The National Assembly of Seychelles

  • Increase font size
  • Default font size
  • Decrease font size
Home

Tuesday 15th July, 2014

E-mail Print PDF

NATIONAL ASSEMBLY OF SEYCHELLES

Tuesday 15th July, 2014

The Assembly met at 9 am

National Anthem

Moment of Reflection

Mr Speaker in the Chair

 

MR SPEAKER

Bonzour tou bann Manm Lasanble Nasyonal.  Bonzour Minis ek son delegasyon.  Bonzour tou bann dimoun ki pe ekout nou dan lakour.  Dabor avan nou komanse mon ti a voudre lo non Lasanble Nasyonal pas mon kondoleans avek Onorab Mirena Souris, pour lokazyon lanmor son manman e mon oule enform tou bann Manm ki lanterman pou fer ozordi 2.30 kot legliz Bel Ombre.

Nou ava aprezan al lo nou Order Paper e nou annan avek nou Minis Adam, Minis pour Zafer Etranzer ki pe vi reponn en kestyon, en Private Notice Question by the Leader of the Opposition ki’n ganny admet yer par mon lofis e mon ava demann Leader Lopozisyon pou demann son kestyon.  Mersi.

 

HON DAVID PIERRE

Mersi Mr Speaker.  Bonzour Minis ek ou delegasyon.  Bonzour tou Manm koleg Onorab e bonzour tou bann ki alekout.

Mr Speaker, eski Minis i kapab donn sa Lasanble en klarifikasyon lo sa size larzan ki dapre alegasyon Sesel in ed Sri Lanka pou plas dan bann labank La Swis.  Mersi Mr Speaker.

 

MINISTER JEAN-PAUL ADAM

Mersi bokou Mr Speaker e mersi Leader Lopozisyon e tou bann Manm Lasanble.  Bonzour tou dimoun dan lakour e mon ti ava kontan zis avan ki mon reponn kestyon osi lazout mon lavwa swivan sa ki Mr Speaker in dir pou prezant mon kondoleans avek Onorab Souris e osi avek tou manm son fanmiy.

Mr Speaker mon krwar sa kestyon e bann lartik ki’n ganny fer referans kot i konsern alegasyon ki annan larzan sorti Sri Lanka ki’n ganny mete dan bann labank La Swis, i baze lo en fo konpreansyon, en fo persepsyon bann striktir servis finansyel.  Akoz dan sa bann lakizasyon zot pe dir ki i annan bann konpanyen Sri Lanka ki’n anrezistre biznes isi e ki apre in fer met zot larzan dan labank La Swis, sa fodre nou konpran ki en sistenm servis finansyel i baze e sirtou en pei parey Sesel nou fer lanrezistreman konpanyen sorti partou dan lemonn, pa selman Sri Lanka.  Annefe Sri Lanka i reprezant zis en pti parti bann anrezistreman bann konpanyen ki ganny fer Sesel, laplipar i sorti dan bann lezot pei, tel ki bann pei Eropeen me osi bann marse ki tre enportan pour nou se Lendonezi, Lasin e bokou bann lezot pei Azyatik.

Sa lakizasyon konmkwa larzan i ganny transfer atraver Sesel, mon ti a dir i konpletman fo dan le sans ki napa okenn laprev dan sa bann lartik konmkwa larzan i ganny pase – zot servi sa largiman ki ti annan 83 milyon Fran Swis an 2013 sorti Sri Lanka dan bann labank La Swis e 87 milyon an 2010, savedir ki’n en diminisyon tandis ki en pei parey Sesel ki en pti pei, i annan en gran logmantasyon.  Me lefet ki I annan en logmantasyon i reprezant lefe ki Sesel in fer en demars partou dan lemonn pou anrezistre bann konpanyen pa selman Sri Lanka me partou dan lemonn e sa bann konpanyen i kapab annan bann assets dan bann labank partou dan lemonn.  Sa i kapab bann assets ki dan bann labank La Swis me i kapab bann assets osi ki dan bann labank partou dan lemonn e enkli Sesel.  E lefet ki larzan i ganny transfere, limenm i pa en krim.  Pour nou kapab dir si i annan en krim oubyen ki i annan frod, oubyen ki i annan en keksoz mal ki pe ganny fer, blansisman larzan fodre i annan en laprev konmkwa en konpanyen i enplike dan en aktivite ilegal.  Dan ka Sesel nou annan tou bann striktir neseser pou nou fer lenvestigasyon me lenvestigasyon pa kapab ganny fer zis pou dir ki i annan larzan pe pase, akoz larzan pe pase toulezour.  Larzan pe pase pou ed La Swis me osi i annan larzan pe vin Sesel.  Sa ki enportan pou note se bann striktir i an plas pou kapab fer bann lenvestigasyon si i annan en kek alegasyon ki spesifik.  Savedir si i annan en konpanyen ki ganny akize konkwa i enplike dan en keksoz ilegal bann striktir i an plas Sesel pour nou kapab fer lenvestigasyon lo sa konpanyen menm konnen kote in fer bann lenvestisman.  Me ou pa kapab zis dir an zeneral ki larzan pe vini.  Sa i en fo deba e i en lakizasyon ki fo.  E Mr Speaker mon ti ava rapel ki sa Lasanble in pas nouvo lezislasyon an Desanm lannen pase ki ranforsi nou striktir an sa ki konsern zestyon konpani ki anrezistre Sesel e osi ki Sesel in pran plizyer mezir pou ranforsi son korperasyon enternasyonal kot i konsern lalit kont frod e kont blansisman larzan.  E dan ka Sri Lanka nou annan menm en lakor lo non doub-lenpozisyon taks e ki Lartik 26 sa rapor i permet osi lesanz lenformasyon e ki i permet si i neseser osi fer korperasyon avek bann lezot pei tyer enkli La Swis e mon krwar lakizasyon kle ki montre ki sa i zis en lakizasyon san okenn baz se pou dir ki restriksyon La Swis in ganny ranforsi se pour sa zot pas par Sesel.  Me sa bann menm restriksyon i aplik pour tou pei dan lemonn.  Alors si ou pou pas par Sesel oubyen si ou pou pas par en lot pei, diferans i pa sa.  Lakle se pou konnen, eski i annan konpanyen ki enplike dan aktivite ilegal?  Si sa bann konpanyen i annan akizasyon spesifik lo menm non en konpanyen nou kapab fer resers, me si napa lakizasyon spesifik napa okenn lenvestigasyon ki kapab ganny fer.  E mon krwar i enportan ki nou al lo baz bann fe e pa lo baz spekilasyon.

Mr Speaker sa se labaz larespons ki mon ti anvi fer anver sa kestyon e mon remersye tou dimoun pour zot latansyon.  Mersi.

 

MR SPEAKER

Onorab okenn siplemanter?

 

HON DAVID PIERRE

Mersi Mr Speaker.  Mr Speaker eski Minis alors i kapab donn sa Lasanble en garanti ki Gouvernman Sesel pa pe knowingly enplik li dan okenn bann tel tranzaksyon ki kapab ilegal, si i annan.

E eski Minis i kapab dir sa Lasanble ki lenpakt advers sa in annan oubyen i kapab annan lo nou lendistri finansyel offshore.  Mersi Mr Speaker.

 

MINISTER JEAN-PAUL ADAM

Mersi bokou pour sa kestyon.  Mon krwar i enportan pour nou regard sa dan son konteks global.  Sesel nou’n pas tou lezislasyon neseser ki fer ki nou annan meyer striktir posib dan lemonn pou kapab adres okenn kestyon transfer larzan ilegal oubyen blansisman larzan.  Nou annan tou bann mekanizm isi Sesel ki vedir ki si i annan okenn tranzaksyon ki sispe, nou annan sa mezir e menm an korperasyon nou annan sa bann mekanizm e sa bann mezir e menm an korperasyon avek bann lezot pei dan lemonn pou nou kapab fer lenvestigasyon ki neseser.  Nou annan Financial Intelligence Unit isi ki dan plizyer ka in kapab entervenir kot in annan larzan ki’n ganny transfer isi dan en fason ilegal e in kapab menm sezi sa larzan e menm dan serten ka rapatri sa larzan avek bann konpanyen e avek bann Gouvernman etranze ki ti pe fer bann lenvestigasyon vizavi sa bann konpanyen.

Alor an larepons ou kestyon nou annan tou bann mekanizm ki neseser pou asire ki sa pa kapab ganny fer.  Nou annan antouka le meyer posib an se ki konsern nou striktir.

Mon ti a osi dir Mr Speaker ki i enportan ki nou pa zis les sa bann deba otour servis finansyel e offshore vin en latak lo nou pei nou menm, akoz nou en pti pei.  Mon konnen dan serten sa bann lartik, serten bann largiman ki ganny fer se Sesel i annan zis 90 mil dimoun me i annan 140 mil konpanyen ki’n anrezistre.  E zot servi sa konmsi ki i vedir ki Sesel otomatikman pe fer en move keksoz.  Me mon krwar ki i enportan pou nou defann sa prensip ki Sesel koman en pti pei nou annan toutafe nou drwa pou nou vin en sant lenvestisman anver lezto rezyon.  Nou pe prezant nou lekor koman sa pei kot ou kapab vin Sesel e servi Sesel koman en baz pou envestir par egzanp Lafrik.  E sa i en model devlopman ki enportan pour nou e i enportan ki nou defann sa model devlopman e ki nou pa les bann ki an konpetisyon avek nou e ki nou pa les bann ki krwar ki nou pa sipoze fer sa servi bann tel largiman pour zot fer krwar ki Sesel pe fer en keksoz ki move.  Nou annan toutafe nou drwa pou nou servi nou stabilite politik, nou stabilite ekonomik koman en baz pou nou atir lenvestisman e pou annan bann konpanyen ki enterese pou vin isi.  Se sa rezon ki nou en zirisdiksyon ki dimoun i anvi vin kot nou.  E mon ti a kontan note ki i annan plizyer lezot pei ki zot bann pti zirisdiksyon e zot annan bann pti popilasyon me zot in anrezistre bokou plis konpanyen.  En legzanp se British Virgin Island (BVI) kot son popilasyon i 80 mil e i annan 800 mil konpanyen.

Alors Sesel nou’n met tou bann striktir an plas ki vedir ki nou kapab zer, annan sa zestyon lo sa 140 mil konpanyen e zis akoz nou pti nou pa devret vin en target e nou nou bezwen defann nou kapasite koman en pei pou nou kapab travay lo sa kalite lenvestisman akoz i form parti nou model ekonomik.  Mersi Mr Speaker.

 

MR SPEAKER

Onorab De Commarmond.

 

HON CHARLES DE COMMARMOND

Mersi Mr Speaker.  Bonzour Minis, bonzour tou dimoun ki alekout.  Mr Speaker eski baze lo sa kestyon ki devan nou e larespons Minis, eski Minis i kapab eklersi nou Lasanble e fer resorti klerman ki si en alegasyon i pa neseserman en keksoz ki vre.

E anmenmtan si i kapab eksplik nou Lasanble ki parey dezyenm bout kestyon i mete, eski Sesel in vreman – letan ou dir Sesel savedir Gouvernman Sesel, in vreman ed Sri Lanka dan sa tranzaksyon?  Oubyen eski se Sri Lanka ki’n servi sistenm finansyel Sesel parey nenport ki konpanyen, bann konpanyen laba in servi konpanyen offshore Sesel e anmenmtan ekslersi nou osi si repitasyon sistenm finansyel Sesel i bon ozordi ?  Mersi bokou.

 

MINISTER JEAN-PAUL ADAM

Mersi bokou Mr Speaker e Manm Onorab pour sa kestyon.  Mon ti a kontan dir ankor ennfwa bann alegasyon dan sa ka i pa vre.  E nou tou nou konnen e mon ti a kontan fer repel ki sa alegasyon in ganny fer dan Parlman Sri Lanka e nou konnen ki dan Parlman souvandfwa bann Parlmanter i dir bann keksoz ki – akoz zot konnen zot annan liminite letan zot dan Parlman, zot kapab petet parfwa egzazere pou zot fer en pwen politik dan en lot pei.  Mon krwar nou tou nou konnen ki sa i en realite parfwa dan bann deba parlmanter.  Me dan sa ka bann alegasyon i konpletman fo.  Sesel nou en sant lenvestisman.  Koman en sant lenvestisman i normal ki larzan i ganny transfere isi pou al dan lezot pei e osi i enportan pou mazinen ki larzan sorti dan lezot pei i ganny envestir isi.  Sa i form parti dan nou model ekonomik e nou’n met an plas tou bann striktir neseser ki fer sir ki sa bann larzan i pas atraver bann kontrol ki enternasyonalman valid e ki ganny rekonnet koman menm bann meyer pratik.  Zot ava rapel ki lannen pase nou ti fer nou assessment avek OECD kot i vre ki Sesel ti ganny zize non-complient.  Selman ki nou’n fer, sa Lasanble menm in pas bann Lezislasyon swivan sa deba e Sesel ozordi mon ti ava dir menm an avans parmi bokou lezot pei akoz nou parmi selman en senkantenn pei ki’n fer sa ki apel sa dezyenm phase assessment e i annan bann pei parey La Swis par egzanp ki pa ankor fer sa dezyenm faz.  Alors Sesel nou an avans an sa ki konsern bann regilasyon ki ganny met an plas pou adres bann kestyon parey blansisman larzan e transfer larzan.  Nou repitasyon i bon e se pour sa ki bann labank i anvi vin kot nou.  Nou annan nouvo labank ki pe pozisyonn zot isi Sesel e zot osi pe pozisyonn zot lekor akoz nou annan stabilite politik e nou annan stabilite ekonomik.  Nou dan en rezyon malerezman ki napa sa stabilite ekonomik e politik.  Nou dan en rezyon ki annan bokou problenm me kantmenm bann biznes e bann labank i bezwen fer biznes e si zot anrezistre zot lekor Sesel i donn zot sa baz pou protez zot lenvestisman e i kapab fer biznes a lonterm dan en fason ki soutenab pour zot.  I enportan ki Sesel nou kontinnyen ofer sa baz stab e sa baz ekonomik ki permet zot dan zot devlopman.  Sesel nou’n met bokou lenportans lo devlop bann Lakor, par egzanp bann Lakor Non-Double Imposition avek bann pei Afriken pou ziteman ofer sa platform.

