman i ekoute e i pran mezir imedyat pou revwar sa Polisi Planning.

Mr Deputy, sa i en pwen ki ganny trouve dan Manifesto Parti Lepep. Pep Seselwa in elekte nou Gouvernman baze lo son Manifesto.  Mon a mazinen nou’n ganny elekte akoz dimoun i vwar ki nou Parti in annan en pli bon progranm devlopman pour nou pep.  E dan sa Manifesto i dir ki Planning i bezwen revwar bann Polisi, pour li reflekte demann e legzizans nou pep Seselwa.  Sa Mosyon pa’n ganny fer dan vag.  Sa Mosyon in ganny fer akoz Onorab De Commarmond, i  Reprezantan Distrik ki annan difikilte pou fer devlopman – Cascade, son non li menm li i dir ou, ki how difficult ki i ete pou devlope.  E sa Mosyon in ganny fer akoz i anliny avek Manifesto Parti Lepep lo ki nou’n ganny elekte.  Nou pe koz lo lavwa en mazorite lepep ki’n donn nou sa manda pou enplimant sa  Manifesto e se nou bann Manm Parti Lepep isi dan sa Lasanble, ki gardyen sa Manifesto e nou pe tou senpleman demann Lotorite alors, pou regard sa Manifesto lo ki nou’n ganny elekte, zot a vwar i annan sa Polisi ladan; e akonpannyen par sa Mosyon, fer tou le neseser pour ki sa bann Polisi rigid i ganny revwar e ki nou reelman siport sa Seselwa ki anvi devlope.

Mersi.

 

MR DEPUTY SPEAKER

Right of Reply, loter Mosyon.

 

HON CHARLES DE COMMARMOND

Mersi Mr Deputy Speaker.

Mr Deputy Speaker, mon a pran kot zisteman Leader of Government Business in fini, dernyen entervenan e se la – se la nou Manifesto Parti Lepep, i pe dir nou sa bann keksoz.  Be nou ki dan Lasanble ki’n ganny elekte, lo baz Parti Lepep la, nou bezwen toultan pe mazinen sa bann Polisi dan nou Manifesto, ki ankre nou Parti, fer li reste konekte avek nou pep.  E fodre pa, ki Gouvernman i fer bann Polisi ki tro an kontrayete avek sa or ki toultan an kontrayete avek sa ki nou Parti, ki nou reprezante pe dir nou.  I osi senp ki sa e sa i enportan.  E mon Mosyon i pa zis pou Cascade.  I vre Cascade son non.  Nou konnen difikilte nou annan, koneksyon Sewage e what not, tousala bann problenm.  Be mon pa koz zis pou Cascade, me partou.  Sa i Nasyonal.  I en keksoz ki pou anmenn e abouti keksoz dan pli gran lanpler.

Mr Deputy Speaker, ler mon’n ekout bann entervenan ki’n koze e mon remersye zot bokou - remersye zot enormeman pour zot kontribisyon, kontribisyon tre, tre valab – in montre poudir sa  Mosyon ti vo lapenn.  Sa Mosyon in vo lapenn e ki nou demande alor e nou ensiste ki Lotorite i ekoute.  Ler mon’n ekout Onorab Volcere, Onorab Volcere in eksplike koman sa Mosyon i relevan e tre relevan pou Pralinwa e ki si ou kalkile Praslin fek ganny en case Ankour.  Mon dir Praslin. akoz sa zafer 50 metres Contour Line ki Mr Talma in gannyen, i reprezant pou mwan Praslin.  Tou dimoun Praslin prezan i pou benefisye e La Digue benefisye ek sa.  Ou vwar sa i annan en zistwar deryer sa e ki mon krwar bann dimoun ki pe fer Polisi annou swiv sa zistwar deryer.  Zot zis in vini pou serten bann rezon e i byen ki Lakour in deside.  Lakour - si tou bann dimoun la, tou lezot ka ki nou annan, i nou anmenn case Ankour e ki’n ganny byen eksplike par Onorab Pillay, sa ‘Right to land ki nou annan, to ‘property me nou tou nou pou ganny case Ankour.  Alor si ou al anmennen pou vin en issue be so, nou pa kapab vwar? Bann ki fer Polisi be gete.  Annou amann sa bann zafer. Annou mitigate.

Si ou kalkile Onorab Souris in dir nou ki e in avans le pwen ki si nou enplimant sa ki Mosyon pe  dir, i pou permet plis later vin lib e plis dimoun pou kapab ganny en loan pou kapab fer son lakaz dan sa sirkonstans.

