The National Assembly of Seychelles

  • Increase font size
  • Default font size
  • Decrease font size
Home

Tuesday 8th July, 2014

E-mail Print PDF

NATIONAL ASSEMBLY OF SEYCHELLES

Tuesday 8th July, 2014

The Assembly met at 9 am

National Anthem

Moment of Reflection

Mr Deputy Speaker in the Chair

 

MR DEPUTY SPEAKER

Bon bonzour tou Manm Onorab.  Bonzour Minis avek ou delegasyon.  Staff Lasanble Nasyonal e Staff SBC e tou manm piblik ki pe swiv nou la bomaten.

Ozordi pou vin reponn kestyon, nou annan Minis Christian Lionnet, Minis pour Litilizasyon Later avek Lakaz.  E san tarde, mon ava envit Onorab Kevin Vidot pou kestyon 77.

 

HON KEVIN VIDOT

Mersi.  Bonzour Mr Deputy Speaker.  Bonzour Minis ek ou delegasyon e tou dimoun ki alekout.

Eski Minister i annan lentansyon revwar sa Polisi konsernan maintain nivo density, sirtou dan bann distrik kot later i limite e topografi eleve parey La Riviere Anglaise?  Mersi.

 

MINISTER CHRISTIAN LIONNET

Bonzour Mr Deputy Speaker.  Bonzour tou Manm Onorab.  Bonzour tou bann telespektater ki alekout.

Mr Deputy, pou reponn kestyon Onorab, wi, mon Minister e pli spesifikman, Lotorite Planning, i deza pe revwar Polisi konsernan nivo dansite.  Letan nou koz lo nivo dansite, i enportan pou nou apresye ki i form parti e i labaz en plan litilizasyon later, ler sa i ganny prepare.  En plan litilizasyon later i en plan ki ganny konsevwar baze lo litilizasyon later aktyel lo teren, bezwen pei e popilasyon en kominote, ki enkli bezwen sosyal e ekonomik.  Kondisyon e kapasite bann lenfrastriktir e lezot.  Son bi se pou annan en framework pou nobou promot devlopman soutenab.  En tel plan i bokou pli enportan dan en pei pti, kot resours later i limite.  Malgre ki son konsepsyon dan en tel pei parey pou nou, i bokou pli konplike, i en zouti enportan pou asir nou devlopman soutenab.

Mr Deputy, sa konponan dansite i enn ki’n touzour enpe kontrovers avek diferan lenterpretasyon, divers lopinnyon e menm fwa, mal antandi.  Pe enport, sa eleman i reste touzour en konsiderasyon enportan ki devret ganny pran an kont ler ou lans en legzersis planifikasyon later.

Anzeneral, klasifikasyon dansite dan en landrwa partikilye i pran an konsiderasyon plizyer fakter.  Lagrandisman e distribisyon popilasyon, topografi teren, zistans avek bann feature natirel tel ki larivyer ek lanmar, lenfrastriktir asosye tel ki drenaz, desarz e lezot.

Dan konteks nou pei, Lotorite Planning i sey son mye pou adopte en nivo dansite, tout an prenan kont karakteristik nou devlopman aktyel, kapasite nou lenfrastriktir aktyel e osi bezwen nou popilasyon.  I enportan pou note ki sa enn legzersis pa’n fasil, me lobzektif Lotorite Planning se pou ariv a en balans ekitab ant abilite pou en dimoun ki annan en teren pou zouir e devlop son propriyete e lezot konsern parey abilite pou zer bann desarz.

Mr Deputy, i pou touzour bezwen annan en lalinny.  Pou asir en devlopman soutenab, nou bezwen annan en Polisi anplas e dezormen, nivo dansite pou bezwen form parti sa bann regilasyon.  Parfwa, nou bliy vit me annou retourn anviron 18 mwan pase kot nou bann kominote dan rezyon les Mahe ti sibir severman, an fas avek dezas Feleng.  Mon asire ki sa pti moman refleksyon, i anmenn bokou kosmar pou nou tou, me pli prensipalman, pou bann fanmiy afekte par sa dezas.  Mon demann Bondye pou kontinnyen donn zot lafors, avek bi ki zot lavi i a retourn dan tout normalite.  Nou pa pou zanmen konpletman elimin risk dezas me nou kapab ansanm, enplimant bann Polisi ki pou minimiz sa risk.  Tou morso teren ki nou konstrir lo la, swa avek en twa ou en bout beton i ogmant lakantite delo sirfas ki pou bezwen trouv son semen pase.  Dan labsans bann lenfrastriktir apropriye, sa delo i kapab koz gro danze parey dan ka Feleng, ou worse, koz lanmor.

Mr Deputy, i malere ozordi ki limaz Lotorite Planning i enn ki negativ, kot dimoun i vwar sa Lotorite koman en blokaz devlopman.  Pour mwan, pa sa rol Lotorite Planning. Lotorite Planning i la pou asir devlopman soutenab.  Kot en endividi pa kapab konstrir lo en teren, Lotorite Planning son rol se pou travay ek sa dimoun e vwar kimannyer toulede parti i kapab atenn zot lobzetiv.  En dimoun ki annan en loportinite pou batir en lakaz adisyonnel lo son later, ouswa later son paran, i devret kapab, avek gidans Lotorite Planning, eksplor tou opsyon posib pour ki sa i a kapab arive, tout an respektan bann regilasyon.  Si dansite i en issue, Lotorite Planning i kapab advise sa dimoun pou konstrir vertikal.  I kapab annan lezot fakter ki anpes sa devlopman, me mon pwen, se ki Lotorite Planning i bezwen travay ek sa dimoun e donn li en opsyon.  Selman apre ki tou opsyon i ganny eksplore e en tel devlopman pa posib ki Lotorite Planning a gid sa kliyan ver lezot brans mon Minister ou lezot Lazans Gouvernman pou vwar kimannyer sa dimoun i a kapab ganny asiste atraver bann prosedir ki anplas.

Board Lotorite Planning i konsyan ki sak lakaz ki ganny konstrir, i en lakaz anplis dan stok lakaz Sesel.  Board Lotorite Planning i konsyan ki sak nouvo biznes ki komanse, i en pa annavan pou plis prosperite dan nou pei.  Lotorite Planning i en servis piblik e i bezwen kontinnyelman alekout son kliyan.  Se pour sa rezon ki tar lannen pase, Board Lotorite Planning ti pran desizyon pou fer en revi lo poursantaz dansite pou tou bann klasifikasyon.  Sa travay in fek fini ganny konplete e bann nouvo poursantaz i ava ganny anonse tre byento.

Mr Deputy, sa revi pe ganny fer pa selman pou distrik La Riviere Anglaise, me pou sa 23 distrik ki Plan Litilizasyon Later pa ankor vin en lenstriman legal.  Mersi Mr Deputy.

 

MR DEPUTY SPEAKER

Kestyon siplemanter, Onorab Vidot.

 

HON KEVIN VIDOT

Yes. Mersi Mr Deputy Speaker.  An vi lanons Prezidan Michel alokazyon Lafet Nasyonal le 18 Zen pou ogmant Housing Loan HFC pou 400 mil e 750 mil pou Second Housing Loan e Housing Loan respektivman, ki nou ekspekte i atrakte bokou dimoun pou vin pran en loan pou devlop zot teren e amelyor zot lavi, vi ki lalis e letan espere pou en lakaz Gouvernman i tre gran.  Ki ou Minister pe fer pou accommodate sa gran demann pou later e osi laplikasyon Planning dan sa tel sityasyon?  E osi, an vi ki Planning i devret travay avek bann dimoun, ki ou Minister pe fer pou asire ki sa travay an konzwent avek bann piblik i arive?  Mersi bokou.

 

MINISTER CHRISTIAN LIONNET

Mr Deputy, mon Minister i welcome lanons Prezidan Michel pou bann logmantasyon ki in anonse dan bann diferan Scheme lakaz.  Nou konnen poudir demann later i toultan en demann ki o e nou pa pou zanmen kapab satisfer tou demann.  So, sa increase i ava posib pou en dimoun kapab si ou oule zouir, oubyen konstrir en keksoz lo later fanmiy oubyen later.

Parey mon’n dir, sak lakaz ki’n azoute lo en morso teren, i en stok lakaz anplis dan stok lakaz Sesel.  R750 mil ozordi pou en Second Housing Loan i ava ede ki en dimoun osi e osi logmantasyon dan Second Housing Loan, i ava ede osi dimoun pou osi pou kapab konstrir bann konstriksyon vertikal, ki dan lepase, petet avek sa limitasyon caping lo loan HFC, i pa’n vreman touzour en posibilite.  Mersi Mr Speaker.

 

MR DEPUTY SPEAKER

Onorab Houareau.

 

HON HERBERT HOUAREAU

Bonzour Mr Deputy.  Bonzour tou dimoun ki alekout.  Bonzour Minis ek ou lekip.  Eski Minis i kapab enform sa Lasanble, ki kriter son Minister i servi pou klas en distrik Lavil dapre son density e osi met serten later Lavil dan rezerv e pa kapab servi pou konstrir?  Mersi.

 

MINISTER CHRISTIAN LIONNET

Mr Deputy, parey mon’n eksplike dan mon lentervansyon, nivo dansite i pran an konsiderasyon plizyer fakter.  Fakter lenfrastriktir ki annan aktyel dan sa rezyon, par egzanp, en landrwa ki nou vwar i annan labsans drenaz apropriye pou deal avek delo, nou pa kapab kontinnyen konstrir bokou lakaz akoz sak lakaz ki nou fer, nou increase kantite delo ki bezwen rod son semen pou li ale.  So, Planning i pran tousala an konsiderasyon.  I pran an konsiderasyon bann fakter topografi, fakter kalite later pou li kapab zer bann sistenm desarz.  Tousala i ganny pran an konsiderasyon e Planning Authority i pronons son lekor lo en dansite ki i santi i kapab ankouraz en devlopman soutenab.  I pa vedir, anmenmtan ki sityasyon lo teren i amelyore, ki sa bann dansite pa pou ganny rekonsidere.  Me selman sa i en travay konzwent ki nou bezwen annan bon planifikasyon avek tou bann Lazans konsernen Gouvernman.

Lo kote bann later rezerv.  Sa i annan plizyer fakter.  Par egzanp, i annan teren ki nou konnen poudir son topografi i telman apik, ki i pa kapab ganny devlope.  I annan bann fakter lanvironnman.  Par egzanp bann landrwa ki annan bann lespes ki bezwen ganny proteze.  Tousala i ganny pran an konsiderasyon.  I pa en legzersis ki ganny fer selman par Lotorite Planning. I en legzersis konsilte.  Se pour sa rezon ki Planning i al dan distrik, i konsilte avek tou dimoun.  I envit tou zabitan distrik.  I envit MNA, i envit DA pou vin devan e diskit en Plan Litilizasyon Later.  I en prosesis konsiltasyon e letan nou tourn dan distrik pou refer sa legzersis, mon swete ki bokou plis dimoun i vin attend akoz sa i annan gran reperkisyon lo propriyete en endividi.

So, parey mon’n dir Mr Deputy, i en desizyon konsiltativ ki pran lefe en kantite fakter ki annan lo teren.  Mersi Mr Deputy.

 

MR DEPUTY SPEAKER

Onorab Jeannevol.

 

HON BEGITTA JEANNEVOL

Mersi Mr Deputy.  Bonzour Minis.  Bonzour tou dimoun ki alekout.  Minis, dan ou larepons, ou’n koz lo enn bann rezon akoz bann plan pa ganny aprouve, ki petet napa lespas pou delo ale.  Mont Fleuri osi i enn bann distrik kot dansite i o, me anmenmtan, nou annan larivyer e bokou sours delo.  Eski sa i kapab ganny konsidere dan konstriksyon vertikal ou si non, ki lefe advers ki sa i kapab annan?  Mersi.

 

MINISTER CHRISTIAN LIONNET

Mr Deputy, mon repete ki rol Lotorite Planning se pou travay avek en endividi, pou eksplor tou opsyon posib, pou fer ki son proze i kapab materyalize e attain son lobzektif.  I annan plizyer fakter ki bezwen ganny konsidere me sa ki mon swete ki sa travay i kontinnyen e en dimoun ki anvi fer en devlopman, i kapab ganny gide dan bon direksyon.  Mersi Mr Deputy.

 

MR DEPUTY SPEAKER

Onorab Edmond.

 

HON ROMA EDMOND

Mr Deputy, an vi repons Minis, kot serten distrik i vreman limite apropo later Leta e kot laplikasyon pou lakaz i bokou.  Eski Minis i kapab eksplik sa Lasanble ki Polisi, ouswa mekanizm ki son Minister i servi ler i priyoritiz lekel distrik ki pou benefisye anver devlopman lakaz atraver bann don, ki son Minister, ouswa Gouvernman i resevwar pou bann proze lakaz?  Mersi.

 

MINISTER CHRISTIAN LIONNET

Mr Deputy, parey Onorab i okouran, i annan plizyer Polisi ki nou’n met anplas sa lannen, pou nou adres en pti pe demann lakaz, ki nou konnen i varye par distrik.  Par egzanp, Ile Perseverance kot alokasyon pour sa lannen diferan pou sak distrik.  Distrik ki annan plis demann, ki annan plis dimoun ki pe kontribye lo Home Saving Scheme, in benefisye bokou plis ki bann distrik ki annan mwens demann e mwens dimoun pe kontribye lo Home Saving Scheme.

Nou osi sey vwar letan nou pe allocate bann later dan bann distrik ki annan plis later, ki nou allocate serten morso later avek bann distrik ki dezormen, akoz zot topografi, zot kondisyon teren, zot napa loportinite pou ofer zot dimoun.

Dan priyoritizasyon proze osi, nou regard en pti pe bann rezyon ki nou santi ki pa neseserman zot bezwen pe ganny adrese par bann proze Nasyonal e nou diriz bann grant, bann don, bann finansman ki nou gannyen, anver sa distrik.  Plan mon Minister pou bann lannen ki vini, se met plis lanfaz avek bann proze distrik dan bann kominote pou adres sa bann bezwen.  Mersi Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Bonzour Minis ek ou delegasyon.  Bonzour tou Manm Koleg Onorab e tou bann ki alekout.

An vi larepons Minis e rol Planning, eski Minis i kapab dir ek sa Lasanble, ki plan son Minister pou ogmant kapasite e lefikasite Lotorite Planning pou koup lo lakantite konplent ki nou gannyen avek piblik.

E dezyenmman, an relasyon avek sa sityasyon desarz, eski Minis i kapab dir sa Lasanble, ki son Minister pe fer, an kolaborasyon ek PUC pou garanti ki distrik La Riviere Anglaise, tou bann dimoun dan distrik La Riviere Anglaise, i ganny konekte avek desarz santral?  Mersi Mr Deputy.

 

MR DEPUTY SPEAKER

Out of Order, dezyenm.  Minis, ou kapab reponn premye morso.

 

MINISTER CHRISTIAN LIONNET

Mr Deputy, pou reponn dezyenm parti kestyon Onorab, sa issue koneksyon sewage santral pou bann lakaz, i en kestyon ki tonm anba portfolio Minister Lanvironnman…

 

(Interruption)

 

MR DEPUTY SPEAKER

Non, non, non.  Minister, mon’n donn en Ruling.  Son dezyenm parti kestyon sewage i Out of Order. Son premye parti, ou kapab reponn.

MINISTER CHRISTIAN LIONNET

Mr Deputy, premye parti size kestyon Onorab Lebon…

 

(Interruption)

 

MR DEPUTY SPEAKER

Ou kapab redemann ou premye parti kestyon Onorab?  Wi.

 

HON DAVID PIERRE

Mersi Mr Deputy.  Mr Deputy, mon’n dir avek Minis, an vi rol Planning, ki plan son Minister pou ogmant kapasite e lefikasite Lotorite Planning pou koup lakantite konplent ki ganny fer par Manm piblik?  Mersi Mr Deputy.

 

MR DEPUTY SPEAKER

Mon vwar ki sa kestyon pe ganny kouver anba kestyon 84 so, nou a proceed kestyon 78, Onorab Ghislain.

 

HON CHANTAL GHISLAIN

Mersi Mr Deputy.  Bonzour tou dimoun.  Swivan Capacity Study pou La Digue, ti annan kestyon e konsern ki ti leve.  Eski Minis pour Litilizasyon Later ek Labita i kapab enform sa Lasanble, ki son Minister pe fer pou enplimant sa bann konsern?  Mersi.

MINISTER CHRISTIAN LIONNET

Mersi Mr Deputy.  Mr Deputy, Ka Capacity Study pour La Digue ti ganny komisyonnen konzwentman par mon Minister, Minister Litilizasyon Later ek Lakaz, Minister Lanvironnman ek Lenerzi, Minister Kiltir e Touris e Board Devlopman La Digue, anlinny avek konsern lo bann diferan aktivite ekonomik, presyon kontinnyel lo lanvironnman natirel e lo bann resours e en degradasyon dan lidantite inik sa pti bizou, nou pei.

An zeneral, ti annan en santiman par mazorite Seselwa e viziter e partikilyerman bann Digwa, ki La Digue ti pe perdi son charme.  Sa letid ti ganny finanse par the Global Environmental Fund, GEF e ganny kordinen par UNDP.  Ti ganny enplimante par 2 Konsiltan, Ms Irish Richter and Mrs Marquise David ki annan leksperyans Lendistri Touris, Lekonomi e Lasyans Lanvironnman, enkli zesyon later.  Letid ti port plis latansyon lo Sekter Touris, sa fakter ki pe koz plis lenpakt lo devlopman La Digue.  En tel letid, i donn en apresi sityasyon aktyel.  Mon krwar ki i enportan pou mwan sit enn de pwen for dan sa letid.

Letid ti fer nou rapel ki sours reveni pou Digwa dan lepase, ti prensipalman Lendistri Lapes ek Lagrikiltir.  Ozordi, aktivite ekonomik lo La Digue i prensipalman relye avek Sekter Touris.  Ant lannen 2000 e 2008, kantite lili dan sa Lendistri ti ogmante sorti 382 pou vin 548.  En logmantasyon 166 lili pandan en peryod 8an.  Pandan 2008 ziska lafen 2012, kantite lili lo La Digue ti’n ogmante pou sorti 548 pou vin 1,076.  En logmantasyon 528 lili, preski 100 poursan logmantasyon dan en peryod 4an.  Nou ava rapel, ki sa ti dan en peryod Reform Ekonomik e i en testaman kler bann Polisi sa Gouvernman, pou asire ki nou popilasyon pa santi otan lefe sa kriz ekonomik.  I fodre note ki sa letid in etabli ki pandan sa peryod, 2 tyer sa bann logmantasyon i an rezilta bann pti letablisman 10, ou mwens lasanm.  Malgre sa, letid ti osi fer sorti ki rate occupancy ti desann a en nivo anviron 60 poursan pandan lannen 2012.

Bann viziter lo La Digue, ti zeneralman eksprim konsern e dezapwentman, lo rapidite devlopman e kantite konstriksyon lo zil.  Zot ti egalman eksprim zot lenkyetid lo bann larsitektir modern ki pa vreman fit dan karakteristik sa zil e lo kantite travayer etranze ki pe travay lo zil.  I fodre osi note, ki letid ti fer resorti fortman, ki ogmantasyon dan lakantite stok lili lo La Digue, ti pe kree serten lenpak negativ lo bann Digwa, sirtou an sa ki konsern supply manze, delo ek elektrisite e osi zesyon salte.  An gro, letid ti fer resorti serten konsern, ki si i pa ganny adrese pou anmenn La Digue ver en destinasyon kot i perdi son lidantite.

Mr Deputy, swivan bann lobzervasyon, Konsiltan ti fer en seri rekomandasyon konm swivan;

1.   Anterm zesyon later, i ti rekomande ki bann spesifikasyon propoze anba Draft Land Use Plan pou La Digue e osi Special Guidelines pou La Digue, i ganny obzerve.

2.  Polisi 50 met contour i kontinnyelman ganny obzerve.

3.  Proteksyon bann lespes an risk disparisyon i bezwen ganny garanti, avek latansyon partikilye pou zwazo Vev.

Lo kote Lendistri Tourizm, i ti rekomandasyon bann konsiltan pou anpes okenn nouvo devlopman dan sa Sekter lo La Digue, pou en peryod 3an.  Savedir, ziska lafen lannen 2015 e rekomande ki sityasyon i ganny re-evalye apre sa peryod.  Sa, pa ti pou enkli bann devlopman dan sa Sekter ki ti’n deza ganny laprouvasyon.

Mr Deputy Speaker, sa bann konsiltasyon ti size en prezantasyon avek bann Digwa e plizoumwen, sa ti reflekte santiman bann Digwa e bann operater touris lo La Digue.  Swivan sa, Konsiltan ti met son rekomandasyon devan en Konsey Minis.  Konsey Minis ti endorse mazorite rekomandasyon, sof sa enn ki ti pe propoz en ban konplet lo devlopman touristik lo La Digue ziska lafen 2015.

Gouvernman ti agree, ki ti annan en nesesite pou kontrol lavites devlopman lo La Digue, me ki pa ti neseserman en bon keksoz pou anpes devlopman ekonomik dan son totalite.  Alor, Gouvernman ti plito konsider e aprouv rekomandasyon alternativ pou permet selman bann pti devlopman 1 a 5 lasanm.  Rezondet par deryer sa, se ki bann tel pti devlopman pa egzers sitan presyon lo bann resours natirel La Digue e osi pa nesesit gran demann lo lanplwa, espesyalman lo sa ki konsern nesesite travayer etranze lo zil e demann pou lakaz pou sa bann travayer etranze.

Konsey Minis ti osi rekomande ki en seri Polisi ek mezir i bezwen ganny konsidere konsernan;

1.  Bann letablisman touristik.

2.  Bann day visitors.

3.  Pasaze ki sorti lo bann cruise ships avek bi pou minimiz risk ki asosye avek tourism lamas.

4.  Amelyorasyon fasilite e kalite bann pti guest house avek bi pou ganny pli bon reveni.

5.  Prezervasyon arsitektir Kreol dan bann developman fitir e

6.  Nesesite pou anmenn plis diversite dan levantay ekonomik La Digue.

Konsey Minis, ti rekomande ki sak Minister i revwar bann mezir neseser ki tonm anba zot Portfolio e konsevwar bann Polisi ki ava realiz lobzektif prensipal.  Setadir, pou promouvwar en devlopman soutenab pou La Digue, tout an prenan kont swe bann Digwa e zot lepanouisman ekonomik.

Mr Deputy Speaker, mon okouran ki bokou sa bann Polisi i deza anplas e pe ede pou redres sityasyon lo La Digue e prezerv son karakteristik.  Sa i enkli nouvo Polisi lo transpor, Special Building Guidelines pour La Digue, 50 met Contour Policy e osi limitasyon lo nonm lasanm dan Sekter Tourizm.

Privatizasyon serten konponan L’Union Estate, espesyalman kot later pou lagrikiltir i konsernen, i osi form parti lenplimantasyon sa plan, prensipalman dan demars pou diversifye lekonomi La Digue.  Mersi Mr Deputy.

 

MR DEPUTY SPEAKER

Kestyon Siplemanter, Onorab Ghislain.

 

HON CHANTAL GHISLAIN

Mersi Mr Deputy.  Mr Deputy, an vi repons Minis, e an vi tou sa bann konsern, e le fe ki La Digue nou konnen son aktivite ekonomik i plizoumwen Tourizm, eski Minis i kapab dir avek sa Lasanble, si i annan posibilite ki nou pe vwar ankor konstriksyon en lot pli gran Lotel La Digue?

Apre osi, eski Minis i kapab asir avek sa Lasanble, ki tou sa bann konsern, lefet ki nou aktivite ekonomik i relye avek Tourizm, ki le fe ki tou bann Digwa i kapab ganny en fair chance, en fair share dan sa market, pour ki lezot devloper etranze, ou menm bann lezot ki annan pli gran biznes, pa pe pran tou.  Mersi.

 

MINISTER CHRISTIAN LIONNET

Mr Deputy, Polisi aktyel se ki nou pou allow zis bann pti letablisman 1 a 5 lasanm.  So, mon pa okouran okenn gran proze ki dan pipeline.  Rekomandasyon Konsiltan se apre 2015, nou pou re-fer en revi sityasyon e Gouvernman i a deside kimannyer nou pou bouz alavan.

Lo kote asire ki bann Digwa i partisipe, mon krwar i Polisi Gouvernman aktyel ki bann lotel ant 1 a 15 lasanm, i rezerve pour Seselwa.  So, wi, Digwa i annan loportinite pou zot kapab konstrir e kontinnyen devlop Sekter Tourizm.

Mon oule remind Lasanble ki 2 tyer logmantasyon stok lili lo La Digue pandan sa dernyen 4an, i sorti kot bann pti letablisman.  Bokou par sistenm fast-track.  Zot a rapel ki Gouvernman ti met en sistenm kot bann dimoun ki annan en landrwa ki apropriye pou resevwar en touris, Gouvernman ti met en sistenm anplas pou donn zot sa loportinite pou kapab fer sa.  E nou ankouraze sa, akoz sa touris i vin Sesel, i kapab eksperyans sa vre kreolite dan tou son lanpler.  So, wi, Digwa, Gouvernman i annan bann Polisi anplas pou ankouraz zot pou pran an men sa Sekter.  Mersi Mr Deputy.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Bonzour tou dimoun ki alekout.  Mr Deputy, mon ti a kontan demann Minis, etan donnen ki sa letid pa’n ganny fer antyerman par Gouvernman, eski Gouvernman alors pe mazinen fer en tel letid dan tou bann rezyon, osi lo Mahe ?  E ki pozisyon son Minister an sa ki konsern bann rezyon pli devlope lo Mahe.  Par egzanp, Victoria, Providence, Beau Vallon ek Anse Royale.  Mersi.

 

 

 

MINISTER CHRISTIAN LIONNET

Mersi Mr Deputy.  Wi, sa letid mon krwar i en zouti ki pou ed nou formil bann Polisi pou nou kapab al alavan, byen alavan.  Nou’n deza komisyonn en study pou rezyon Nor, ki enkli distrik Glacis, Beau Vallon, Belombre.  Sa study in ganny finalize e byento, i pou ganny prezante inisyalman devan Konsey Minis avan ki nou retourn a lakominote pou nou relye findings sa study.

Gouvernman osi in pran desizyon ki nou bezwen annan en kind Capacity Study pou antye nou bann zil.  Prensipalman bann zil ki devlope parey Mahe e Praslin.  Rezon pour sa, se ki i annan en limit kwa ki nou kapab as en pti pei ki nou kapab soutenir.  Nou bezwen annan en capping lo kantite touris ki antre dan pei par egzanp.  Sak touris ki vini, i servi nou delo, i servi elektrisite, i anmenn salte.  I annan en nivo ki nou pti pei i kapab soutenir.  E i enportan ki nou konnen sa akoz tou bann devlopman ki arive, par egzanp, devlopman dan domenn Lotel, si nou annan tro bokou lasanm Lotel, nou pou vwar ki yield, ki bann Letablisman i gannyen, i pa pou ase eleve pou fer en proze viab.  So, Gouvernman in donn manda Minister Tourizm pou komisyonn en study pou etablir kind capacity pou nou bann zil annantye.  Mon krwar sa i ava ed nou en kantite pou formil bann plan devlopman alavenir.  Mersi Mr Deputy.

 

MR DEPUTY SPEAKER

Kestyon 79, Onorab Ghislain.

 

HON CHANTAL GHISLAIN

Mersi Mr Deputy.  Eski Minis pour Litilizasyon Later ek Labita, i kapab dir ek sa Lasanble, ki zistans son Minister in arive avek sa proze met bann later Praslin ek La Digue ki ti lo vye rezis, pou met lo nouvo rezis.  Mersi.

 

MINISTER CHRISTIAN LIONNET

Mersi Mr Deputy.  Mr Deputy, pou rezon bidzeter ek mank resours imen, sa proze pou met later Praslin ek La Digue lo nouvo rezis, pa’n kapab demare sa lannen parey nou ti’n prevwar.  Me nou swete ki pandan lannen ki devan nou, resours a kapab ganny mete a nou dispozisyon pou komans sa proze e enn fwa pour tou, met mazorite later Sesel, lo nouvo rezis.

I fodre note ki proze adjudication later parey nou dir dan son term teknik, ti ganny antreprann lo Mahe dan son totalite pandan lannen 1983 a 1991.  Sa ti konpri partisipasyon 31 travayer dan Sekter Survey.  Rezon prensipal sa longer letan, i relye prensipalman avek konpleksite sa legzersis, ki enkli osi dezakor lo balizaz ek lekel ki vreman propriyeter en morso later.

Sa proze an total, lo Praslin ek La Digue, pou kout Gouvernman apepre R8 milyon pou en dirasyon 4 a 5an.  3an pou fer field work e larestan pou finaliz prosedir ladministrasyon e legal.  Annatandan, Seksyon Survey pe kontinnyen mont lo Praslin ek La Digue toule 3 mwan pou survey bann later ki lo lalis demann e bann surveyor prive pe osi adres bann demann prive.

La mon ti a oule lans lapel avek bann dimoun lo Praslin ek La Digue, ki pe arpant zot later lo en baz prive, pou asire ki zot Arpanter i fer prosedir pou met zot later lo nouvo rezis, apre ki survey in ganny aprouve.  Bann dimoun ki zot later in fini arpante, i neseser osi ki zot fer prosedir pou anrezistre li lo nouvo rezis.  Mersi Mr Deputy.

 

MR DEPUTY SPEAKER

Kestyon siplemanter Onorab Ghislain.