Enn bann alegasyon ki’n ganny fer dan sa bann lartik se ki, akoz en gro labank pe vin Sesel kan nou annan zis 90 mil ?  Be si nou servi sa largiman nou pa pou annan okenn labank.  Nou en pti pei, nou servi nou lekor koman an baz e sa bann labank ki envestir isi, zot pa pe regard zis nou marse.  Zot pe regard en marse ki plis ki en demi milyar, setadir, 500 milyon dimoun dan marse Lafrik ki koresponn avek bann lagreman ki nou’n sinyen avek bann pei Afriken.  E i enportan pou nou model ekonomik, ki nou defann sa prensip e nou pa les bann alegasyon fo e mon ti a dir parfwa, menm malis, pou fer nou sanz nou stratezi akoz nou bezwen diversifye nou lekonomi e sa i en eleman kle dan sa diversifikasyon.  Mersi Mr Speaker.

MR SPEAKER

Onorab Rose.

 

HON MARIE-ANTOINETTE ROSE

Mersi Mr Speaker.  Bonzour tou dimoun.  Mr Speaker, eski Minis i kapab pou lenformasyon piblik, konfirmen ki Gouvernman Sesel napa okenn rol dan okenn tranzaksyon finansyel, eksepte pou regulate bann tranzaksyon e ki biznes offshore i ganny fer par Sekter Prive premyerman.

E dezyenmman, etan donnen ki Sesel i annan bon relasyon diplomatik avek Sri Lanka, ki pozisyon Sesel anver sa bann alegasyon etan donnen ki sa bann alegasyon i met an ze nou repitasyon.  Mersi.

 

MINISTER JEAN-PAUL ADAM

Mersi bokou Leader Zafer Gouvernman.  Premyerman, mon ti a kontan konfirmen ki efektivman, tou tranzaksyon ki ganny fer atraver offshore, se bann tranzaksyon ki ganny fer par bann konpannyen prive.  Gouvernman napa okenn rol ladan apard ki koman sa regilater ki asire ki tou bann norm i ganny swiv e kot i neseser, i annan osi bann Lenstitisyon parey Financial Intelligence Unit, ki kapab azir pou fer sir ki Lalwa i ganny respekte e kot i annan transfer ki ganny fer ki pa an konformite, sa i kapab menm ganny sezi.  Alor Gouvernman son rol i zis koman regilater, i napa okenn aksyon pou li fer dan sa bann aktivite limenm.

E kot i konsern nou relasyon diplomatik avek Sri Lanka, ankor, nou met an plas en baz pou permet en korperasyon for ant sa 2 pei.  Se pour sa nou’n sinny bann Lakor par egzanp, lo Non-Double Imposition bann Tax.  Me sa apre se bann Sekter Prive ki servi sa bann Lakor.  E laranzman ki nou annan avek Gouvernman Sri Lanka se nou met sa baz ki permet apre Sekter Prive pou azir.  Sa i enkli dan Sekter Labank kot nou’n vwar Bank of Ceylon ki’n vini.  Me nou’n vwar osi lasirans ki vini.

E mon ti ava rapel ki nou Lalwa isi Sesel i vedir ki tou labank pa kapab azir zis offshore. I bezwen osi annan bann eleman dan lekonomi lokal.  E mon krwar ki i form parti osi nou stratezi koman en Gouvernman pou anmenn plis konpetisyon dan Sekter Banker.  Akoz nou en pti pei, me malgre ki nou en pti pei, nou bezwen annan plizyer labank pou asire ki i annan konpetisyon pou fer pli bon loportinite pou Sekter Prive isi Sesel.

E alor, labaz nou relasyon avek Sri Lanka, ant bann Gouvernman se zis pou etabli sa striktir ki apre permet Sekter Prive pou azir e envestir dan en fason soutenab.  Mersi.

 

MR SPEAKER

Onorab Herbert Houareau.

 

HON HERBERT HOUAREAU

Bonzour Mr Speaker, mersi Mr Speaker.  Mr Speaker, mon kestyon i lir swivan; eski Minis i ki kapab enform sa Lasanble, vi ki pa zis Sesel ki anrezistre bann konpannyen enternasyonal, me enpe partou dan Lerop e Lanmerik osi i fer li, kot i annan Lalwa anplas, kwa ki nou Gouvernman pe fer pou deal avek sa bann fo alegasyon e anmenmtan pran aksyon Legal kont tou bann dimoun ki fer bann fo alegasyon e fo piblikasyon lo nou pei?  Mersi.

 

MINISTER JEAN-PAUL ADAM

Mersi Onorab.  Mon krwar ki, meyer keksoz ki Sesel i kapab fer, se zis montre avek tout latransparans, tou bann eleman ki in met anplas.  E se sa ki nou’n fer, nou’n pas Lalwa.  Sesel i osi an korperasyon direk avek tou bann pei Eropeen par egzanp, e osi avek Lanmerik, kot Sesel nou pe met anplas laranzman par egzanp pou sa ki apel FATCA, ki sa Lakor avek Lanmerik, ki permet Gouvernman Ameriken annan tou lenformasyon ki neseser lo bann konpannyen Ameriken ki anrezistre atraver lemonn, pas zis Sesel.  I pa aplik zis pou Sesel, i aplik pou tou pei e Sesel nou pe fer sir ki nou donn tou sa transparans lo tou bann Lezislasyon ki nou’n pase.  Nou pe osi angaze avek OECD pou asire ki nou annan sa bann meyer pratik.  E sa in ganny rekonnet par OECD, sa zefor ki Sesel pe fer.  E nou vwar atraver kontinnyasyon lenvestisman ki pe ganny fer Sesel, ki nou travay pe ganny rekonnet e ki i annan konfyans ki striktir Sesel i toutafe alaoter e ki nou pe reisi pou nou asire ki nou annan sa meyer striktir posib pou asire ki nou bann striktir finansyel pa ganny mal servi par bann ki annan move lentansyon.

I pa vedir, e la mon ti ava kontan kler, i pa vedir ki napa dimoun ki pe mal servi sa bann striktir.  I annan malerezman, dimoun ki touzour sey rod en laport pli vit, oubyen pli fasil pou ouver, dan plas al atraver mekanizm Legal.  Me deplizanpli, bann striktir ki nou’n met anplas, i vedir ki, posibilite pou annan sikse atraver sa bann move lentansyon, i minim.  Akoz nou’n met anplas bann striktir ki modern e alaoter e mon krwar resaman, nou’n vwar bokou ka sikse kot nou’n entervenir atraver bann larzan ki’n ganny anvoye Sesel ilegalman e ki’n ganny sezi.  Mersi Onorab e mersi Mr Speaker.

 

MR SPEAKER

Bon, avek sa larepons, nou’n arive alafen Question Time e mon ava remersye Minis e son delegasyon e ekskiz li parmi nou.  Yes Minister.

MR SPEAKER

Dezyenm pwen lo Order Paper ozordi set en Second Reading, Merchant Shipping (Amendment) Bill, 2014, ki pe al ganny prezante par Minis Morgan.  Nou a ganny nou en Motion for Second Reading.  Leader of Government Business, lo Merchant Shipping (Amendment) Bill, 2014.

HON MARIE-ANTOINETTE ROSE

Mr Speaker, anba Order 64(2), mon move ki nou lir sa Bill en dezyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Mr Speaker, Mosyon i ganny segonde, mersi.

 

MR SPEAKER

Bon, nou ava envit Minis pou entrodwir son Bill.

 

MINISTER JOEL MORGAN

Mersi Mr Speaker.  Bonzour Speaker, tou Manm Lasanble Nasyonal, tou dimoun ki alekout.

Mr Speaker, mon osi rezwenn ou pou prezant mon kondoleans avek Onorab Souris lo lanmor son dimoun pros.

Mr Speaker, sa Merchant Shipping (Amendment) Bill, ki en Proze de Lwa devan Lasanble Nasyonal bomaten, i pe etablir legalman, Seychelles Maritime Safety Administration, SMSA.  Bi sa lamannman, se pou asire ki kad Legal Sesel, i zwenn bann kriter Lorganizasyon Maritim Enternasyonal, koni koman IMO, e vin an konformite avek standar formasyon e sertifikasyon bann maren ki apel, STCW.

Sa i ava permet Sesel pou soumet son bann dokiman avek IMO pandan sa mwan Zilyet sa lannen, si Lasanble i aprouv sa Bill.  Pour ki Sesel i ganny mete lo sa ki nou apel white list IMO, disi boner 2015.

Sa prosesis pe ganny sipor e gidans avek Colombo International & Nautical College, CINEC, sorti Sri Lanka, avek ki Seychelles Maritime Safety Administration in sinny en MOU, an 2013 pou anmenn nou ver IMO white listing e pou gid nou e konsey nou dan sa prosesis.

Mr Speaker, ki benefis pou Sesel si nou ganny STCW Certification e nou vin en IMO white list country?  Sesel i annan en laflot 5 tanker ki pe fer larout enternasyonal.  Anplis ki sa, Sesel i annan lezot bato ki pe flot paviyon Sesel e pe fer bann navigasyon lo en baz enternasyonal.  Le fe ki Sesel i pa lo sa white list IMO, i vedir ki bann bato ki pe flot nou paviyon, i ganny targete.  Lenspeksyon rigore i ganny fer lo sa bann bato par bann Port State Control Officers letan nou bann bato i koste en por, nenport ki pei ki lo IMO white list.  Letan Sesel i ava ganny sa stati white list par IMO, son nivo rekonesans anterm flag state control, nou pei koman en pei, i fer ki otomatikman, bann bato ki anba nou paviyon, pa pou bezwen pas atraver bann prosedir strikt, parey i le ka konmela, dan bann por enternasyonal.  I osi en loportinite pou Sesel amelyor son kad Legal e demontre son langazman enternasyonal anlinny avek bann Konvansyon e bann Lakor Maritim ki nou’n sinnyen lo nivo enternasyonal.

Mr Speaker, sa Proze de Lwa parey mon’n dir, i osi fer provizyon pou lezot keksoz.  Enn parmi se en Board Lanket dan ka bann aksidan maritim, ki apel, Marine Accident Investigation Board.   Sa Proze de Lwa, i fer provizyon pou en nouvo definisyon Board Maritim, pou li vin anlinny avek lezot lobligasyon enternasyonal, parey IMO i rekomande.

Aktyelman, Board Maritim i ganny rekonnet lokalman pou asiste SMSA dan bann lanket letan i annan bann lensidan, ouswa bann aksidan maritim.  La ki nou annan lentansyon al lo sa white list IMO, i enportan ki Sesel i respekte bann regilasyon IMO letan i pe fer bann lanket maritim dan bann ka aksidan par egzanp, e osi lezot keksoz ki annan pou fer avek sekirite maritim.  Sa i anlinny avek rezolisyon IMO, MSC 255, 1984.

Sepandan, rol e fonksyon Marine Accident Investigation Board lokalman, pou reste parey.  Akoz SMSA i bezwen pran an konsiderasyon bann bato ki pe fer bann tranzaksyon, bann navigasyon lokal osi.