Onorab Arnephy in fer resorti fortman ,ki sa Mosyon i a ede permet Seselwa annan son prop lakaz, e i a osi a permet plis later vin lib e osi i ava kapab bon pour envestir si oule e reste konekte plis lakaz avek Sewage System ki ava ganny devlope.

Mr Deputy Speaker, Onorab Pillay in fer resorti relevans nou bann Polisi.  In tous osi laspe konstitisyonalite e legalite sa Mosyon.  In touzour - i touzour bon pour en zanfan pa al tro lwen avek son paran, Onorab Pillay, in azoute.  Bann pwen ki fantastik.

Onorab Monnaie, in dir nou ki Planning Authority i devret vin pli vizyoner, i annan plis vizyon e permet bann lezot keksoz ganny pran an konsiderasyon ler zot pe pran zot desizyon.  Par egzanp, i dir, annou konstrir vertikal.  Annou met letaz si i neseser e prevwar ki bann kontrol drenaz, ensidswit kapab ganny pran an konsiderasyon e tou sa i demann en travay ansanm; e se la kot Onorab Rose, Leader of Government Business i fer resorti, i met lanfaz enportan lo sinerzi ki devret annan ant Polisi, legzizans piblik e devlopman e progre li menm; e si fodre revwar nou bann Polisi pou permet plis soustenabilite e litilite pou si oule dir, bann Policymakers pou revwar zot latitid.  Leader of Government Business in ensiste lo la.  In fer resorti fortman pour ki nou konpran ki sa Mosyon pe dir.

Pou fini Mr Deputy Speaker, ou vwar sa ki nou pe demande.  Sa ki nou pe demande i senp.  Nou pa pe akiz Planning Authority nou.  Nou pa pe koz mal lo Planning Authority nou.  Me Planning Authority i dan problenm li osi li.  I dan problenm akoz li i vwar sa bann keksoz, me pa li ki fer Polisi.  Polisi se MLUH ki fer.  E Planning Authority i dir mwan me si MLUH i dir li fer sa, nou fer nou.  Nou, nou fer Polisi.  Nou fer sa ki Polisi i dir.  Se sa rezon mon Mosyon i dir, MLUH ek Planning Authority. Ou vwar?  E la sa sinerzi ki devret annan i bezwen annan e i bezwen act fast.

E alor la nou demann MLUH pou vitman revwar       sa bann Polisi e enstrir Planning Authority accordingly; dir Planning Authority, lala enplimant en pe sa koumsa, fer li koumsa, en fason ki nou -  nou konnen la nou annan en nouvo Planning Authority, i annan nouvo sanzman  lo Planning Authority, nouvo Chairperson ensidswit.  And en Planning Authority ki pli aprosab, ou kapab koz ek zot sa bann dimoun la.  Zot konpran, zot tande.  Mwan mon dir koumsa, akoz in ariv legzanp nou’n koze e zot pe konpran.

Alor, nou kapab annan sa sinerzi parey Leader of Government Business, in dir pour nou kapab al pli lwen e fer bann Polisi ki ava  bon pour nou – ki ava ed nou vwar solisyon.  Sa ki nou pe demande. Ed nou vwar solisyon rather than less anpay nou sa bann Polisi.

Annou travay ansanm nou pe dir, annou travay plis avek en leker e konpran sa lanvironnman, Sa sityasyon otour nou ler nou pe pran bann desizyon.  Sa mesaz ki sa Mosyon osi pe anvoye.  E nou pe dir annou fer sa vit, o pli vit posib, pour ki nou pep i santi ki i pe al dan bon direksyon.

E finalman, finalman  menm, nou demande ki bann dimoun ki pe ekout nou, konpran sa ki nou pe esey dir e ki i annan bann ka, bann problenm ki zot in pas ladan ki sityasyon i la koumsa - ki ankre dan konteni sa Mosyon, ki zot resubmit zot bann ka kot MLUH kot Planning Authority pou kapab ganny konsidere dan laliny ki sa Mosyon ki pe sey dir.

Mersi Mr Deputy Speaker. Mon demann tou dimoun pou vot e siport sa Mosyon.

Mersi.

 

MR DEPUTY SPEAKER

Bon, lo sa Mosyon nou pran en vot.  Tou Manm ki an faver?
Okenn Manm ki kont?  Mazorite in vot an faver.  Mosyon in ganny aprouve.

E avek sa Lasanble i ava adjourn, e nou ava rezwenn Mardi  prosen.

 

 

(ADJOURNMENT)

Last Updated on Friday, 03 June 2016 09:35