 

HON CHANTAL GHISLAIN

Mersi Mr Deputy.  Mr Deputy, Minis in fer referans avek mank Bidze pou enplimant sa proze.  Eski Minis i kapab enform sa Lasanble, le fe ki dan Bidze 2014 ti annan en sonm larzan ki ti’n mete pou demar sa proze sa lannen, eski Minis i kapab dir avek sa Lasanble ki pe arive avek sa larzan silvouple?  Mersi.

 

MINISTER CHRISTIAN LIONNET.

Mr Deputy, dapre lenformasyon ki mon annan, napa alokasyon Bidze ki’n ganny fer pou sa konponan proze.  Mersi Mr Deputy.

 

MR DEPUTY SPEAKER

Onorab Esther.

 

HON NATASHA ESTHER

Mersi Mr Deputy Speaker.  Deputy Speaker, eski Minis i kapab enform sa Lasanble, si son Minister in konsider fer sa proze par faz, an vi ki ti annan larzan dan Bidze lannen pase.  Mersi.

 

 

 

MINISTER CHRISTIAN LIONNET

Mr Deputy Speaker, mon Minister malgre nou napa Bidze pou fer sa proze, i annan travay entern ki nou’n deza komanse pou nou kapab prepar bann travay pou nou bouz alavan.  Par egzanp, i annan en demann ki nou’n fer avek Minister Finans pou nou kapab ganny en Konsiltan dan Departman Survey pou kapab komans prepar bann formalite.  E mon’n ganny dir avek Minister Finans, ki sa demann pou abouti avek propozisyon ki i pou met devan Lasanble dan Bidze Siplemanter.  Mersi Mr Deputy.

 

MR DEPUTY SPEAKER

Onorab Volcere.

 

HON MARC VOLCERE

Mersi Mr Deputy Speaker.  Bonzour Minis ek ou delegasyon.  Mr Deputy Speaker, mon ti a kontan demann Minis ki poursantaz later lo Praslin aktyelman, ki ankor lo vye rezis e dapre zot plan travay konbyen letan i pou pran zot pou kapab met later lo Praslin, transfer anba nouvo rezis.  Mersi.

 

 

 

MINISTER CHRISTIAN LIONNET

Mr Deputy, lo Praslin i annan 3,800 ektar, 3,163 ektar in fini ganny survey e 30 poursan ladan in fini ganny met lo nouvo Rezis Later.  Larestan bann prosedir anrezistreman ki swiv pankor ganny neseserman konplete.  Nou ekspekte ki sa proze parey mon’n dir Onorab, i pou pran 3 a 5an.  Mersi Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, eski Minis i kapab dir avek sa Lasanble, konbyen, anterm konbyen larzan i pou kout son Minister pou antreprann sa proze lo Praslin e La Digue dan son totalite ?  E eski Minis i kapab donn nou en garanti ki, sa enn la fwa si, sa larzan pou ganny mete, pou ganny aprovize dan Bidze pou lannen 2015.  Mersi Mr Deputy.

 

MINISTER CHRISTIAN LIONNET

Mr Deputy, parey mon’n dir dan mon lentervansyon orizinal, sa proze pou kout anviron R8 milyon.  Mon pa kapab donn en garanti ki larzan pou ganny aprovize.  Nou pou senpleman kapab met en demann avek Minister Finans e mon swete ki zot bann Onorab osi, zot kapab siport sa demann e ki en fason, sa proze i a kapab materyalize.  Mersi Mr Deputy.

 

MR DEPUTY SPEAKER

Kestyon 80, Onorab Dugasse.

 

HON MELVAL DUGASSE

Mersi Mr Deputy.  Bonzour Minis, bonzour tou dimoun alekout.  An vi logmantasyon dan popilasyon e lakantite demann pou lakaz, eski Minis i kapab enform sa Lasanble, si Gouvernman i annan lentansyon dan lavenir, fer okenn proze lakaz dan distrik Anse Etoile?  Mersi Mr Deputy.

MINISTER CHRISTIAN LIONNET

Mr Deputy Speaker, wi, Gouvernman i annan lentansyon dan lavenir, pou fer proze lakaz dan distrik Anse Etoile.  Mon Minister, in deza idantifye e rezerv 3 morso teren dan sa distrik, pou en devlopman o dansite ki ava deservi zabitan Anse Etoile e osi lezot aplikan lo lalis lakaz.

Sa 3 teren i konm swivan, Parcel H4238 La Gogue avek en siperfisi 27, 349 met kare.  Parcel H6968 La Gogue 3,907 met kare.  Parcel H10051 La Gogue avek en siperfisi 22, 508 met kare.  Poulemoman, Minister pa ankor finaliz plan detaye pou sa bann proze e nou ankor annan konstrent finansyel ki fer ki devlopman sa bann sit pa ankor determinen.

Apard sa bann sit, distrik Anse Etoile pou osi benefisye avek devlopman Ile Aurore, ki li dan son plan inisyal i ofer anviron 57 poursan teren lo sa zil pou litilizasyon later.  Sa i reprezant anviron 364 mil met kare.  Parmi, pou annan en trantenn kare later pou konstriksyon bann blok flat ki ekspekte donn nou plis ki 200 unit lakaz.  Sa bann proze blok flat lo Ile Aurore, i a kapab ganny antreprann serten par sekter prive e serten par bann Lazans Gouvernman e zot osi zot ava ofer loportinite pou bann zabitan Anse Etoile.  Mersi Mr Deputy.

MR DEPUTY SPEAKER

Kestyon siplemanter, Onorab Dugasse.

HON MELVAL DUGASSE

Mersi Mr Deputy, wi.  Eski Minis i kapab dir ek sa Lasanble, konbyen dimoun Anse Etoile ki aktyelman pe esper lakaz?  E osi konbyen dimoun ki pe pey zot Scheme ?  E ki mesaz i kapab pas avek sa bann dimoun ki pa pe pey zot Scheme.  Mersi Mr Deputy.

MINISTER CHRISTIAN LIONNET

Mr Deputy Speaker, ozordi i annan 156 dimoun lo laplikasyon lakaz Anse Etoile e i annan 156 dimoun ki pe pey zot Scheme.  Polisi Gouvernman i kler.  Si ou napa kont HSS e ou pa pe peye, ou napa en aplikasyon lakaz.  So, mon mesaz a tou dimoun, ki annan bezwen pou en lakaz, se pran zot responsabilite anver enn zot priyorite lavi.  Vin kot Minister, eksprim zot lentere pou zot antre lo Scheme e komans fer zot kontribisyon en mannyer ki dan 1an, zot ava eligible pou ganny konsidere pou ganny en lakaz avek Gouvernman.  Mersi Mr Deputy.

MR DEPUTY SPEAKER

Kestyon 81, Onorab Dugasse.

HON MELVAL DUGASSE

Mersi Mr Deputy.  An vi ki semen Hangard ti ganny konstrir par Minister Later ek Lakaz pou deservi en proze land bank e ki semen i dan en move kondisyon, eski Minis pour Later ek Lakaz ansanm ek lezot Lazans, i annan lentansyon fer okenn renovasyon irzan ek drenaz apropriye lo sa semen?  Mersi Mr Deputy.

MINISTER CHRISTIAN LIONNET

Mr Deputy, rol Minister Litilizasyon Later ek Lakaz an sa ki konsern bann proze semen, i reste koman en Lazans Gouvernman ki enplimant proze.  Setadir, ler en Estate i ganny konsevwar e lenfrastriktir i ganny konstrir pou en premye fwa, Minister Litilizasyon Later ek Lakaz i annan manda pou fer design proze.  Rod kontrakter pou antreprann sa devlopman e finans sa devlopman lenfrastriktir. Me apre ki proze in konplete, sa bann lenfrastriktir ki reste bann lenfrastriktir piblik, i transfer anba responsabilite bann diferan Lazans respektiv ki annan manda regilatwar pou okip e zer sa bann fasilite.  Setadir, semen i retourn anba responsabilite SLTA. Lenfrastriktir delo ek elektrik i retourn anba responsabilite PUC.  Bann drenaz e rigol i anba responsabilite Depatyman Lanvironnman e Lazans ki netway sa bann tel fasilite.

Semen land bank Hangard, ti reprezant anviron 1.5 kilomet semen, ti ganny konstrir an 2002 a 2007.  An rezilta serten difikilite later ki pa apartenir a Gouvernman dan serten landrwa kot desarz delo lapli i natirelman tonbe, selman 1 kilomet drenaz ti ganny konstrir.  Sa i kouver an prensipalman bann bout anler sa semen.

Ansemoman, MLUH pe travay lo en proze pou agrandi en serten porsyon drenaz, apre serten konplent ki nou’n resevwar.  Sa proze i pou konpri konstriksyon anviron 455 met drenaz.  Nou dan en staz fer en plan detaye ek laplikasyon Planning e rod way leave kot i neseser.  Osito ki sa bann detay i konplete, provizyon Bidze i ava ganny fer, sa louvraz i ava ganny met lo tender pou son lenplimantasyon.

Lo kote kondisyon semen, mon Minister in fer serten lobzervasyon ansanm avek SLTA.  Poulemoman, nou vwar ki sirfas semen i ankor ase dan en bon kondisyon apard serten morso izole kot i annan serten trou.  SLTA pou pran responsabilite pou bous sa bann trou.  MLUH in deza fer vizit ansanm avek SLTA e zot pou fer en progranm pou fer sa travay tre byento.

Lobzervasyon i osi montre ki serten parti drenaz i bouse avek debri ek later.  Minister in rekomande ki Lotorite Distrik i zwenn avek Lazans ou kontrakter ki annan responsabilite pou fer netwayaz dan distrik Anse Etoile, pou asire ki sa bann drenaz i ganny garde dan leta prop e fonksyonnel.  Mersi Mr Deputy.

MR DEPUTY SPEAKER

Siplemanter Onorab Dugasse.

HON MELVAL DUGASSSE

Mersi Mr Deputy.  Minis, baze lo ou larepons, an vi ki Hangard napa bokou letan ki sa semen in ganny konstrir e i dan en move leta.  Ni bis pa kapab deservi sa lakominote, eski Minis i kapab dir avek sa Lasanble, si son Minister pe met anplas en bon sistenm monitoring e mezir prevantif pandan devlopman bann tel proze, pour ki sa defi parey semen Hangard, pa ariv ankor?  Mersi Mr Deputy.

 

MINISTER CHRISTIAN LIONNET

Mr Deputy wi.  Nou kontinnyelman pe rod fason pou nou amelyor nou sipervizyon lo bann proze.  I mon swe.  Aktyelman mesaz ki mon pas avek tou mon travayer.  Ler ou fer en proze, ou fer en proze parey ou ti pe fer li pour ou menm.  Parey ou ti pe konstrir ou prop lakaz.  Ou donn li tou latansyon posib pou asire ki nou ganny de kalite.  E sa i mesaz ki mon kontinnyelman pase e mon konnen ki mon Sekreter Prensipal pe travay for, pou fer sir ki nou met bann mezir, bann sistenm anplas, ki nou kapab monitor e donn Seselwa valer zot larzan.  Mersi Mr Deputy.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Speaker.  Mr Speaker, petet Minis si i ti kapab enform nou lo plan, oubyen progranm son Minister, ansanm avek lezot partner, pour ki bann travay oubyen lenfrastriktir lo bann proze land bank parey Hangard, i reste lo standar e kot i ava anpes plis depans alafen dizour?  Mersi.

 

MINISTER CHRISTIAN LIONNET

Mr Deputy, parey mon’n dir.  Nou bi se pou donn en prodwi de kalite.  Nou pou kontinnyen met zefor, met resours, donn training nou bann Staff, pou fer sir ki sa sou ki nou mete dan sak proze, i en sou ki pou reap benefis pou lonterm.  Mersi Mr Deputy.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker, an relasyon avek larepons ki Minis in donnen, eski son Minister, ansanm avek bann Lazans konsernen, pe mazinen antreprann bann diskisyon avek bann dimoun ki reste dan sa landrwa, pou vwar lo ki morso sa bann semen ki zot osi zot kapab kontribye, pou ede akseler travay ki kapab ganny fer lo sa semen e osi dan lezot konteks dan nou bann semen land banks, si son Minister i annan plan koz avek bann dimoun ki pou benefisye avek sa land bank, pour ki zot osi zot a pare pou kontribye, pour ede e fasilit sa bann proze e fer li enpe pli vit?

 

MR DEPUTY SPEAKER

Kestyon i lo semen HangardProceed Minister.

 

MINISTER CHRISTIAN LIONNET

Mr Deputy, non.  Mon Minister pa’n mazin lo apros bann dimoun ki servi sa semen.  Me selman si i annan dimoun ki enterese pou ofer son lekspertiz.  Pa neseserman kontribisyon moneter, me pou ofer son leksperyans, son knowledge, son know how lo kalite, Minister i touzour la pou ekout zot.  Mersi Mr Deputy.

 

MR DEPUTY SPEAKER

Kestyon 82, Onorab Arnephy.

 

HON BERNARD ARNEPHY

Mersi Mr Deputy.  Bonzour Mr Deputy.  Bonzour tou dimoun.

Mr Deputy, eski Minis i kapab dir nou Lasanble, avek alokasyon bidzeter ki son Minister in gannyen pour sa lannen, kwa ki pe ganny fer konkretman pou enn fwa pour tou adres e clear backlog an sa ki konsern survey pou later pou proze land bank e lakaz dan bann distrik?  Mersi Mr Deputy.

 

MINISTER CHRISTIAN LIONNET

Mr Deputy, survey i en konponan kle dan alokasyon later.  I en legzersis presi e plizoumwen straight forward.  Me survey later i annan plizyer konpleksite.  Konpleksite ki pa neseserman relye direkteman avek survey limenm, me plizoumwen avek later.

Pou eksplik sa nou Lasanble e nou dimoun ki alekout, permet mwan sit enn de legzanp.  Pou rode, oubyen met taso balizaz e diviz later, Lalwa Survey i demande ki plizyer paramet i ganny obzerve, pou fer sir ki serten presizyon i ganny strikteman respekte.  Depandan sityasyon lo teren, pou obzerv sa bann paramet, i pa toultan fasil.  Alor, baze lo leksperyans e konesans teknisyen, serten louvraz i kapab pran pli lontan ki lezot, menm si spesifikasyon louvraz i parey.  Setadir, i pa garanti ki pou rod en taso balizaz en kare later dan plato Caiman, Anse Boileau pou pran menm kantite letan parey ti pou pran dan leo Anse La Mouche, Santa Maria.

I osi annan plizyer lenstans kot louvraz teren survey in konplete me serten laspe later pa permet sa survey ganny aprouve.  Sa i annan pou fer avek permisyon pou diviz later.  Nou Minister i rankontre pa mal difikilte avek bann later ki pa lo nouvo Rezis e osi bann later prive ki lo nouvo Rezis, me ki annan bann restriksyon lo la.  Sa ki nou apel an term legal, bann incumbents.  Ansemoman, i annan plizyer ka kot dimoun pe demann Gouvernman pou tir encrochment semen e miray lo zot later me ki pa oule donn permisyon neseser pou diviz later.  Sa i enn de legzanp Mr Deputy.  I parmi lakoz mazorite retar ki nou eksperyanse.

Mr Deputy, lo aksyon konkret ki mon Minister pe pran pou adres sa issue backlog e letan ki pran pou adres bann survey, i konm swivan.  An preparasyon Bidze pou lannen 2014, mon Minister  ti fer en demann avek Minister Finans pou alokasyon Bidze pou recruit 2 surveyor, 3 Survey Technicians e 2 Data Capture Technicians, sa ki nou apel Chainmen. Malerezman, an vi konstrent bidzeter e priyoritizasyon finansman, sa pa’n posib.  Nou’n a plizyer repriz okour sa lannen, fer bann reprezantasyon avek bann Konsey Minis e Minister Finans pou rekonsider sa demann.  E mon annan plezir pou raporte, ki Minister Finans in donn mwan lendikasyon ki dan Bidze Siplemananter ki pou ganny prezante devan sa Lasanble tre byento, provizyon pe ganny fer pou finansman en Land Surveyor, 3 survey technicians e 2 Data Capture Technicians.  Provizyon pe osi ganny fer pou en konsiltan pou Departman Survey ki ava ede komans travay lo proze adjudication later Praslin ek La Digue.

Mon osi ganny met okouran, ki Minister Finans pe konsider ogmant lakantite larzan ki ti’n ganny allocate pou outsourcing bann survey avek bann surveyor prive.  Sa i ava ede an vi alokasyon R1 milyon pou sa konponan ki ti ganny fer boner sa lannen, in fini ganny epwize.  Mon ava lans en lapel ek sa Lasanble, pou eksprim zot sipor total a sa demann.  Menm si nou demann bidzeter pou 2014 pa’n materyalize, mon Minister in rod alternativ pou amelyor nou prodiktivite.  Sa nou’n fer li atraver restriktirasyon entern, kot nou’n rebalans nou resours imen aktyel pou met plis lanfaz lo aktivite teren, an dezavantaz bann lezot aktivite mandatwar lofis.  Sa in fasilit nou pou ogmant lakantite tim ki al lo site an sortan 2 pou vin 3 avek 1 Arpanter par tim.  Nou’n osi reorganiz bann distrik depandan lo kantite aktivite survey par distrik, pou fer sir ki volim louvraz i ganny egalman partaze ant sa 3 Arpanter.

Mr Deputy, nou’n osi revwar lafason nou outsource survey.  Dan plas en sistenm batch e outsource, nou’n adopte en lapros kontra fix avek bann arpanter prive.  Setadir, arpanter prive i ganny ofer en kontra pou fer survey par rezyon pou en dirasyon 6 mwan.  Sa kontra i renouvlab baze lo performans.  Sa 2 mezir in ede pou klersi 108 ka ziska prezan, me mon oule partaz ek sa Lasanble ki demann i sitan bokou pou later, ki ler survey i konplet en ka, preski 2 nouvo i ganny anrezistre.  Alor ki kontinnyen kree sa debalans.

An gro, survey i annan en backlog 272 ka depi Zen sa lannen, konpare avek 380 ka an Septanm 2013, ki montre en sinny progre.  Me menm sa, nou rekonnet ki i touzour annan lespas pou amelyorasyon.  Mersi Mr Deputy.

 

MR DEPUTY SPEAKER

Kestyon siplemanter, Onorab Arnephy.

 

HON BERNARD ARNEPHY

Mersi Mr Deputy.  Mr Deputy, eski Minis i kapab dir ek nou par egzanp, dan en ka kot en dimoun i idantifye en bout later, me sa later i pou Gouvernman e sa dimoun li, i pare an partnership avek en Arpanter prive, pou li kapab incur sa cost pou son later ganny survey, eski dan bann ka parey, Minister i konsidere?  E eski Minis i kapab osi dir ek nou, ki zistans son Minister in arive avek survey lo lakizisyon Ex-Holden Pierre, Anse Louis.  Mersi.

 

MINISTER CHRISTIAN LIONNET

Mr Deputy, dan bann ka ki bann dimoun i idantifye bann morso teren, bann pti pocket later parey nou dir e i ekrir Minister.  Minister byensir i annan en prosedir konsiltasyon.  I konsilte Lanvironnman, i konsilte tou bann Lazans respektiv pou vwar si sa later i annan potansyel pou rezidansyel.  Nou konsilte priyorite sa dimoun avek Lotorite Distrik akoz nou bezwen kit an tet, ki later i ganny allocate lo en baz priyorite.  E kan tousala in fini, kan sa dimoun in ganny approval in principle, approval an prensip pou sa morso later, sa dimoun i toultan annan opsyon pou li kapab ganny en Surveyor prive pou fer arpantaz sa later.  Me prosedir pa sitan senp koumsa.  Letan nou’n idantifye en bout later, i bezwen annan en plan ki ganny propoze avek Lotorite Plan pou fer en sub-division.  Sa normalman, nou akouraze ki i ganny fer par Surveyor Minister.  E once ki nou annan permisyon Planning, la sa endividi i kapab demann sa opsyon pou li al ver en Surveyor prive pou kapab enplimant, met taso lo teren.

An sa ki konsern later, akizisyon, anler Anse Louis, sa ki mon okouran se ki, survey in deza fini anmas tou bann detay lo teren.  In deza soumet en plan avek Lotorite Planning ki’n deza ganny aprouve e survey i dan staz pou la enplimant, met bann balizaz lo teren.  Mon’n ganny asire ki sa travay i ava konplete ver disi milye Out e ki mannyer sa bann dimoun i a kapab bouz devan e rod en loan pou zot kapab amelyor zot kondisyon lavi.  Mersi Mr Deputy.

 

MR DEPUTY SPEAKER

Onorab Dokter Payet.

 

HON DAVID PAYET

Mersi Mr Deputy.  Bonzour tou dimoun.  Mr Deputy, eski Minis i kapab enform sa Lasanble, si son Minister pe konsider en solisyon task force kot serten Arpanter etranze i ganny envite pou vin clear sa backlog pandan en peryod letan spesifik.  Mersi Mr Deputy.

 

MINISTER CHRISTIAN LIONNET

Mr Deputy, wi, nou’n konsider sa.  Aktyelman, sa 2 Arpanter ki nou pou resevwar, nou napa Arpanter Seselwa poulemoman.  Nou annan enn ki lo training aletranze ki’n fek konplet son premye lannen, i reste li 2an pou li kontinnyen.  E sa 2 Arpanter ki nou oule fer vini i Arpanter etranze ki nou pou fer zot vini lo Fixed Term Contracts, prensipalman pou ede pou deal avek backlog ki lo nou rezis.  Mersi Mr Deputy.

 

MR DEPUTY SPEAKER

Onorab Esther.

 

HON NATASHA ESTHER

Mersi Mr Deputy.  Mr Deputy, avek bi retir backlog e fasilit travay Survey Division lo Praslin – La Digue, eski Minis i kapab enform sa Lasanble, si alavenir son Minister i annan plan pou donn formasyon staff MLUH lo Praslin pou ede avek bann senp pti travay survey parey remet bann taso ki’n perdi.  Mersi.

 

 

 

MINISTER CHRISTIAN LIONNET

Mr Deputy, wi, mon Minister i annan plan pou ekip tou nou bann staff teknik lo Praslin, staff dan Departman Proze pou kapab fer bann pti konponan survey.  Mon pa krwar remet taso i pou kapab ganny antreprann apard from en Licensed Surveyor.  Me selman bann keksoz par egzanp pou sey relocate en taso, pa pou remete, pou relocate.  Si taso i la, pou sey vwar taso, i en keksoz ki kapab ganny konsidere e mon siport sa an son totalite.  Mersi Mr Deputy.

 

MR DEPUTY SPEAKER

Onorab Bristol.

 

HON ALDERIC BRISTOL

Mersi Mr Deputy.  An vi larepons Minis lo increase dan tim Surveyor, eski Minis i kapab enform sa Lasanble so zot annan ase transpor pou asire ki sa bann travay i ganny fer efektivman?  E kwa ki pe ganny fer lo nivo teknolozi pou asire e pou ede eklersi sa bann backlog?  Mersi Mr Deputy.

 

MINISTER CHRISTIAN LIONNET

Mr Deputy, non, nou napa ase transpor.  Nou bezwen remersye Minister Finans ki sa lannen in kapab increase en pti pe nou fleet, an plizoumwen ranplas en pe nou fleet akoz nou ti annan enn de transpor ki ti ase alaz.  Nou pou kontinnyen fer demann avek Minister Finans pou nou ganny plis resours dan sa domenn.  Me nou konpran konstren finansyel Gouvernman, konstren finansyel pei e nou konpran poudir i annan osi en kantite priyorite.  So, i a nou pou nou maksimiz resours ki nou annan e fer travay marse.  Mersi Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, dan bann ka kot i annan bann blokaz avek bann sitwayen prive, eski Minis i kapab dir avek sa Lasanble, ki bann mezir adisyonnel ki son Minister pe mazin pran pou fer sir ki sa bann sityasyon i ganny debloke pou nou kapab fini avek sa travay enn fwa pour tou.  Mersi Mr Deputy.

 

MINISTER CHRISTIAN LIONNET

Mr Deputy, mon pa konpran blokaz ki Onorab be refer lo la.

 

 

HON DAVID PIERRE

Taler ou’n mansyonn bann difikilte ki zot gannyen avek bann sitwayen prive ki refize kekfwa, pou donn Gouvernman serten way-leave dizon, pou fer sa travay.  Ki bann mezir adisyonnel kot zot in bloke, ki bann mezir adisyonnel ki ou Minister i anvizaze pran dan sa bann sityasyon.  Mersi.

 

MINISTER CHRISTIAN LIONNET

Mr Deputy, pou survey limenm, survey anba son Lalwa i annan provizyon pou li kapab donn notis en dimoun pou li mont lo son later pou vin anmas bann detay spesifik lo sa later.  Me selman pou nou kapab diviz later en dimoun, pou nou kapab tir en morso later pou nou cater pou bann lenfrastriktir, sa nou bezwen permisyon sa dimoun, omwen ki sa lenfrastriktir i dan lentere piblik.  E sa nou annan en Lalwa anba Lakizisyon anba lentere piblik ki Gouvernman i kapab evoke pour ki mannyer nou kapab secure bann lenfrastriktir ki bezwen pou benefis kominote e benefis piblik anzeneral, me sa pou mwan, i dernyen rekour.  Nou toultan annan sa prosedir konsiltasyon avek en dimoun avan ki nou servi Lalwa pou nou kapab attain nou lobzektiv.  Mersi Mr Deputy.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, pou lenformasyon piblik, mon ti a kontan demann Minis, ki arive dan en sityasyon dan en distrik kot survey, sa distrik i annan son later e survey tanzantan i vin survey enpe later dan later sa distrik.  Me sa distrik i osi annan en kantite dimoun ki pe demann later.  Ki travay ki son Minister i fer avek distrik pou fer sir ki bann distrik ki annan later zot dimoun osi i benefisye avek travay survey menm si bann pti bout ki pe ganny retire dan distrik ?  Si Minis i kapab eksplik piblik sa travay ki ganny fer e si sa Polisi 60-40 poursan i ankor egziste ?  Mersi.

 

MINISTER CHRISTIAN LIONNET

Mr Deputy, wi, sa Polisi 60-40 poursan i ankor anplas.  Si i annan en nesesite pou nou revize, nou ava vwar sa a moman apropriye.  Me pou bann proze land bank ki nou devlope, 60 poursan i al pou sa distrik kot sa proze i ete, 40 poursan i ganny retenir par Minister pou distribye ek bann distrik ki dezorme zot kondisyon teren, topografi, lokalite, i pa permet zot pou kapab ofer zot zabitan en loportinite.

Nou konnen ozordi poudir en kantite Seselwa i fer kantite resers, parwaze partou pou sey rod en pti morso later.  Parfwa sa later i pa neseserman dan son distrik.  Parfwa sa later i dan en lot distrik.  Me nou dan nou prosedir alokasyon, nou fer sir ki nou annan en konsiltasyon ase wide avek distrik kot i sorti, avek distrik kot i pe ale, kot sa later i ete, pou nou fer sir ki tou dimoun i adere avek sa lokasyon.  Nou santi, nou konnen i annan presyon, serten kot distrik, pou retenir later dan zot distrik a zot dimoun, me nou bezwen osi rekonnet ki, en Seselwa pe viv dan son pei, i bezwen kapab annan loportinite dan nenport ki distrik.

Mon krwar i en balans ki nou bezwen achieve, i pa fasil me nou pou kontinnyelman travay avek tou bann Lotorite Distrik pou fer sir ki nou pran en desizyon ki pou benefis sa endividi e benefis tou dimoun anzeneral.  Mersi Mr Deputy.

MR DEPUTY SPEAKER

Kestyon 83, Onorab Dugasse.

 

HON MELVAL DUGASSE

Mersi Mr Deputy.  Eski Minis responsab pour Later ek Lakaz i kapab eksplik sa Lasanble, kwa ki son Minister i anvizaze fer pou lafanmiy Nicholas ek Ally La Retraite ki zot lakaz in sibir domaz lie avek fot dan konstriksyon?  Mersi Mr Deputy.

MINISTER CHRISTIAN LIONNET

Mr Deputy, i Polisi Minister Litilizasyon Later ek Lakaz, kot i annan lakaz ki’n ganny aste avek Gouvernman e ki a longer ditan i dekouver ki i annan problenm striktirel relye avek defo konstriksyon, pou Minister pran responsabilite pou remedye sa problenm striktirel.  Nou krwar senserman ki lenvestisman en endividi dan en lakaz, i enn lonterm.

Sa 2 lakaz, 2 lasanm ki size kestyon, i 2 unit ki ti ganny konstrir koman emergency house dan laform semi-detached.  Zot fondasyon i an blok ek beton, en gran parti zot siperstriktir i bann stud partition wall apard ki zot common wall ki osi i an blok.  Sa 2 lakaz in ganny afekte avek differential settlement ki fer ki zot common wall ek zot miray kote lavarang, i annan bann felir ase sever.

In deza annan lesey pou repar zot, me sa problenm in re-manifeste.  Apard sa problenm felir, kondisyon sa 2 lakaz i osi demann bokou renovasyon.  Departman Proze dan mon Minister in deza an konsiltasyon avek sa 2 fanmiy ki pe okip sa 2 unit e i annan en fanmiy ki’n eksprim lentere pou fer en devlopman mazer lo son unit.  Sa i a kapab enkli re-konstriksyon total pou nobou agrandi fasilite dan sa lakaz.

An vi sa posibilite e an vi ki sa 2 lakaz i atase avek kanmarad, avan antreprann okenn reparasyon, Minister i bezwen konsider plan lonterm sa 2 unit ansanm avek zot okipan.