Mr Speaker, bann lamannman ki sa Proze de Lwa pe propoze i konm swivan;

(a), definir SMSA, son Direkter Zeneral e Board Lanket, dan ka aksidan lo lanmer e kennsel definisyon Shipping Master anba Seksyon 3 Lalwa egzistan;

(b), kennsel mo ‘Shipping Master’ e ‘Board Maritim’ partou dan Lalwa e ranplas li avek ‘Direkter Zeneral’ e Board lanket dan ka aksidan lo lanmer respektivman;

(c), ranplas Seksyon 5, pou kapab etablir Ladministrasyon Sekirite Maritim Sesel, dan plas Divizyon Por ek Servis Maritim aktyelman;

(d), amann Seksyon 9 ek 11 e azout nouvo Seksyon 11(a), 11(b) e 11(c) pou fer provizyon pou Direkter, Rezistrar Shipping, Rezistrar Seamen, Examiner e Zofisye Legal respektivman;

(e), amann Seksyon 131 pou zwenn standar IMO avek bann fonksyon relativ e responsabilite travay bann Zofisye Maritim e sertifikasyon bann maren.  E finalman;

(f), amann Seksyon 227 pou fer provizyon pou fonksyon Board ki fer lanket dan aksidan lo lanmer.

Mr Speaker, avek sa bann propozisyon ki mon’n fer, mon ti a kontan rekomann avek Lasanble Nasyonal, pou aprouv sa Proze de Lwa.  Mersi.

MINISTER JOEL MORGAN

Mersi Mr Speaker.  Bonzour Speaker, tou Manm Lasanble Nasyonal, tou dimoun ki alekout.

Mr Speaker, mon osi rezwenn ou pou prezant mon kondoleans avek Onorab Souris lo lanmor son dimoun pros.

Mr Speaker, sa Merchant Shipping (Amendment) Bill, ki en Proze de Lwa devan Lasanble Nasyonal bomaten, i pe etablir legalman, Seychelles Maritime Safety Administration, SMSA.  Bi sa lamannman, se pou asire ki kad Legal Sesel, i zwenn bann kriter Lorganizasyon Maritim Enternasyonal, koni koman IMO, e vin an konformite avek standar formasyon e sertifikasyon bann maren ki apel, STCW.

Sa i ava permet Sesel pou soumet son bann dokiman avek IMO pandan sa mwan Zilyet sa lannen, si Lasanble i aprouv sa Bill.  Pour ki Sesel i ganny mete lo sa ki nou apel white list IMO, disi boner 2015.

Sa prosesis pe ganny sipor e gidans avek Colombo International & Nautical College, CINEC, sorti Sri Lanka, avek ki Seychelles Maritime Safety Administration in sinny en MOU, an 2013 pou anmenn nou ver IMO white listing e pou gid nou e konsey nou dan sa prosesis.

Mr Speaker, ki benefis pou Sesel si nou ganny STCW Certification e nou vin en IMO white list country?  Sesel i annan en laflot 5 tanker ki pe fer larout enternasyonal.  Anplis ki sa, Sesel i annan lezot bato ki pe flot paviyon Sesel e pe fer bann navigasyon lo en baz enternasyonal.  Le fe ki Sesel i pa lo sa white list IMO, i vedir ki bann bato ki pe flot nou paviyon, i ganny targete.  Lenspeksyon rigore i ganny fer lo sa bann bato par bann Port State Control Officers letan nou bann bato i koste en por, nenport ki pei ki lo IMO white list.  Letan Sesel i ava ganny sa stati white list par IMO, son nivo rekonesans anterm flag state control, nou pei koman en pei, i fer ki otomatikman, bann bato ki anba nou paviyon, pa pou bezwen pas atraver bann prosedir strikt, parey i le ka konmela, dan bann por enternasyonal.  I osi en loportinite pou Sesel amelyor son kad Legal e demontre son langazman enternasyonal anlinny avek bann Konvansyon e bann Lakor Maritim ki nou’n sinnyen lo nivo enternasyonal.

Mr Speaker, sa Proze de Lwa parey mon’n dir, i osi fer provizyon pou lezot keksoz.  Enn parmi se en Board Lanket dan ka bann aksidan maritim, ki apel, Marine Accident Investigation Board.   Sa Proze de Lwa, i fer provizyon pou en nouvo definisyon Board Maritim, pou li vin anlinny avek lezot lobligasyon enternasyonal, parey IMO i rekomande.

Aktyelman, Board Maritim i ganny rekonnet lokalman pou asiste SMSA dan bann lanket letan i annan bann lensidan, ouswa bann aksidan maritim.  La ki nou annan lentansyon al lo sa white list IMO, i enportan ki Sesel i respekte bann regilasyon IMO letan i pe fer bann lanket maritim dan bann ka aksidan par egzanp, e osi lezot keksoz ki annan pou fer avek sekirite maritim.  Sa i anlinny avek rezolisyon IMO, MSC 255, 1984.

Sepandan, rol e fonksyon Marine Accident Investigation Board lokalman, pou reste parey.  Akoz SMSA i bezwen pran an konsiderasyon bann bato ki pe fer bann tranzaksyon, bann navigasyon lokal osi.

Mr Speaker, bann lamannman ki sa Proze de Lwa pe propoze i konm swivan;

(a), definir SMSA, son Direkter Zeneral e Board Lanket, dan ka aksidan lo lanmer e kennsel definisyon Shipping Master anba Seksyon 3 Lalwa egzistan;

(b), kennsel mo ‘Shipping Master’ e ‘Board Maritim’ partou dan Lalwa e ranplas li avek ‘Direkter Zeneral’ e Board lanket dan ka aksidan lo lanmer respektivman;

(c), ranplas Seksyon 5, pou kapab etablir Ladministrasyon Sekirite Maritim Sesel, dan plas Divizyon Por ek Servis Maritim aktyelman;

(d), amann Seksyon 9 ek 11 e azout nouvo Seksyon 11(a), 11(b) e 11(c) pou fer provizyon pou Direkter, Rezistrar Shipping, Rezistrar Seamen, Examiner e Zofisye Legal respektivman;

(e), amann Seksyon 131 pou zwenn standar IMO avek bann fonksyon relativ e responsabilite travay bann Zofisye Maritim e sertifikasyon bann maren.  E finalman;

(f), amann Seksyon 227 pou fer provizyon pou fonksyon Board ki fer lanket dan aksidan lo lanmer.

Mr Speaker, avek sa bann propozisyon ki mon’n fer, mon ti a kontan rekomann avek Lasanble Nasyonal, pou aprouv sa Proze de Lwa.  Mersi.

 

MR SPEAKER

Bon, deba i ouver.  Onorab Barbe.

 

HON NICHOLE BARBE

Mersi Mr Speaker.  Mr Speaker, Minis ek ou delegasyon, Koleg Onorab, bonzour.

Mr Speaker, koman en nasyon ki antoure par lanmer, i en lekspektasyon normal alors ki nou pep i vin en nasyon maren e i vre ki depi ki Sesel i Sesel, nou’n toultan annan en bon lipye maren.  Si nou fer en vwayaz tre bref dan nou listwar, nou pou vwar ki Seselwa in servi koman maren dan 4 kwen lemonn.  Koman en pei antoure par lanmer, i tre normal ki nou bann zwenn pou swazir en karyer koman maren.  En karyer ki kapab kontribye pou soutenir nou lekonomi atraver bann pozisyon byen peye, stab avek bann bon potansyel pou lavansman.

Sa metye maren, i en karyer lo lanmer, i ozordi reprezant en bann pli gran potansyel pou devlop nou bann resours imen ki Sesel i posede.  Louvertir lo lanmer pou Seselwa trouv lanplwa, i enn ki deza form parti larealite lavi toulezour Sesel.  Ki swa lo tankers, bato ton, bato plezir, lapes, ouswa cruise ships, Seselwa i deza pe okip bann pozisyon kle lo lanmer.

Pandan sa bann dernyen mwan, nou’n vwar Prezidan Michel pran en lentere partikilye dan formasyon e devlopman nou bann maren Seselwa.  Prezidan Michel, in servi son lenfliyans avek Leta Sri Lanka e in entervenir personnelman pou met anplas bann proze ant Sri Lanka avek Sesel ki pou permet Lekol Maritim Sesel form bann maren ki lo nivo e standar enternasyonal ki’n ganny set par IMO.  I dan sa moman evolisyon e tranzisyon dan Lendistri Maritim Sesel, ki ozordi, Merchant Shipping (Amendment) Bill, i vin dan nou Lasanble.  Sa bann lamannman, pe sers pou moderniz e met azour, en morso Lezislasyon ki’n deza desot son letan servis.  Lamazorite bann lamannman, i administrativ e i pe reflekte en bezwen pou met sa morso Lezislasyon anlinny avek tou bann lezot Lalwa modern Sesel.

Lalwa en pei, i bezwen fonksyonn an konformite avek kanmarad.  E pou sa arive, i bezwen annan serten iniformite dan premyerman, langaz ki ganny servi.  Me osi dan bann provizyon ki ganny fer tel parey ki lapwentman bann Zofisye Egzektitiv, ki pou ganny apwente anba sa Lalwa.  I tre enportan ki bann Lalwa nou pei pa ganny fer an izolasyon avek kanmarad e ki napa okenn gran disparite dan lafason ki sa bann Lezislasyon i ganny prezante e met ansanm.

Alors, enn bann fonksyon enportan nou Lasanble, se pou vwar ki bann Lalwa ki nou pe aprouve e mentenir en nivo konformite avek kanmarad dan en fason pou fer zot lenplimantasyon pli fasil e pratik lo teren.

En lot rezon enportan pou sa lamannman an sa moman, se ki Sesel in pran en pozisyon tre prominan lo lasenn enternasyonal lo tou sa ki konsern sa Dosye Maritim.  Sa i vin premyerman, akoz rol ki Sesel in pran dan konba kont lapiratri.  Sa fleo piratri, in pous Sesel dan en pozisyon tre prominan kot nou pei in bezwen pran en rol leadership dan en fason pou zer sa kriz e elimin bann menas pirate dan nou lanmer.  Me sa in egalman fer ki i annan bokou latansyon enternasyonal lo Sesel.  E letan ki en pei i anba mikroskop lakominote enternasyonal, i responsabilite sa pei pou fer sir ki son lakaz i annord.  E dan ka Sesel, sa i vedir met nou Lalwa azour avek bann norm enternasyonal ki fer ki sa lamannman i egalman en zefor pou met Merchant Shipping Bill Sesel on par avek bann lezot Lezislasyon similer ki nou bann partener komers enternasyonal pe itilize.

Mr Speaker, i tre enportan ki nou rekonnet rol e pozisyon ki nou pei pe ranpli dan lemonn ozordi.  Nou kapab annan nou bann lopinyon diferan me bann fe i montre ki Sesel, pe zwe en rol tre enportan dan lemonn ozordi e i enportan ki sa i ganny reflekte atraver bann Lezislasyon serye ki nou adopte.

Mr Speaker, Merchant Shipping (Amendment) Bill, 2014, i vin osi ariv dan nou Lasanble, dan en zefor pou sey anmenn plis efikasite dan Lendistri Maritim Sesel.  Sa Lendistri i enn ki tre enportan pou nou pei.  Senpleman akoz ki i atrakte en kantite zenn.  Sa karyer maren, i en pwen dantre dan lemonn travay pou en kantite zenn Seselwa.  En kantite zot i dir, i dir ou ki maren i pa en metye, me plito en vokasyon.  Ki se lanmer ki apel zot e se pa zot ki’n al ver lanmer.

Sa ki nou vwar, se ki, lamazorite zenn ki swazir sa profesyon, zot fer li akoz zot kontan lanmer e zot annan en pasyon pou sa travay ki zot pe fer.

La ki nou pe pous pou plis lefikasite, evolisyon e sanzman distrik Bel Air, pe demande ki nou vreman met sa Lendistri o servis nou pep.  Seselwa i bezwen vwar benefis ki nou bann maren i pwize atraver zot lasyer lo lanmer.  La ki bann maren Seselwa pe ganny sertifikasyon IMO isi menm Sesel, bann ladministrasyon konsernen pou bezwen redouble zefor pou asire ki bann maren Seselwa i ganny peye lo en nivo ki ekitab avek zot bann koleg etranze.  Nou’n deza okouran sitiyasyon bann maren Seselwa ki pe travay lo bann persener Linyon Eropeen.  Me i egalman annan nou bann zenn Seselwa ki lo nou bann prop tankers ki pa 100 poursan satisfe avek zot bann kondisyon.  Sa bann zenn i apresye tou bann loportinite ki’n ganny met a zot dispozisyon.  Zot rekonnet lenvestisman ki Gouvernman, atraver SEYPEC in envestir dan zot formasyon, me zot anvi ganny renimere lo en baz pli ekitab avek zot bann koleg etranze.

Mr Speaker, koman reprezantan Bel Air, mon touzour pli enterese lo ki fason en lezislasyon i kapab direkteman benefisye nou bann dimoun.  Se sa laspe imen ki mon konsern primer, a sak fwa ki mon fer resers e preparasyon mon bann deliberasyon.  E la, mon oule lans en lapel pou mon ladministrasyon konsernen, pou ofer en sipor ekstra nou bann maren Seselwa.  Zot bezwen en bon Sea Man’s Union ki serye e ki fonksyonnen.  Zot bezwen en Lasosiasyon serye ki kapab ofer zot soutyen e zot egalman bezwen en lasosiasyon familyal.  Sipor familyal.  Me zot pa pou kapab fer tousala lo zot menm, san en bon sipor bann ladministrasyon ki ankadre zot profesyon.