Depandan lo kwa ki zot ganny deside, Minister i ava asiste sa 2 fanmiy avek Enzenyer i Teknisyen pou fer detay teknik e osi kontribye serten porsyon pou proze an proporsyon avek defo konstriksyon ki ti annan avek proze inisyal.

Minister pou zwenn avek sa 2 fanmiy pou desid lo kwa ki meyer proze pou lonterm.  Mon oule reasir lafanmiy Nicholas e Ally ki mon Minister pou reste kot a kot avek zot pou rezourd sa problenm.  Mersi Mr Deputy.

MR DEPUTY SPEAKER

Kestyon siplemanter, Onorab Dugasse.

HON MELVAL DUGASSE

Mersi Mr Deputy.  Eski Minis i kapab dir ek sa Lasanble, konbyen i pe koute pou re-aranz sa lakaz?  E osi Minis, ki mekanizm ki’n ganny met anplas pour ki sa bann kalite sityasyon ki’n arive ek fanmiy Nicholas ek Ally, pa repet ankor.  Mersi Mr Deputy.

MINISTER CHRISTIAN LIONNET

Mr Deputy, konbyen i pe koute, nou napa en kou estimen.  Parey mon’n dir, nou pankor konsevwar akoz sa bann fanmiy in eksprim lentere ki zot anvi en redevlopman.  E nou pa kapab fer en travay ki nou santi ki nou pou bezwen fer en lot travay apre.  I enportan ki nou met nou resours kot i enportan.

So, once sa fanmiy i donn nou en endikasyon, kwa ki zot anvi fer, then Minister i a kapab met resours e etablir kou, konbyen pou koute.

Mr Deputy, parey mon’n dir, Minister i ankor toultan pe rod fason pou improve kalite louvraz ki nou donnen.  Parey mon’n dir, nou konsyan ki en envestisman dan en lakaz i en envestisman lonterm.  Parfwa, i annan keksoz ki zanmen ou pou apersevwar.  Nou bezwen fer plis bann tes inisyal, nou bezwen fer bann tes lo teren, bann tes ki oparavan nou pa ti neseserman pe fer.  Nou bezwen rod fason pou nou kapab minimiz sa bann problenm.  I enportan ki larzan ki’n envestir dan en proze, i reste pou lonterm.

E mon konvenki ki dan Minister mon annan en bon tim ki kapab amelyor sityasyon.  Annou pa bliye poudir, sa bann proze i deza bann proze 10an, 15an vye ki ozordi malerezman, nou pe vwar lekonsekans.  Me nou bezwen fer sir ki, sa ki nou envestir ozordi, i en envestisman lonterm.  Mersi Mr Deputy.

 

MR DEPUTY SPEAKER

Onorab Souris.

 

HON MIRENA SOURIS

Mersi Mr Deputy.  Baze lo larepons Minis, eski Minis i kapab enform sa Lasanble, parey lafanmiy Nicholas, ki rekour ki en fanmiy i annan dan ka kot sa teren limenm li, i nepli kapab konstrir.  Kot sa lakaz in crack e kot sa fanmiy in deza fini pey son lakaz.  Mersi Mr Deputy.

 

MINISTER CHRISTIAN LIONNET

Mr Deputy, parey mon’n dir dan mon lentervansyon, si i annan problenm striktirel ki relye avek fot konstriksyon, mon Minister i pou antre pou ed sa fanmiy pou kapab remet keksoz byen.  Malerezman, i annan serten sityasyon ki andeor kontrol Gouvernman.  I annan sityasyon parey dan bann ka dezas, parey dan ka Vista D’omar kot nou ti annan en fenomenn glisman later ki personn pa ti pou kapab prevwar.  I mean, ‘l’homme propose, Dieu dispose’.  Me selman, Minister i toultan, Gouvernman i toultan; nou en Gouvernman sosyal, nou en Gouvernman lepep.  Nou toultan apros sa bann dimoun pou vwar en solisyon pou bouz alavan.  Mersi Mr Deputy.

 

MR DEPUTY SPEAKER

Onorab Meggy Marie.

 

HON MEGGY MARIE

Mersi Mr Deputy Speaker.  An vi ki sa problenm lakaz crack ki an rezilta fot konstriksyon e sa problenm i eparpiye dan lezot distrik tel ki, mon distrik Anse Aux Pins e i en progranm ki’n deza ganny evalye, eski Minis i kapab dir avek nou Lasanble, ki pe arive avek bann ki’n fini ganny evalye dan lezot distrik e ki dele letan i pou pran ou Minister pou kapab remedy, rezourd sa problenm?  Mersi Mr Deputy Speaker.

 

MINISTER CHRISTIAN LIONNET

Mr Deputy, mon pa kapab donn en dele letan zeneral.  Sak prose i annan son spesifisite, sak proze i annan en bezwen resours spesifik.  Me selman, si ou annan en ka spesifik dan ou distrik Onorab, ou kapab apros Minister e nou kapab etablir bann paramet pou bouz alavan.  Mersi Mr Deputy.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker, mon ti a kontan demann Minis si son Minister i annan plan vwar kimannyer lasirans i kapab antre an sa ki konsern konstriksyon bann proze lakaz kot apre i annan bann keksoz ki ganny afekte.

E apre dezyenm, ki kalite garanti ki sa bann kontrakter ki fer sa bann lakaz i mete?  E si son Minister i annan plan revwar bann kontra ki zot fer pour ki sa kontrakter i garanti sa proze dan en serten dele letan pou asire ki si i annan bann keksoz minimal ki arive lo komansman, zot pa agrave plitar ki apre i kout pli bokou pou repare.  Mersi Mr Deputy Speaker.

 

MINISTER CHRISTIAN LIONNET

Mersi Mr Deputy.  Dan tou kontra konstriksyon normalman nou annan sa ki nou apel en defect liability period e dapre standar norm enternasyonal, sa i pou 1an.  So, pandan premye peryod 1an apre konstriksyon apre ki i annan handing over sa proze avek kliyan, ouswa avek Gouvernman, sa kontrakter i responsab pou rektifye tou bann defo ki arive ek lakaz.  Pa neseserman bann defo ki lakoz litilizasyon, me selman bann defo ki ganny apersevwar pandan sa peryod letan.

Me malerezman, i annan serten defo parey bann settlement, differential settlement, ki pran plis ki 1an pou li materyalize.  So, nou pa kapab really hold kontrakter pou li kapab ale al repar sa.  Me pandan sa 1an, nou idantifye, akteylman, apre ki nou’n allocate en lakaz par egzanp, apre 1an Zofisye Lakaz i pas Zofisye Minister Proze kot proze, i pas kot sa fanmiy e i fer zot anpli en defect liability check list.  E ler sa fanmiy i sinnyen, se la ki nou larg larzan retansyon avek kontrakter.

Lasirans i toultan zwe en rol.  Dan bokou ka, dan mazorite ka, lasirans in fer serten kontribisyon anver bann domaz ki’n arive.  Nou konnen poudir pa tou keksoz ki lasirans i kouver.  Me selman PMC avek Minister pou mwan i kontinnyen travay avek lasirans en mannyer ki nou kapab get a better package pou nou kapab ofer nou kliyan.  Parey ou konnen Onorab, PMC avek HFC letan en lakaz i ankor pe pey ou loan, oubyen ou ankor dan en house purchase, i annan en lasirans ki ganny pran ki kouver tou son stok lakaz dan pei.  Mersi Mr Deputy.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Mr Deputy.  Mr Deputy, an vi repons Minis, eski Minis i kapab enform sa Lasanble, ki i anvizaze fer dan ka kot bann konstriksyon, kot anplis ki fot konstriksyon, kontrakter in ganny donnen larzan pou en proze apre in kit site in ale.

Eski Minis osi i kapab enform sa Lasanble, si i pe anvizaze amelyor nou sistenm monitoring.  Mersi.

 

MINISTER CHRISTIAN LIONNET

Wi Mr Deputy.  Nou annan, nou pou kontinnyen met zefor pou nou monitor bann proze bokou pli byen.

Dan en ka kot en kontrakter i kit teren i ale, i annan bann formil anba en kontra pou deal avek sa sityasyon.  Byensir, en kontrakter ki malonnet, dan Minister nou bezwen ban li petet pou antreprann lezot proze alavenir.  Nou bezwen travay ek dimoun ki serye, devlopman Sekter lakaz dan nou pei, i depan lo responsabilite nou tou, enkli sa kontrakter ki li, i son devwar e son responsabilite pou donn en prodwi ki byen e ki byen pou nou Seselwa kapab zouir.  Mersi Mr Deputy.

 

MR DEPUTY SPEAKER

Kestyon 84, Onorab Lebon.

 

HON LENNY LEBON

Mersi Mr Deputy.  Bonzour a tous.  Eski Minis responsab pour Litilizasyon Later ek Lakaz, i kapab enform nou Lasanble, ki plan Lotorite Planning e kwa ki pe ganny fer pou redwir lakantite letan i pran pou en plan ganny aprouve?  Mersi.

MINISTER CHRISTIAN LIONNET

Mr Deputy Speaker, vizyon Lotorite Planning, se pou vin en Lotorite dinamik ki ofer en servis de kalite, zis, transparans e efikas pou promot devlopman soutenab ki depas lekspektasyon son kliyan.

Son misyon se pou prepar ban plan litilizasyon later pou nou pti leta zil, pou aplik Lalwa Planning ek son bann regilasyon, pou kree en lanvironnman ideal pou devlopman fizik soutenab dan nou pei e pou travay ek piblik pou amelyor devlopman later dan nou pei.

Travay Lotorite Planning i pa enn fasil ditou.  Nou viv dan en pei kot nou atas en kantite lenportans lo nou lanvironnman e devlopman soutenab.  Prezerv nou lanvironnman e karakteristik nou pei e ankouraz devlopman e lenvestisman, i parfwa problenmatik e Planning Authority i sa Lotorite ki mandate pou etablir sa bon balans.

Mr Deputy, mon krwar ki sa Lasanble i ava apresye son konpleksite.  Nou realize ki Lotorite Planning i en konponan kle dan lepanouisman nou lekonomi e pandan sa bann dernyen lannen, bokou pe ganny fer pour ki Lotorite Planning i vin en Lotorite pli efikas anlinny avek son vizyon.

Devlopman bann plan litilizasyon later pou le 25 distrik Mahe, Praslin ek La Digue, i enn parmi sa bann zouti kle ki pou ede akonplir sa lobzektiv.  A leksepsyon sa 2 distrik Praslin ki ozordi sa plan i anfors.  Nou deza annan en plan preliminer pou larestan 23 distrik.  Prosesis konsiltasyon in deza komanse e nou annan en plan retourn ver lakominote pou prezant devan zot dernyen plan avan ki prosedir pou donn li son stati legal, i komanse.  En tel plan i a fer ki en endividi, ou lakonpannyen i konnen klerman kwa ki i permet ganny konstrir lo en morso later.

Pou rezyon Lavil, mon Minister i salye kolaborasyon Lotorite Planning Sesel ek Urban Planning Council Abu Dhabi ki pe finans en group Konsiltan sorti Langleter pou travay avek Lotorite Planning Sesel pou konsevwar en plan devlopman pou nou Lavil Victoria.  Sa i en zouti kle ki a diriz devlopman nou Lavil pandan sa prosen 20an.

Mon oule refer sorti Mr Deputy, ki kontrerman avek serten propagann, sa plan i pe ganny konsevwar pour Sesel, par Seselwa.  Partisipasyon Urban Planning Council e Konsiltan Arup, i senpleman pou ofer nou gidans e zot lekspertiz.

Lotorite Planning an konsiltan avek Biro Prokirer Zeneral, i osi pe finaliz bann amannman e revizyon neseser an sa ki konsern Lalwa ki gouvern li.  Revizyon Town and Country Planning Act, ki ti vin anfors an 1970 e ki osi size plizyer amannman dan bann lannen ki’n swiv, i dan son staz final e nou ekspekte ki sa i a ganny table devan sa Lasanble avan lannen fini.  Sa i ava donn nou en Lalwa modern ki ava adres nou sityasyon aktyel.

Ankor, avek bi pou met bann mekanizm anplas pou vin pli efikas, Lotorite Planning ti propoz e ganny laprouvasyon Konsey Minis, pour kreasyon en Minor Works Committee, ki annan manda pou regard bann aplikasyon devlopman miner, fer vizit e pran dezisyon.

Sa Komite ki konpri en reprezantan Planning, en reprezantan Lanvironnman, en reprezantan Servis Lasante Piblik, i bezwen pronons son lekor lo en tel aplikasyon pandan en dele letan 3 semenn.

Konzwentman, Lotorite Planning i annan plan pou re-etablir sa ki nou apel, Utilities Committee.  Sa Komite ki enkli en manm Lotorite Planning, en manm sorti Departman Lanvironnman, en manm sorti Departman Transpor e en reprezantan sorti kot bann Service Providers, i ava annan manda pou get laplikasyon ki annan pou fer avek bann utilities.  Parey lenfrastriktir telekominikasyon, delo ek elektrisite.  I osi pou annan manda, pou kordin pli byen sa bann aktivite ant plizyer Lazans.

Mr Deputy, Lotorite Planning i osi ofer sa ki nou apel pre-planning advice, a tou son bann kliyan.  Sa i permet en kliyan, ouswa en Azan pou vin kot Planning e konsilte avek bann Teknisyen avan ki zot al met resours lo preparasyon bann plan pou soumet avek sa Lotorite.  Nou konstate ki sa servis okour bann dernyen mwan, pe pli ganny byen itilize e mon ekspekte ki sa i ava fer ki laprouvasyon bann plan, a pase avek mwens difikilte.

Mr Deputy Speaker, en lot zouti kle li Lotorite Planning i annan lentansyon lanse tre byento, i en sistenm elektronik pou soumet bann plan online.  Sa sistenm in deza ganny konsevwar e pe aktyelman dan en faz ganny teste par tou akter konsernen, enkli bann end users, ki bann Azan.

Sa sistenm i a permet en Azan pou soumet son plan online e dan konfor son lofis, ouswa son lakaz, san ki i bezwen deplase pou vin anvil e osi permet li pou swiv bann diferan staz son aprouvasyon.

En lot fakter ki parfwa afekte letan ki Lotorite Planning i pran pou deal avek bann aplikasyon, i dele letan ki bann referral agencies i pran pou donn zot lopinyon e osi la kalite lopinyon ki ganny pas ek Lotorite Planning.  Parey zot konnen, Lotorite Planning i sa one-stop-shop, me son desizyon i pa selman baze lo son pozisyon me e pwennvi kolektiv bann Lazans.

Pou nobou atenn sa dele 6 semenn pou pran en desizyon lo en aplikasyon, Lotorite Planning i a son tour donn bann Lazans 2 semenn pou donn zot komanter.  Dan mazorite ka, sa pa arive.  Lotorite Planning i konsyan konstrent resours imen sa bann Lazans, prenan kont kantit aplikasyon ki i resevwar pandan lannen.

Travay pe kontinnyen avek Departman Ladministrasyon Piblik e Minister Finans pou nobou donn resours apropriye sa bann Lazans avek bi pou rann en servis de kalite e efikas a nou piblik.

Mr Deputy, mon konstate ki mon’n sot probableman limit pou reponn sa kestyon, malgre ki i annan ankor bokou pou dir.  Par egzanp, bann Azan ki malonnet, bann plan ki pa lo standar e plizyer lezot.  Mon swete ki mon’n kapab reasir sa Lasanble e piblik anzeneral, ki nou konstate bann defi e nou pe sey nou mye pou anmenn en Lotorite Planning ki efikas e relevan.

Lo sa not, mon oule remersi tou staff Lotorite Planning e bann Lazans pou zot travay determinasyon e mon swet zot bonn kontinnyasyon.  Mersi Mr Deputy.

 

 

MR DEPUTY SPEAKER

Kestyon siplemanter, Onorab Lebon.

 

HON LENNY LEBON

Mersi Mr Deputy.  Mr Deputy, eski Minis i kapab dir nou Lasanble, ki si apre tou bann kritik kontinnyel lo performans Lotorite Planning, si son Minister in fini pran desizyon pou anmenn en transformasyon serye dan konpozisyon sa Lotorite.  E osi, ki kantite plan Lotorite Planning i resevwar dan en lannen?  Mersi Mr Deputy.

 

MR DEPUTY SPEAKER

Micro.

 

MINISTER CHRISTIAN LIONNET

Mr Deputy, pou reponn kestyon Onorab lo kantite plan ki Planning i resevwar pandan en lannen.  Statistics 2013 depi le 3 Zanvye 2013, ziska le 31 Desanm 2013, Lotorite Planning ti resevwar 2,310 laplikasyon.  Sa i en pti pe plis ki apepre 200 aplikasyon par mwan.  Dan sa 2,310 aplikasyon, 1829 in ganny aprouvasyon, ki reprezant apepre 80 poursan tou laplikasyon ki’n antre, in ganny aprouvasyon.  Bann ki’n ganny rezete, i senpleman reprezant 7.3 poursan.

Mon kontan kestyon Onorab akoz i donn mwan en loportinite pou met sityasyon aktyel devan zot Lasanble.  Mon krwar Planning Authority i deal avek en kantite plan.  Nou bann Lazans ki nou annan, parfwa ki nou okouran, letan nou ti annan Reform Ekonomik.  Kot ti annan en nesesite pou nou right size Gouvernman, nou’n perdi en kantite staff teknik.  Petet, nou bezwen revwar kot bann Sekter ki konsern devlopman.  Bann Sekter ki pou promouvwar devlopman ekonomik, devlopman fizik.  Nou bezwen donn sa bann Minister resours apropriye.

Parfwa ou demann ou lekor, 200 plan par mwan ki pe ganny deal avek par 4 staff Lanvironnman, eski sa i posib?  Eski sa ki ou gannyen i bann lenformasyon konkret, kredib ki ou kapab asire ki ou annan devlopman soutenab?  So, nou nou pou kontinnyen travay avek Minister, Departman Ladministrasyon Piblik, Minister Finans pou donn sa bann Lazans bann staff apropriye.

Mr Deputy Speaker, nou pe kontinnyelman revwar kimannyer Planning Authority i operate.  I bezwen en Lotorite relevan, i bezwen en Lotorite dinamik.  Letan ou regard sistenm Planning Authority, i en sistenm ki byen ganny oiled up.  Savedir i en sistenm ki sistematik.  Aplikasyon i antre premye zour, aplikasyon i ganny sirkile kot tou bann Lazans.  Dezyenm semenn sa aplikasyon i sipoze retourn kot Planning Authority.  Trwazyenm semenn Sub-Committee i zwenn e debat lo aplikasyon.  Katriyenm semenn, i soumet son rekomandasyon avek main Board e senkyenm semenn main Board i sipoze pran en desizyon.  Pran en desizyon kimannyer ki sa sizyenm semenn, sa piblik i ganny enformen lo en desizyon.  I malere ki parfwa, akoz ankor mank resours, sa i pa ganny attained.  Me mon krwar sistenm i anplas, i en kestyon pou nou kontinnyen met bann zouti, bann prosedir anplas.  Nou bann Land Use Plans par egzanp.  En dimoun ler i vwar son Land Use Plan in ganny klasifye pou rezidansyel, i pa kapab vini, propoze pou met en laferm.  I pou konnen davans, poudir i kapab fer tel aktivite lo sa morso teren.

Nou online system.  Letan en Azan i soumet en aplikasyon avek Planning Authority, i pou kapab swiv kote son aplikasyon in pri.  Eski Lanvironnman in donn son views? Eski Public Health in donn son views?  Tousala i pou ede ki nou kapab monitor e fer dimoun keep bann diferan Lazans lo zot toes.  Mersi Mr Deputy.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Mr Deputy.  Mr Deputy, eski Minis i kapab enform nou Lasanble, si son Minister in etablir, oubyen pe konsidere etablir en lofis avek bann personnel kalifye avek bi donn leksplikasyon bann kliyan ki annan en problenm ek zot plan ki’n ganny soumet pou konsiderasyon par Lotorite Planning.  Mersi.

 

MINISTER CHRISTIAN LIONNET

Mr Deputy, wi, propozisyon Onorab dan en lemonn ideal, i en propozisyon parfe.  Nou annan en mank resours dimoun teknik, dimoun ki annan kapabilite.  Me selman sa ki mon konnen se ki Planning Authority i adopte en open-door Policy.  En dimoun ki’n ganny refize son plan, oubyen ki Planning Authority in demande pou defer son plan pou serten rezon, sa dimoun i toultan kapab rod en apwentman swa pou vwar CEO, swa pou vwar bann Konsiltan, ouswa pou vwar bann Teknisyen pou diskit son plan.

Dan prosedir Appeal ki swiv apre ki Planning in refiz en aprouvasyon, i mandatwar ki sa Appeals Committee letan ki Minis in pran en desizyon baze lo rekomandasyon, i zwenn ek sa dimoun dan bann ka ki nou refize en.  Bann ka ki aprouvasyon, oubyen si sa dimoun i kontan, i pa tro, tro anvi vwar ou li, i anvi bouz ek son devlopman.  Me dan ka kot nou’n refize, i prosedir aktyel anplas ki Komite Appeal i zwenn sa dimoun e eksplik li rasyonnel akoz son devlopman in ganny refize.  Mersi Mr Deputy.

 

MR DEPUTY SPEAKER

Onorab Barbe.

 

HON NICHOLE BARBE

Mersi Mr Deputy.  Bonzour tou dimoun.  Mr Deputy, eski Minis i kapab enform sa Lasanble, ki rol Lotorite Plan i annan pou asire ki bann Draftsmen, Architect e Architectural Firms ki anrezistre dan Sesel, i bann ki genuine.  Mersi Mr Deputy Speaker.

 

MINISTER CHRISTIAN LIONNET

Mr Deputy, rol Lotorite Planning se senpleman pou fer rekomandasyon pou assess lekspertiz en Draftsmen, ou Architect e fer rekomandasyon avek Licensing Authority ki en License i ganny donnen.  Mon krwar i rol Licensing pou donn License Seselwa, ouswa etranze pou fer en biznes partikilye.

Me kestyon Onorab i donn mwan loportinite osi pou eksplik Lasanble demars ki nou pe fer an sa ki konsern bann profesyonnel.  Mon Minister i krwar senserman ki sa Lendistri i kapab ganny kontrole par bann profesyonnel limenm e nou pe travay lo en proze pou nou kapab etablir en Lotorite, ouswa en Council pou bann profesyonnel ki sa Lendistri i kapab self-regulate son lekor dan lefitir.

I annan travay ki’n deza ganny fer.  Mon CEO Planning Authority, mon PS avek en dimoun prive, in deza fer en trip Moris boner sa mwan pou vwar kimannyer Moris zot in etablir zot sistenm, zot annan en sistenm parey ki anmars e nou pe sey aprann from en zil ser, en mannyer ki nou kapab met sa anplas dan nou pti pei Sesel.  Mersi Mr Deputy Speaker.

 

MR DEPUTY SPEAKER

Onorab Bristol.

 

HON ALDERIC BRISTOL

Mersi Mr Deputy.  Mr Deputy, eski Minis i kapab enform sa Lasanble, si Lotorite Planning i vreman pran an konsiderasyon bann komanter ki Lotorite Distrik i fer lo bann laplikasyon ki vin dan distrik pou komanter?  E ki arive dan bann ka kot bann rapor i ganny fer lo bann konstriksyon ilegal ki pe ganny fer?  Mersi Mr Deputy.

 

MINISTER CHRISTIAN LIONNET

Mr Deputy, wi, komanter ki Lotorite Distrik i fer lo bann aplikasyon i en komanter ase enportan, I mean, tre enportan.  Zot dimoun dan distrik, zot konn problenm distrik, zot konnen kwa bann difikilte, oubyen bann keksoz ki pa neseserman ki pou sorti lo en bout papye ler i vin devan nou.  So, wi nou pran an konsiderasyon zot bann konsern.  Me desizyon pou aprouv en devlopman i reste avek Lotorite Planning.  I en desizyon kolektiv ki pran lefe tou bann komanter ki antre avek en aplikasyon.

Lo kote bann devlopman ilegal, once ki nou apersi i annan en devlopman ilegal, Planning i mont lo sit i donn en stop notis kot i neseser.  Sa dimoun i ganny en sans pou li regilyariz sa devlopman atraver en retrospective application ki i soumet avek PlanningPlanning i deliber lo la, i re-konsilte distrik, i re-konsilte tou bann Lazans konsernen e si desizyon se ki sa devlopman pa kapab arive, then Planning i enforce sa dimoun pou li kapab retir sa devlopman ilegal.  I en prosedir ase long.  Sa dimoun i kapab fer en Apel e menm si letan Apel in rule lo son desizyon, lo la, i kapab osi anmenn sa keksoz Ankour.  Sa dimoun i annan tou son drwa pou li egzos tou posibilite.  So, i annan bann ka parey ki pran enpe letan.  Me sa ki enportan se ki, Planning i pran bann aksyon neseser pou rektifye sityasyon.  Mersi Mr Deputy.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, an vi kantite konplent par bann manm piblik e an vi bann defayans, serten defayans ki Minis in koz lo la anrelasyon avek Lotorite Planning, eski Minis i kapab dir sa Lasanble, si zot in fer, oubyen si zot anvizaze fer en evaliasyon konpreansiv lo fonksyonnman Lotorite Planning avek bi pou idantifye tou bann defayans ki sa Lotorite pe fer fas e avek bi pou fer li vin pli efektiv.  Si zot in fer sa evaliasyon, eski Minis i kapab share rezilta sa evaliasyon ek Lasanble Nasyonal.  Mersi Mr Deputy.

 

MINISTER CHRISTIAN LIONNET

Mr Deputy, wi, nou kontinnyelman pe fer evaliasyon akoz mon repete, nou bezwen en Lotorite Planning ki reste relevan e ki reponn demann piblik.

Tou sa bann sistenm ki nou pe met anplas ki mon’n elabor lo la dan mon entervansyon orizinal, i sorti, i baze lo bann problenm ki nou’n idantifye.  Problenm avek kalite draftsmen, ok. Nou’n met anplas en sistenm pwen ki pou deal avek bann draftsmen ki nou santi pa at par avek sa.

Problenm lo letan ki i pran pou bann Lazans reponn, donn zot views.  Nou’n fer demann avek Minister Finans avek DPA pou donn zot plis resours.  Nou pe met sistenm elektronik anplas pou nou kapab pli byen monitor performans sak dimoun.

`       Ou konnen, parfwa nou kritike, wi, Planning i pran en ta letan.  Me i ok pou kritike dan labsans, nou napa statistics.  Ozordi nou annan en sistenm anplas ki nou konnen egzakteman konbyen en plan i pran kot sak bann Lazans.  Konbyen letan en plan i pran pou ganny aprouvasyon, oubyen pou ganny refuse eksetera, eksetera.  E once ki sa sistenm in ganny servi pour enpe letan e nou annan en database ase ekstansiv, mon ti a kontan retourn kot sa Lasanble e montre zot bann fe.  Akoz parfwa, nou fer lopinyon baze lo en leksperyans personnel, en leksperyans endividi e nou zeneraliz sa lopinyon.  Mon krwar en kantite travay pe ganny fer lo kote Planning ek son bann Lazans, pou nou kapab donn sa servis ki dimoun i bezwen.  Zanmen nou pou kapab satisfer tou dimoun.  I annan devlopman ki malerzman, pa pou kapab ganny permet pou arive e mon asire ki sa dimoun pou santi li fristre.  I pou fristre ek Planning akoz son swe li se devlop son propriyete.  Son swe li se annan son devlopman parey i anvi.  So, nou pa pou zanmen kapab pler tou dimoun.  Me sa ki nou bezwen fer, se travay pou fer sir ki nou kapab efikas.  Donn en dimoun en desizyon aler.  E sa en keksoz mon bezwen felisit Planning sa en.  Si i annan en Lotorite Gouvernman, en Lazans Gouvernman, en lebra Gouvernman ki keep son kliyan informed, menm si pou li anvoy en let pou dir koumsa i bezwen ankor 3 semenn pou li deliber lo son aplikasyon, Lotorite Planning i enn sa bann Lazans ki fer sa byen.

Wi, dimoun i oule desizyon, dimoun i oule desizyon pozitiv, me pa toule ka ki nou pou kapab meet zot lekspektasyon e met sa ki zot anvi.  Mersi Mr Deputy.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, Minis in dir i pran apepre 5 a 6 semenn pou Lotorite Planning donn en larepons.  E in osi koz lo mank resours e la in fek koz lo lekspektasyon piblik.  Eski Minis pa krwar ki 5 semenn i en dele letan ki pa rezonnab pou ni Planning Authority, e i met en presyon lo Planning.  Eski Minis pa kapab konsider ogmant sa dele letan ki ava limit lekspektasyon piblik e Lotorite Planning i a kapab fer en pli bon travay dan en pli gran dele letan e donn piblik en pli bon servis e tou dimoun i ava konnen i pou pran enpe plis letan e zot a kapab espere?  Sa i mon premye kestyon.

Mon dezyenm kestyon.  Ki’n arive avek sa legzersis PR ki Lotorite Planning ti pe antreprann enpe letan pase, pou li annan en pli bon relasyon avek manm piblik.  Mersi.

 

MINISTER CHRISTIAN LIONNET

Mr Deputy, wi, mon welcome kestyon Leader of Government Business, 5 a 6 semenn, i ase demanding, i en dele letan ase kourt.  I en dele letan ase kourt prenan kont ki poulemoman, nou napa tou sistenm anplas pou kapab diriz nou, or gid nou dan bann desizyon, prenan kont resours ki nou annan.  I en keksoz ki Gouvernman i kapab re-vizite, revwar e dan lavenir fer bann sanzman neseser.

Mon konnen poudir i annan en kantite ka osi ki nou deal avek pandan 5 a 6 semenn.  Par egzanp, en lakaz ki en dimoun i oule konstrir, pou mwan, 5 a 6 semenn i rezonnab.  Bann pli gro proze parey bann proze touristikk, bann proze ki annan plis konpleksite, definitivman, 5 a 6 semenn i pa pou ase.  Nou pou bezwen bokou, bokou plis letan.  So, Planning Authority i ava revwar sa e petet i ava kapab soumet en kategori proze pou diferan peryod letan ki i bezwen deal avek.

Lo kestyon PR, i en legzersis ki nou ti’n komanse.  Nou’n realize poudir dan bann dernyen mwan pase, nou’n slack down en pti pe.  Mon toultan dir Planning Authority, pou nou kapab annan, pou dimoun kapab vin on board, nou bezwen angaz zot dan bann diskisyon.  Par egzanp bann Azan, mon ensiste ek Planning Authority ki toule 3 mwan, zot zwenn bann Azan, bann Architect, bann Enzenyer e dyaloge.  Dyaloge dan fason ki Planning Authority i kapab konpran zot bann defi e zot osi zot kapab konpran defi Planning Authority.  Sa laspe dyalog i pou rezourd en kantite problenm, i pou tir en kantite sa move limaz ki ozordi i annan dan Planning AuthoritySo, wi mon ava demann Planning Authority pou kontinnyen met lanfaz lo legzersis PR.  I en legzersis kle e enportan ki pou improve limaz Lotorite.  Mersi Mr Deputy.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.  Bonzour Minis, bonzour tou dimoun ki alekout.  Mr Deputy Speaker, eski Minis i kapab enform nou Lasanble, ki rekour en dimoun, oubyen kominote, i kapab annan, ler Lotorite Planning in fer en move desizyon?  E ziska ki zistans eski Lotorite Planning i swiv prosedir EIA de pros konmsi?  Par egzanp si prosedir meeting piblik pa’n byen ganny advertise ensidswit.  Ki arive?  Ki bann rekour ki dimoun i annan?  Mersi.

 

MINISTER CHRISTIAN LIONNET

Mr Deputy, en piblik ki santi en desizyon Planning in afekte li, i toultan kapab fer en Appeal.  I annan en prosedir Apel anba Lalwa ki i annan en Komite.  En Appeals Advisory Committee ki advise Minis pou fer bann desizyon pou vwar si vre Planning Authority i at fault.  Ouswa si vre Planning Authority in refiz en aplikasyon, ouswa si vre i annan posibilite pou donn aprouvasyon dan en ka refizyan.  I annan bann mekanizm anba Lalwa ki kapab permet sa.

Lo kote EIA, EIA parey ou konnen Onorab, i en prosedir ki anba Lalwa Environmental Protection Act, ki ganny dirize par Departman Lanvironnman.  E Planning normalman letan i ganny en green card, ouswa en clearance EIA, en acceptance of EIA, i assume ki tou bann prosedir, dapre Lalwa, in bezwen ganny swiv.  Mersi Mr Deputy.

 

MR DEPUTY SPEAKER

Kestyon 85, Onorab Vel.

 

HON JENIFFER VEL

Mersi Mr Deputy.  Bonzour Minis, bonzour tou dimoun.  Eski Minis pour Lamenazman Later ek Lakaz, i kapab enform nou Lasanble, si son Minister i annan okenn plan dan lefitir pou redevlopman flat Mirabel Pointe Larue?  Mersi.

 

 

MINISTER CHRISTIAN LIONNET

Mr Deputy, dan flat Mirabel, PMC i annan 18 unit 1 lasanm, dan laform 3 blok.  Poulemoman, Minister avek PMC, pou gard sa bann flat 1 lasanm koman parti son stok lakaz tranzitwar e nou napa plan redevlopman.  Sa bann unit ki ti ganny premye allocate an ‘98 e nou santi zot ankor annan valer ekonomik.  I annan bokou bann dimoun ki ti ganny allocate me ki’n deza transfer dan ban unit permanan, par egzanp, Ex Albert, Anse Francois e Ile Perseverance.

Sa propriyete ki lo S1861, dan plato Pointe Larue, i dan en landrwa ki souvan ganny afekte par linondasyon.  En lot problenm prensipal se problenm desarz an vi high water table.  Pou rezourd sa problenm avek sistenm desarz, i proze pou konekte sa bann blok flat avek sistenm tretman PUC, Pointe Larue.  Sa proze pa ankor materyalize ziska prezan an vi kontrent finansyel e kou ki ase eleve.

An se moman, PUC in fek sinny en kontra avek Konsiltan GIBB Mauritius pou fer en feasibility study ek detailed design pou en proze sewage santral ki ava kouver plato Pointe Larue, Anse Aux Pins ek Au Cap.  Sa faz letid ek design, i ekspekte konplete an Fevriye 2015.  Labank BADEA in deza eksprim lentere pou finans enplimantasyon sa proze e koman letid fezabilite i konplete, sa i ava ganny prezante pou konfirm finansman.

Ler sa sistenm ava vin anmars, problenm desarz ava rezourd enn fwa pour tou.  Poulemoman, PMC i regilyerman ponp bann septic tank lo sa Estate e osi kan problenm i ganny raporte.

An sa ki konsern problenm inondasyon, koman parti bann rekomandasyon letid drenaz Pointe Larue, ki ti fer apre tanpet Feleng an 2013, Minister Lanvironnman i annan plan pou en drenaz ki pas ant Airport ek plato Pointe Larue.  Sa proze i ava ede amelyor sa sityasyon.  Dat pou lenplimantasyon sa proze pa ankor finalize.

Mr Deputy, lo kote batiman limenm, parey mon’n dir oparavan, striktirelman, nou napa lenkyetid.  Me travay reparasyon i neseser lo bann balistrad e lo twatir.  PMC in asir mwan, ki travay renovasyon lo sa 2 konponan pou ganny konplete avan lafen sa lannen.  Mersi Mr Deputy.

MR DEPUTY SPEAKER

Kestyon siplemanter Onorab Vel.  Switch off mic, Minister.

 

HON JENIFFER VEL

Mersi Mr Deputy.  Mr Deputy, an vi repons Minis, eski Minis i kapab dir nou apard sa feasibility study pou koneksyon sewage, flat Mirabel Pointe Larue.  Eski son Minister pe anvizaze osi pou konsider letid lo lenpak lasante lo zabitan ki ganny afekte avek sa ?  E an vi ki sa problenm i en problenm kontinnyel ki pe persiste pou plizyer lannen, eski son Minister i kapab dir nou ki nivo priyorite zot pe rank sa proze drenaz ek sewage pou enn fwa pour tou rezourd sa bann problenm kot flat Mirabel ?  Mersi.

 

MINISTER CHRISTIAN LIONNET

Mr Deputy, wi, nou konnen poudir sa problenm sewage kot flat Mirabel akoz nivo delo ki ase o avek linondasyon ki arive tanzantan, nou konstate ki i en problenm grav.  Pou mon Minister i en bezwen irzan, me selman lenplimantasyon bann tel problenm sewage santralize, pou en gran rezyon parey, i tonm anba responsabilite Minister Lanvironnman.

Mon konnen ki Gouvernman i atas en kantite priyorite avek sa proze.  E se pour sa rezon ki demars in ganny fer deza pou apwent en Konsiltan e osi apros Labank BADEA pou nobou kapab sekiriz son finansman.

Poulemoman, PMC pou kontinnyen travay avek sa bann dimoun pou fer sir ki sa bann dimoun ki reste flat Mirabel, i viv dan en lanvironnman sen e sof.  Mon konnen in ariv problenm dan lepase, nou pou bezwen kontinnyen travay ansanm pou adrese ziska ler poudir i annan en sistenm permanan ki vin anplas.  Mersi Mr Deputy.

 

MR DEPUTY SPEAKER

Bon, avek sa nou’n ariv alafen seri kestyon pou Minis Lionnet.  Mon a remersi li e mon ava ekskiz li parmi nou.

Mon pou servi mon diskresyon anba Order 33(4), pou nou kontinnyen avek Question Time letan nou repran 11er bomaten.

Avek sa nou a pran en break e nou a rezwenn 11er.

 

(BREAK)

MR DEPUTY SPEAKER

Bon nou pou kontinnyen avek nou Question Time ki nou ti’n komanse bomaten e avek nou nou annan Minis Joel Morgan, Minister pour Home Affairs avek Transpor, ki pou vin reponn en Kestyon Irzan table par Onorab sorti Baie Ste Anne Praslin, Onorab Esther e nou a swet labyenveni Minis Morgan avek son delegasyon e mon a demann Manm Onorab pou demann son kestyon.

 

HON NATASHA ESTHER

Mersi Mr Deputy Speaker.  An vi sa nouvo vag krim ki pe afekte Pralen resaman, eski Minis pour Zafer Entern i kapab dir avek nou Lasanble, ki son Minister pe fer pou re-etablir respe pou lord ek lape lo zil e ki zistans son Minister in arive dan lanket ki pe fer an koneksyon avek lanmor Msye Andy Laurence?  Mersi.

 

MINISTER JOEL MORGAN

Mersi Mr Deputy Speaker.  Bonzour tou Manm Lasanble e tou dimoun ki alekout.  Mr Deputy Speaker lapolis i touzour travay pou mentenir lord ek lape dan pei e sa i enkli lo Pralen.  Sepandan lapolis in konstat en logmantasyon dan bann ka vol lo Pralen pandan sa dernyen 2 mwan ki’n pase.  Swivan sa lapolis in reviz son stratezi lo prevansyon kont krim pour sa zil.  Bi en tel stratezi se pou aret logmantasyon bann vol ek lezot krim an zeneral lo Pralen.  Depi lenplimantasyon sa stratezi le 27 Zen ziska yer bomaten, lapolis in remark en rediksyon dan lakantite krim an zeneral ki pe arive lo Pralen.

Dan kad sa stratezi Mr Deputy Speaker lapolis in vwar ni ki i bezwen vin pli proaktiv lo Pralen e in deplway plis zofisye laba pou kapab met sityasyon anba kontrol.  Bann zofisye sorti dan diferan seksyon NCSD - National Crime Services Division ti ganny deplwaye lo Pralen.  Parmi i annan zofisye sorti dan Dog Unit, Vice-Intervention Component, Criminal Intelligence Unit avek Special Intervention Team. Sa bann gard in zwenn avek bann lezot ki deza pe travay lo Pralen e depi ki lzot in komans sa loperasyon le swivan in ganny fer:-

  • 1,014 spot checks lo transpor in ganny fer.
  • 238 fixed penalties in ganny donnen.
  • 12 dimoun in ganny sarze pou lofans drive anba lenfliyans lalkol.
  • 18 warning in ganny donnen pou bann diferan lofans.
  • 33 transpor in ganny retire lo semen akoz zot pa ti road worthy.
  • 583 lafouy in ganny fer lo dimoun e 68 dimoun in ganny arete pou bann rezon ki enkli posesyon drog e ki zot lo lalis bann wanted persons.

Mr Deputy Speaker, sa bann statistik i rezilta sa loperasyon dan en lespas 10 zour.  Rezilta i depas sa ki sa 2 stasyon lo Pralen ti pe fer an mwayenn pandan 1 mwan.  Loperasyon i anba komandan lapolis rezyonnal pou Pralen ek La Digue e bann zosifye Sinyor sorti Mahe pe osi fer en vizit lo Pralen lo en baz toule semenn pou evalye sa travay, fer bann lazisteman kot i neseser e osi pou motiv bann ki enplike dan sa loperasyon.  Lapolis pou monitor progre sa loperasyon e aziste son nivo prezans e son reaksyon depandan lo sirkonstans pou asire ki sa sityasyon i reste anba kontrol.

Mr Deputy Speaker, pou dezyenm parti sa larepons konsernan Msye Andy Laurence mon a reponn konm swivan.  Lapolis pe eksplor tou posibilite lie avek lanmor Andy Laurence ki ti aze 24an.  Msye Laurence ti ganny anmase san konesans obor semen Cote D’or granmaten le 6 Avril 2014.  Swivan sa lensidan en lanket ti komanse e Komisyonner Lapolis ti answit fer lapel avek Interpol ek Lapolis Kenya pou ganny lasistans avek sa lanket.  4 zofisye ti ganny deplwaye sorti aletranze, parmi 3 zofisye Interpol ek enn sorti kot CID Kenya.  Zot in travay tre pros avek CID Sesel ek zofisye Scientific Support Unit dan lapolis Sesel pou esey etablir sirkonstans egzakt lanmor Msye Laurence e esey idantifye lekel ki responsab.  Lapolis in fer en lanket detaye e plizyer fwa zot in vwar levidans ki ti’n deza ganny ranmase e osi bann ki ti pe kontinnyelman antre.  Zot in osi rekestyonn dimoun ki ti’n deza ganny kestyonnen oparavan fi e an mezir ki bann nouvo levidans in antre.

Mr Deputy Speaker mon oule met lanfaz ki lanket dan sa ka i ankor pe kontinnyen e pou sa rezon lapolis pa dan en pozisyon pou devwal plis lenformasyon ki kapab konpromet ouswa afekte sa lanket.  E pandan ki sa lanket i kontinnyen dan sa lensidan mon ti a profite pou lans en lapel avek okenn dimoun ki annan okenn lenformasyon pou asiste lapolis dan zot lanket, zot kapab fer li atraver lalinny telefonn anonim 133 oubyen vin direkteman kot Komisyonner Lapolis dan en fason konfidansyel.  Mersi.

 

MR DEPUTY SPEAKER

Kestyon siplemanter Onorab Esther.

 

HON NATASHA ESTHER

Mersi Mr Deputy Speaker.  Mr Deputy Speaker an vi sa gran mouvman dimoun ant Mahe, Pralen, La Digue eski Minis i kapab enform sa Lasanble ki stratezi ki Lapolis pe servi pou adres sa sityasyon pou evite ki Pralen pa ganny servi koman en landrwa kasyet par bann dimoun ki’n deza komet lofans serye lo lezot zil?

Eski Minis i kapab enform sa Lasanble si son Minister i annan en progranm an plas pou son bann zofisye ki pe travay lo Pralen pou ed zot delivre en servis pli efikas?  E si son Minister pe osi konsider adres sa konstrent transpor lapolis avek plan pou anvoy transpor lapolis ki dan en pli bon kondisyon lo Pralen.  Mersi.

 

MINISTER JOEL MORGAN

Mersi Mr Deputy Speaker.  Lo premye parti sa kestyon konsernan mouvman dimoun ant Mahe ek Pralen sirtou mouvman bann dimoun ki sispe bann kriminel, Mr Deputy Speaker i annan en Unit dan lapolis ki pe ganny devlope fortman e sa se Criminal Intelligence Unit.  Son fonksyon se pou donn lapolis lenformasyon lo tou bann diferan eleman kriminalite ki pe arive dan pei e donn lapolis an zeneral lenformasyon lo mouvman serten dimoun ki bann dimoun ki nou apel bann persons of interest – setadir bann dimoun ki ganny sispekte ki par deryer bann diferan krim prensipalman vol, house breaking and so on.

Mr Deputy Speaker sa ki nou’n fer en remark se ki, pandan ki kriminalite in stabilize enpe lo Mahe e in desann lo La Digue in annan en logmantasyon kriminalite lo Pralen e ler nou fer analiz, lapolis i vwar poudir i annan serten kriminel ki’n deplase sorti Mahe e nal plas zot lo Pralen e zot in fer serten aksyon lo Pralen ki’n donn sa logmantasyon dan bann krim an zeneral.

Ozordi Mr Deputy Speaker, i annan bokou bann dimoun ki veye kote lapolis i aktiv e an rezilta sa zot deplas zot dan en lot landrwa e zot fer bann aksyon.  Nou’n vwar sa resaman osi lo Mahe dan bann rezyon parey Anse Aux Pins, Anse Royale, Au Cap kot menm keksoz in arive.  Alor i nesesit en Criminal Intelligence Unit ki tre aktiv ki kapab donn sa lenformasyon lapolis ki zot kapab reazir dan en fason bokou pli proaktiv olye ki zot atann ki statistik i monte, statistik kriminalite i monte e answit i annan dan en fason en dekadans, en pert dan sa kontrol ki annan dan sa landrwa an term sirtou bann vol e bann house breaking.

An dezyenm parti sa kestyon konsernan formasyon bann zofisye.  Mr Deputy Speaker lapolis pe form son bann zofisye lo en baz kontinnyel.  Nou annan nou bann marnmay ki pe pos-segonder, ki dan Lakademi, i annan 55 la ki pou graduate an Out e sa i en sirk kontinnyel ki nou fer avek Minister Ledikasyon, kot sa bann zenn ler zot sorti Lakademi apre 18 mwan training zot vin lo nivo konstab dan lapolis.  Nou annan nou osi bann dimoun ki ganny pran koman bann special constable lo en kontra 2an e zot fer en formasyon debaz e swit-a-sa zot kontinnyen ganny training apre sa e evantyelman zot vin en formally fledge police officer depandan lo zot performans.  Nou annan nou osi bann progranm kontinnyel pour bann zofisye dan lapolis ki par egzanp la apre ki sa group i graduate an Out, sa group bann cadate i graduate an Out, i pou annan en training ziska Desanm pou bann zofisye a bann diferan moman lo bann diferan teknik policing.  E i osi annan Mr Deputy Speaker bann training spesyalize, par egzanp lo CID, lo fraud, lo bann diferan eleman deteksyon lo kote scientific support, tousala i arive non selman isi atraver bann loportinite ki nou gannyen avek bann diferan pei ki vin fer training isi e bann lorganizasyon parey UNODC me osi nou bann zofisye i al aletranze, zot al dan bann diferan pei pou zot ganny bann formasyon neseser pou ogmant zot nivo spesyalizasyon dan zot bann domenn spesifik ki zot ladan.

Mr Deputy Speaker e Pralen dan sa lobtik pa ganny obliye.  Pralen ek La Digue osi i benefisye avek menm formasyon, bann zofisye i benefisye avek menm formasyon ki bann zofisye lo Mahe i gannyen.  I en prosesis kontinnyel ki nou bezwen ranforsi pou asir parey mon dir toultan nivo profesyonnalizm lapolis i kontinnyen ogmante.

An sa ki konsern sa trwazyenm parti kestyon transpor, Mr Deputy Speaker lapolis i fer en fason ki i annan ase transpor a preski tou moman pou bann polisye deserz zot bann responsabilite.  I vre ki i kapab arive par egzanp si i annan en stasyon, en Kordgard kot i annan 2 transpor in ariv petet 2 lensidan preski o menm moman, toulede transpor in ganny deplwaye dan bann diferan landrwa, i ariv en trwazyenm lensidan a sa moman e la zot bezwen ganny rekour pou zot recall en lot Kordgard ouswa Santral ouswa NCSD, bann patrol NCSD pou kapab ed avek sa trwazyenm lensidan.  So i arive bann lenstans koumsa e nou pe travay pou esey minimiz e re-organiz en pti pe pou minimiz sa problenm.

Mon a donn zot en legzanp.  Lo kote trafik nou’n vwar poudir souvandfwa ler i annan aksidan sirtou lo aswar nou vwar poudir bann patrol NCSD, bann special patrol i bezwen ganny deplwaye pou al attain sa scene kot in annan aksidan.  I kapab annan bann dimoun ki blese gravman, i kapab annan bann lezot eleman dan sa aksidan.  Sa ki Patrol Section dan lapolis pe fer, Traffic Police, se zot in etablir en nouvo unit ki li i pou deal inikman avek sa sityasyon aksidan e osi fer bann sa ki nou apel sobriety checks, bann spot checks lo bann drayver ki pe dray anba lenfliyans lalkol.  E zot zot pou aktiv.  I en unit ki dedye zis pou sa e i pou aktiv ziska tar aswar lo en baz regilye sirtou lo bann zour kot i annan bann aktivite parey disco, lasemenn, dan weekend and so on enkli Dimans.  E zot zot fonksyon se pou respond to bann accident scenes, entervenir kot i neseser me anmenmtan zot fer sa patrol spesyal, sa special patrol pou detekte bann dimoun ki pe dray anba lenfliyans bann sibstans ilegal ouswa pe fer lezot aksyon par egzanp reckless driving, speeding bann keksoz koumsa.  So sa i en lot eleman ki pe ganny entrodwir pou esey ankor ennfwa anmenn enpe plis kontrol an sa ki konsern bann dimoun ki pe mal servi transpor lo semen.

Mr Deputy lo Pralen limenm li, nou asire, nou pe asire ki a tou moman nou annan ase transpor e nou pou kontinnyen travay pou fer sa arive.  Si nou bezwen lwe bann transpor tanporerman pou fer sa travay lapolis, sa i ganny fer.  E parey mon ti dir dernyen fwa dan Lasanble, pou terminen parey mon ti dir dernyen fwa dan Lasanble i annan sa batch transpor sorti Lenn ki nou pou atann pou siplemant sa vehicle fleet lapolis me ki pou le moman pa ankor materyalize e ki nou pe atann ki sa line of credit i ganny ouver pou lapolis kapab ganny sa bann transpor neseser pou li fer son bann travay ki enkli bann transpor spesyalize parey bann jeep – e bann jeep se bann lezot transpor ki i bezwen.  Mersi.

 

MR DEPUTY SPEAKER

Onorab Volcere.

 

HON MARC VOLCERE

Mersi Deputy Speaker.  Bonozur Minis ek ou delegasyon.  Mr Deputy Speaker mon ti a kontan demann Minis eski lapolis zot annan en prezans baze lo statistik ki nou’n gannyen, krim ki pe arive lo Pralen.  Zot annan en prezans lo por avek Airport petet pou detekte bann kriminel ki sorti Mahe pou desann Pralen, pou kapab vwar zot bezwen lo Pralen.  E si zot annan sa posibilite anba Lalwa pou fer sa bann dimoun si zot napa narnyen konkret apre ki zot in ganny investigate, kestyonnen pou zot kapab retourn kot zot in sorti.  Petet pou kapab redwir ek sa bann case ki nou pe vwar arive lo Pralen.

E dezyenmman Minis eski ou kapab konfirmen poudir Pralen pou annan en Unit Traffic ki pou deal avek zis size trafik.  Mersi bokou.

 

MINISTER JOEL MORGAN

Mersi Mr Deputy.  Mr Deputy sa kestyon i enn ki enpe sansib me sa ki mon kapab dir se ki lapolis atraver son Criminal Intelligence Unit i pe fer le neseser pou li kapab detekte mouvman sa bann dimoun both lo Airport e lo por pasaze Pralen, La Digue e Mahe pou kapab vwar enpe kote sa bann dimoun i mouvmante.  I deza annan lenformasyon ki zot gather, zot anmennen e bann diferan eleman, bann diferan departman lapolis, bann diferan seksyon lapolis i deal avek sa lenformasyon.  I kapab NCSD, i kapab bann unit dan NCSD parey CID, i kapab Intervention Team, Vice-Intervention Component ensidswit.

Pou fer sa bann dimoun retournen, par egzanp si zot sorti Mahe zot pe al Pralen, fer zot retournen i difisil akoz si zot pa pe konmet okenn akt kriminel, si zot pa lo wanted person’s list i pa dan Konstitisyon.  Zot annan zot drwa konstitisyonnel pou akse lib dan pei amwen ki i annan en lord Lakour lo zot pou limit zot dan zot mouvman dan tel ou tel landrwa pou tel ou tel rezon.  Pour le moman i napa sa an mazorite apard pou bann ki’n ganny anba Anti-social Behavior Order.  Me i annan ki lo bail ki bezwen raport kot Stasyon Lapolis lo en baz petet toule 2 zour ouswa toulezour ouswa toule 3, 4 zour dan en stasyon partikilye.  So sa dan en fason i limit zot osi pou reste dan en serten landrwa pandan sa peryod.

Mr Deputy Speaker lo sa dezyenm parti kestyon, eski Pralen i pou annan en unit trafik, larespons e lentansyon i wi.  Pralen i bezwen en unit trafik.  Pralen nou’n vwar atraver sa loperasyon kimannyer sityasyon i ete lo Pralen limenm li an se moman e lapolis pou mete en unit trafik lo Pralen, sa i en committment ki mon pe fer me i en kestyon bidze.  I en kestyon bidze e resours osito ki nou annan sa posibilite an term bidze pou fer li lapolis definitivman pou met sa an plas akoz i neseser.  Mersi.

 

MR DEPUTY SPEAKER

Onorab Jacqueline.

 

HON SULTANE JACQUELINE

Mersi Mr Deputy Speaker.  An vi ki lapolis i bezwen fer lentervansyon dan bann lensidan kriminalite ki arive.  Eski Minis i kapab enform sa Lasanble ki son Minister pe fer pou anmenn en lanket ki kredib pou asire ki serten zosifye ki abiz zot pourvwar zot ganny pini an rezilta zot move lentervansyon iresponsab parey resaman pe arive dan pei.  Mersi Mr Deputy.

 

MINISTER JOEL MORGAN

Mr Deputy Speaker lapolis in adopte en pozisyon tre kler lo move konportman ouswa bann akt kriminalite ouswa bann lezot aksyon son bann zofisye ki denigre ouswa ki degrade lapolis Sesel.  E Konmisyonner Lapolis ki la akote mwan e mon menm mwan koman Minis responsab pour Lapolis nou annan en Polisi zero tolerans pou labi par bann zofisye, move konportman par bann zosifye e bann lezot aksyon ki pou anmenn lapolis Sesel dan en leta kot i perdi son kredibilite vizavi piblik ki i pe deservi.  Alors i annan plizyer lenstans kot bann lanket i ganny fer atraver departman Lapolis Internal Affairs, seksyon Internal Affairs dan Lapolis e atraver bann enquiry ki Konmisyonner limenm li i inisye swit a bann lensidan ki arive.  Par egzanp ti annan en lensidan resaman lo Pralen kot sa pti garson ti perdi son lavi atraver en aksidan ki en polisye ti pe dray en lot e Konmisyonner in deside lans en lanket endepandan avek en Chairman endepandan Lapolis pou fer en lanket detaye lo sa issue e donn li zot rapor avek zot findings e zot rekomandasyon.  E baze lo la Konmisyonner i ava azir pou pran bann aksyon neseser pou vwar kimannyer prezan i pou al Delavan avek sa ki’n arive.

A nenport ki moman dan Lafors i annan bann keksoz ki arive e mon kapab donn sa lasirans avek Lasanble Nasyonal e avek tou dimoun ki alekout ki tou sa bann keksoz aksyon i ganny pran kont bann zofisye konsernen, investigation i ganny fer e si zot ganny trouve koupab bann aksyon disipliner depandan lo Police Force Act e depandan lo Penal Code i ganny pran kont sa bann dimoun konsernen.

Mr Deputy Speaker zero tolerans pou okenn move konportman dan Lapolis, dan Lafors e zero tolerans pou okenn labi pourvwar dan Lafors.  Mersi.

 

MR DEPUTY SPEAKER

Onorab Pierre.

 

HON DAVID PIERRE

Mesi Mr Deputy.  Bonzour Minis ek ou delegasyon.  Mr Deputy eski Minis i kapab enform sa Lasanble si sa nivo travay lo Pralen ki pe ganny fer par nou bann zofisye Lapolis pou ganny garde lo en baz lonterm oubyen eski i zis en mezir tanporer ?  E eski sa bann polisye sorti lo Mahe ki’n al travay lo Pralen i bezwen bann special allowances?

E lo nivo kestyon B, eski Minis i kapab enform sa Lasanble si zot annan okenn lentansyon entrodwir bann nouvo teknolozi ki annan lo Mahe dan kad sirveyans osi lo Pralen?  E eski nou’n annan sa kapasite pou deal avek forensics evidence ki’n kapab ganny anmase dan ka lanmor Msye Andy Laurence.  Mersi Mr Deputy.

 

 

MINISTER JOEL MORGAN

Mersi Mr Deputy.  Mr Deputy Lapolis in entervenir lo en baz stratezik lo Pralen pou metriz sa sityasyon e apreann bann dimoun ki responsab pou sa vag kriminalite ki nou’n vwar dan sa dernyen 2 mwan lo Pralen.  Fi e an mezir ki sityasyon i ganny stabilize e keksoz i retourn ver normalite la aprezan Lapolis i revwar son stratezi e i pa neseser pou li kontinnyen deploy la menm kantite resours ki ti demande okomansman akoz sityasyon natirelman i revin stab e i revin anba kontrol.  Me a tou moman anba sa nouvo stratezi Lapolis pou bezwen bokou pli proaktiv pou kapab sirtou regard bann statistik, sa ki nou apel bann crime statistics lo Pralen e dan bann lezot distrik par egzanp nou pe regard Anse Aux Pins, Anse Royale, Au Cap parey mon’n mansyonnen kot a sa moman kot i vwar poudir i annan en logmantasyon imedyatman i kapab pran aksyon e met sa sityasyon anba kontrol.  Mon krwar se la kot lapolis i annan sa travay pou li fer pou kapab vin pli proaktiv an sa ki konsern son responses pou bann tel sityasyon avanler ki i ariv sa lanpler ki nou’n vwar in arive lo Pralen pandan sa dernyen 2 mwan.  E sa pe ganny fer Mr Deputy Speaker.  Mon’n zwenn avek Lapolis, nou’n diskit lo la e tou zofisye sinyor ki konsernen dan sa loperasyon i onboard e mon krwar ki nou pou kapab pran en lapros bokou pli determinen dan sa nouvo travay ki zot pe fer.