Mr Speaker, i mon swe ki sa Lalwa ki nou pe amande ozordi i ava kapab ede kree en klima ki pou kree plis loportinite pour nou bann zenn Seselwa.  Mersi Mr Speaker.

 

MR SPEAKER

Onorab Fideria.

 

HON EMMANUEL FIDERIA

Mr Speaker Mersi.  Mr Speaker, sa Bill devan nou Lasanble Merchant Shipping Bill 2014, i annan en gran lenportans, ler nou konsider konteni sa bann lamannman ki pe ganny propoze.  Sa bann Lamannman i kree 2 dimansyon.  Premye dimansyon se Nasyonal, ki fer aparan ki Sesel pe bouze e progresivman anmenn reform serye dan son sistenm Lalwa o nivo Nasyonal.

Dezyenm dimansyon se enternasyonal ki permet Sesel antre an armoni avek bann standar oubyen demann enternasyonal ki oblize ki bann pei ki oule ganny liste par IMO, swa Lorganizasyon Maritim Enternasyonal i fer.  Dan sa konteks, Sesel i swete ganny liste oubyen ganny aksepte e rekonnet par sa Lorganizasyon.  Alor, koman pri kondisyon, i oblize ki konteni nou Lalwa Nasyonal i vin an akor avek bann paramet enternasyonal.

Mr Speaker, Mardi le 22 Oktob 2013, nou senkyenm Lasanble ti ratifye MLC 2006, swa Maritime Labour Convention.  Nou ti pran nou responsabilite e fer nou travay koman en Lasanble, avek bi permet Gouvernman met li annord e azour avek bann regilasyon enternasyonal, baze lo bann paramet konteni dan MLC.  San okenn dout, nou Lasanble napa letan pou entertain distraksyon.  Nou bezwen reste fokalize dan Sesel.  Nou larout ver sa nouvo frontyer in fini trase.  Lo some sa nouvo frontyer ki nou bezwen arive, annou pa trenn lipye.  Nou bezwen bouz avek legzistans letan e nou bezwen smart.

Mr Speaker, dan lepase nou ti annan en Divizyon anba Minister Transpor ki ti apel Port and Marine Services ki’n la, ki’n fer son travay.  An pasan Mr Speaker, si nou fer referans avek lepase, nou ava apresye ki lontan, ler bato ti pe antre dan por, paviyon ti monte anler Mont Signal, pou fer konnen bato pe antre dan Por Victoria.  Lontan, sa ki nou ti annan apel far ti ganny alimen.  Travayer ti alim far aswar.  Mon salye tou sa bann dimoun ki ti fer sa travay dan lepase.  Mon konnen ki i annan ki ankor vivan, me osi mon konnen ki serten in kit sa later.  Malgre tou, i donn nou gou pou koz lo serten bann levennman istorik reel me ki atraver letan, nou’n evolye, nou’n adopte lezot pratik ek standar.  Nouvo teknolozi in fer son larantre.  Wi Mr Speaker.  Nou’n evolye.  Ozordi nou pe koz lo Lotorite Por ki’n ganny kree.  Nou vwar plizyer amelyorasyon ki’n arive.  Si pa mazorite, i byen evidan ki i annan bokou plis marsandiz ki ganny transporte e ganny debarke dan container isi Sesel.  Pli gro bato i kapab koste dan Por Victoria.

Mr Speaker, lepok salan in fini dan Sesel.  Sistenm kominikasyon avek bato pli sofistike.  Konmela, Por Victoria i fonksyonn 24 lo 24.  7 lo 7.  Nou pa satisfe e pour sa rezon ki Gouvernman in anons en plan lenvestisman pou garanti Por Victoria, avek bi pou ofer plis lespas e konsekaman delivre en o standar servis tou bann bato ki kontinnyen frekant nou por.  Sa i nou defi.

Mr Speaker, Bill devan nou Lasanble pe koz lo legaliz SMSA ki’n ganny kree an 2004, avek bi re-organizasyon konsekaman serten fonksyon ki Port and Marine pe fer pou ganny transfer anba SMSA.  Sa a son tour, pou ganny gouvernnen anba Merchant Shipping Act 1995.  Mon konpran ki enn parmi bann fonksyon tre enportan SMSA se asire e gard sekirite tou trafik ou tranzaksyon ki pase lo lanmer dan nou Zone Ekonomik Eksklizif Sesel.  Ozordi, 90 poursan bann marsandiz ki Sesel i konsonmen i vin par bato.  Nou Sekter Lapes i zwe en rol tre enportan dan nou lekonomi.  Zefor serye pe ganny fer pou en gran lenvestisman dan lapes semi-endistriyel.  Seselwa i konsonm bokou pwason e sa i nou sours protein tre enportan.  Aktivite lwazir, plezir dan bato, dan nou lanmer partou in enn parmi bann pilye nou lekonomi i bezwen ganny sekirize akoz i anmenn en reveni enportan dan nou lekonomi.

Mr Speaker, misyon SMSA se pou fer sir ki tou bato ki angaze dan nenport ki aktivite swa lapes, lwazir, touris, kargo, oubyen bann bato ki antre dan nou lanmer ou dan nou por i mentenir en bon standar sekirite.  Zot bezwen etablir sa.  Lo en nivo tre minimum, risk pou lavi imen, pe enport swa si ou en maren, swa ou en pasaze.  An pasan, mon note ki lentansyon Gouvernman pou fer SMSA retenir en rol regilater, tou dernyenman Mr Speaker, in annan bann bato ki’n antre dan nou por ki’n pran dife.  In annan ki’n perdi lo lanmer.  Plizyer leksplikasyon in ganny donnen pou sa bann maler, spesyalman sa ki konsern bato perdi lo lanmer, ler ou ekout lo radyo pe dir sistenm kominikasyon pa pe marse.  Nou’n perdi kontak avek bato.  Nou pa konn lokasyon bato eksetera.  Sa bann sitiyasyon i fer plizyer fanmiy dimoun ditor e dan sa sirkonstans spesifik, mon persyade ki i tre enportan ki Lotorite SMSA i bezwen fer sir ki bann lekipman lo tou bann bato i lo en standar ki akseptab.  Probableman, i devret osi annan provizyon pour en standby lekipman kominikasyon, zis anka enn pa bon, dan moman kot nou pli bezwen servi li, spesyalman dan moman maler, kot lavi imen i an danze.

I annan en gran lenportans ki tou dimoun i rekonnet nesesite travay an partenarya.  Travay an kolaborasyon.  Enn parmi i konsernan, i bezwen devlop en sinerzi serye ansanm, rapor travay i neseser garde e konsolide avek SMSA.  Note ki an fezan sa, nou pa zis ede pou sov lavi inosan an ka detres me ou pe protez ou lenvestisman ki ou’n fer.  Ou’n pran en loan pou aste en bato oubyen plizyer bato avek plizyer lekipman.  Eski ou pa enterese vwar ou biznes fleri?  Eski ou’n fer ou lenvestisman pou rekolte destriksyon ou bann asset? Anplis note.  Nou konnen ki ler en bato i perdi lo lanmer ki kantite resours larzan, resours imen ki Gouvernman, Leta Sesel i bezwen depanse pou lans en legzersis resers lo sa vast teritwar lanmer ki nou annan.  Nou tou nou konnen ki i pa fasil.  De lot kote, nou bezwen pran konsyan ki kantite soufrans emosyonnel, langwas, sagrinasyon, ki nivo depresyon i enn plizyer fanmiy i oblize pas atraver pou plizyer letan.  I pa fasil.  I bann moman latristes sever pour nou bann fanmiy.  Alor, nou konpran Mr Speaker, ki sa rol gard en o nivo sekirite i tre, tre enportan.  A sa staz, i enportan pou eklersi se ki ler dizon, en lenspeksyon in ganny fer, en konklizyon se ki bann lekipman pa bon, oubyen pa lo standar.  Ki arive si propriyeter oubyen met bato napa ase larzan ?  Eski SMSA i kapab fasilit prosesis ganny akse avek en loan pou met tou lekipman neseser lo standar ?

Mr Speaker, nou ankor lo rol ki SMSA i annan pou vwar en lot laspe tre enportan, sa se pour donn lenformasyon bann mariners lo okenn evantyalite ki pe arive lo lanmer.  Seselwa i rapel ki pa bokou letan, nou’n soufer avek piratri.  Pa bezwen nou repet tou sa ki’n arive me pei in soufer.  Sesel in soufer.  Nou patri in soufer.  Emosyonnelman, finansyelman, i la kot SMSA i bezwen donn tou bann direktiv kote pou al lapes.  Ki danze i été, dan ki moman lazournen, dan ki sezon ki nou bezwen vin pli vizilan.  Ki prekosyon nou bezwen ganny pran pou anpes okenn sitiyasyon negatif arive.

An sa ki konsern polisyon, Sesel nou’n fer bokou pou protez nou lanvironnman, swa lo lanmer, swa lo later.  Nou’n envestir bokou resours.  SMSA i bezwen fer sir ki bann bato pa pe polye nou lanmer.  Sa Proze de Lwa, ler ou etidye son konteni, ou vwar ki i annan bann lenspekter ki ava annan koman zot responsabilite, pou fer sir ki bann bato i dan bon kondisyon.  E ler nou’n fini ganny white listed par IMO, bann bato ki flot paviyon Sesel ler zot frekant lezot por, not byen ki laba osi zot pou pas atraver bann lenspeksyon.

Mr Speaker, mon konpran ki en lot rol SMSA se pou anrezistre bann bato.  Sa laspe i tre enportan, senpleman akoz i reprezant en lot brans, oubyen aktivite ki annan potansyel devlope dan nou pei, kot plizyer konpannyen i kapab diversifye zot biznes, me dan sa laplikasyon, nou bezwen tre smart e vizilan.  Nou bezwen fer byen nou resers avan ki Sesel i aksepte anrezistre en bato.  Ozordi dan sa monn, i ranpli avek plizyer trik, par egzanp serten bann bato propriyeter serten bato ki enplike dan bann tranzaksyon ilegal, parey trafik imen.  Byen ki kaptenn ki responsab bato, me nou repitasyon koman en pei i tre enportan.  Dan sa Proze de Lwa, i osi koz lo en Marine Accident Investigation Board ki son rol prensipal pou fer investigation dan bann ka kot i annan aksidan.  Vwar si tou bann kondisyon safety in ganny swiv.  Apre en tel legzersis, Marine Board ava soumet son rezilta lanket, rekomandasyon e propozisyon kot IMO, anplis kot Lotorite Gouvernman a respektiv lo kimannyer pou amelyor zot kalite sekirite lo lanmer.  Anplis ki amelyor serten konponan lo bann bato konsernen.  Mr Speaker, en legzanp kot SMSA ti vreman aktif se ler bato Turf ti ganny tape par en gro bato ki ti pe travers nou lanmer.  Lentervansyon oubyen rol SMSA in zwe, in ede anmenn en solisyon pou sa problenm.

En lot pwen tre enportan mon oule koz lo la se sirkonstans ler en bato i dan detres.  Swa i pe koule, masin in kase, pran dife eksetera.  Dan tel evantyalite, mon konsidere ki rol okenn lezot bato ki vin ede se pour sov lavi, non pa pou sov marsandiz.  Kot i konsern lezot keksoz, mon panse lasirans bato i byen plase pou deal avek.

Mr Speaker, lontan nou ti annan en kantite Seselwa ki ti al travay lo plizyer tenk angle.  Bokou nou i koz lo la.  Ti annan Duedale, Derwendale, Ennendale, enkli bann bato Grek.  Sa lepok, pa ti bezwen gran sertifika.  Ozordi i anfas avek legzizans devlopman ki’n arive dan sa Sekter, i fer ki pou ganny en sertifika safety, nou bezwen al Sid Afrik, oubyen lezot pei.  Keksoz pou diferan ler Sesel i ganny white listed par AMO. Isi dan Sesel, nou Sant Lantrennman Maritim, apre ki bann aplikan in pas atraver bann prosedir e formalite, apre ki zot in fini zot letid, nou pou annan lotorite pou donn sertifika.  Sertifikasyon ki ava ganny rekonnet lo nivo enternasyonal.  Konsekaman, i ava permet tou bann maren, nou bann zenn Seselwa kapab al eksplor lezot posibilite lo nenport ki bato atraver lemonn.  Sa i pour en devlopman tre pozitif.

Mr Speaker, ozordi plis ki zanmen, donnen nouvo loportinite, nou Sekter aktivite i ganny kree, i egzize nou bezwen sistematikman envestir plis dan formasyon nou prop lafors travay pou Sekter Maritim.  I enplik plis ki formen pou nou bann zenn deza ganny vwar nesesite ki Sesel i annan surveyor kalifye pour bato.  I annan plizyer kalite surveyor ki bezwen ganny fer lo en bato.  Pou ou ganny rekonnet koman en examiner, ou bezwen annan grad swa en Kaptenn, oubyen en Sef Enzenyer.  Nou bezwen envestir.  Si nou pa fer li ozordi, nou pou touzour kontinnyen depan plis lo etranze.  Sa sitiyasyon i obliz nou osi pou pozitivman revwar kondisyon travay ek lapey ki Seselwa i gannyen.  San okenn dout, sa i ava kree kondisyon pou atrakte plis zenn dan sa nouvo Sekter.

Mr Speaker, i pozitiv pou antisipe ki sitiyasyon pou pran en pwen tournan ver lannen prosenn, si tou keksoz i mars byen.  Ler tou prosedir i konplete, Sesel a ganny white listed parey IMO.  Nou pou vwar en kantite loportinite pou ganny prezante, tel ki formasyon lokal ki ava gany rekonnet lo nivo enternasyonal.  Plis loportinite pour nou bann zenn ganny akse avek plizyer lekspertiz ki IMO i annan pou ofer.  Alors, ou ki pe ekout mwan, leve, bouze.  Met ou pare pou sezi tou sa bann gran loportinite.  I pour ou sa.  Leve lazenes Seselwa.  Annou ralye pour nou tou ansanm anmenn Sesel lo sa nouvo semen, lo sa some, lo sa nouvo frontyer.  Mon persyade ki donnen sirkonstans kot Sesel i annan 5 tanker ki pe travers lanmer o nivo enternasyonal.  E lozikman, zot pe flot paviyon Sesel.  I dir tousel ki nou bann tanker pe ganny bokou targete, zis akoz ki Sesel dan sa moman aktyel pa ankor ganny white listed par IMO.  De lot kote, i annan bokou kritik e konsern an relasyon avek lapey ek kondisyon travayer, nou bann Seselwa ki pe travay lo nou bann tanker. Mon panse i neseser fer en letid e pran en konsiderasyon serye sa bann kritik ki konsern tou nou bann maren Seselwa.

Mr Speaker, i annan sa ki nou apel ITF.  I koz lo minimum wage ki sea farers i gannyen.  Oktob lannen pase nou ti ratifye MLC 2006 e nou koman en pei, Konpannyen SEYPEC i responsab nou bann tanker, nou bezwen asire ki nou pe swiv tou sa bann kondisyon oubyen regilasyon anba sa bann Konvansyon.  E dan sa fason, nou pran responsabilite pou redres sitiyasyon e donn en serten lasirans ki tou nou bann maren Seselwa pe ganny en fair deal.  Mon pa konvenki ki nou annan en lot alternatif.

Ozordi, nou pe koz lo blue economy.  A konsept i en volitilasyon maximum tou sa gran potansyel ki egziste dan nou vazo Ekonomik Eksklisiv.  Ozordi nou pe koz lo leksplwatasyon delwil, leksplwatasyon potansyel pou trouv gas eksetera.  Nou bezwen devlop kapasite nou bann Lenstitisyon ki nou’n kree e pou kontinnyen kree, avek bi safeguard nou bann rises ki nou annan e ki bann ki reste pou dekouver.  E si nou pe prozekte SMSA koman sa striktir ki pou zwe en rol efikas e efektiv dan nou demars, lanpler oubyen dinamik lenplimantasyon tou bann dimansyon konteni dan konsept blue economy, mon napa okenn dout ki sa Lorganizasyon, apre 10an legzistans, i bezwen ganny donnen en priyorite dan devlopman tou son bann kapasite imen, lekipman eksetera.

Mr Speaker, mon panse ki travay i bezwen kontinnyen ganny fer lo Merchant Shipping Act, dan control of high air craft and Beach Control Act akoz i relye avek bann Lezislasyon Maritim.  Sekter Maritim pe vitman evolye e ganny transformen e i dir tousel ki Sesel i bezwen reste alaoter sa bann nouvo legzizans.

Avek sa detrwa mo ki mon’n dir, ozordi dan mon soumisyon, mon pou aport tou mon sipor pour sa Bill.  Mersi Mr Speaker.

 

MR SPEAKER

Onorab De Commarmond.

 

 

 

HON CHARLES DE COMMARMOND

Mersi Mr Speaker.  Mr Speaker, Merchant Shipping Amendment Bill, 2014 i en bon Bill ki devan nou, ki a met nou avek sa bann lamannman letan nou’n aprouve, i a met nou anlinny avek bann term e kondisyon IMO parey Minis in fer sorti.  Me bann lezot lamannman oubyen lezot travay ki annan pou fer avek Shipping Act limenm i plis ki sa ki nou pe fer la.  Petet letan pa’n permet.  Mon krwar ki Minis i a bezwen vini plitar pou anmenn bann lezot lamannman pou anpes bann overlap ki annan, pou anpes bann mankman ki annan, pou nou met nou ankor pli byen alaoter bann kondisyon, bann regleman e anmenmtan, pou met nou anlinny avek bann plizyer Konvansyon ki nou’n sinnyen koman en pei, vizavi Lalwa, tranzaksyon, lamenazman maritim, ki swa pou fer avek nou lanmer limenm, oubyen bato ki pas, oubyen ki vin dan nou por, dan nou bann por petet e anmenmtan, bato ki’n anrezistre Sesel.

Ou konnen, osi nou annan lezot challenge letan nou pe aprouv sa bann lamannman.  Sesel, ok. Nou annan Port Victoria, me selman nou annan plizyer Port of Entry.  Plizyer landrwa kot bato i kapab antre.  Nou annan osi sa challenge kot bato, sirtou la avek sa roulman pirat, kantmenm pankor fini 100 poursan net.  Anytime i kapab - i repran en pti pe, me kantmenm nou’n met li vreman anba kontrol nou kapab dir, me nou annan problenm.  Nou pa konnen bann bato ki antre parfwa san ki nou, nou annan sekirite lo la.  San ki nou, nou konnen sa bann bato.  I annan alegasyon par egzanp, ki Eden Island i annan bato ki antre ki nou pa konnen.  Letan dimoun i konnen, in fini antre.  I annan diferan landrwa dan Sesel kot ou konnen, mannyer nou ete, nou pa kapab veye.  Lo Praslin, lo La Digue.  Nou annan menm en letan, bato pirat ti’n ariv preski ater La Digue.  Apre ki nou al konnen.  Me i demann bokou pour nou kapab met tousala anba kontrol.

Sa Lalwa, i a ed nou pour nou kapab omwen ariv lo nivo kot IMO i demande, i egzize pour ki i nou osi koman en por enternasyonal, rezyonnal nou bezwen fonksyonnen.

I annan lezot pwen ki nou bezwen osi siporte e pouse, lefe ki nou pe amann sa Lalwa, ki nou bezwen fer resorti.  Ou konnen, lontan, in ganny mansyonnen par entervenan avan mwan me petet nou pa’n ase lwen.  Lo nou bann dimoun ki’n travay abor tenk.  Sa bann dimoun, letan nou’n - in deza vin dan nou Lasanble sa bann keksoz kot nou vwar zot bann kondisyon letan zot ti abor tenk, i pa’n parey avek bann lezot maren.  Seselwa li, konpare avek Grek, konpare avek Angle ek lezot pei ki sa letan ti bann Koloni Angle, pa ti parey.  E ozordi, zot annan en Lasosiasyon ki zot pe demann ankor zot konpansasyon, ki mon krwar zot annan parfetman rezon.  La zot pe rod Sesel pou pouse ok. Sesel koman en pei, Gouvernman, pou donn zot koudmen e nou devret pouse pour ki zot ganny zot konpansasyon.  Me i vin en leson pou lezot maren.  Konpran mwan byen akoz la, nou annan osi tankers ki pa pou ni Angle, ni nanryen.  Sa bann tankers sa letan, ti osi form par dan lager.  I pa ti zis anmenn delwil.  Zot ti anmenn delwil pou bann bato-d-ger.  Zot ti siport bann bato-d-ger.  Zot risk ti bokou plis ki ozordi.  Ozordi nou, nou annan tankers koman en pei, nou annan tankers.  Nou annan bann lezot bato lapes ki vin Sesel, ki nou annan serten Seselwa abor osi.  Me kestyon, eski zot kondisyon i parey ek tou lezot travayer abor bann bato?  Non.  Nou konn tre byen plizyer konplent ki annan.  Sa i bezwen ganny met azour.  Travayer Seselwa ki lo bann bato, lo bann tankers i bezwen ganny met azour.  Zot osi zot kondisyon.  Zot imen zot osi.  Zot bezwen parey lezot travayer.  Nou annan travayer lo por limenm.  Travayer kot Land Marine, Hunt Deltel ensidswit.  Zot osi zot case i bezwen ganny gete.  Nou pa kapab les sa pase.  Me selman la letan mon pe koze, mon anvi osi fer met en pwen for lo nou bann Seselwa ki travay dan sa bann domenn ki mon pe nonmen la.  Nou pa kapab, akoz nou annan en bon Gouvernman, nenk nou asize lebra krwaze, fye ki Gouvernman i fer tou pour nou.  Mon lans en lapel avek sa bann travayer, pou zot form par en bon Lasosiasyon e en bon Union.  In mansyonnen boner par entervenan avan mwan.  En Union pour bann maren ok i bezwen.  I bezwen egziste, i bezwen for.  Se sa Union ki pou fight pour zot.  Pa ekspekte bann lezot lenstans pou vini toultan pou fight pou zot.  I vre nou annan en bon Gouvernman zot.  Me selman, nou osi nou bezwen fer nou bout.  Ok. Seamans Union se sa lenstans ki bezwen fight pour zot.  Nou a met bann Lalwa annord.  Be zot osi bezwen sa bout la.  So, travayer Seselwa, sirtou sa bann ki konsernen avek lamarin i bezwen form par en Union. Ale, al anrezistre si pankor formen, al formen sa Union la.  Sa ki pou fight pou zot mon remete.

Bon, nou osi, atraver sa bann lamannman, nou pe dir avek Minister konsernen pou met tou sa bann keksoz azour.  Pa kapab Port Authority i fer son bout, apre SMSA li i annan son bout.  Apre ou vwar bout ki enn pa pe ekout lot, lot pa kapab dir pa ou ki ansarz, mwan ki ansarz.  Pran ou en legzanp, bann marsandiz ki vini, ki nou bezwen detrir lo por limenm.  Ok. I vini marsandiz in antre dan Sesel, i vreman pa bon pour nou pei.  Pa bon si sa marsandiz i reste, ouswa menm si in antre, ou pe remet li lo bato, i kapab annan en risk fer krwar e ki demann brile deswit.  Sansan problenm.  Napa incenerator lo port.  E si ou oule met enn, Port Authority i dir ou pa li ki responsab.  SMSA i dir ou pa li.  Lot pa li, lot pa li.  Personn pa li.  E dan nou pei, nou annan plizyer sa bann zafer, kot personn - nou’n fer, nou’n kree en ta bodies, personn pa oule responsab pou serten keksoz.  E nou bezwen arete sa bann zafer dan nou pei.  Nou Lasanble pe anvoy en mesaz serye ek nou Gouvernman, pou dir sa ta Lalwa, sa ta regleman ki nou pe anmennen, annou fer fason met keksoz byen azour e anpese ki i annan personn ki pa oule pran responsabilite.  Annou pran nou responsabilite.  Annou fer ki nou Gouvernman i a bouz byen dan bann bon direksyon e ki i a evit bann problenm kot pa neseser.  So, nou pe lans en lapel, nou dir incinerator lo por la, whoever ki responsab sa bann Lorganizasyon, Port Authority oubyen sepa lekel la, al mete, i enportan, bezwen annan.

Mr Speaker, nou osi i byen ki nou pe fer.  Nou annan Lekol Maritim ozordi e i neseser Lekol Maritim.  I bezwen lo en bon nivo.  Sa Lalwa la i bezwen fer fason get byen nou lekol Maritim, fer sir ki nou bann zenn ki pe vin maren la, i vin bann bon maren.  Bann bon maren ki ekipe ek tou sa bann pwen ki mon pe dir la.  Demen zot, fodre pa zot vin fer fot letan zot pe lead dan sa direksyon dan nou pei, ki swa lo tankers, ki swa lo por, ki swa lo SMSA, ki swa lo safety administration, ensidswit.  Se ki zot, zot a omwen konpran tou sa.  Savedir, nou bezwen edik zot Lalwa Maritim byen davans.  Fer zot konpran tou sa bann keksoz byen dan lekol.  Pa zis konmsi montre zot en pti zafer, epi setou akoz zot pou al pas dan menm difikilte ki nou bann dimoun aktyelman i pase.  So, nou lans sa lapel osi lo la e ki nou demande ki sa Lekol Maritim i ganny ekipe byen menm parey deza nou pe vwar, bann bon pa ki pe ganny fer.  I byen e sa i bezwen kontinnyen e kit li lo sa standar enternasyonal si ou oule, kot i asosye parey Liniversite Sesel in fer.  Asosye bann bodies deor, kot la osi i ava bon pou zot sertifikasyon i ava alaoter.