An sa ki konsern teknolozi mon panse nou pe koz lo sistenm radyo, cameras and so on.  Larepons se wi.  Deza tou bann polisye ki pe travay lo Pralen kot i neseser zot annan zot radyo.  Lo kote cameras i annan sa proze ki mon ti’n mansyonnen avek Lasanble resaman ki pe ganny met an plas osi lo Pralen e sa i pou ganny fer fi e an mezir ki sa proze i ganny enplimante.

Lo kote forensics, si Lapolis Sesel i annan ase kapasite?  Mr Deputy Speaker pour le moman Lapolis Sesel i annan en bon kapasite lo kote forensics.  I napa tou sa ki i bezwen, i napa tou lekipman e son laboratwar i pa a sa nivo ki nou ti a kontan vwar li akoz fasilite fizik limenm pa permet pou kapab annan bann lespas pou kapab met bann nouvo lekipman e nou annan parey mon ti eksplike dernyen fwa dan Lasanble nou annan en plan ki’n fini pare pou en nouvo batiman pou Forensics Lab e pou bann zofisye ki travay dan sa area pou zot kapab aprezan annan nouvo lekipman ki neseser pou kapab fer en travay pli konplet.  Par egzanp DNA testing.  Bann diferan keksoz, par egzanp bann tyre prints ki ganny pran – par egzanp dan sa lensidan Msye Andy Laurence lo Pralen, bann tyre prints ti ganny pran ti ganny konpare avek sa ki ti ganny vwar lo lekor Msye Laurence e sa ti bezwen ganny fer Moris akoz ti napa bann konpetans neseser isi, bann fasilite neseser pou kapab fer sa accurately.  So tousala i bann konpetans ki Lapolis pou ganny dan lavenir e nou bezwen build up nou prop konpetans nasyonal an sa ki konsern forensics otan ki posib pou nou kapab azir rapidman e donn bann rezilta rapidman dan bann lensidan ki arive.  Mersi.

 

MR DEPUTY SPEAKER

Onorab De Commarmond.

 

HON CHARLES DE COMMARMOND

Mersi Mr Deputy Speaker.  Mr Deputy Speaker eski Minis i kapab eksplik nou Lasanble si i krwar i byen ki Seychelles News Agency i poste tou sa bann lenformasyon lo krim lo Pralen lo internet e fer ki nou dyaspora e touris etranze i komans enkyet e kestyon nivo kriminalite isi e komans per pou vin Sesel.  E pa i montre en kapasite nou Lapolis pou deal avek krim ler nou pe rod led avek Interpol pou deal avek bann krim lokal parey sa bann lo Pralen la.  Mersi.

 

MINISTER JOEL MORGAN

Mr Deputy Speaker si zot pe demann mwan en lopinyon ki mon krwar se leka konsernan Seychelles News Agency ki’n met sa online, mon pou dir ki i difisil pou mwan donn ou en lopinyon lo la akoz ozordi media i annan akse lib avek lenformasyon dan nou pei e zot met pratikman sa ki zot anvi an sa ki konsern lenformasyon lo bann diferan keksoz ki arive dan pei lo internet.  I en keksoz ki nou bezwen adapte avek, nou bezwen evolye avek e nou bezwen osi kapab revin avek bann mesaz pozitiv pou dir, bon in arive sa me anmenmtan Lapolis in reazir e se sa ki mon’n dir avek Lasanble Nasyonal ozordi atraver tou sa bann statistik ki mon’n donnen ki mon pou donn avek Seychelles News Agency, mon pou dir zot vwala e avek nenport ki ankor ki anvi pran sa bann lenformasyon, vwala Lapolis in reazir e in metriz sa sityasyon e ki Pralen i reste en landrwa touristik ki safe an zeneral pour bann touris e pour nou bann rezidan osi kapab prezan ladan.

Dezyenm parti sa kestyon.  Eski i demontre kapasite Lapolis lokal, Lapolis Sesel si nou’n anmenn bann zofisye Interpol ek bann zofisye sorti Lapolis Kenya pou vin travay lo sa case ?  Mon larepons se wi.  Lapolis Sesel i konpetan.  Nou annan nou bann tre bon detective ki travay dan Lapolis Sesel.  Se pour sa rezon ki nou annan nou plis ki 700 kriminel ki dan prizon Montagnee Possee, Marie-Louise avek Coetivy.  E se pour sa rezon ki nou kapab maintain sityasyon anba kontrol malgre sa logmantasyon dan bann aktivite kriminalite dan nou pei relye prensipalman avek nou problenm drog ki nou pe fer fas avek.

Mr Deputy Speaker rezon ki Lapolis, ki Konmisyonner in envit bann zofisye a leksteryer pou vin partisip dan sa lanket set akoz i ti anvi ganny en lopinnyon, en dezyenm lopinnyon e en lasistans pou kapab build up sa case pou get to the bottom of it pou nenport ki ki responsab i kapab fer fas avek lazistis.  Akoz sa ki’n arive avek Msye Laurence i pa akseptab.  I en lensidan tre kler hit and run.  E sa i en aksyon kriminel e sa i en keksoz ki nou bezwen vwar lekel ki responsab.  E dan en lanket i normal ki en lafors lapolis i fer lapel avek son bann lezot koleg dan bann lezot lafors pou donn en koudmen.  Par egzanp mon a donn zot en legzanp ler i annan sa fame pirat Msye Afweyneh ki ti ganny arete, i ti ganny anmennen La Belzik, i ti ganny arete pou fer fas avek bann diferan sarz – Sesel ti ede, Sesel ti donn en koudmen atraver lenformasyon lo bann diferan keksoz ki Msye Afweyneh in fer e Sesel in kontribye dan en fason signifikativ an term levidans ki bann polisye Berge i kapab servi lo envestigasyon kont sa pirat Afweyneh.  E in arive dan lepase kot Sesel in kolabore avek bann lezot pei osi pou donn sa koudmen lo bann lezot travay ki lapolis i fer e anmenmtan nenport ki pei i kapab demann lasistans Interpol e zot fer li.  Kot i neseser zot fer li pou zot kapab annan sa breath, sa profonder sa lenvestigasyon kot i neseser.  Mersi.

MR DEPUTY SPEAKER

Bon avek sa nou pou ariv alafen nou Question Time pour ozordi.  Mon ti a remersye Minis avek son delegasyon e eskiz zot parmi nou.

 

(MINISTER WAS EXCUSED FROM THE HOUSE)

 

MR DEPUTY SPEAKER

Bon nou pou kontinnyen travay lo nou Order Paper .  Avek nou nou annan Vis Prezidan Larepiblik Msye Danny Faure ki pou vin prezant Public Holidays (Amendment) Bill, 2014.  Nou a ti a kontan swet labyenveni Vis Prezidan Faure avek son delegasyon.  Me avan nou al lo la nou annan en First Reading ki nou bezwen fer.  Mon envit Deputy Clerk pou fer li.

 

MADAM DEPUTY CLERK

This Act may be cited as the Merchant Shipping (Amendment) Act, 2014.

 

MR DEPUTY SPEAKER

Bon mon ava envit Vis Prezidan Faure pou fer prezantasyon sa Bill.  Non nou’n sot prosedir.  Mon ava envit en Mosyon pou Second Reading.

 

HON MARIE-ANTOINETTE ROSE

Mr Speaker anba Order 64(2) mon move ki nou lir sa Bill en dezyenm fwa.

 

MR DEPUTY SPEAKER

Okenn Manm ki segonde?

 

HON CHARLES DE COMMARMOND

Mr Deputy Speaker Mosyon in ganny segonde.

 

MR DEPUTY SPEAKER

La aprezan nou annord pou envit Vis Prezidan pou prezant son Bill.  Proceed Vis Prezidan.

 

VICE PRESIDENT DANNY FAURE

Onorab Deputy Speaker, Onorab Leader of Government Business, Onorab Leader of the Opposition, Onorab Manm Lasanble Nasyonal.  Le 18 Zen sa lannen alokazyon nou Lazournen Nasyonal Prezidan Larepiblik ti dir e mon site; ‘Listwar en nasyon, listwar en pep i konpoze par serten letap, serten moman determinan ki karakteriz li e definir son parkour.  Pou nou enn sa bann moman desisif se le 18 Zen.  Sa dat i ankre dan memwar kolektif Seselwa.  I ouver en sapit kle dan listwar Sesel, i komemor sa zour ki trwazyenm repiblik ti ne, zour ki nou nasyon ti adopte en nouvo lalwa siprenm nou Konstitisyon’.  Lafen sitasyon.

Mr Deputy Speaker i vreman en gran loner e osi en plezir lo lapar Gouvernman pou ozordi prezant avek nou Lasanble Nasyonal en lamannman lo Lalwa ki gouvern konze piblik.  E mon ti a kontan rekomann avek Lasanble Nasyonal ki le 18 Zen i dezormen vin Lazournen Konstitisyon.

Mr Deputy Speaker ler nou koz lo nou Konstitisyon mon ti a kontan ki nou fer referans avek bann parol nou preanbil.  Nou lepep Seselwa rekonesan anver Bondye tou pwisan akoz nou reste dan enn bann pli zoli pei dan lemonn.  Touzour konsyan ki Sesel i inik e frazil.  Konsyan nou listwar kolonyal avan ki nou ti vin en repiblik endepandan.  Konsyan e fyer ki koman desandan diferan ras nou’n aprann viv ansanm koman en sel nasyon, avek lagres Bondye e nou kapab servi koman legzanp en sosye milti-rasyal armonye.  Ver lafen sa preanbil nou fer en deklarasyon sonamel, nou lobligasyon ferm dan nou trwazyenm repiblik pou mentenir Sesel koman en Leta endepandan politikman e ekonomikman.  Sofgard son sovrennte e lentegrite teritorial.  Soutenir lalwa ki baze lo bann drwa ek laliberte imen fondamantal ki’n etablir dan sa Konstitisyon par respe pou legalite e dignite bann etre imen.  Devlop en sistenm demogratik ki ava asir en lord sosyal adekwat e progresiv ki ava garanti manze, lenz, lozman, ledikasyon, lasante, en standar lavi ki ogmante konstaman pour tou Seselwa.  Partisip aktivman dan en lekonomi soutenab ek devlopman sosyal nou sosyete.  Egzers nou bann drwa ek laliberte endividyel an tenan kont bann drwa ek laliberte lezot ensi ki lentere komen.  Ede prezerv en lanvironnman sen e sof e fonksyonnel pou nou menm ek nou prosperite.  Nou adopte e akord nou menm sa Konstitisyon koman lalwa fondamantal e siprenm nou repiblik souveren e demogratik.

Mr Deputy Speaker dan son diskour osi alokazyon nou Lazournen Nasyonal le 18 Zen, Prezidan Larepiblik ti dir e mon site; ‘Sa dat i senboliz nesans en pep, lespwar pou lavenir, manifestasyon laviktwar, kouronnman en lalit.  I osi reprezant linite en pep dan en gran ferver patriyortik.  Le 29 Zen i en dat enkontestab dan nou listwar.  I en dat ki rankontre linaminite parmi tou Seselwa.  En dat inifikater, en dat ki rasanble nou otor bann valer ki fer larises boner e byennet sa pep ki nou ete.  Linite nasyonal, patroyotizm, solidarite, fraternite, lanmour e respe pou nou prosen’.  Fen sitasyon.

Mr Deputy Speaker mon ti a kontan rekonmann osi avek nou Lasanble Nasyonal ki nou donn nou sipor pou fer ki le 29 Zen ki nou Lazournen Lendepandans i osi ganny selebre koman nou Lazournen Nasyonal.  Mersi.

 

MR DEPUTY SPEAKER

Bon nou pou al lo deba lo sa Bill, e mon’n ganny en konpran ki anvi ki Lasanble fek fer gran deba lo Mosyon an se ki konsern sa size, i annan en konsansis ki zis le de Leaders ki pou pronons zot lekor lo la e mon ava envit Leader Lopozisyon pou fer son lentervansyon.

 

HON DAVID PIERRE

Mersi Mr Deputy.  Bonzour Vis Prezidan ek ou delegasyon.  Mr Deputy mon a komans kot ou’n terminen e wi mon ava dir poudir 2 ou 3 semenn pase nou ti fer en gran deba lo sa size le 29 Zen pou ranplas le 18 Zen koman nou Lazournen Nasyonal.  I pa petet fer sans pou nou repet sa deba.  Me sa ki enportan ozordi i se ki listwar pe ankor ganny kree otour 2 pli gran zour dan listwar nou pei.  Le 18 Zen lefe ki i pe sorti koman nou Lazournen Nasyonal sa pa devret Mr Deputy fer sa dat perdi son signifikans dan listwar nou pei.  Valer le 18 Zen i reste akoz sete sa zour kot nou ti annan konkretizasyon, formasyon nou trwazyenm repiblik avek re-entrodiksyon multi-party democracy e se sa ki’n permet nou koman en nasyon, koman en pep pou fer bann gran reform demogratik ki nou ankor pe kontinnyen fer e pou fer bann gran reform ekonomik ki nou ankor pe kontinnyen fer.  Alor sa dat i en dat of course istorik but not less important ki le 29 Zen e donk son signifikans, son valer i devret kontinnyen ganny selebre.  Nou’n kapab anmenn en Konstitisyon sa zour ki’n donn Seselwa sa vre laliberte e bann drwa sakre ki nou tou nou bezwen respekte e ki Leta i bezwen respekte e prezerve atraver bann lalwa ki modern e atraver bon laplikasyon sa bann lalwa.  Le 18 Zen i donk reste koman en dat istorik e tre enportan dan nou listwar donk parey nou pe trouve i reste koman en konze piblik, mon krwar tou Seselwa i apresye lefe ki zot konze piblik i reste akoz zisteman i en zour ki tou Seselwa i devret tre fyer pou selebre akoz parey mon’n dir le 18 i sa fondasyon, i the very existence of nou trwazyenm repiblik ki fonde lo sa Konstitisyon aktyel ki nou lalwa siprenm parey in ganny dir dan sa Lasanble this morning.

Mr Deputy lo lot kote mon vwar sa pa ki pe ganny fer, ki pe ganny pran koman enn parmi sa ki nou bezwen pran.  Bann pa ki nou bezwen pran koman en pep, koman en nasyon pou attain linite nasyonal, i byen akoz i enn bann pa konkret dan sa bon direksyon.  Me Mr Deputy lalit ver linite nasyonal i enn ki long e in ganny debat dan nou Lasanble.  Mon panse alors ki Gouvernman i ava montre ankor plis e sa vre kouraz e lodas pou pran bann lezot pa konkret parey sa enn e al pli lwen, al pli profon pour ki nou ariv ziska lo bout dan nou lobzektif parey mon ti dir dan Mosyon pou attain sa vre linite nasyonal.  En size deba ozordi, en size ekstrememan enportan pou lavenir nou Sesel e lavenir nou pep.

Parey ki sa size in ganny adrese vitman, sa size le 29 Zen pou vin nou Lazournen Nasyonal in ganny adrese vitman e konkretman, mon osi swete ki lezot size otour linite nasyonal i ganny adrese osi vitman e avek menm volonte politik e avek menm kalite vites.  Mon pe toudmenm Mr Deputy Speaker, mon pe toudmenm swete ki pei i kontinnyen son larout ver sa nouvo direksyon ki zisteman i en bon direksyon.  Se sa ki mon annan poudir lo sa size Mr Deputy.  Me avan mon terminen mon pe rod en leklersisman lo sa size le 29 Zen, lo ki fason, kimannyer konmsi lepep pou apel li prezan, Lazournen Lendepandans, National Day parey le 18 Zen nou pa ti servi – wi i ti Lazournen Kontitisyonnel kot nou ti adopte nou nouvo Konstitisyon trwazyenm repiblik nou pa ti apel li Lazournen Konstitisyon me nou ti apel li National Day.  La aprezan nou pou apel li Lazournen Konstitisyon.  Le 29 Zen in touzour ganny apele Lazournen Lendepandans me la nou pe sanz li e nou pe anvoy li National Day, en pti pe petet Minis i kapab koz lo la, ki ekspekte letan le 29 Zen i arive, ki i eksepte Seselwa i apel sa lazournen.  Si nou dir li le 29 Zen i Lazournen Nasyonal, si nou dir li Lazournen Nasyonal, si nou dir li Lazournen Lendepandans.

Avek sa pti kestyon pour Minis mon ava dir avek Deputy Speaker e Lasanble Nasyonal ki mon pou donn mon sipor sa lamannman.  Mersi Mr Deputy.

 

MR DEPUTY SPEAKER

Onorab Leader Zafer Gouvernman.

 

HON MARIE-ANTOINETTE ROSE

Mersi Mr Deputy.  Mr Deputy sa lamannman dan lalwa ki gouvern bann konze piblik i enn ki tre senp, me enn ki annan gran lenplikasyon lo kwa ki nou’n akonplir koman en nasyon okour sa dernyen 3 deseni e kwa ki nou oule akonplir dan bann lannen ki vini.  I en Lalwa istorik akoz nou zenerasyon pe ankor ennfwa ganny demande pou ekrir en nouvo sapit nou listwar kot nou lepase pe vin reklanm son vre plas kot nou pe vin konkretiz e onor travay sakrifis ki nou bann gran paran ti fer ler zot ti debout for e demann Lendepandans pour Sesel e plitar bann ki ti travay ansanm kot-a-kot pour ki Sesel i ganny li enn bann Konstitisyon pli modern dan nou rezyon.

Mr Deputy nou isi dan Lasanble Nasyonal nou konpran tre byen valer nou Konstitisyon.  Nou viv li toulezour.  Nou propoze Mr Deputy ki le 18 Zen Lazournen nou Konstitisyon i ganny servi pou met an valer bann prensip nob ki soude dan nou Konstitisyon.  En Konstitisyon i Lalwa siprenm nou pei e nou pei in deza fer en refleskyon profon lo revizyon nou Konstitisyon dan ki Lasanble Nasyonal pou ganny sans fer son kontribisyon.  Moman i la alors pou nou reflesir tre byen lo sa Lalwa siprenm pou lavansman nou demokrasi, pou proteksyon drwa lendividyel, pou plis devlopman sosyal, politik e ekonomik nou pei, pou nou atenn bann gran rev dan sa nouvo Sesel.

Mr Deputy Speaker depi ki Prezidan Michel e Kongre Parti Lepep ti pran en desizyon ki dezormen nou Lazournen Nasyonal pou ganny selebre zour Lendepandans bokou lopinyon in ganny met devan me in en desizyon inanim parmi popilasyon e diverzans lopinyon politik.  Savedir nou tou nou’n tonm dakor ki Lazournen Lendepandans pou vin nou Lazournen Nasyonal.  Deba isi dan nou Lasanble in ganny fer e bann premye pa pour ki sa i arive in fini ganny fer par Gouvernman e ozordi nou Lasanble nou bezwen fer nou bout e legalman proklanmen ki Lazournen Nasyonal pou ganny selebre le 29 Zen e ki le 18 Zen alors pou vin Lazournen nou Konstitisyon, zour ki nou Konstitisyon ti ganny promilke e vin en dokiman vivan.

Ozordi nou pase i retournen pou reklanm son plas veritab dan sapit listwar nouvo Sesel e nou Lasanble koman zanfan sa pei nou tre fyer pou fer nou kontribisyon anver sa akt non selman senbolik e legal me enportan e profon pou lavenir nou pei.  Pou nou Lendepandans e pou nou Lendepandans en pei i al odela en dat e parey Prezidan Michel ti fer resorti dan son diskour zour Lendepandans le 29 Zen i en dat inifikater, i en senbol linite nasyonal, i sa sel dat ki ralye tou Seselwa deryer drapo Sesel.  Lendepandans pour Sesel in komanse par travay dir en pti group zonm ek fanm Sesel ki ti konnen ki vre larout ver progre sete debout lo ou 2 lipye e gouvern ou prop desten.  Les li alors ganny rikorde dan listwar nou senkyenm Lasanble Nasyonal pou formelman rekonnet zefor e sakrifis nou père et mere fondater pou anmenn Lendepandans pour Sesel e tou Seselwa.  Lendepandans pour Sesel i vedir Lendepandans ekonomik kot nou asiz ansanm e rod meyer fason pou zer nou lekonomi.  Listwar resan in prouve ki tou pei i enter-konekte an sa ki konsern komers e lekonomi me sa enn ki pli rezilyan i sa enn ki kapab tenir bann sok eksteryer e kontinnyen tenir stil lavi son pei lo en o nivo.  Lendepandans ekonomik pa vedir pa depan lo larestan pei, i vedir annan en lekonomi ki kapab sibir sekous mondyal.  Lendepandans ekonomik ti komans avek en demars dan bann lannen ‘80 pou fer marse bann lendistri debaz isi Sesel.

Ozordi anba direksyon Parti Lepep nou pei pe koz sikse reform, nou pe koz lekonomi ble, nou pe koz leksplwatasyon delwil si zanmen i trouve o fon nou lanmer, nou pe koz soutenabilite reform ekonomik.  Ozordi nou Lasanble alors i zwenn sa zefor nasyonal pou nou kontinnyen fer grosi sa gato ki soutenir nou lekonomi, ki soutenir sa nivo devlopman ki nou’n arive.  Nou konnen ki sa zefor i enn ki merit linite nasyonal, enn ki merit met de kote nou diverzans, enn ki merit menm spirit e menm lanvi ki nou Lendepandans ti anmennen.  Lendepandans pour Sesel i vedir en Lendepandans sosyal e detasman avek en mantalite soubaltern ki bokou pei kolonyal i sibir apre zot Lendepandans.  En panse ki malerezman i determin nou aksyon i fer nou parfwa krwar ki nou ankor enferyer ki sa ki sorti aletranze i petet pli bon ki sa ki pour nou, i anmenn prezedis rasyal ouswa gender.  Lendepandans sosyal i vedir Lendepandans kot en mantalite soubaltenn e ozordi nou bezwen koman en pei debout fyer ki enn fwa nou ti kolonize me nou bezwen debout nou latet anler koman en nasyon.  En nasyon Seselwa, ras melanze, divers kwayans relizye, fanm ek zonm akote kanmarad, en zoli nasyon Mr Deputy.

Sa mantalite soubaltern ti komans ganny detrir avek en sistenm ledikasyon ki ti pou edik nou zenn lo lanmour prop e valer pou son prop lekor.  En sistenm ledikasyon ki non selman donn lenstriksyon formel me ledikasyon sosyal pour lavi.  I vin avek en sistenm lasante e en mantalite pou nou pran ka avek nou prop lasante, i vin avek en mantalite travay, travay dir pou ganny sa ki ou anvi gannyen.  I vin avek lanmor pou ou prosen e lanmor pou tou sa ki otor ou, i vin avek lanvi prezerv sa bon fason fer.

Mr Deputy mon krwar ki ler nou pe pas sa Lalwa, nou koman bann dirizan lokal nou bezwen ralye nou zefor pou fer en retour ver Lendepandans Sosyal nou pei.  Remet an valer bann bon fason viv, bann bon fason fer, bann desizyon ki zis e drwat e fer tou dimoun konnen ki zot responsab an premye lye pour zot prop byennet e progre.  Nou Gouvernman in fer tou sa ki i kapab fer pou byennet son pei e bokou i ankor pe ganny fer me larestan i depan lo sak endividi e sa lanvi pou sorti anba sa mantalite soubaltenn.

Lendepandans i vedir annan en idantite Mr Deputy, konnen ki nou ete koman en nasyon, konnen ki nou en nasyon Seselwa, en pei souveren, en pei ki desin son prop desten, en pei ki diriz son prop lekor, en nasyon ki promouvwar son prop valer dapre son kiltir e tandans.

Mr Deputy mon remet an valer ki savedir Lendepandans pour en nasyon akoz nou lo kote parti mazoriter nou anvi sezi sa moman la pou ofer nou kontribisyon anver selebrasyon nou Lendepandans dezormen.  En zour ki nou krwar merit ganny marke avek bokou lanfaz lo sa prosen zenerasyon, met devan zot sa bann valer ki fer nou vreman en pei endepandan.  Remet devan zot ki savedir annan en lidantite en nasyon, refer zot konnen e apresye nou pase, konnen lekel ki ti lite pour Lendepandans, konnen e apresye akoz en pei i bezwen Lendepandans, konnen e apresye akoz en pep i merit travay dir pou tenir son Lendepandans, konnen akoz ozordi zot merit sezi tou sa loportinite pou avanse, pou devlope, pou fer sa ki bon e non pa sa ki pa bon, pou tenir e fabrik nou sosyete e bann bon fason fer ki fer nou kreol Seselwa ki pou kontinnyen fer nou en nasyon fyer.

Mr Deputy nou prosen zenerasyon i merit konpran ki savedir viv byen ansanm, rezourd konfli dan en fason entelizan e non pa destriktiv.  Felisit e ankouraz lakonplisman.  En zenn i merit konnen ki sete Lendepandans ki’n anmenn sa vast loportinite ki annan ozordi e ki drog e prostitisyon pou selman anprizonn son lespri e sa pa onor lakoz nou Lendepandans.  En zenn i merit konnen ki se selman atraver travay dir, pran ka avek son lekor, annan lanmor prop e respe ki i pou kapab vin en veritab sitwayen.  Okenn lezot konportman i met akoz lalit ki’n anmennen pour nou Lendepandans.

Mr Deputy alors nou lo kote parti mazoriter nou krwar ki i annan en gran travay ki nou merit fer avek nou lazenes pou zot konpran kwa ki nou pe fer ozordi isi dan sa Lasanble e akoz zot merit donn en koudmen serye anver lavansman nou pei dan sa prosen letap dan sa nouvo Sesel.

Mr Deputy pou terminen les mwan sit zot kwa ki Prezidan ti dir le 29 Zen 2014.  “Dear compatriots, we have a duty and obligation to preserve and build on our achievements of the last 38 years.  The freedom which the Seychellois nation earned after a very hard struggle would have been in vain if we do not overcome divisions created needlessly by political polarization. Independence Day – I repeat – belongs to all Seychellois, without exception.  On this day we put aside all our differences.  It is on this day that we rededicate ourselves to the cause of the Seychellois nation, to the construction of the New Seychelles.  It is on this day that the flame of national unity, patriotism, spreads it light on all Seychellois.  It is the day that we stand proudly, and proclaim solemnly these words from the preamble of our Constitution: “Aware and proud that as descendants of different races we have learnt to live together as one Nation under God”. Mr Deputy bann parol nou Konstitisyon ki nou Vis Prezidan fek repete bomaten avek nou.

Mr Deputy sa paragraf dan diskour Prezidan Michel i dir tou.  I enspir nou pou al odela sa ki nou krwar nou kapab fer, i tir dan nou sa pli gran patriyot, sa pli bon Seselwa, sa pli bon zanfan nou pei.  Avek sa Mr Deputy nou lo kote parti mazoriter nou pou siport sa Proze de Lwa ki devan nou san okenn rezervasyon.  Mersi.

 

MR DEPUTY SPEAKER

Mon osi vwar ki ou’n anvoy en pti amannman.  Mon pa konnen si ou oule dir de mo lo la tou.

 

HON MARIE-ANTOINETTE ROSE

Mr Deputy sa lamannman i en senp lamannman.  I fer tre kler ki Lazournen Lendepandans pou osi ganny nonmen koman Lazournen Nasyonal.  Mersi.

 

MR DEPUTY SPEAKER

Right of Reply Vis Prezidan.

 

VICE PRESIDENT DANNY FAURE

Mr Deputy Speaker mon ti a kontan dir Mersi le 2 Leader dan nou Lasanble Nasyonal pour bann praol ki zot in eksprimen lo sa Proze de Lwa ki devan nou.  E mon osi welcome bann lavansman bann nide dan lafason ki pei an zeneral i merit selebre le 18 Zen lannen prosen ki vin nou Lazournen Konstitisyon e ki bann levantay e konteni bann aktivite ki devret gid nou lannen prosenn ler nou selebre nou lafet Lendepandans e menm zour i vin nou Lazournen Nasyonal.  Mon vwar ki deza nou bann Leaders isi pe reflesir e mon felisit zot pour sa bann pa forward thinking ki pe ganny fer.

Mr Deputy Speaker mon ti a kontan en mo spesyal pou sakenn de zot ozordi.  I pa zis en azar istorik.  I pa zis en sanzman senp ki pe ganny fer.  Lo sirfas i paret ki set sanzman, en sanzman en dat pour en lot dat.  Me pli profon, pli fondamantal set en refleskyon, en lalimyer ki pe sers en pli gran boner pour Sesel fas a en pep se son pei ki pe debout.  Se Sesel ki atrakte li e dan sa demars Prezidan avek tou bann ki pe swiv li e lepep ki pe swiv pe sers kwa ki kapab ini nou pei plis e sa set en manifestasyon konkret e le 18 i ava ranforsi nou kwayans, nou konviksyon dan Lalwa siprenm nou nasyon ki garanti nou laliberte, nou drwa koman sitwayen sa pei ki parfwa nou under estimate me ki vre dignite tou zonm ek fanm Seselwa pou li kapab viv dan son laliberte e ki nou lalwa fondmantal i donn li sa lankadreman.  E ki osi i annan bann committment e lobligasyon delapar sitwayen an term son responsabilite, son drwa, bann proteksyon -  tout en travay pou plizyer lannen pou fer ki bann entitlement, bann drwa i ganny respekte, drwa ledikasyon, drwa lasante i bann drwa ki pa’n zis vin la, in zis aparet, in zis artifisyel me ki rezilta tout en progranm, progranm lalit pou met zonm o sant nou devlopman.