E avek sa Mr Speaker, mon krwar mon’n tous en pti pe keksoz ki enportan pou ki nou standar lo kestyon lamarin dan Sesel, lo bann norm ek regilasyon ki nou bezwen swiv, pou met nou azour avek bann kondisyon e norm IMO ki i ganny fer.  Nou, nou siporte e mon krwar ki Minis la, i byen si i pe anmenn sa bann keksoz dan sa direksyon.  Minister i bezwen fer sir ki tou keksoz i on board.  E parey mon’n dir, sa bann lezot lamannman ki nou vwar i bezwen vini plitar, annou organiz li.  Pa tro tarde avek.  Anmennen e mon krwar nou dan bon direksyon lo la.  Mersi.  Nou devret siport sa Proze de Lwa.  Mersi Mr Speaker.

 

MR SPEAKER

Onorab Pierre.

 

HON DAVID PIERRE

Mersi Mr Speaker.  Mr Speaker, lamannman ki devan nou, an relasyon avek Merchant Shipping Bill i bann lamannman ki enportan.  Annefe, si nou rapel tre byen, pa tro bokou letan pase isi dan sa Lasanble, plizyer Manm dan en deba ti refer sorti sa nesesite pour Sesel met li azour ek son bann Lalwa ki pou permet li ganny white listed an relasyon avek IMO. E mon kontan.  Mon ti enn sa bann Manm Parlman ki ti fer sa bann demann dan sa Lasanble Nasyonal e ozordi mon vreman apresye lefe ki zefor in ganny fer pou met nou azour pour ki finalman nou ganny white listed akoz letan nou pa ganny white listed, nou pas atraver plizyer defayans ki kree bann lenkonvenyans pa zis pour lekonomi Sesel koman en pei, me pour bann travayer, bann maren Seselwa ki travay abor bann bato oubyen bann tankers, oubyen bann vessels ki port paviyon Sesel.  E nou konnen poudir pei ekonomikman i perdi larzan par lefe ki nou pa pe kapab partisip fully dan bann aktivite maritim akoz nou pa ti ankor ganny white listed oubyen par lefe ki nou ganny scrutinise zis akoz nou bann bato i pas atraver nou bann tankers, i pas atraver bann difiilte, zis akoz nou pa ti ankor ganny white listed.  E ozordi mon apresye lefe ki bann lamannman pe ganny fer.

Me de lot kote Mr Speaker, mon ti ava prefere ki bann lamannman i ganny fer dan son entirety.  Nou revwar.  Mon ti ava panse poudir sa ti ava en loportinite pour nou revwar tou bann lamannman ki nou bezwen fer e vin avek en seri lamannman ozordi, rather than vin avek enpe lamannman ozordi e vin avek en lot pe lamannman plitar.  Mon ti ava prefere vwar en travay pli profon in ganny fer dan sa direksyon, pour ki nou fini avek sa.  Nou met tou nou bann Lalwa ki annan pou fer avek Maritim annord e vin prezant li avek Lasanble Nasyonal enn fwa pour tou.

Mr Speaker, en lot size ki mon ti a kontan touse an relasyon avek sa bann lamannman, an relasyon avek nou bann Lalwa Maritim, la ki sa bann lamannman pe al pase, mon swete ki Gouvernman, ki Sesel koman en pei i met tou bann striktir anplas, pou asir lenplimantasyon atraver bon, pou asir bon lenplimantasyon.  Lenplimantasyon efektiv atraver bon laplikasyon nou bann bon Lalwa ki nou pe pase dan sa Lasanble Nasyonal.  Mon krwar poudir nou realize poudir isi Sesel, enn bann pli gran defayans ki nou annan se ki an tan ki nou annan bon Lalwa dan plizyer domenn, dan plizyer areas, nou konnen poudir lenplimantasyon nou bann Lalwa parfwa i en defayans.  Nou get nou Lalwa Trafik par egzanp kot nou annan en kantite defayans.  Nou annan bon Lalwa me nou annan defayans dan lenplimantasyon, dan laplikasyon nou bann Lalwa.  Mon krwar poudir nou Lawa Maritim pe ganny mete azour e nou bezwen fer sir ki nou annan bann striktir anplas ki pou permet nou.  E bann mekanizm ki pou permet nou met sa bann Lalwa an aplikasyon dan en fason for, parey i devret, so that i a vin nou bann Lalwa.  I a vin efektiv.

Mr Speaker, sa bann lamannman ki devan nou, pou annan en lenpakt.  Pou annan en baring direk lo nou bann maren.  I annan en baring lo nou bann doker, lo nou bann maren e sa Lasanble Nasyonal ozordi, a plizyer repriz in fer li son devwar pou fer tande lavwa nou bann maren.  Pou fer tande lavwa nou bann doker.  E mon krwar poudir ozordi, i en loportinite pou Gouvernman, pret zorey a sa ki bann Manm Parlman pe dir e ekout lavwa sa bann travayer atraver Lasanble Nasyonal.  Mon krwar poudir nou’n debat, Mosyon in ganny anmennen devan Lasanble Nasyonal, nou’n fer bann lezot deba otour nou bann doker e nou bann maren e still mon krwar poudir zot lavwa pankor ganny tande.  Annou, koman en pei, pran sa koman en loportinite pou dir be tyonbo en kou.  Annou get sa bann maren pli pros.  Annou get nou bann maren par egzanp lo nou bann tankers.  Annou get bann kondisyon travay ki nou donn zot.  Annou get bann rekonpans ki nou anvizaze donn zot, dizon letan zot fini travay.  Annou get tousala.  Annou met li anba microscope.  Annou fer en revi e annou donn zot the best ki the country i kapab afford pou donn sa bann maren akoz zot annan en kont.  Zot annan e zot fer en kontribisyon enportan.  Ekstrememan enportan dan lekonomi Sesel.  Ozordi, Sesel nou vwar nou pe fer fas ek en sitiyasyon kot nou Lendistri Touris pe bese.  Kot, mon pa pe dir poudir i pou lonterm, me selman nou pe vwar bann menas ki annan lo nou Lendistri Touris.  Nou konnen poudir nou tre depandan lo Lerop pou nou Lendistri Touris e nou konnen poudir i annan en problenm la.  Lerop i ganny afekte, nou osi nou ganny afekte.  Nou bezwen devlop nou Lendistri Maritim e i fantastik ki nou pe fer bann lamannman ki pou ede dan sa direksyon.  Me nou bezwen osi egalman, paralelman, avek sa bann lamannman, vwar bann lezot areas kot nou bezwen improve, pou ensure ki nou ganny en Lendistri Maritim ki for e ki kontribye dan devlopman ekonomik Sesel dan en fason pli for akoz nou potansyel i enn ki dir nou poudir nou devret pe fer pli byen.  E si nou devret pe fer pli byen, i vedir ki i annan defayans e nou bezwen idantifye, vwar kot sa bann defayans i ete e aranz sa bann defayans.  E enn bann areas kot i annan defayans, se zisteman avek nou bann travayer.  Nou bezwen get zot pli pros e nou bezwen donn zot tou sa ki pei i kapab donn zot, pou fer ki an retour zot, zot donn tou sa ki zot kapab donn en pei e avek sa 2 ansanm, nou krwar poudir nou pou fer en bouze.  En perse pli for lo en baz ekonomik pour Sesel e pour tou Seselwa.

Mr Speaker, en lot size enportan an relasyon avek sa lamannman i se ki nou bezwen fer sir ki, avek sa, nou bezwen fer sir ki nou bann por i ganny manage dan en fason pli efikas pou promouvwar bon letik biznes.  Mon pe mansyonn sa bann pwen akoz i annan pou fer avek devlopman ekonomik Sesel.  E nou lentansyon se pou fer sir ki nou anmenn the best possible devlopman ekonomik lo nivo maritim pour Sesel.  E enn bann keksoz se fer sir ki avek sa bann lamannman, nou bezwen fer sir ki nou bann por i ganny amenaze dan en fason efikas.  Nou bezwen fer sir ki napa monopoli.  Nou bezwen fer sir ki tou bann akter i ganny loportinite pou zwe zot rol dan en fason fair e dan en fason zis, pour ki biznes i bouze.

Lot size Mr Speaker, en size ki’n ganny koz lo la se sekirite avek safety maritim.  Mr Speaker, mon krwar poudir ozordi nou annan nou bann Seselwa ki pe donn lanmen lager kont lapiratri.  Ozordi nou ankor annan nou bann bato lapes ki pe perdi.  Nou annan en vessel monitoring system, ok. Me nou pa pe met li an aplikasyon dan sa best possible way.  E ozordi nou ankor vwar poudir i annan bann bato lapes ki pe perdi, me nou pa kapab idantifye kote sa bann bato lapes ti ete a moman ki nou ti annan dernyen kominikasyon avek zot.  E mon krwar poudir i annan en travay pli formidab ki nou bezwen fer dan sa direksyon akoz ozordi nou pe demontre, atraver sa bann lamannman poudir nou annan lentere sekirite nou bann maren, nou bann travayer ki travay lo lanmer aker.  E nou bezwen met li an aplikasyon dan en fason pli byen.

Onorab De Commarmond in fer sorti en pwen trakasan.  En pwen enportan, me en pwen ki trakasan.  In koz lo nou bann ports of entry kot bato, i dir poudir i annan posibilite ki bato pe antre dan nou pei me nou pa konnen.  Mr Speaker, mon krwar poudir i en pwen konsern pou Gouvernman.  I en pwen konsern pou nou tou akoz ozordi enn bann issues ki pe detrir Sesel koman en pei, ki pe detrir lazenes Seselwa se sa issue drog.  E nou konnen, atraver bann levidans ki’n ganny demontre dan bann cases ki’n deza fini pase Ankour, poudir enn bann landrwa kot drog i antre dan Sesel se atraver maritim.  Atraver bato.  E pour nou agree ki i annan bann bato ki pe antre dan Sesel ki nou pa konnen, oubyen i annan bann ports of entry ki nou pa kapab kontrole e i trakasan, e mon ti ava kontan ki Gouvernman i fer en keksoz dan sa direksyon pou nou lager dan en fason pli for kont sa size drog.

E Mr Speaker, dernyen pwen ki mon ti ava kontan fer se the issue of marine accident investigation board. Tre enportan.  Tre enportan.  Sesel i antoure avek lanmer e nou konnen poudir i annan en kantite aktivite maritim ki pran plas dan nou lanmer on a daily basisBe it lokal, be it enternasyonal, be it i enplik Seselwa, be it i enplik etranze, bann touris ki vin vizit nou zoli pei Sesel.  Mon krwar poudir i pou enportan dan sa lalinny ki nou annan en Board ki efektiv.  En Board ki fer son travay dan en fason endepandan, dan en fason profesyonnel e dan en fason ki tre for.  Mon krwar i devret en Board ki annan lentegrite.

Mr Speaker, en tel Board ki pe fer en tel travay lo en tel nivo ki mon’n eksplike, i pou osi ede pou dekouraz neglizans.  I pou osi ede pou kontrol, oubyen pou met anba kontrol lakantite aksidan maritim ki arive dan nou pei Sesel.  Letan mon pe koze la, mon pe mazin sa move aksidan trazik ki ti arive rafal Karnaval lot lannen pase e kot ti annan neglizans.  Mon krwar poudir sa pa ti bon pour Sesel koman en pei e mon krwar poudir en travay efektiv sa Board i kapab al dan en tel direksyon ki i anpes sa kalite aksidan par dekouraz neglizans.  Mon krwar poudir overall, letan nou get bann benefis ki Sesel koman en pei i kapab gannyen from sa bann lamannman ki devan nou la, mon krwar i kler ki Lasanble Nasyonal pou vot pour sa bann lamannman e byensir mwan koman Leader Lopozisyon dan Lasanble Nasyonal, mon pou donn mon full sipor sa bann lamannman.  Mersi Mr Speaker.

 

MR SPEAKER

Onorab Rose.  Onorab Rose, ou osi annan en bann ……….

 

(Technical problem)

 

HON MARIE-ANTOINETTE ROSE

Yes Mr Speaker.  Bonzour tou dimoun.  Bonzour Minis.

Mr Speaker, mon pa pou long akoz mon krwar bann entervenan avan mwan in dir tou sa ki merit ganny dir konsernan sa Proze de Lwa ki devan nou.  An gro, i en bon Proze de Lwa.  I bon pour Sesel e nou konpran tre byen direksyon kot Sesel pe ale avek sa Proze de Lwa.  Menm sa Mr Speaker, mon krwar i enportan mon entervenir lo 3 nivo.  Enn an sa ki konsern kote Seselwa i vwar li dan sa Proze de Lwa.  Ki pe arive lokalman an sa ki konsern SMSA e armonizasyon bann Lalwa ki pou gouvern nou isi Sesel.  E kote Sesel pe ale lo nivo enternasyonal.