E lot laspe se Lendepandans pa devret en keksoz ki diviz nou, set en dat ki ini nou plis ankor, plis ki zanmen, se Sesel vizavi son pep.  Se son pep ki anbras son pei e vwala kot nou pe ale, set en parkour.  Sa en zenerasyon a en lot zenerasyon.  I pa fini la e si i annan okenn dout ki i annan serten size ki pa ganny adrese mon krwar Prezidan i dir ki si i annan okenn size ki ganny diskite ek annan en konversasyon otour bann size, ki i annan en dyalog otour sa bann size dan laresers pou en konsansis me ki toultan Sesel i renye.  Fodre pa bliye sa en.  Ki toultan Sesel i the winner.  Set en demars pou al an avan pou met Sesel toultan premye.  E lentere Sesel toultan premye.

Donk mon krwar se sa ki gid Prezidan, ki gid nou – Sesel.  Sesel e lentere Sesel.  Sesel toultan, Sesel touzour e Sesel pou toultan gid nou.  E ler nou koz lo linite nasyonal fodre nou plas Sesel an avan.  Si nou koz lo linite nasyonal e nou plas nou lekor nou pa pe al devan.  Si nou met nou Sesel devan e nou koz lo linite nasyonal Sesel pou toultan renye e pou toultan annan sa ki byen, sa ki bon, sa ki ris pou sa pep ki nou debout pou defann.  Mersi Mr Deputy.

MR DEPUTY SPEAKER

Bon mon oule zis enform zot ki sa senp amannman ki’n ganny propoze i pe ganny konsidere anba Order 67(1)So sa Bill as amended nou pran en vot lo son prensip e merit zeneral.  Tou bann ki anfaver lev zot lanmen?  Inanim.  Mon a ganny en Formal Second ReadingRequest mic.  I annan enn ki on parla.  Non?

 

MADAM DEPUTY CLERK

A Bill of an Act to amend the Public Holidays Act Cap 190.

 

MR DEPUTY SPEAKER

Mon a ganny en Mosyon pou sot staz Komite.

 

HON AMRIE-ANTOINETTE ROSE

Mr Deputy anba Order 91(1) mon move ki nou sot staz Komite.

 

MR DEPUTY SPEAKER

Okenn Manm ki segonde?

 

HON CHARLES DE COMMARMOND

Mon segonde Mr Deputy Speaker.

 

MR DEPUTY SPEAKER

Nou pran en vot lo la.  Tou bann ki anfaver nou sot staz Komite ?  Okenn ki kont ?  So nou sot staz Komite.  Mon a ganny en Motion for Third Reading.

 

HON AMRIE-ANTOINETTE ROSE

Mr Deputy anba Order 71(1) mon move ki nou lir sa Bill en trwazyenm fwa.

 

MR DEPUTY SPEAKER

Okenn Manm ki segonde?

 

HON CHARLES DE COMMARMOND

Mon segonde Mr Deputy Speaker.

 

MR DEPUTY SPEAKER

Nou pran en vot final lo sa Bill.  Tou bann ki anfaver lev zot lanmen ?  Inanim.  Bill in ganny aprouve.  Mon a ganny en Third Reading.

 

MADAM DEPUTY CLERK

This Act may be cited as the Public Holidays Amendment Act, 2014.

 

MR DEPUTY SPEAKER

Bon avek sa nou’n fini lo sa premye Bill.  Mon a remersye Vis Prezidan e mon ava eskiz li parmi nou ek son delegasyon.

 

(Technical Problem)

 

(LUNCH)

MR DEPUTY SPEAKER

Bon.  Nou a dir bonn apre midi tou Manm e tou dimoun ki la avek nou.  Nou a kontinnyen nou travay lo Order Paper.  E avek nou apre midi, nou annan Minis pour Kiltir e Touris, Minis Alain St Ange e son delegasyon e nou ti a kontan swet li labyenveni.  Minis St Ange pou vin prezant Creole Institute of Seychelles Bill, 2014.  E avek sa mon a ganny en Mosyon pou Second Reading.

 

HON MARIE-ANTOINETTE ROSE

Bonn apre midi Mr Deputy.  Mr Deputy, anba Order 64(2) mon move ki nou lir sa Bill en dezyenm fwa.

 

MR DEPUTY SPEAKER

Okenn Manm ki pou segonde?

 

HON CHARLES DE COMMARMOND

Mr Deputy Speaker, mon segonn sa Mosyon.

 

MR DEPUTY SPEAKER

Bon, avek sa mon ava envit Minis pou entrodwir son Bill.

 

MINISTER ALAIN ST ANGE

Mersi Mr Deputy Speaker.  Mr Deputy Speaker, ozordi nou isi dan sa Lasanble pou prezant e pou diskit Proze de Lwa, pou fer Lenstiti Kreol Sesel vin en Lorganizasyon endepandan, anba parasol Departman Kiltir dan Minister Touris avek Kiltir.

Sa ki enteresan avek sa Proze de Lwa Mr Deputy Speaker, se ki Lenstiti Kreol i reprezant en letap tre revolisyoner dan nou listwar.  Nou, kot Departman Kiltir, nou dir sa i en letap revolisyoner akoz nou Gouvernman ti pran bokou desizyon lo nou lalang maternel, lo sa lalang kreol.  Premyerman, par fasilit son pasaz sorti koman en lalang oral pou vin en lalang ekrir.  Answit, pou fer li vin en lalang ledikasyon, avek lentrodiksyon kreol dan lekol an 1982 e pli enportan, deklar li koman enn nou lalang Nasyonal, akote sa 2 lalang enternasyonal ki listwar in fer nou idantifye avek, savedir angle ek franse.

Mr Deputy Speaker, enportan pou fer resorti se ki Gouvernman pa ti zis deklar kreol en lalang Nasyonal akote angle ek franse, me in donn li en stati egal avek sa 2 lalang enternasyonal, dan sa dokiman sakre ki definir nou Nasyon.  Sa se dan nou Konstitisyon limenm.  Lefet ki kreol i osi lalang ofisyel nou Lasanble Nasyonal, i montre krwayans Sesel dan son lalang maternel e lanfaz ki i mete lo nou lidantite Nasyonal.  Sa i osi enn bann desizyon pli enportan ki Gouvernman ek nou pei, in pran vizavi nou lalang maternel.

Mr Deputy Speaker, kreol i nou lalang.  Kreol i nou kiltir.  Kreol i nou lidantite.  An dot mo, kreol se nou.  “Sesel sa” i sa 2 mo kreol ki reflekte sa lafyerte Seselwa dan son lidantite kreol.  I pa etonan donk, ki depi 1981, Gouvernman Sesel ti pran sa desizyon pou kree en Lenstitisyon pou zer devlopman kreol koman en lalang.  Sa letan, Lenstiti Kreol ti zis en Seksyon dan Minister Ledikasyon e son bi prensipal sete pou asire, asir devlopman kreol, afen ki i ti a kapab deservi tou fonksyon lalang ki pep Seselwa ti pou bezwen.  Sirtou tranzisyon sa lalang pou vin en lalang ledikasyon.  Pou servi koman en lalang literer e evantyelman en lalang servis piblik.  Pli gran lanfaz byensir ti ganny mete lo kreasyon materyo laprantisaz, deskripsyon gramatikal e kreasyon dokiman diktatik pou fasilit son pasaz de loral a lekri.

Me Mr Mr Deputy Speaker, lalang i en keksoz ki vivan e Lenstiti Kreol ti vwar li deplizanpli pe zwe en pli gran rol, non selman dan zesyon devlopman kreol, an fonksyon lansennyman ek ledikasyon an zeneral, me osi dan lavi kiltirel nou pep Seselwa.

Mr Deputy Speaker, an 1987, Gouvernman ankor enn fwa ti vwar li neseser pou fer Lenstiti Kreol vin en Lorganizasyon separe avek Seksyon Kreol dan Minister Ledikasyon e donn li son prop batiman, avek en misyon pli larz, ki ti anglob devlopman lalang e devlopman kiltir kreol.  Mon profit sa lokazyon pou fer Lasanble rapel ki sete gras a zefor, sa zefor antouzyasm Madanm Danielle de St Jorre, ki nou ti ganny sa zoli batiman ki Lenstiti Kreol in etablir ladan par en don Gouvernman Leta Ini.  En don ki ti permet nou fer en renovasyon konplet sa propriyete ki ti’n tonm an rin e ki ozordi in vin en senbol nou kiltir e en senbol nou kreolite e en senbol nou lidantite pour nou pep an antye.

Mr Deputy Speaker, sa i anmenn mwan lo pwen reform Servis Piblik.  Lefe ki ozordi, stati Lenstiti Kreol i bezwen ankor enn fwa fer fas ek sanzman, i montre ki son plas e i montre nou ki son rol dan nou sosyete in kontinnyen evolye e pe kontinnyelman vin pli gran e pli enportan.  Sa bezwen pou sanzman i montre nou ki kreol ti tre vivan dan nou pei, ensi ki dan nou larezyon kot nou ete.  Fodre pa oubliye ki nou pei Lavil, petet pli pti kapital dan lemonn i osi koni koman kapital lemonn kreol.  E sa in ganny aksepte partou dan lemonn.  Nou’n reisir fer lemonn aksepte lefe ki nou zwe en rol far dan valorizasyon lalang e dan valorizasyon kiltir kreol, non selman atraver nou Festival Kreol anyel, me osi atraver bann travay ek servis ki Lenstiti Kreol i kontinnyen ofer isi lokalman e osi aletranze.  Sesel i ganny site partou dan lemonn koman sa pei ki’n revolisyonniz lidantite kreol atraver son bann desizyon politik ki’n donn kreol en stati enportan, pa zis senbolikman me dan en fason pratik.  An ekrir dan nou Konstitisyon, dan son reform ledikasyon e osi atraver kreasyon en Lenstiti Kreol e rol enportan ki sa Lenstitisyon i zwe dan devlopman ek dan valorizasyon sa lalang e dan valorizasyon sa kiltir.  Lenstiti Kreol i byen koni partou dan lemonn kreol e i souvan ganny servi koman model pour bann pei ki oule fer plis pou devlop zot lalang maternel oubyen zot lalang Nasyonal.  Fas a bann sanzman ek devlopman dan lemonn, kot resers ek pratik laprantisaz e kiltirel pe evolye kotidyennman e lefe ki nou pe viv dan en vilaz global, Gouvernman ti deside ki i ti bezwen enkli Lenstiti Kreol dan bann reform servis piblik ki i ti komans antreprann depi 2010.

Mr Deputy Speaker, sa Proze de Lwa ki devan nou, akoz ki nou bezwen li?  Donn Lenstiti Kreol plis lotonomi i sa rezon prensipal pou sa Proze de Lwa ki nou’n anmennen devan sa Lasanble ozordi.  Pou al plis an detay, piblik deplizanpli i ekspekte plis avek nou Lenstiti Kreol.  Lakantite servis ki i donnen in ogmante e pareyman, lakantite kliyan ki i deservi lo en baz toulezour in osi ogmante.  Direksyon Lenstiti Kreol i donk bezwen plis lotonomi pou azir e pou pran desizyon san ki i bezwen pas atraver sa pli gran prosesis ki i bezwen fer pou ganny laprouvasyon en Lotorite pli o ki byen souvan i annan lezot preokipasyon ki petet i pli santral pou li.

Mr Deputy Speaker, Lenstiti Kreol ti ganny plase avek Minister Ledikasyon an 2010, swivan premye zenerasyon reform, par egzanp dan letid ki komisyon reform Servis Piblik in fer vizavi Lenstiti Kreol ek son Minister paran, in vwar ki fonksyon Minister Ledikasyon i baze prensipalman lo lansennyman.  E donk, dan Lenstitisyon ki tonm anba li, i vize ver lansennyman oubyen fasilitasyon lansennyman.  Lenstiti Kreol par kont, son fonksyon prensipal i pa lansennyman me plito provizyon bann mwayen devlopman pour kreol dan tou son dimansyon.  Sa i pa vedir sepandan ki i napa son rol pou zwe dan ledikasyon.  I enportan ki Lenstiti Kreol i reste azour avek devlopman ledikasyon kreol e asiste Minister Ledikasyon dan devlopman bann zouti lansennyman dan sa domenn.

Mr Deputy Speaker, avek devlopman plis domenn kot kreol pe ganny servi, sirtou dan lespas vertyel e dan bann domenn teknik, Lenstiti Kreol pe fer fas avek en pli gran bezwen teknik, pa zis dan konteks mwayen devlopman ek resours travay me osi dan resours ki i bezwen kree, pou fer fas avek tou sa bann bezwen.  Sa i enkli kreasyon terminolozi, dokiman diktatik ki vin vit e pli aksesib, fasilite resers e bann lorganis spesyalize pou pran desizyon teknik kot lizaz kreol i konsernen, tel ki Komite Lalang Kreol.  Deplizanpli, rol Lenstiti Kreol pe ganny en konponan regilatwar, sirtou kot i konsern standardizasyon, lortograf kreol atraver travay kontinnyel ki Komite Lalang Kreol i fer lo lortograf ek lo Leksik.  E pli enportan ankor, bann lareg ki definir gramer sa kreol Seselwa.  Sa Komite Lalang Kreol ki annan manda pou fer desizyon lengwistik lo kreol Seselwa e se Lenstiti Kreol ki bezwen enplimant sa bann desizyon.  Me sa manda i pa ase kler e petet menm, i pa ase efektif.  Lotonomi Lenstiti Kreol i a permet li ganny en Board ki a travay avek li lo manda Komite Lalang Kreol e tou lezot Polisi ek regilasyon ki konsern lengwistik kreol e son zesyon.  Parey nou vwar, nou vwar li enportan ki nou ekrir en bon angle standar e en bon franse standar, nou bezwen osi vwar li enportan pou ekrir en bon kreol standar.  Savedir, kreol ki son lortograf i korek.

Mr Deputy Speaker, nou bezwen pareyman annan respe pou sa Lenstitisyon ki annan responsabilite pou zesyon nou lalang maternel e donk fer en zefor pou respekte son bann desizyon e servi bann servis ki i ofer.  Mon asire ki sa i ava en gran pa ver en pli bon lizaz kreol Seselwa standar parmi servis piblik e parmi popilasyon an zeneral.

Mr Deputy Speaker, rol nou Lenstiti in menm al aletranze.  Lenstiti Kreol enternasyonal pe ed nou plas nou koman sa Leader dan devlopman lakreolite.  Lenstiti Kreol in osi, pandan sa dernyen deseni, rod plis afilyasyon enternasyonal e in zwe en rol Leader dan bokou ka, dan domenn valorizasyon kreol.  Depi 2004 ziska 2011, sete Lenstiti Kreol Sesel ki ti reprezant bann lalang kreol dan en proze konzwentman zere par Lorganizasyon Enternasyonal La Francophonie ek Gouvernman Kanadyen.  Sa proze ti santre lo devlopman, zouti, tekno, lengwistik pou bann lalang Afriken ek Kreol.  Enn bann retonbe sa proze se ki en database terminolozik in kapab ganny kree dan bann domenn spesifik dan tou sa bann pei manm La Francophonie ki’n partisipe.  Set atraver sa proze ki nou Lasanble Nasyonal in ganny en premye volim terminolozi parlmanter an kreol Seselwa ki mon’n asire in servi nou bann Manm Lasanble byen, dan preparasyon zot bann deliberasyon.  Ensi ki tou lezot zouti lalang, langaz ki Lenstiti Kreol in met a zot dispozisyon, tel ki Leksik e Gramer.  I annan bokou lezot proze enternasyonal ki Lenstiti Kreol in zwe en rol enportan ladan, par egzanp son partisipasyon dan bann Foronm Komite Enternasyonal pou letid kreol ki baze Liniversite Provans, Lafrans.  Tou resaman, an Zilyet 2013, pour e pli presi, Prezidan Larepiblik Msye James Michel avek mwan menm, nou’n vwar li neseser ki Lenstiti Kreol i pran en rol pli enportan dan relasyon enternasyonal.  Sa i form parti zefor nou Gouvernman pou zwe en rol far dan promosyon byennet bann pti leta zil.  Set ensi ki pandan nou vizit La Reunion an 2013, nou ti propoze ki Lenstiti Kreol i pran en dimansyon enternasyonal, pou permet li reprezant plis bann pti pei kreol ki anvi met zot lalang e ki anvi met zot kiltir alavan.  Rikord Lenstiti Kreol dan domenn relasyon enternasyonal in donn nou sa konfyans ki i kapab fer li e sa ki sa Lenstitisyon i reprezante pour nou isi Sesel i fer nou fyer e i fer nou anvi partaz li avek leres lemonn.  Ozordi, en bon nonm nou bann konfrer kreol in dakor ki zot osi, zot ava annan zot prop kwen dan Lenstiti Kreol isi Sesel.  Zot in dakor avek zot akoz zot in toultan admir lefe ki nou annan en tel Lenstitisyon pou valorizasyon e pour devlopman sa lalang ek sa kiltir ki pour lamazorite son legzistans in ganny defavorize e in ganny stigmatize e in ganny sou-estimen.  Nou Sesel, nou’n montre lemonn ki tousala ti bann fo krwayans.  Zot annan zis pou vin Sesel e zot a vwar valorizasyon kreol dan tou son dimansyon e zot a vwar ki kreol i en atou e ki kreol pa en dezavantaz.

Mr Deputy Speaker, sete alor le 10 Zanvye 2014, pandan ki nou ti pe selebre 30an legzistans Komisyon Losean Endyen, Lenstiti Kreol Sesel ti osi vin Lenstiti Kreol Enternasyonal.  Lenstiti Kreol Enternasyonal i annefe en lagreman korperasyon ant bann pei kreol ki deside vin manm avek Lenstiti Kreol Sesel koman son syez ofisyel.  Bi sa Lorganizasyon se pou promouvwar devlopman ek valorizasyon kreol dan tou son dimansyon e pou ralye bann rezyon kreol ansanm pou vwar kreol koman en lalang e koman en kiltir komen ki ganny partaze atraver lemonn e ki ozordi pe annan en gran lenfliyans dan prosesis globalizasyon.  Sirtou Mr Deputy Speaker, syev Lenstiti Kreol Enternasyonal i bezwen vin en sant kot nenport ki serser, viziter ou sitwayen kreol i kapab vini pou ganny akse avek dokimantasyon lo otan bann lalang ek otan bann kiltir kreol ki annan dan lemonn.  Annefe, lansman Lenstiti Kreol Enternasyonal ti elev en swe parmi serten zournalis dan lemonn kreol ki petet, sa i ava komansman kreasyon en sel Nasyon kreol.

Setadir Mr Deputy Speaker, lemonn pe ekspekte bokou de nou.  E nou, nou pe ekspekte bokou avek nou Lenstiti Kreol Sesel.  Sa i osi enn bann rezon prensipal akoz Lenstiti Kreol i bezwen plis lotonomi pou li kapab azir.  I bezwen osi son prop Bidze ki a sifizan pou son fonksyonnman kotidyen e osi i bezwen plis lendepandans dan zesyon son Bidze.  I bezwen en pli bon striktir ki a permet li anploy plis travayer kalifye e devlop son lekip travay pour li kapab deservi son bann fonksyon sa Lenstitisyon ki aprezan in vin pli eleve.

Set ensi Mr Deputy Speaker, ki mon pe demann sa Lasanble ozordi, le 8 Zilyet 2014 pou aprouv sa Proze de Lwa pou re-kree Lenstiti Kreol Sesel atraver en Lakt, ki a fer li vin en Lenstitisyon otononm anba parasol Minister Touris ek Kiltir, donn manda Lenstiti Kreol pou vin sa lotorite lo kreol Seselwa.  Donn manda Lenstiti Kreol pou fonksyonn koman syez ofisyel Lenstiti Kreol Enternasyonal.  Mon remersye ou Mr Deputy Speaker.

 

MR DEPUTY SPEAKER

Bon.  Deba i ouver lo prensip e  merit zeneral sa Bill. Okenn Manm ki oule koze?  Onorab Arnephy.

 

HON BERNARD ARNEPHY

Mersi Mr Deputy.  Bonzour Minis ek ou delegasyon.  Bonn apre midi.  E bonn apre midi osi tou bann Manm Onorab.

Mr Deputy, bomaten dan Lasanble, ler Vis Prezidan in prezant Proze de Lwa lo Lamannman Konze Piblik, in tous en keksoz fondamantal e sa se preanbil nou Konstitisyon.  E preanbil nou Konstitisyon i fer nou reflesir en pti pe lo nou koman en pep, ki nou ete.  Nou lidantite koman en Nasyon e kwa ki fer nou sa pep ki nou ete ozordi.

Pandan bokou lannen, in annan bokou koze lo nou kreolite.  Pandan ki en group dimoun par egzanp i dir kot kreol pou anmenn nou, en lot group dimoun i dir, nou kreolite se nou lafyerte.  E ler nou al dan bann pei aletranze, nou fyer nou en kreol.  Ler nou koz nou kreol, menm serten dimoun i kestyonn nou.  I demann nou, ki langaz nou pe koze?  Kote nou’n erit sa langaz?  E pour sa, nou tre fyer akoz nou annan nou en kiltir, nou annan nou en lalang, parey Minis fek dir.  En lalang ki vivan e en lalang ki tre ris.  E mon panse i en lalang ki nou bezwen soutenir li, kontinnyen anbelir li pou li anmenn nou odela, bann lannen ki devan nou.

Mr Deputy, ler mwan mon ti lekol.  Minis in koz lo ‘81.  Mon pa ti ganny sans aprann kreol dan lekol.  Me ozordi, mon fyer mon koz kreol, mon konn lir kreol e mon konn ekrir kreol.  E kreol koman en lalang, koman en langaz i fer ou fer en kantite keksoz.  I fer ou kapab reflesir, i fer ou kapab analize e i kapab fer ou fer bann deliberasyon parey nou bann Manm nou fer dan Lasanble ozordi.  E nou fer li dan nou langaz kreol.  So, mon panse, avek kreasyon en tel Lenstiti, sa i pou ede pou ankor enn fwa, valoriz ankor bokou plis nou lalang kreol.  Parfwa nou koz lo en federasyon bann zil kreolofonn, kot tou bann pei ki koz kreol, nou kapab zwenn ansanm, anmenn nou bann atou ansanm e ansanm, vwar koman nou kapab promot sa lalang.  E promosyon sa lalang, in ganny fer bokou dan lepase.  E la, mon oule felisit Lenstiti Kreol, anba gidans Madanm Choppy ki’n fer bokou travay.  In fer bokou travay dokimantasyon.  Bokou travay referans ki ozordi nou kapab al kot sa Lenstiti e nou kapab fer serten resers dan nenport ki domenn vizavi nou kreolite.  E zis yer swar menm ler mon ti pe pas en pti pe dan bann dokiman.  Regard en pti pe kwa ki nou annan.  Bann dokimantasyon kreol.  Mon’n vwar par egzanp bann non bannann ki egziste Sesel, apepre 33 non bannann an kreol ki mon pa ti menm pe mazinen.  Non patat, sitan kantite ankor.  E mon panse tousala petet i bann keksoz ki la pe dormi, ki nou bezwen komans partaz avek nou zenerasyon ozordi e zenerasyon demen.

So, mon swe se ki sa Lenstiti avek son lotonomi ki i pou gannyen, avek sa bann sipor ki i pou gannyen, i a ede promot sa kiltir kreol dan tou son form.  Son form ekonomik, son form artistik, son form ledikasyon, lengwistik, antropolozik, siyantifik.  E mon panse tousala i bann keksoz ki pandan bann lannen ki’n pase, nou’n annan bann kolok ki’n ganny organize e pandan sa bann kolok, tou sa bann keksoz in ganny diskite.  In ganny diskite, avek bi pou asire ki bann zil kreolofonn i devlop sa bann laspe kreolite lo en nivo kot ler nou pe koz nou kreolite, nou pe koz sort of, an partikilye, menm langaz.

So, Mr Deputy Speaker, avanyer dan, Dimans ler Prezidan Michel ti pe koze dan “En moman avek Prezidan”, in koz en pti pe lo kwa ki inifye nou koman en Nasyon.  E nou listwar i en listwar ris.  Depi ler nou bann premye zanset ti met lipye Sesel dan bann lannen ‘70, in annan bokou keksoz ki’n diviz nou.  Me atraver letan, nou’n vwar ki nou’n retrouv fason pou nou kapab anmenn nou pep ansanm.  E ozordi, mon kontan ki Sesel, atraver Lenstiti Kreol, atraver Minister Kiltir, nou pe fer bokou.  Nou annan Festival Kreol par egzanp ki en fason pou anmenn nou dimoun ansanm.  Pa zis nou dimoun, me osi lemonn antye ansanm.  Mon konnen ozordi, i annan bann dimoun, bann etranze ki plan zot vakans par egzanp e ki regarde kan eski nou selebre sa lafet pou zot vin form parti en tel levennman.  Depi lannen pase, Seymas in komans organiz Dimans Moutya.  Mon panse ankor i en Foronm, i en levennman kot i regroup nou ansanm, pou nou fer viv nou valer kiltirel.  Me malgre tou sa, mon santi ki ozordi, i ankor annan serten tabou asosye avek nou kreolite.  I annan par egzanp ler nou get dan Leksik Kreol, dernyen edisyon ki ti pibliye lannen pase, parmi sa 18 mil ekek mo ki annan dan Leksik, nou ankor pe ganny dir poudir i annan serten mo ladan ki ganny konsidere koman bann mo vilger par egzanp.  Me ki a serten moman, sa bann mo ti ganny servi.  So, petet la nou bezwen ankor vwar.  Eski si en mo i trouve dan nou Leksik par egzanp, ok. Ler en dimoun pou koze dan son konversasyon, dan pe fer en fraz.  Eski i bann mo enterdi?  Ouswa i banna mo ki nou dwatet pe servi?  So, sa i bann, petet bann pwen refleksyon ki nou merit mazin lo la.

Nou annan lezot keksoz ki asosye nou avek nou kreolite.  Nou annan Zedmo.  Nou annan nou bann Kont ek Lezann.  Ki petet la mon lans en lapel avek sa nouvo Lenstiti ler i formen, pou li fer repann sa bann Kont ek Lezann ankor enn fwa parmi nou bann zenn, parmi nou zenerasyon ozordi.  En serten letan nou ti annan bann zistwar lo radyo.  Msye Gilbert Confait.  Ti bann zistwar tre enteresan ki ti ganny rakonte me ki ti relevan avek nou lavi toulezour.  Petet tousala in tant pou perdi.  Vwala ankor kot Lenstiti i kapab antre pou reviv en pti pe sa bann keksoz.

Mr Deputy Speaker, mon ti a kontan ki ler Lenstiti i formen, avek son lotonomi ki i pou annan, propagasyon nou kiltir kreol atraver nou zanfan lekol, atraver group tou laz dan nou sosyete i pa zis restrikte pandan Festival Kreol.  Mon ti a kontan ki sa i vin en keksoz 365 zour dan en lannen.  Mon ti a kontan ki sa Lenstiti, avek tou son dokimantasyon ki i annan, i vin en Lenstitisyon vivan, kot dimoun i kapab vini, antre, fer resers, ganny konesans e answit, al partaz sa bann konesans avek zot konfrer.

So, mon siport lide pou anmenn en tel Lenstitisyon.  E parey Minis in dir, Lenstiti pou byensir bezwen plis sipor.  Petet sipor teknik, sipor finansyel pou li kapab fer son travay me mon panse ki i en travay ki nou bezwen fer pou nou kontinnyelman gard nou kiltir vivan e kontinnyelman mentenir nou lidantite koman en Nasyon.  En Nasyon fyer e en Nasyon ki fyer son kreolite.

So, Mr Deputy.  Mon konnen i annan bokou entervenan ki pou koze.  So, petet zis mon ti ava kontan demann Minis, vizavi Lenstiti, ki pou rol bann lezot Lazans ki nou’n koz lo la resaman, par egzanp CINEA? Ok.  Ki pou son rol?  ki pou rol Lasosyasyon bann Mizisyen vizavi Lenstiti?  Par egzanp, nou’n koz lo Seymas pli boner.

So, petet Minis dan ou larepons taler, ou ava eklersi nou en pti pe lo la me mon panse ki i en tre bon Proze de Lwa e mon asire ki tou nou bann koleg isi pou siport sa Proze de Lwa e mon remersi ou Mr Deputy Speaker.

 

MR DEPUTY SPEAKER

Onorab Pillay.

 

HON SEBASTIEN PILLAY

Mersi Mr Deputy Speaker.  Mr Deputy Speaker, mon krwar ki ozordi i enn bann rar moman ki nou gannyen dan nou Lasanble pou nou kapab fer en deba ki tre enteresan e tre vibran akoz par lefe ki nou pe koz lo en Proze de Lwa ki konsern prezervasyon e valorizasyon pa zis nou langaz maternel, me osi enpe plis, enpe pli larz nou idantite.  E la avan mon al pli lwen, mon krwar nou devret felisit travay ki’n ganny fer pou met kreol lo sa map lengwistik nou pei e osi pou sirtou soulinny lafason ki nou koman Seselwa nou tret nou lagaz maternel, i soulinny sa lenportans e sa lanfaz ki nou Nasyon i atase avek nou kiltir e nou lidantite e akoz nou krwar nou bezwen prezerv li pou zenerasyon fitir.

Mr Deputy Speaker, mon pa pou al tro an detay lo lezot size me mon oule restrikte mon lentervansyon lo detrwa pwen ki mon krwar i tre, tre enportan pou nou konsidere, dan konteks ki nou pe anmenn sa Proze de Lwa ozordi.  Enn bann pwen enportan ki mon krwar se sa sanzman e evolisyon teknolozi ki pe arive e ki lanfaz sa i annan lo nou kiltir, lo nou langaz, lo lafason ki nou ekrir e nou kominike.  E la mon oule servi legzanp bann telefonn portab par egzanp.  Pa ki mon pe dir ki telefonn portab i pa bon, non.  Me mon pe zis kontribye dan sa deba kot nou vwar kimannyer teknolozi i kapab sanz kimannyer nou enterakte dan en fason ki parfwa i kapab pozitiv, dan en fason ki pa neseserman negativ me osi sanz konteks sa bann enteraksyon.

Par egzanp.  Ozordi nou vwar poudir atraver en telefonn portab, bann dimoun i kapab anvoy bann mesaz par text. Sertennman.  Me ki nou vwar?  Nou vwar poudir bann zenn i devlop en fason kourt pou ekrir kreol lo sa telefonn.  Par egzanp, dan plas ekrir ‘ou’, o avek u, zot ekrir o, zis ‘ou’ par egzanp zis en ‘u’.  Konnen, zot ekrir konnen i ‘knen’ par egzanp.  Me i annan tout diferan fason, tout en gam fason pli modern ki zot servi pou ekrir, ki prezan fer ou mazin lo lenpakt ki petet sa i kapab annan ler zot pou bezwen par egzanp ekrir sa kreol formelman dan laklas, dot anplis ki ozordi, akse avek teknolozi i pa restrikte a zis en serten laz, me plito avek preski tou laz.

Si nou pran par egzanp statistik Biro Statistik ki’n ganny anmase pandan Census 2010, nou vwar poudir Sesel i enn bann pei dan Losean Endyen kot dimoun i annan plis akse avek en telefonn portab.  Ozordi, i sitan fasil pou en dimoun ganny en telefonn portab.  E nou bezwen prezan mazinen e analize kimannyer sa in sanz konteks lenteraksyon, pa zis lo en pwennvi kominikasyon me osi lo en pwennvi enter-relasyonnel par egzanp.  Kot ozordi, oparavan par egzanp 10an pase, mon ti pou definitivman al ver sa dimoun ki mon oule al vizit li.  Ozordi, en koud telefonn, mon kapab zwenn li e koz ek li.  I vin pli fasil.

Dan en lot konteks osi, i annan bokou keksoz ki’n sanze an sa ki konsern lafason ki teknolozi i ed nou prezerv nou langaz.  E la osi nou bezwen eksplor meyer fason pou nou vwar kimannyer sa teknolozi i kapab antre dan sa prezervasyon, dan lafason ki nou arsiv.  Asire ki annan en larsiv tou sa bann keksoz, sa bann dokiman ki’n pase.  E mon krwar Sesel, nou bezwen zwe en rol tre enportan ladan, dot anplis ki sa Proze de Lwa pe pozisyonn nou Lenstiti Kreol koman sa syez formelman dan Lalwa pou Lenstiti Kreol Enternasyonal.  Sa mon krwar i en pwen tre enportan pou nou fer.

En lot pwen enportan ki mon oule fer Mr Deputy Speaker, i an sa ki konsern kreol e sa relasyon ki annan ant kreol e laprantisaz.  In annan bokou ki’n ganny dir li la.  In annan bokou resers ki’n ganny fer kot par egzanp, dan konteks enternasyonal, i annan resers ki’n dir poudir si en zanfan i aprann dan son lalang maternel, i pli fasil pou li kapab devlop serten konsept.  E la nou pe koz lo kreol koman en langaz pou fer laprantisaz.  Me dan lot kote osi, nou annan kreol koman en langaz, koman en size.  E sela kot nou bezwen eksplore kimannyer sa dinamik i permet zanfan swa aprann pli byen, swa devlop serten konsept dan en fason ki pli soutenab, pour ki plitar zot kapab servi ler zot pe fer letid pli avanse.  E mwan mon krwar la se la kot parey Minis in dir, Lenstiti Kreol i annan en rol primordyal pou zwe akoz akoz set en partenarya ki bezwen ganny etablir ant Lenstiti Kreol e Minister Ledikasyon an sa ki konsern kimannyer nou kapab servi kreol koman en langaz pou laprantisaz, dan bann konteks kot petet bann terminolozi ki souvandfwa parfwa an angle, i vin restriktiv pou serten zanfan avek serten nivo.

Mr Deputy Speaker, koman en ansyen ansennyan Matematik e mon asire lezot koleg dan Lasanble ki’n travay dan lansennyman, i konpran tre byen ki mon pe dir.  Parfwa, par egzanp, dan lansennyman matematik, ou vwar ou pe eksplik serten konsept an kreol, akoz i pli fasil pou en zanfan relye ek sa konsept akoz ou kapab konekte son leksperyans toulezour an kreol, pli fasil ki ou ti pou fer an angle.  E sa i enportan pou nou mazin lo la.  E lafason ki nou fer laprantisaz, i annan en rol enportan pou zwe an sa ki konsern kimannyer nou fer antre nou lalang dan sa konteks.  E se la kot lenstiti li i ava annan sa rol avangard pou li zwe an sa ki konsern konekte sa bann resers, me osi etablir sa partenarya etrwat avek Minister Ledikasyon, pou vwar kimannyer esansyelman sa pe marse dan nou pei.  Pa bliye poudir tou pei i prezant en difereran konteks e sertennman petet nou konteks Sesel osi i annan serten diferans, serten nwians ki nou bezwen pran an konsiderasyon.

Mr Deputy Speaker, en lot rol enportan ki mon oule koz lo la e sa Proze de Lwa i fer kler se sa rol avangard ki sa Lenstiti i annan pou zwen lo en konteks enternasyonal.  E sa i tre enportan akoz ler ou regarde, Sesel, en pti pei, nou’n vin syez pou Lenstiti Kreol Enternasyonal.  E sa i tre, tre enportan pou konsidere, me osi fer nou mazinen ki lafason ki nou apros, mentenir e promouvwar lanfaz lo lalang, lo kiltir e rol ki sa syez pou zwe, sirtou dan lenplimantasyon sa Proze de Lwa, i tre, tre enportan.  E la mon pe koz lo resours swa lo en pwennvi resours imen, oubyen lo resours finansye, oubyen lo resours teknik, ki nou bezwen asire nou annan anplas pou kapab permet sa Lenstiti zwe son rol, parey in ganny definir anba Lalwa.  E sa i tre, tre enportan.

Si nou mazin tre byen par egzanp 30an, 40an pase, i annan de lenstans kot kreol ti pe perdi son valer e ti’n kapab menm disparet si keksoz ti’n kontinnyen dan sa fason.  Ozordi, kreol i la akoz nou’n pran nou en zefor konsyan koman en Nasyon pou nou kapab prezerv li e i al plis ki sa.  I al ver prezervasyon en fason viv.  I al ver prezervasyon en fason viv ki met lanfaz lo en kanmaradri, lo annan en lesanz ant dimoun, kot par egzanp.  Mon a donn ou en legzanp Mr Deputy Speaker.  Ou pe asize ek en group zanmi.  Ou annan en keksoz pou ou al fer, ou dir ek zot mon pe vini.  E sa ki fer kreol ris se ki en dimoun pou dir ou, be ou pa pe vini.  Ou pe ale ou.  An angle par egzanp ou pou dir, I’m coming back e i fini.  Ou vwar lenteraksyon i fini la.  Me an kreol, lenteraksyon i sitan ris ki i annan sitan nuance.  Mon zis mazinen ki mon pa pe ofans okenn lengwis la, me mwan mon krwar personnelman ki i annan en larises dan lafason ki sa bann lenteraksyon i pase e parfwa i annan menm en, sa mo i annan plis ki en definisyon, i annan plis ki en lenterpretasyon.  E sa i fer nou langaz ris.  E si nou pa kapb prezerv sa, nou pou perdi.  Sanmenm sa ki fer nou, nou idantite.  Kot en dimoun i kapab pe dir ou en keksoz e ou kapab pran en lenterpretasyon totalman opoze e still e menm, sa konversasyon pou kontinnyen.

Mr Deputy Speaker, parey ou vwar, pou mwan ozordi, mon pe fer en zefor.  En zefor akoz mwan osi mon’n pas atraver nou sistenm ledikasyon e mwan osi mon’n pas atraver sa levolisyon teknolozi ki parfwa, menm dan mon koze, mon pa kapab anpese ki i antre bann mo angle.  Sa i montre levolisyon e sanzman dan langaz ki arive, menm an Frans, menm Lenn, menm Langleter kot i annan serten mo ki ganny servi, i pa neseserman bann mo ki tradisyonnelman i ganny servi.  E sa osi i en rol, sa rol avangard enternasyonalman ki sa Lenstiti i annan pou zwe.  Vwar kimannyer e predwir kimannyer sa bann sanzman i enterakte e i enpakte lo nou kiltir, lo nou lidantite.

Mr Deputy Speaker, i annan en kantite pou dir lo sa Proze de Lwa e mon ava les laplas pou lezot dimoun fer zot kontribisyon.  Me selman, i annan en keksoz ki mon vwar dan sa Proze de Lwa ki mwan mon krwar i en keksoz tre enportan.  E sa se sa lotonomi ki sa Lenstiti i kapab zouir, pour li kapab limenm li fer son travay, rod fon, rod resours e sa i enportan sa akoz andeor laba, ler ou voyaze, ou vwar poudir i annan bokou bann filantroup, bann Lorganizasyon ki pare pou met resours a dispozisyon bann linisyativ koumsa, me selman parfwa, zot napa en veykil ki zot kapab annan konfyans ladan.  E zot dir ou poudir parfwa, mon’n met larzan dan tel veykil e apre ki’n arive, ou vwar poudir dimoun in servi sa larzan a zot prop fre.  Me isi Sesel nou napa sa problenm akoz nou annan en transparans.  Nou annan en nivo transparans ki bokou pei ki nou pe koz dan sa rezyon kreolofonn, i napa.  E se sa ki fer lavantaz ki sa Lenstiti i kapab annan si i komans fer keksoz byen boner, pour li kapab asire ki i maksimiz lo sa potansyel ki i annan.

Pou konklir Mr Deputy Speaker, mon oule fer en remark ki koman Seselwa, nou’n annan bokou pou nou fyer.  E sa i en keksoz ki nou devret fyer.  Nou en pti Nasyon 80 mil dimoun e nou’n arive ozordi prezerv nou lalang maternel.  Nou’n arive fer ki ozordi ou kapab al fer resers lo sit web an kreol.  I pa en pti keksoz sa.  I en gro keksoz.  I en gro zafer sa.  E mon krwar nou devret apresye zefor ki nou tou koman en kolektiv nou anmennen, nou mete.  E la nou bezwen koz lo sa lanfaz ki sa linite Nasyonal pou anmennen pou nou, pour nou kapab kontinnyen prezerv nou lidantite, prezerv sa ki nou kiltir i anmennen.  Se sa primordyalman sa bann Poze de Lwa.  Akoz, annou pa bliye.  Listwar pou zize kimannyer nou zenerasyon nou, ti kree sa konteks pou prezerv sa ki nou, nou’n gannyen pou zenerasyon fitir.  Mon zanfan demen pou zize pou vwar kimannyer mwan mon ti aport mon kontribisyon.  E bann Proze de Lwa konm tel se sa ki ede pou nou kapab prezerve e valoriz sa ki nou’n annan dan lepase.

Mr Deputy Speaker, avek sa mon pou aport mon sipor a sa Proze de Lwa.  Mersi.

 

MR DEPUTY SPEAKER

Onorab Payet-Marie.

 

HON MARIA PAYET-MARIE

Mersi Mr Deputy Speaker.  ‘Kreol, mwan mon en pti kreol.  E mon pou koz kreol tou mon lavi’.  Wi Mr Deputy Speaker.  Sa i selman en lalinny dan en sanson ki fer mwan mazin letan mon ti ankor lekol.  E sa sanson ti osi popiler, dan menm letan ki Lenstiti Kreol Sesel ti ganny formen an 1981e 1982, kot lalang kreol Seselwa, nou lalang maternel ti ganny rekonnet koman en langaz Nasyonal, kot nou langaz ti kapab ganny servi oralman, e osi ekrir dan tou lekol Leta.  E ti pandan sa menm letan, kot nou ti vwar plizyer nou bann adilt ki pa ti neseserman ganny sans pou al lekol ler zot ti ankor zenn, benefisye avek kour alfabetizasyon.  Sa bann kour ti ouver pour tou sa ki ti enterese e sa ti anmenn en gran benefis pour tou sa ki ti swiv sa kour.  Dan en pti konversasyon avek en madanm ki ti parmi enn premye bann pou swiv kour alfabetizasyon, i ti dir mwan.  Apre ki in swiv sa kour, i ti santi li fyer koman en kreol Seselwa, akoz i ti kapab ekrir son pti let limenm an kreol.  I ti kapab fer son lalis konmisyon limenm.  E sa ki i ti pli kontan se ki i ti osi kapab lir en zournal oubyen en liv kreol e konpran tou sa byen menm.  I ti dir mwan ki menm si nou pa pou vwar ankor kour alfabetizasyon akoz devlopman dan nou pti pei, ki i devret annan en landrwa apropriye pou kontinnyen donn plis lenportans, kontinnyen promouvwar e devlop plis nou langaz, nou kiltir e nou leritaz akoz sankrwa nou bann zenn pa pou konpran nanryen ki savedir tousala.  Zot pou zis viv parey Eropeen e sa i pa bon pour nou.

Mon fer referans avek sa ki sa madanm in dir mwan akoz mwan osi, parmi bokou lezot Seselwa, mon krwar dan en Lenstiti Kreol Sesel.  Enn ki annan pour bi asire ki nou langaz e nou kiltir kreol i ganny pli byen promouvwar e devlope a tou pri.  E Lenstiti Kreol Sesel ki pe selebre son ventyenm lannen depi ki i ti vin an egzistans, i osi pour mwan Mr Deputy Speaker, sa landrwa ideal pou promouvwar nou langaz e kiltir kreol Seselwa.  E osi, sa landrwa apropriye koman Sekretaryat Lenstiti Kreol Enternasyonal akoz sa Lenstiti Mr Deputy Speaker, i osi en Moniman Nasyonal e sa i donn li plis valer.

Pou al direkteman lo sa Proze de Lwa devan nou Mr Deputy Speaker e la mon pou sey fer mon mye pou koz pirman kreol.  Sa Proze de Lwa pa pe zis eksplik nou ki rol prensipal sa Lenstiti, me i osi koz lo lobzektiv e osi fonksyonnman sa Lenstiti.

Mr Deputy Speaker, mon pou koz en pti pe lo fonksyonnman sa Lenstiti, akoz mon krwar ki i annan bokou keksoz ki depi lontan ti’n devret ganny konsidere me petet avek resours limite, sa pa’n kapab arive.  Toudmenm, la ki tou sa i la devan nou, mon a profite pou koz en pti pe lo par egzanp, Seksyon 5(1)b, kot pe koz lo promot langaz kreol e kiltir Seselwa lokalman e enternasyonalman, atraver seminar, legzibisyon, piblikasyon oubyen prodiksyon odyo vizyel.  Sa i fer mwan refer lo goal 2 sa Lenstiti ki dir ki sa Lenstiti pou asire ki zot pou market, (ekskize, mon bezwen servi angle la) e efektivman promouvwar servis e prodwi, avek le bi pou ogmant lakantite kliyan, atraver bann divers prodwi ki zot pou ofer.

Mr Deputy Speaker, seryezman i devret annan plis promosyon baze lo sa ki Seksyon 5(1)b pe fer resorti.  Sa i enportan ler nou pe koz lo diversifikasyon dan sa ki nou ofer nou viziter, me osi nou Seselwa ki annan bokou lentere an sa ki konsern prezervasyon, promouvwar e devlop nou Lendistri Kiltirel.  E osi Seksyon 1(b), i osi enportan, sirtou la ki Lenstiti Kreol Sesel in ganny li sa manda boner sa lannen pou vin Sekretaryat Lenstiti Kreol Enternasyonal.

Lot Seksyon ki mon pou tous lo la Mr Deputy Speaker, se Seksyon 5(1), h ziska l, ki konpri resers ek dokimantasyon.  Menm si bokou finansman in neseser pou facilitate en bon resers e osi pou kapab pli byen dokimant bann diferan resers ki ganny fer, i enportan konnen, petet Minis a kapab eksplik nou, si pou annan okenn kontribisyon finansyel ki lezot pei kreolofonn ki pou servi Sekretaryat Lenstiti Kreol Enternasyonal pou bezwen kontribye finansyelman ou dot fason, akoz amonavi, sa i a neseser akoz i a osi ede anver bann diferan resers e osi plas bann bon sistenm modern pou pli byen dokimant tou sa ki sa Lenstiti pou annan.

En bon resers i neseser pou ed Lenstiti Kreol Sesel pou pli byen konpran son marse e osi persepsyon kliyan.  En bon resers i neseser pou ed Lenstiti Kreol Sesel pou pli byen konpran son kapasite entern ki i annan, pou pli byen kapab deservi son kliyan.  En bon resers i a permet Lenstiti Kreol Sesel pou pli byen kapab idantifye bann loportinite anver lavantaz konpetisyon.  E en bon resers i a kapab ogmant repitasyon, limaz, skills, konfidans e motivasyon bann travayer ki travay pour sa Lenstiti e ki alafendizour, zot a kapab delivre en pli bon servis e osi enn ki pli profesyonnel.

E dernyen Seksyon ki mon pou koz lo la Mr Deputy Speaker, se Seksyon 5(1)p, ki koz lo lankourazman pou zenn reserser e pedagog lo lenportans nou leritaz e lengwistik nou pei e osi ankouraz zot pou travay ansanm pou devlopman fitir anver langaz e kiltir kreol Seselwa.  Semenn pase dan Lasanble, Minis Tourizm ek Kiltir ti prezan pou reponn kestyon lo plizyer size, enkli kestyon ki mon menm mwan ti poz li lo bann progranm pou asir lentere e partisipasyon bann zenn Seselwa anver promosyon e prezervasyon nou leritaz kiltirel.  E sa Seksyon, pe tous en pti pe dan sa lalinny ki tre byen.  Mr Deputy Speaker, rezon akoz mon ti demann sa kestyon e osi swazir pou koz lo sa pwen p, anba Seksyon 5 set akoz mon konsernen avek lafason kimannyer plizyer nou bann zenn pe perdi lentere dan lafason ki zot pratik nou langaz kreol, osi lafason ki zot montre lapresiyasyon anver nou kiltir kreol Seselwa.  I vre ki nou, koman en pti leta zil, nou pe devlop ase vit, menm tro vit Mr Deputy Speaker.  Me i neseser e primordyal ki nou zenn zenerasyon i komans ganny ankouraze pou konpran lenportans prezerv tou sa ki nou annan.  Nou kiltir, nou leritaz, nou langaz eksetera akoz apre tou, en Nasyon i aprann par son listwar, par son pase.  Nou pase i nou lavenir e nou lavenir i devret komans avek sa zenerasyon ki deza la e pe grandir.

Mr Deputy Speaker, menm si Proze de Lwa devan nou in kouver bokou keksoz enportan e neseser ki pou anmenn benefis pour tou Seselwa, kot nou pou vwar nou en Lenstiti Kreol Sesel pli enteresan, pli vivan, mon toudmenm bezwen fer sorti serten bann defi ki sa Lenstitisyon pe fer fas avek, ou pou bezwen fer fas avek e petet demann Minis petet pou bref mwan, eksplik nou en pti pe dan ki fason sa bann defi a kapab ganny adrese.  Petet avek lezot sipor lezot partner byensir.  Menm ki mon konnen ki Minis ek son lekip pe fer tou pou asire ki sa Lenstitisyon i vin enn ki pa pou fer okenn Seselwa tonm deryer, okontrer enn ki pou fer nou tou fyer, mon pou profite la pou mwan felisit Minis avek son tim ek tou travayer Lenstiti Kreol.  Petet en defi Mr Deputy Speaker, se ler nou pe koz lo resours imen.  Eski Minis petet i kapab eksplik nou ki pou ganny fer pou ogmant resours imen, avek le bi ki sa Lendistri a ofer pli bon servis?  E petet lo kote marketing osi.  Petet pou byen kapab promouvwar nou langaz, nou kiltir eksetera, nou bezwen fer bon marketing, bon promosyon.  E pour sa, nou pou bezwen annan zouti e fasilite pou fer li.  Petet ti a byen nou konnen ki pou annan anplis, pou asire ki i annan ase landrwa, apard ki Lenstiti Kreol, pou market e promouvwar bann prodwi ou servis, pou kapab ankouraz e sipor plis Seselwa pou zot annan keksoz pou ofer, pou met dan sa Lenstiti.  E petet, si i annan anplas, en seksyon marketing ki pou ede adres tou sa ki mon’n dir pli boner ?

E en dernyen defi mazer Mr Deputy Speaker, se leta Lenstiti aktyelman.  Mon mazinen ki avek dernyen renovasyon ki ti ganny fer, sa Lenstiti i devret ganny repare e lenfrastriktir neseser e apropriye ganny met anplas.  E la petet mon a fer en mansyon petet nou - mon konnen Minis ek son lekip pou fer sa.  Nou prezerv sa larsitektir kreol.

Mr Deputy Speaker, mon konnen ki defi pa pou kapab ganny adrese en sel kou.  I pou pran enpe letan.  Me avek sipor e lasistans neseser, plizyer defi ki mon’n fer resorti a kapab ganny adrese.  Apre tou, pou konklir Mr Deputy Speaker, i annan keksoz ki nou devret get li koman enportan pou nou prezerve pou nou fitir zenerasyon.  Sa i kapab en lobze, oubyen en batiman, oubyen en sanson, oubyen en zistwar.  Nenport ki form ki zot pran, tou sa i form parti nou leritaz.  E nou leritaz i bezwen zefor aktiv tou dimoun pou li ganny byen prezerve, promouvwar e devlope.  Apre tou, nou pa nenport ki kreol nou, Mr Deputy Speaker.  Nou bann zoli kreol Seselwa.  Bann zoli kreol Seselwa ki devret toultan pare pou promouvwar e prezerv tou sa ki nou annan.  Ki swa nou langaz, ki swa nou kiltir.

Mwan mon pou vot anfaver sa Proze de Lwa Mr Deputy Speaker, akoz mon santi ki koman en Anbasader kreol Seselwa, mon devret fer li.  Mersi Mr Deputy Speaker.

 

MR DEPUTY SPEAKER

Dernyen lo mon lalis, Onorab Ghislain.

 

HON CHANTAL GHISLAIN

Mersi Mr Deputy.  “Lasezon kreol in refleri, dan bouke vilea mon lespri, ere avek bann melodi”.  Mr Deputy Speaker, bann parol kolore e poetik santer Joe Sammy.  Sitan keksoz, dan zis 2 mo.  Konbyen fwa nou’n antann sa pti fraz?  En fraz, laplipar letan prononse par en trwazyenm dimoun, ki souvandfwa in la pe ekoute, menm si konversasyon ti ant selman 2 dimoun.  Touzour pe azout son kwiyer masala ladan.  Sa i nou.  Nou sa pep Seselwa, sa pep kreol avek en karakteristik e pekilyarite diferan avek lezot kiltir e pep lemonn.  Nou senpleman diferan e personn pa kapab demanti sa.  Touzour brode e asezonnen avek bann mo anplis, tel ki ‘En, en.  Ou santer ou.’  En pti koze atraver, ‘Sanmenm, donn li mon ser.  Ou ganny li.’  En pti koze kontrer, ‘Prezan plise konmsi lisyen ki’n vwar bwat dile.’  ‘Fer figir parey lannmen maryaz.’  Ziska bann ki pli dir pou anvale.  ‘Mon ser, ou pe fer ou tim foutbol, en.’  Menm an riyan, ou dalon pe dir ou menm.

Nou fason koze i kapab paret tout a lanver me si ou tradwir li dan en lot langaz, pou nou i pou paret normal.  Ler en paran i dir avek son zanfan dan loto, ‘Tir ou lanmen deor,’ ouswa ‘Tir ou figir ou likou deor.’  ‘Al penny ou latet.’  ‘Met ou soulye ouswa ou savat dan ou lipye.’  E souvandfwa, mwan menm mon oule ankoler avek mon pti fiy akoz sak fwa mon dir li al met son soulye dan son lipye, i dir mwan, ‘Manmi, i sere.  I pa antre.’  Me apre, zis riye, letan avek konviksyon i esey koriz mwan, i dir mwan, ‘Pa soulye ki antre dan lipye, me lipye ki antre dan soulye’.  Me tou sa i bann kreol, bann mo kreol, bann fraz kreol ki pour nou, i paret toutafe normal.  Tou sa pou anmenn plis kouler dan en lalang ki pa ti egziste ditou ziska larive bann premye zabitan ki ti konpri bann gran blan koman met e Afriken koman lesklav e plitar bann sorti Lazi koman marsan.  Me pe enport si sa bann lesklav ti pe monk zot bann met, ouswa senpleman pe esey kominike, en lalang ti ne.  Kot ansanm, avek bann mers e manni, parfen zepis dan nou lakwizin, fason viv, koutim, melanz kouler lapo, krepi ou drwat.  Dezormen, sa karakteristik kreol e kiltir en ras melanze, enfliyanse par Afriken, Eropeen e Lazi, ti form nou lidantite koman kreol Seselwa.

Mr Deputy Speaker, toulezan, Sesel i 100 poursan kreol pou en semenn, kot nou selebre tou form lar e kiltir kreol.  Avek son lanmizik kreol ki rezonnen dan tou kwen nou bann zil, melanze avek sa parfen zepis nou lakwizin, Sesel i fet kreol atraver Festival Kreol.  Sa ki ozordi i resanble festivite pour tou, i annefe rezilta bann panse serye depi plizyer lannen pase.  Lide pou servi langaz kreol non selman koman en form kominikasyon ant bann dimoun ordiner, me pou devlop li koman en langaz, en vre langaz koze dan bann landrwa ofisyel, ekrir dan bann dokiman ofisyel e aprann dan lekol atraver pei.  Sa kreol ki bann lesklav, premye zabitan nou later isi Sesel ti pe imit langaz zot bann met kolonyal franse, avek en prononsyasyon diferan, langaz franse ti’n tordir e donn nesans a en lalang maternel ki nou apel kreol.

Mr Deputy Speaker, premye Lazournen Kreol ti lanse le 26 Avril 1982 par Prezidan France Albert Rene.  Sa ti pwen depar pou devlop en seri levennman ki ti pou anmenn nou ziska Festival Kreol parey nou konn li ozordi, avek laspe kiltirel tel ki teat, lanmizik, literatir e lar.  Sa ti pou fer Sesel vin Lazans prensipal e pli enportan, en lorganizasyon levennman anyel pour tou pei ki koz kreol.  Ler nou ti deside fer kreol vin nou langaz e pou reviv nou kiltir kreol vibran, pou prezerv li pou prosterite, Lenstiti Kreol osi ti ne.  Sitiye dan enn bann Grann Kaz Au Cap, en lakaz ki’n temwanny tout en listwar e levolisyon kreol depi son kiltir ziska ozordi, son langaz.  Si ozordi, en Lenstitisyon parey Lasanble Nasyonal in arive kapte latansyon e lentere piblik an zeneral, pe enport ki ou stati dan lavi, ki kwen ou ete.  Pa zis akoz son MNA ki pe koze, me en gran parti set akoz nou koz an kreol.  E al lo sit web Lasanble Nasyonal ozordi, sa ki nou dir isi oralman dan sa Lasanble i ganny ekrir mo pour mo, parey in ganny dir.  Sa langaz ki konekte nou avek nou pep.  Radyo, televizyon.  Tou sa i form kominik avek piblik e dimoun i pli konekte.  Set akoz i dan son langaz maternel.  Nou annan nou en Diksyoner, Leksik, Lortograf e menm Granmer Kreol.  En seri liv dan form roman, la poezi e zistwar kreol.  E mon swe ozordi avek sa Lenstiti se ki pou nou al en kou, trouv en liv konplet an kreol avek bann lardon, zedmo, bann parabol e kotasyon ensitasyon ki kapab ganny perdi.

Mr Deputy Speaker, anmezir ki letan i pase, bann vye koutim e tradisyon Sesel in dousman, dousman palir ouswa disparet, tel ki pou en zonm ganny maryaz, fodret i konn fer kapatya koman sinny e senbol son merit pou kapab ganny travay, soutenir son nouvo fanmiy.  Larap koko koman premye pake fanm dan lakaz, let demann, roul ponm damour, tou sa in preski perdi.  Lezot koutim pli siperstisye in osi disparet, me ki’n plitar retournen dan bann sirkonstans en pti pe bizar parfwa.  En pti bren labarb St Andre anba sez bann paran ti fer zot dormi.  E sa 2 zenn anmoure ti kapab profite pou sove.  En gous lay anba lebra ti sifi fer lasaler monte anba lebra sa zanfan ki fer krwar i ganny lafyev, pour li zis pa al lekol.  Tou sa i nepli me lefe i reste ki malgre nou en Sesel modern, vye labitid pa mor.  Ouswa, les mwan dir, labitid i segonn natir.