Mon krwar bann entervenan lo kote Parti mazoriter in fer resorti ki en Seselwa i devret vwar li klerman dan sa Lalwa.  I pour devlopman Sesel e devlopman maritim Sesel.  E bokou in ganny dir lo nou bann maren.  Annefe nou krwar sa Proze de Lwa i en Proze de Lwa pour nou bann maren Seselwa, pou zot vwar zot bokou plis koman bann profesyonnel lo lanmer.  Nou’n koz lo listwar maritim Sesel depi bomaten.  Bann maren ki ti al lo tankers. Mon krwar en kantite fwa, akoz nou listwar, nou vwar bann maren koman zis bann dimoun ki napa gran konesans, alors zot al rod en louvraz lo tanker pou zot kapab ganny lavi save, epi retourn Sesel.  Me ozordi, avek bann legzizans enternasyonal, avek bann demann enternasyonal, i enportan ki nou bann fitir maren, oubyen nou bann maren konmela i vwar sa travay koman en profesyon, en travay profesyonnel kot zot ganny byen renimere e kot zot ganny bon training. E se la kot mon siport demars Gouvernman pou nou annan bann Lakor avek bann Kolez, bann Lenstitisyon enternasyonal pour ki sa ki Lekol Maritim i ofer isi i byen, i bon, me nou kapab al pli lwen.  Nou bann maren i kapab al pli lwen.  E pa tou dimoun ki pou aspire vin en Kaptenn abor bato.  Pa tou dimoun ki anvi vin en Kaptenn abor bato.  I annan dimoun ki anvi fer lezot louvraz ki osi enportan e ki osi ganny demande par IMO e ki zot annan zot sertifika.  E mon konnen, enn fwa ki sa Lalwa i pase, pou annan sa bann legzizans lo nou bann Seselwa.  E sa i rezon akoz mon zwenn Lasanble.  Demann ki mon’n fer a plizyer repriz, pour ki sa diferans dan renimerasyon, dan saler, dan bann kondisyon i ganny adrese pou nou bann maren Seselwa.

I bon nouvel pour bann zenn ki anvi, ki aspire zwenn sa profesyon.  Mon refer a travay maritim koman en profesyn akoz i en travay ki merit bokou respe.  En travay bokou sakrifis parey Onorab Fideria in fer resorti.  En travay bokou sakrifis ou kit ou pei, ou kit ou fanmiy ou ale, lannen apre lannen e i en travay ki i annan dimoun i fer 10an, 20an i ankor lo lanmer e ler zot retournen, zot ankor preski napa en fanmiy.  So, i en travay ki demann bokou sakrifis.  Zot bann anbasader Sesel.  Ler zot ariv dan en por, zot devret vwar zot koman bann anbasader Sesel.  En bato ki flot nou paviyon i en bato ki en anbasader Sesel.  Alors i enportan ki zot konportman, fason viv, fason fer i osi alaoter.  Alors, nou bann zenn Seselwa ki anvi devlop zot dan sa domenn i devret vwar lavenir.

Mon konnen i pa dan sa Lalwa Mr Speaker, me mon ti a kontan osi dir, avek leksplorasyon petrol dan lanmer Sesel.  Mon krwar Lekol Maritim e bann Lakor ki nou annan avek bokou bann Lenstitisyon repite, i devret pe gear li en pti pe towards devlopman bann spesyalis dan devlopman leksplorasyon petrol, dan bann sipor lozistik ki annan avek leksplorasyon petrol.  Etan donnen ki leksplorasyon petrol pe ganny fer lo nou lanmer osi.  Sa i kimannyer Seselwa i vwar li dan sa Lalwa.

Mr Speaker, lo nivo lokal, lo kote parti mazoriter, nou’n konstate ki sa Lalwa i selman en bout.  Mon krwar in ganny fer resorti ki nou ti a kontan vwar en Lalwa konplet e mon krwar Onorab Barbe in fer resorti tre kler.  En Lalwa ki armoniz li avek lezot Lalwa.  En Lalwa ki gid Lotorite Por, Lalwa ki gid lasante piblik.  Lezot Lalwa ki nou isi dan sa Lasanble nou pe pase.  I enportan ki enn fwa ki nou’n pas sa Lalwa, SMSA mon krwar pou annan en travay pou revwar sa Lalwa dan son antyerte e tou bann lezot laspe ki annan pou fer avek kimannyer lokalman, SMSA i fonksyonnen avek lezot antite.

Mr Speaker, kote Sesel pe ale?  Mon krwar World Cup in fini me nou nepli pe zwe dan nou prop league. Mon krwar i enportan ki nou konpran ki nou nepli pe zwe dan nou prop league. Nou pe zwe lo en league enternasyonal.  Ozordi bomaten, Minis in vin reponn en Kestyon Dirzans akoz en issue enternasyonal.  E i kler ki bokou pei, bokou pei vwazen dan larezyon pe regard Sesel tre for.  Pe regard nou tre for.  Pe regard tou nou bann move ekonomik.  Tou nou bann stratezi ekonomik.  Pe regarde ki sa pyon nou servi ?  Kote nou pe ale ?  E Sesel pe pozisyonn li klerman koman en dirizan dan preski tou domenn.  E mon krwar Minis in byen fer pou asize ansanm e fer sir ki si nou pe zwe dan league enternasyonal, si nou anvi zwe dan World Cup, alors nou bann Lalwa i bezwen lo sa nivo.  Nou bann mendev i bezwen lo sa nivo.  Nou bann resours i bezwen lo sa nivo.  E mon kontan ki Leader Lopozisyon pe donn nou sipor e in koz bokou lo resours ki bezwen alaoter isi lokal akoz isi lokal ki the point of contact, ki regulate nou bann Lalwa, nou bann Kad Legal, nou bann dimoun ki annan konesans aprofondir dan domenn Merchant Shipping.

Mr Speaker, i osi enportan ki nou vwar ki bann devlopman pe arive lo por.  Devlopman por ler nou konpar Victoria avek Dar es Salaam, avek Port Louis, avek Mombasa.  I annan en kantite konpetisyon.  I annan en kantite konpetisyon e sa bann por, lannen pase nou ti ganny sans nou de Leader Lopozisyon pou al Dar es Salaam e ou vwar ki direksyon i pe anmenn li.  Ou vwar i pe al dan en direksyon tre, tre, tre, tre vit e mon zwenn Onorab De Commarmond ler i koz lo bann krim ki ganny komet on the high seas.  Bann krim ki ganny komet lo lanmer e nou konnen i annan en kantite - Dar es Salaam, Mombasa i bann pwen kot i annan en kantite krim ki ganny komet.  Bann krim organize.  Drog par egzanp.  E fodre ki ler Sesel i anvi vin en por konpetitv e SMSA i annan en pli gran rol pou zwe ler i annan en por konpetitiv.  Sa pouvwar ki i pe gannyen anba sa Lalwa i ganny byen ankadre, i ganny byen egzerse akoz nou pe al lo sa nivo.  E mon krwar nivo kot Gouvernman pe ale, nou pe koz lo blue economy, nou pe koz lo leksplorasyon delwil, nou pe koz lo Victoria, being the number one port in the region. I kler kot nou pe ale.  If you want to be the number one port in the region, nou Lalwa i alaoter.  Mon krwar lokal mechanism.  SMSA son rol ki i annan pou zwe i bezwen enn ki tre for e bann pti defayans ki nou annan, nou bezwen travay ansanm pou fer sir ki nou eklersi e nou met nou azour.

Mr Speaker e i kler ki lo nivo enternasyonal Sesel i bezwen ganny byen repite.  Bann bato, mon’n fer en pti pe resers.  Bann bato ki flot paviyon Sesel ozordi, zot ganny en bon pe, quite a tough time ler zot antre dan bann por akoz nou Lalwa pa azour.  E zot ganny si ou oule, en lenspeksyon rigore ki pa neseser akoz nou deza pe pratik sa bann nivo enternasyonal.  Bann pratik par egzanp lo nou bann tankers, lo bato i deza a sa oter.  So si nou pe practice to that level, nou Lalwa i might as well be to that level.

So, Mr Speaker, avek sa nou pou siport sa Lalwa e parey ou’n dir, avek ou permisyon, mon pe soumet serten lamannman devan Lasanble pou konsiderasyon.  Mersi.

MR SPEAKER

Ok.  Mon mazinnen sa bann lamannman i tre miner e mon konpran in ganny laprouvasyon Lofis AG.  So, Minis, ou ofe avek sa bann lamannman ki nou’n sirkile?

 

MINISTER JOEL MORGAN

Wi Mr Speaker, mon ofe avek sa bann lamannman e mon napa okenn issue avek sa ki’n ganny propoze.  Mersi.

 

MR SPEAKER

Ok.  So alors, Right of ReplyMinister.

 

MINISTER JOEL MORGAN

Mersi Mr Speaker.  Mersi tou Manm Lasanble Nasyonal ki’n fer zot kontribisyon tre valab pou siport e debat bann pwen ki’n ganny propoze dan sa lamannman Merchant Shipping Act ki devan zot.

Mr Speaker, mon pou endorse tou bann pwen ki bann Manm in fer resorti ozordi dan deba an sa ki konsern bann diferan fakter ki nou pe fer fas avek ozordi dan Sesel, lo kote Sekter Maritim.  E se pour sa rezon ki parey bann Manm in fer resorti e ki mwan mon’n prezant devan zot ozordi.  Se pour sa rezon ki mon’n vin avek sa Bill ki en mezir enterim par enterim, ki i annan en pli gro travay pli aprofondi ki pe ganny fer par deryer sa, kot i annan en komite legal ki’n ganny etablir, ki pe travay lo en revision sa Merchant Shipping Act 1994, ki parey bann Manm in fer resorti, i annan en nesesite pou nou moderniz sa Lalwa, pou nou met nou azour avek bann norm enternasyonal, lo bann lobligasyon enternasyonal e pou fer ki Sesel i kontinnyen maintain sa leading role, ki por Victoria i kontinnyen annan sa rol leader dan larezyon, an sa ki konsern Sekter Maritim e bann travay ki Sesel pe fer dan devlopman maritim parey nou’n vwar, lo kote leksplorasyon pou delwil, devlopman ekonomik nou por, and so on.

So Mr Speaker, sa ki mon pou dir avek Lasanble se ki boner lannen prosenn mon pou vin avek en nouvo Proze de Lwa devan Lasanble Nasyonal ki pou ranplas Merchant Shipping Act ki nou annan ozordi.  E rezon ki mon’n bezwen vin enpe avan avek sa propozisyon se ekzakteman akoz nou bezwen etablir lo kote nou kad legal poulemoman sa bann lamannman ki mon’n propoze avek zot bomaten, sirtou lo sa Marine Accident Investigation Board e sirtou lo Maritime Safety Administration, SMSA, kot i definir son bann pozisyon legal dan sa ladministrasyon, anlinny avek nou bann requirements pour IMO white listing.

Bann Manm in fer resorti bann problenm ki nou pe fer fas avek lo nou bann bato ki pe vizit bann por dan bann lezot pei e kot sak fwa zot vizite, zot annan sa lenspeksyon rigore ki ganny fer lo bann bato, akoz nou pankor achieve white listing status. E i annan en travay entansiv ki’n ganny fer deza lo kote SMSA, lo kote Maritime Training Centre, MTC dan Minister Ledikasyon, pou asire ki nou bann striktir i anplas.  Nou’n koz lo bann striktir.  Pou asire ki sa i anplas enn fwa ki sa Lalwa i ganny pase, pou met annefe e met an aplikasyon bann provizyon sa Lalwa e osi serten provizyon ki egziste dan Merchant Shipping Act ozordi, ki neseser pour nou kapab enplimante.  E la osi i annan en issue resours.  Resours pou fer sir ki SMSA, nou Maritime Safety Administration i annan ase dimoun an term son staffing e nivo konpetans sa bann dimoun, pou asire ki sa ladministrasyon safety i kapab fer son travay efektivman.  Nou’n koz lo met sa annefe.  Wi Mr Speaker.  E nou bezwen donn sa resours neseser, pou asire ki nou kapab atrakte bann dimoun konpetan pou vin travay dan SMSA e nou bezwen kapab pey sa bann dimoun en saler, according to zot nivo konpetans akoz dan bann lezot pei, par egzanp bann examiner ki bann kaptenn ki annan en kantite lannen leksperyans, zot ganny en serten package ki enpe difisil pou nou kapab match ozordi dan Sesel.  E nou’n koz lo sa kestyon salary package osi pou bann maren ek bann doker, bann stevedore. Menm issue i aplike pour bann dimoun ki pe travay dan SMSA.  Menm keksoz i aplike akoz ou pe regard en Sekter Enternasyonal kot ou pe fer konparezon, si ou fer sa analozi avek bann Pilot.  Ou fer sa analozi avek bann dimoun ki pe travay dan lo nivo SCAA, lo kote aircraft safety.  I bann norm, i bann standar, i bann nivo.  Bann kad enternasyonal kot nou bann dimoun i fasilman ganny atrakte pou al travay dan en lot pei akoz package i bokou pli bon ki nou, nou kapab ofer.  Me neamwen, nou annan dimoun ki pare pou travay isi.  Pare pou travay dan SMSA par egzanp.  Nou vwar otour nou dan sa Lasanble, serten Manm ki dan SMSA, ki bann dimoun tre konpetan, ki pe fer sa fonksyon.

Alor Mr Speaker, mwan mon pwen se ki mon pe siport nesesite pour nou kapab ofer nou bann seamen, nou bann dimoun ki travay dan Sekter Maritim, nou bann Kaptenn, nou bann zofisye, nou bann dimoun ki pe travay lo kote engineering.  Tou dimoun.  Bann coxwain, bann skippers, zot tou.  Bann Kaptenn parey mon’n dir, en package ki commensurate avek bann lezot dimoun ki pe travay lo par egzanp, en bato.  I bezwen ki en Seselwa ki pe travay lo en bato lapes, en bato ton par egzanp, ouswa en lot bato.  Kot i annan bann dimoun akote li ki pe ganny en saler pou sa pozisyon, li osi i ganny menm saler.  Baze lo prensip, equal pay for equal work.  Mon krwar sa i en keksoz ki tre enportan e ki nou bezwen koman en Gouvernman, travay pou fer sa arive.  E se pour sa rezon ki osi, mon kontan ki i annan en Seafarer’s Association ki’n ganny etablir.  Ozordi, nou annan en Seafarer’s Association. Sa in ganny formen legalman e sa Lasosiasyon in fer plizyer zefor pou zot osi fer avanse bann Drwa ek bann Responsabilite bann maren e osi bann dimoun ki pe travay lo nivo stevedoring, bann doker and so on.  E ansanm avek zot, ansanm avek Minister Lanplwa, nou bezwen fer, Departman Transpor, Minister Lanplwa ek Seafarer’s Association i bezwen fer en zefor pour nou kapab negosye avek sa bann lakonpannyen, pour asire ki nou bann dimoun in ganny en pli bon package egal avek bann lezot dimoun ki pe travay lo bann bato lo nivo enternasyonal, me osi lokalman, pou asire ki otan ki bann lakonpannyen i kapab afford, nou kontinnyen atrakte nou bann Seselwa pou travay dan sa Sekter.  E mon konnen ozordi par egzanp i annan kaptenn ki pe travay dan bann Lakonpannyen.  Par egzanp lo kote bann Fairies, bann bato ki anmenn cargo and so on. Zot pe ganny en bon package.  Me i annan nesesite pou nou kontinnyen revwar, pou ankouraz sa bann dimoun ki anvi join sa profesyon, antre ladan e vin bann dimoun ki parey ozordi nou annan nou bann pilot Seselwa, nou annan nou bann First Officers, nou annan nou bann kaptenn lo nivo maritim, nou annan nou bann First Officers, nou annan nou bann Enzenyer.  Devlop sa koman en karyer.  E se la kot ansanm avek bann Lenstitisyon, parey bann Manm in dir, lo nivo enternasyonal, par egzanp SINEC sorti Sri Lanka.  Lezot ankor lo kote Sid Afrik nou annan.  Bann Lenstitisyon nou pe travay avek pou kapab kontinnyen devlop Maritime Training Centre pou ofer bann course, pou raise sa nivo profesyonnalizm ki Onorab Rose in fer referans lo la, pou kapab annan bann dimoun ki vin bann maren profesyonnel dan nou pei.

Lontan Sesel ti renonmen pour son bann kaptenn e i pou vin ankor sa lepok kot Sesel i renonmen dan Sekter Maritim, kot nou annan sa leadership role non selman lo nivo kaptenn, me osi lo tou bann nivo - bann Enzenyer e bann dimoun ki fer navigasyon, ensidswit.

Mr Speaker, i annan sa issue por.  Devlopman nou por e maintain nou konpetitivite lo nivo enternasyonal e rezyonnal nou por, Por Victoria.  Ozordi dan nou pei, Sesel i kontinnyen annan sa leadership role lo nivo por lapes.  Nou pe transbord, nou pe - i annan apepre 300 mil tonn ton.  250 a 300 mil tonn, depandan lo lannen, toulezan ki pas atraver Por Victoria.  E sa i fer ki Por Victoria i annan sa leading role.  Sa leadership role.  Sa por nimero 1 lo nivo larezyon.  E resaman, bann Manm i ava note ki nou’n antre an en joint venture koman en Gouvernman, avek en Lakonpannyen ki apel Jakar, kot nou pe devlop en nouvo por.  En gran por lapes ki pou kapab anmenn plis ankor devlopman an term valer azoute lo nivo later, lo nivo bann fish processing activities.  Lo nivo bann aktivite maritim ki pou siport por lapes e siport bann lezot bato ki pe vin isi Sesel.  E sa i en lot pa anavan, an term devlopman nou por e maintain Sesel lo sa nivo konpetitivite ki nou’n koz lo la.  Anmenmtan, i annan plan pou nou expand por aktyel, nou por komersyal ver sid, pou kapab fer li pli gran e fer sir ki nou annan plis lespas pou bann aktivite komersyal lo nivo por.  E la ankor, Manm in koz lo sa kestyon monopoli, konpetitivite.  E mon ti a kontan adres sa osi, pou dir ki dan sa nouvo devlopman por ki nou pe fer avek Jakar, sa joint venture, i napa en monopoli an term bann lezot Lakonpannyen pou antre la.  I annan en nouvo Lakonpannyen ki pe ganny formen.  I apel IPHS. In fini ganny formen annefe, ki li i pou fer stevedoring lo sa nouvo por.  Alor, nou pou annan, dan lavenir, nou pou annan 3 Lakonpannyen ki pe fer bann aktivite stevedoring e sa i pou kontinnyen dan lavenir, fir e anmezir ki bann por i devlope, anmenmtan, an asiran ki i annan fairness dan bann aktivite komersyal e bann aktivite monopolistik i pa ganny fer par bann Lakonpannyen e ki nou reste dan sa loptik konpetitiv, konpare avek bann lezot por kot i annan bokou konpetisyon ozordi dan larezyon.

Mr Speaker, nou’n dir ki nou bezwen asire ki nou kontinnyen devlop nou bann striktir lo nivo nou Kad Legal e lo nivo nou bann fasilite ki nou annan dan nou pei.  Lo nivo Kad Legal, mon’n adres sa.  Mon’n dir ki lannen prosenn mon pou vin avek sa nouvo propozisyon Lalwa e anmenmtan, fir e anmezir ki nou ale, i annan bann lezot lamannman ki petet pou neseser, ki mon ava vin avek devan Lasanble Nasyonal ler i neseser pou nou fer li anatandan.  Me mon ti a kontan koz lo sa kestyon responsabilite ki nou’n dir ozordi lo nivo bann dese ki vin lo por akoz sa osi i form parti responsabilite legal an term disposal of hazardous waste, disposal of waste an zenerral, an term nou bann Konvansyon ki nou’n sinnyen.  E nou annan Mr Speaker, nou annan lo por en incinerator. Nou annan lo Airport, en incinerator. Sa 2 incinerator ti ganny finanse atraver en proze Linyon Eropeen, si mon rapel byen, an 2007.  I ti vin an operasyon enpe letan apre sa e i ti reste an operasyon pandan en kourt peryod letan.  Rezon prensipal ki in aret marse, in aret ganny servi se son kou ekonomik, son kou finansye pou run sa bann incinerator, akoz sa bann incinerator i bezwen ki ou kontinnyen fire li, ou kontinnyen run li lo en baz 24 lo 24.  Enn fwa ki ou’n start li up, ou bezwen kontinnyen fer li marse.  E son kou pour Lotorite Por e son kou pou SCAA ti bokou eleve.  E ler nou ti pe pas dan sa peryod difikilte ekonomik, kot ti annan problenm finansye, nou ti bezwen aret sa travay e rod lezot mwayen pou dispose sa bann waste sorti lo bann bato e sorti lo bann avyon.

Gouvernman resaman in debat sa issue lo nivo Cabinet e Cabinet in donn en direktiv ki nou bezwen refer sa bann incinerator marse.  Nou bezwen kapab dispose bann waste ki sorti lo bann bato e sorti lo bann avyon, an konformite avek nou bann norm lanvironnman, nou bann norm legal lokal e osi enternasyonal.  Alor, Lotorite Por avek Lotorite Laviasyon Sivil in ganny direktiv sorti kot mwan, pou vwar kimannyer nou kapab remet sa bann masin, sa bann incinerator azour e fer sir ki nou kapab prezan, fer zot fonksyonnen e vin an aplikasyon pou fer sa travay incineration.

Mr Speaker, zot in retourn ver mwan avek bann kou ki nou bezwen envestir pou moderniz sa bann incinerator.  Pou modifye zot avek bann lekipman retro fitting, pou fer sir ki nou kapab run zot a en fason ekonomik dan lavenir.  Sa bann kou i ase eleve.  Nou pe regard apepre ant 700 a R1 milyon pou remet sa bann incinerator azour, pour sak incinerator. E lenvestisman pou bezwen ganny fer accordingly, pou nou kapab fer sa e mon espere ki dan lavenir, byento nou pou kapab met sa bann masin azour e remet zot an fonksyonnman, pour nou kapab meet nou bann lobligasyon nasyonal e enternasyonal.

Mr Speaker, dernyen pwen ki mon anvi tous lo la se sekirite maritim.  Nou’n koz lo sa issue VMS. Nou’n koz dan Lasanble bomaten la, lo sa issue bann bato lapes par egzanp ki ziska ozordi pa pe kapab ouswa pa pe servi VMS dan bann diferan landrwa kot zot pe ale, ler zot pe al lapes.  E sa i en gro konsern non selman pou SMSA, pou Departman Transpor, me osi pou SFA akoz ler en bato i dan detres, i napa VMS, i vin en gro travay e kantite resours i ganny servi pou kapab locate sa bato.  E sa issue piratri, parey Onorab De Commarmond in fer resorti.  Sa issue piratri pankor terminen.  Nou bezwen touzour reste vizilan.  I ankor annan serten aktivite par bann pirat dan bann rezyon nor avek Sesel e nou bezwen asire ki tou nou bann dimoun.  Tou nou bann maren lo bann bato, zot annan sa metod kominikasyon radyo ansanm avek sa metod kominikasyon VMS pour zot bann bato, pou asire ki zot annan en mwayen pou alert bann lotorite ler zot an detres, si zot ganny atake, ouswa si i ariv bann aksidan, ouswa si bato limenm li i annan problenm.  E la mon’n demann SMSA, ansanm avek mon koleg Minis responsab pou Resours Natirel lo nivo SFA, pou nou fer en travay pou met bann kad legal neseser, pou asire ki tou bann bato.  Tou bann bato i ganny anrezistre e osi i annan lekipman VMS anplas, pou kapab asir zot sekirite maritim e sekirite tou bann dimoun ki abor sa bann bato.  Akoz propriyeter sa bato e sa skipper lo sa bato i annan sa responsabilite pou li asir sekirite tou son maren abor son bato.  I en lobligasyon sa.  E nou, nou bezwen fer sir ki sa i ganny met an aplikasyon pour ki nou sovgard lavi nou bann maren ki al travay lo lanmer, ki al travay tre dir parey nou bann Onorab in fer resorti dan sa Lasanble bomaten.

Mr Speaker, avek sa bann pwen ki mon’n fer resorti, mon ti a kontan remersye tou bann Manm pou zot kontribisyon ankor enn fwa e demann sipor pou sa Bill.  Mersi.

 

MR SPEAKER

Bon, lo merit zeneral Bill, nou ava pran en vot.  Tou bann ki anfaver?  Okenn ki kont?  Bon, nou ava ganny en formal Second Reading.

 

MADAM DIRECTOR

A Bill of an Act to amend the Merchant Shipping Act, Cap 127A.

 

MR SPEAKER

LGB, mon a ganny mwan en Mosyon pou nou sot Committee Stage.

 

HON MARIE-ANTOINETTE ROSE

Mr Speaker, anba Order 91(1), mon move ki nou sot Committee Stage.

 

MR SPEAKER

Okenn ki segonde?

 

HON CHARLES DE COMMARMOND

Segonde Mr Speaker.

 

MR SPEAKER

Nou pran en vot lo la.  Tou bann ki anfaver?  Okenn ki kont?  Motion for Third Reading.

 

HON MARIE-ANTOINETTE ROSE

Mr Speaker, anba Order 71(1), mon move ki nou lir sa Bill en Trwazyenm fwa.

 

MR SPEAKER

Okenn ki segonde?

 

HON CHARLES DE COMMARMOND

Motion seconded Mr Speaker, Sir.

 

MR SPEAKER

(Technical problem)

 

MADAM DIRECTOR

This Act may be cited as the Merchant Shipping Amendment Act 2014.

 

MR SPEAKER

Bon, Bill in pase e avek sa mon ava remersye Minis avek son delegasyon.  E ABC, nou pou zwenn 11.30 e Meeting i adjourn ziska Mardi prosen 9er bomaten.

 

(ADJOURNMENT)

Last Updated on Thursday, 09 October 2014 07:40