An konklizyon pou siport sa Bill, les mwan dir ki avek letan, kreol in vin non selman en lalang, me en pep avek en lidantite.  I pa sifi dir mon en Seselwa me pli konplet ler mon dir mon en kreol.  Seve krepi me lapo bren, lizye nwanr.  En lot, seve drwat ou malbares, me lapo nwanr, lizye gri.  Se pour sa rezon zis ki nou dir, i pa sifi pou dir nou en Seselwa, me i pli merite dir ki nou en kreol.  Bann tradisyon e koutim ki’n kontribye ver nou fason viv, en kiltir Seselwa vibran.  Malgre tou bann zefor pou kraz li, nou lalang in en lalang ki vivan.  Enn ki nou’n kree nou menm.  Nou’n kree nou prop kiltir, ki fer ozordi i en santiman for nou en kreol.  Mersi.

 

MR DEPUTY SPEAKER

Onorab Fideria.

 

HON EMMANUEL FIDERIA

Mersi Mr Deputy.  Mr Deputy, sa Proze de Lwa ki’n ganny soumet konsernan letablisman Lenstiti Kreol i annan en lenportans, pour ki zenerasyon apre zenerasyon, nou ava pe koz lo en moman enportan dan sa desizyon brav e kouraze, ki leadership Sesel in pran dan sa letap aktyel.  Sa desizyon i annan en valer imans ki personn pa kapab konteste.

Mr Deputy, malgre ki sitwayen dan diferan pei i annan fakilte pou aprann e koz plizyer langaz, sa pa pou fer ou vin en Angle, pa pou fer ou vin en Franse, pa pou fer ou vin en Italyen, pa pou fer ou vin en Alman.  Me ranforsi e fasilit ou posibilite reel pour kominike atraver lemonn.

Mr Deputy, napa Lakademi ozordi.  Napa Lengwis ozordi ki pe kestyonnen e met dout ki labaz fondamantal vre lidantite en pep i prensipalman ganny definir par son langaz.  Pour nou, pep Seselwa, nou langaz kreol i nou vre lidantite.  Isi byen ki dan lezot parti lemonn kot nou ete, nou langaz i annan en rol tre enportan.  Annou eksplor son litilite dan nou lavi toulezour.  Mon oule listwar i note e i tre enportan ki sa misyon ki nou pe akonplir ozordi i fondamantal pou fitir langaz kreol.  2 keksoz.  Ozordi, Sesel in ganny aklamen e ganny respekte koman Kapital bann zil kreol.  Dezyenmman, sa Bill pe fer provizyon ki Sekretaryat Lenstiti Kreol Sesel i ganny etablir e ganny deklare koman Sekretaryat Enternasyonal Lenstiti Kreol.  En evolisyon istorik san presedan dan nou listwar devlopman ek evolisyon kiltirel, pli spesifikman, i sinifye en moman tournan an sa ki konsern valorizasyon nou langaz kreol.  Sa moman eksepsyonnel i afirm e osi donn pli gran valer, stati konstitisyonnel ki nou trwazyenm repiblik in san rezerv akorde dan nou Konstitisyon, ler nou donn menm valer nou 3 langaz, kreol, franse, angle.  E Seselwa in ganny garanti sa drwa konstitisyonnel pou servi son langaz lo tou nivo devlopman akote sa 2 lezot langaz.

Sapit 1, Lartik 4, 1 ek 2 nou Konstitisyon i fer sa tre kler.  Donk, si Konstitisyon in garanti nou sa Drwa, i enportan ki tou Seselwa, pa enportan ki laz, me son disponibilite, kapasite fizik, i permet li e sosyete i donn li sa posibilite ek loportinite pou aprann son langaz, pou li kapab ekrir son langaz.  Pou li kapab lir son langaz e byensir, kominik avek pli gran lefikasite e klarite dan son lavi toulezour.

Mr Deputy, sa Proze de Lwa ozordi i osi donn nou en gran loportinite pou nou koz lo en size ki en konsern serye.  Sa konsern se ki nou annan ankor krwayans ki konn lir e lir nou langaz kreol pa pou anmenn nou okenn par.  Oubyen, ki i napa okenn lenportans konn lir e ekrir kreol.  Mon ganny touse seryezman ler en zenn graduate pa kapab lir kreol e ou ganny dir, kreol pa enportan.  Dan sa konteks, si i annan en domenn ki nou devret seryezman revwar se meyer fason pou asire ki tou etidyan ki kit nenport ki Lenstitisyon skoler dan Sesel i konn lir e ekrir kreol.  Sa kestyon i riske enpe kontroversyel akoz mon konsyan ki i ankor annan ki krwar ki ler ou konn lir e ekrir kreol, pa pou anpes ou vin en pli bon Dokter, vin en pli bon Enzenyer, vin en pli bon Siyantis oubyen anpes ou ganny bann A Star.  Mon panse ki sa i en persepsyon ki nou bezwen a sa staz nou devlopman, annan sa grander lespri pou nou pans diferaman.  Mon note, an pasan ki nou langaz kreol in zwe e pour zenerasyon dan lavenir pou kontinnyen zwe en rol tre enportan.  Nou langaz i definir nou lidantite sosyal.  I definir nou lidantite kiltirel e personnel.  I osi fer nou sa ki nou ete ozordi.  Nou fason kominike koman en pep.  Nou koutim.  Nou bann valer, eksetera.  Sa ki laverite se ki nou kree sa vre lanbyans lanmizman oubyen lafet en gran mazorite Seselwa yer, ozordi i servi langaz kreol.  En gran mazorite i servi langaz kreol yer ek ozordi pou eksprim zot lemosyon, zot sagren, zot lanmertim e menm zot douler.  Anfen, labaz se ki napa langaz ki enferyer e napa langaz ki siperyer.  I zis en kestyon lafason ki tel ou tel langaz in evolye.  Definisyon lakseptasyon, determinasyon son litilite, praktikalite dan en moman istorik konkret.

Lo nivo touristik, bann touris, ensi ki bann etranze ki vin travay Sesel, zot fer zot zefor pou dekouver, apresye e menm aprann nou langaz, ki petet nou koman en pep, nou pa pe valoriz li e promouvwar li ase.  Pour ki nou langaz i epanouir, pour ki nou langaz i reste an bonn sante e vivan, sa bann Lenstitisyon ki’n ganny sa manda pou edik, promouvwar e valoriz nou langaz kreol ki bezwen fer en bon travay.

Premyerman, lo nivo Minister Ledikasyon, bokou pe ganny fer pou edik nou pep.  Nou zanfan pe ganny loportinite pou aprann nou langaz kreol ziska en serten nivo Primer 6.  Nou bann Ansennyan ki montre langaz kreol pe ganny formen kontinnyelman lo fason pou ansenny langaz kreol e anmenmtan, zot bagaz lengwistik pe ganny anrisir.  Me kestyon ki reste, kan ki pou nou entrodwir kreol lo nivo Segonder?  Eski i fezab?  Wi.  I pa en misyon enposib.  Mon swete, ki la avek kreasyon Lenstiti Kreol, nou ava fer en zefor spesyal pou kontinnyelman ekrir, pibliye e devlop plis literatir an kreol lo en pli o nivo posib.  Nou devlop en progranm spesyalize dan langaz kreol ki ava fasilit sa prosesis laprantisaz kreol lo tou nivo, dan bann Lenstitisyon Skoler.  Nou met en valer plis progranm ki ava permet nou bann zenn devlop plis zot nivo kreativite an kreol dan domenn literatir, sanson, pyes teat, resers eksetera.  Fodre ki nou pare pou nou envestir dan devlopman langaz kreol.  Annou pa esper zis Festival Kreol pou fer sa zefor eksepsyonnel ki ganny fer.  Medya i kontinnyen zwe.  I annan en rol primordyal, pour ki nou langaz kreol i ganny propaze lo sa standar ki nou oule vwar kreol i arive.  Dan sa konteks, fodre ki Zournalis i ganny formen, pou asire ki zot prodiksyon ekrir lo en nivo ki rezonnab.  Mon tir sapo avek Radyo Sesel.  Zot fer li zot devwar pou pas bann progranm ki tous nou pep.  Dan kwen lasante, legal ek lezot ankor i an kreol.

Mr Deputy, dan Lenstiti Kreol i annan en Komite Lengwistik lo nivo Nasyonal.  Son rol se veye e asire ki devlopman e proteksyon langaz kreol dan sa lemonn globalize.  Mon santi soulaze kimannyer lo nivo nou devlopman sosyal, pou vwar nou langaz kreol reste tre vivan.  Leker sosyete Seselwa i la.  Douler ek malez lasosyete i ganny eksprimen an kreol.  O moman pou defann ou lekor legalman, langaz kreol ki koze.  Ziz etranze i ganny en tradikter e pas a Seselwa.  Akoz nou dan Sesel, nou lib pou eksprim nou dan langaz kreol.

Mon pa kapab termin mon soumisyon san koz lo lenportans langaz maternel.  Langaz maternel Seselwa se kreol e se sa, pou nou vwar li dan sa konteks drwa enternasyonal ki UNESCO, ki Lorganizasyon Nasyon Ini pour Ledikasyon, Lasyans e Kiltir in met bokou lanfaz lo la.  Mon repete.  Sa se nou drwa annan akse a ou langaz maternel.  Bokou resers in prouve ki langaz maternel i annan en lefe pozitiv lo devlopman lengwistik e edikasyonnel en zanfan.  Sepandan, vre defi bann endikater bann ki fer desizyon politik se fasonn sa evolisyon lidantite Nasyonal e kiltirel dan en fason ki Drwa tou sitwayen i ganny respekte e ki resours kiltirel lengwistik ek ekonomik i ganny maksimize.  Ki Lenstiti Kreol i devlope e vin sa gardyen nou langaz maternel.  Ki Lenstiti Kreol i fer tou pou fer rezonnen langaz kreol pli for dan tou kwen lemonn, kot nou annan bann nasyonalite ki annan bokou lentere, konpran e apresye langaz kreol.  Ki Lenstiti Kreol i vreman fer sa zefor pou devlope e ogmant diferan kalite lesanz ant tou bann pei kreolofonn e fer ki tou laspe lavi nou pep i ganny met an valer, spesyalman atraver nou Lendistri Touris kot nou annan bokou pou gannyen.

Viv nou kreol Seselwa.  Mr Deputy, mon remersi ou e mon pou siport sa Bill.  Mersi.

 

MR DEPUTY SPEAKER

Onorab Valmont.

 

HON SYLVIANNE VALMONT

Mersi Mr Deputy Speaker.  Bonn apre midi Minis.  Mr Deputy Speaker, mon pou zwenn lezot koleg Onorab pou koz an sipor sa Bill, avek bokou lafyerte.  Koman en Seselwa ki fyer mon lorizin.  Fyer mon pei e son lakonplisman dan konteks nou lalang Nasyonal.  Fyer pou nou kiltir kreol Seselwa, malgre diferan lopinnyon konsernan nou langaz, mon apresye bokou rezon det sa Bill pou transform Lenstiti Kreol koman en Lorganizasyon ek son prop lotonomi.

Mr Deputy Speaker, si ozordi dan sa Lasanble nou pe eksprim nou lide e debat lo bann diferan size dan nou lalang kreol, set akoz en pozisyon politik ki Gouvernman nou pei ti pran plizyer lannen pase.  Sa i parmi bann bold decisions parey labitid, ki Parti SPUP ti pran dan sa lepok akoz i ti kler ki ler en pei i vin endepandan, i neseser ki i rod bann mwayen apropriye, non selman pou prezerv son kiltir e leritaz me osi pou promouvwar son lidantite Nasyonal pou zenerasyon fitir.  Parey Msye Jean-Claude Mahoune ti fer sorti dan son resers plizyer lannen pase, sa Gouvernman ki ti pran pouvwar an 1997 ti annan e mon quote:-‘A people oriented concept of development which believed that the majority of the population should participate fully in the economic, social, political and cultural development of the Country’.  Unquote. Depi sa letan, nou’n vwar bann devlopman enportan dan plizyer domenn, pour ki lalang kreol in pran son plas dan nou lavi kotidyen.

Mr Deputy Speaker, koman en pti pei ki’n sibir sistenm kolonyal, parey bann pei Karaib tel ki Haitii, kot kreol i lalang ofisyel, Sesel in fer tou sa ki posib pou valoriz e promot kreol dan tou son laspe.  En legzanp tipik se nou Festival Kreol parey enn de lezot koleg in koz lo la, ki fer an Oktob toulezan.  E nou konnen osi ki Lenstiti, depi son legzistans, in fer tou sa ki posib e fer bokou dan konteks lengwistik kreol kot in annan sinerzi lo nivo lokal, rezyonnal, ensi ki enternasyonal.  I evidan ki depi desizyon Gouvernman pou nou servi kreol koman nou lalang Nasyonal ansanm avek angle e franse, bokou zefor e provizyon in ganny fer pou asire, ki koman en lalang ofisyel, i ganny devlope dan en fason efektiv e soutenab.  Bokou travay resers in ganny fer par Minister ledikasyon, ensi ki Minister Kiltir e Lenstiti limenm pour ki dan konteks lengwistik, lalang kreol i kontinnyelman devlope e evolye.  Nou lalang kreol in vwar son vre plas dan nou sosyete Seselwa, parey nou Konstitisyon i permet.  E anlinny avek sa pwen Mr Deputy Speaker, mon apresye ki VP bomaten i ti lir preanbil nou Konstitisyon dan nou Lasanble, pou fer resorti son valer.

Sa Bill pou etablir Lenstiti Kreol koman sa body corporate, avek bi pou sirvey, regilariz e promouvwar devlopman langaz e kiltir Seselwa i en lot milestone dan nou listwar e dan listwar Lenstiti Kreol limenm, ki ti ganny met anplas depi lannen 1981, plis ki 30an pase.

Mr Deputy Speaker, i evidan ki Lenstiti Kreol pe deza fer bokou travay anlinny avek lobzektif sa Bill ki’n ganny liste dan dezyenm parti Seksyon 4 e Seksyon 5, ki konsern Linguistic and Cultural Development of the Creole Language e fonksyonnman Lenstiti.  Par egzanp, lo paz 6 Lartik 4 ki met lanfaz lo providing means of development for the Seychelles Creole language and literature.  Levidans bann travay ki kontinnyelman ganny pibliye dan medya e bann lansman plizyer dokiman prepare par Lenstiti Kreol i tre kler.

Mr Deputy Speaker, mon’n dir avan.  Mon fyer mon lidantite Seselwa, kot koman en Nasyon, nou viv dan en pei kot i annan en larmoni kiltirel enpekab.  Kot i annan tolerans e respe pou diferan ras e tradisyon, ensi ki larelizyon.  Nou lazwa de viv kreol, nou fason viv, parey nou toultan dir, i inik dan lemonn e mon swe, se ki nou fer tou sa ki posib pou kontinnyen prezerv li parey Minis in dir dan son lentervansyon.  Nou lalang maternel se nou.  I evidan ki letablisman lotonomi Lenstiti Kreol pou kontinnyen zwe en rol enportan kot i konsern prezervasyon nou lidantite, me pli enportan ankor, parey in ganny fer sorti dan lezot lentervansyon, i pou en leading institute for creole language in the world. Etan donnen ki Sesel i sel pei pou promouvwar lalang kreol enternasyonalman.  I kler ki koman en sekretaryat enternasyonal, Lenstiti pou annan en rol kle.  Anmenmtan, Lenstiti pou annan bokou defi me nou ekspekte ki i pou ganny bann sipor neseser pou sirmont sa bann challenges parey nou dir.

A sa pwen, mon pou sezi sa loportinite pou salye e felisit sa bann travay ki pe ganny fer par staff kot sa Lenstiti, pou zot zefor kontinnyel pou promouvwar lalang e nou kiltir e pour bann travay resers, dokimanter e tou lezot travay ki pe ganny fer par sa Lenstiti.

Mr Deputy Speaker, mon swete e rekomande ki zefor i ganny fer pou ankouraz bann zenn pou rekonnet travay e lenportans sa Lenstiti, pour ki zot osi vwar loportinite en karyer dan sa domenn.  Parey in fer sorti fortman dan Seksyon 5 lo paz 8 sa Bill.

Mr Deputy, avek sa 2 pti mo, mon pou aport mon sipor pou sa Bill. Mersi bokou.

 

 

 

 

MR DEPUTY SPEAKER

Nou bezwen met sa mo ‘challenges’ osi an kreol.  Onorab Jeannevole.

 

HON BEGITTA JEANNEVOLE

Mersi Mr Deputy.  Mr Deputy, langaz e lidantite i direkteman relye ek kanmarad.  En kominote i eksprim son lidantite dan son langaz maternel.  Son langaz maternel se sa langaz ki in erite ek son gran paran e se sa langaz ki i koze dan lakour.

Mr Deputy, pour mwan, set avek gran fyerte ki nou prezant en Lezislasyon ozordi lo kreasyon en Lenstitisyon ki pou promouvwar nou lalang kreol.  E mwan, koman sa Manm Lasanble pour Mont Fleuri, ki fyer nou kreolite, mon pa pou mank sa lokazyon spesyal pou dir enn de mo an sipor sa Lalwa.

Permet mwan Mr Deputy pou santre mon lentervansyon lo lansennyman lalang maternel dan lekol e sa enn an kestyon ozordi se nou lalang kreol ki sa Lenstiti i promouvwar.  Resers in montre ki en zanfan ki konn koze e lir dan son lalang maternel i pli fasil pou li servi sa menm abilite e kapasite dan laprantisaz en lot langaz.

Mr Deputy, mon’n menm fer sa leksperyans letan ki mon ti ansenny langaz dan lekol.  Lansennyman okenn langaz etranze i sa fondasyon lengwistik premyerman pou ansenny okenn langaz.  Par egzanp, pou li pli byen komans aprann angle ou franse, detanzantan ou pe bezwen fer tradiksyon dan sa langaz ki i koze toulezour.  Dan sa fason, i pli fasil pou sa zanfan fer en portre dan son lespri, olye en leksplikasyon ki ou ti pou donn li, ki petet ti pou pli konpleks pou li e ki i pa ti pou ganny en konpran.  Servi nou langaz kreol dan lekol i osi ede pou fasilman tous tou zanfan ki sorti dan diferan kalite lakour, ki petet i annan sa enn ki li, okenn mo angle i pa’n ganny sans aprann.  I pou alor konpletman etranz pou li, letan i komans tann koz an angle e anplis par sa, i sipoze pe aprann en lot nouvo keksoz.  I pou retenir tre pe, ou menm nanryen, sirtou si ou pe sey fer sa zanfan konpran bann konsept par egzanp dan matematik ou lasyans, dan en langaz ki a menm moman, i pe sey aprann.  Carol Benson dan son resers lo bilengwizm i apel sa, konmsi ou pe met sa zanfan dan delo, me san montre li kimannyer pou naze.  Byensir, ki pou arive avek li?  Apre sa, i pou depan lo abilite e lentelizans sak zanfan, kimannyer zot pou aprann an angle sa bann menm konsept.  Me i pa ditou fonde ki set akoz zot in aprann an kreol avan e ki apre zot pa kapab aprann an angle parey serten i dir.  Nou Gouvernman i asire ki nou polisi ledikasyon pour tou i ganny akonplir par sa.  En Gouvernman ki met son pep o sant devlopman e sa i osi enkli son zanfan dan ledikasyon.  Sa largiman i egalman anlinny ek Konvansyon UNESCO kont diskriminasyon dan lekol.  Sa Lorganizasyon i osi rekonnet ki tou zanfan i merit ganny akse ek ledikasyon debaz dan son lalang maternel.  UNESCO i egalman aksepte ki bilengwizm i osi enportan.  Kapasite en langaz pou sirviv pa zis depan lo son lesanz oral, me osi lo en gran volim prodiksyon bann materyo pou lansennyman e dokiman enprimen.  Enn parmi bann travay ki Lenstiti Kreol i fer.  Tou le lannen, apepre 10 langaz dan lemonn i mor.  I reste aktyelman 6 mil lalang ki oral selman e ki ankor an risk disparisyon.   Nou pa oule ki sa i ariv ek nou kreol.  I pli fasil pou en langaz disparet ler i ganny pratike zis oralman.  Nou sanse ki nou lalang kreol i en langaz ek lekritir ki fonetik.  Savedir, nou ekrir ekzakteman sa ki nou tande.  Nou ekrir sak let ki nou prononse dan en mo e sa i fer li pli fasil pou en dimoun ki pa’n aprann kreol dan okenn Lenstitisyon formel me i kapab ekrir an kreol.  Sa pa arive dan okenn lezot langaz.

Dan serten pei, serten dimoun pa ganny enkli dan lavi sosyal e devlopman sa pei akoz napa okenn liv ou domiman ekrir dan zot lalang maternel.  Madanm Irina Bokova, Direkter Zeneral UNESCO i dekrir sa koman en vyolasyon Drwa Imen pou laliberte lekspresyon.  Sesel, ou Drwa eksprimen e pou reste enformen i ganny respekte akoz nou Gouvernman i rekonnet 3 lalang Nasyonal, kreol, enkli parmi.

Mr Deputy, kreol in osi fini vin lanmod ozordi.  Fini sa letan kot nou gran paran ti ganny bate, ou sinon mars ek en papye lo zot ledo dan lakour lekol akoz ti’n mansyonn en mo an kreol.  Menm dan Legliz ozordi, lektir i ganny lir an kreol e lakoral i sant parfwa an kreol.  Nou bann santer e santez, plis ki 80 poursan zot sanson i an kreol e piblik i apresye pli byen bann sanson ki an kreol.  Zot sanson pli popiler i sa enn an kreol.  Lekel ki dir alor, ki nou pa kapab ariv okenn par ek kreol?

Mr Deputy, permet mwan osi site kote nou kapab arive ek kreol.  Ou kapab annan ou en profesyon dan ou lanmen par montre kreol dan lekol.  Ou kapab vin en Zournalis, ankor ou pou bezwen konn lir e ekrir an kreol.  Ou kapab vin en travayer dan sa Lenstiti Kreol.  Ou kapab vin en lengwizm e pour sa, byensir ou pou bezwen konn ou langaz maternel.  Isi menm dan sa Lasanble, nou deliberasyon i an kreol, malgre tou nou Lalwa i an angle.  Tre bon linisyativ alor pou tradwir sa enn morso lezislasyon an kreol.

Me pli enportan Mr Deputy, nou langaz kreol i nou lidantite sosyal.  Nou rekonnet kanmarad par nou langaz.  E langaz i sa fason pli fasil, pli for pou prezerv en leritaz.  En langaz alor, i bezwen annan en Lenstiti ki gid son devlopman, asir son promosyon, gid son lekritir e literatir, osi byen ki son kiltir kreol ki atase avek.

Pou konklir Mr Deputy Speaker, les mwan fer rapel sa Lasanble ki tou Seselwa, ou laplipar Seselwa i fyer son lidantite e kreolite.  Sa pti minorite ki pe fer nou krwar ki kreol pa enportan e ki se kreol ki responsab pou anpes laprantisaz bann zelev dan lezot size, sa i fo.  Ki kantite nou, ler nou kit Sesel pou al etablir aletranze swa pou travay ou pou letid, i kontinnyen kwi sa pla kreol, ou anvi manz sa bon bouyon bred?  Koman zot ariv Sesel pou vakans, zot anvi manz sa ladob.  Se sa ki fer nou sa vre kreol.

Festival Kreol i reste enn sa bann aktivite pli apresye par Seselwa.  Bal Kreol i konmela ganny fer pli souvan e i toultan ranpli, menm ek lazenes.  Yer swar menm nou’n vwar lo televizyon, Dimans Moutya, ti annan bokou partisipasyon zenn Seselwa.  Se sa ki montre nou alor ki wi, nou Seselwa i apresye nou kreolite e sel fason prezerv li se par gard nou langaz.

Se pour sa rezon Mr Deputy ki mon pou donn mon sipor pour sa Bill.  Mersi.

 

MR DEPUTY SPEAKER

Onorab Meggy Marie.

HON MEGGY MARIE

Mersi Mr Deputy Speaker.  Bonn apre midi Minis ek ou delegasyon.  Bonn apre midi a tous.

Mr Deputy Speaker, sa Proze de Lwa ki’n ganny prezant devan nou i annan pour lobzektif kree en Lenstiti Kreol Seselwa ki pou apel Lenstiti Kreol.  Son bi se pour regle, sirvey e promouvwar devlopman kiltir ek lalang kreol Seselwa.  Sa Lenstiti Mr Deputy Speaker, i pou osi fonksyonn koman Sekretaryat pou Lenstiti Kreol Enternasyonal.

Mr Deputy Speaker, permet mwan komans mon lentervansyon par esey rod leklersisman lo 2 kestyon ki zabitan mon distrik, ensi ki lezot Seselwa zot kapab pe demande.  Akoz en tel Proze de Lwa, sirtou kan ti deza annan en Lenstiti Kreol e ki’n ganny ranplase par Lenstiti Kreol Enternasyonal?  Anba ki regilasyon oubyen Lalwa ki ansyen Lenstiti Kreol ti pe fonksyonnen?

Mr Deputy Speaker, Nasyon Seselwa pou dakor avek mwan ki sa Proze de Lwa pe donn sa valer legal kiltir ek lalang kreol Seselwa.  E pou elabor lo serten son bann lavantaz, mon pou komans avek en konparezon lo lafason ki ansyen Lenstiti Kreol ti pe fonksyonnen.  A en serten letan, i ti en striktir ki ti pe fonksyonn anba Minister Ledikasyon e dot moman, anba Minister Tourizm ek Kiltir.  Mr Deputy Speaker, avek en tel sitiyasyon, i kler ki ti en vre defi pou fer fonksyonnen avek lefikasite sa Lenstiti.

Premyerman, latansyon ki ti ganny akorde a sa Lenstitisyon ti limite akoz latansyon ti bezwen osi ganny partaze pou fer fonksyonnen lezot striktir sak Minister ki’n deza mansyonnen.

Dezyenmman Mr Deputy Speaker, pou fer fonksyonnen en Lenstiti parey i koute an term resours imen, resours fizik, letan ek finansman.  La osi i ti en defi pour sa 2 Minister konsernen pou finans tou proze ek aktivite.  Donk Mr Deputy Speaker, sa Proze de Lwa i premyerman fer provizyon pour ki sa nouvo Lenstiti Kreol i vin otononm.

Koman ilistrasyon Mr Deputy Speaker, mon analiz lo lavantaz sa Proze de Lwa pou konm swivan.  Lartik 5(1) Mr Deputy Speaker, i donn lotorite ek pouvwar legal nouvo Lenstiti Kreol pou prezerv, promouvwar e donn valer tou sa ki anglob lalang ek kiltir kreol Seselwa.

Dezyenmman Mr Deputy Speaker, Lartik 6(2) sa nouvo Lenstiti Kreol pou ganny laprouvasyon Minis Finans pou rod sponsor, donasyon ek lezot aktivite.  I pou osi annan drwa fer son prop kont banker, antre an partenarya avek lezot Lenstitisyon, me an akordans avek Public Finance Management Act, 2012.

Lartik 16 Mr Deputy Speaker i senpleman vedir ki sa Lenstiti pou annan son prop Bidze, aprouve par Lasanble Nasyonal pou fer son bann depans.

Mr Deputy Speaker, Lartik 7 i montre langazman ek konviksyon Parti Lepep vizavi promosyon ek valorizasyon kiltir ek nou lalang kreol lo nivo Nasyonal ek enternasyonal.  Sa nouvo Lenstiti Kreol pou ganny dirize par en Board ki son bann manm pou ganny apwente par Prezidan Larepiblik.  I pou osi annan en Sef Ekzekitif ki li osi pou ganny apwente par Prezidan.

Mr Deputy Speaker, pouvwar legal sa Board ii mans, konpare avek ansyen Lenstiti Kreol.  Pou sit koman legzanp Mr Deputy Speaker, Lartik 9(1), Board pou fer sir ki Lenstiti Kreol i perform tou son fonksyon avek lefikasite, an akordans avek kad politik, lengwistik e kiltirel.  Board pou osi annan pouvwar pou kree bann komite pou fasilit son travay ek enplimant son bann lobzektif.

Mr Deputy Speaker, Lartik 5(2) i eksplik klerman ki nouvo Lenstiti Kreol pou devlope e plitar fonksyonn koman en Sekretaryat Lenstiti Kreol Enternasyonal.

Mr Deputy Speaker, atraver en tel demars, nouvo Lenstiti Kreol i ava benefisye e epanouir avek leksperyans ek lekspertiz lezot pep kreolofonn.  En tel devlopman pou fer nou lalang kreol ek nou kiltir syonn sa glob lemonn, sa lemonn kreolofonn, frankofonn ek anglofonn.

Mr Deputy Speaker, permet mwan termin mon lenterevansyon avek enn de pti pwen refleksyon.  Si nou anvi ki sa Lenstiti i reisir avek sikse, fodre ki sa bann pwen konsern i ganny konsidere.  Mon swete ki letan sa Lalwa i pase, bann mekanizm ek regilasyon i ganny met anplas e enplimante avek lefikasite.  En tel Lenstiti i bezwen travayer kalifye, donk provizyon i devret ganny fer pou resours imen ek finansyel.

Finalman Mr Deputy Speaker, ‘En lizye lo lavenir’ parey moto Festival Kreol i dir, nou zanfan ek etidyan, ensi ki Seselwa an zeneral i bezwen ganny ankouraze pou vwar ki letid lalang kreol Sesewla i osi enportan ki lezot size.  Alor, provizyon i devret ganny fer pou anmenn letid kreol lo nivo pli o, par egzanp lo nivo Liniversiter.

Pou terminen Mr Deputy Speaker, mon swet tou bann ki’n antreprann sa latas nob kouraz dan zot parkour e mon envit lepep Seselwa, ansanm avek mwan pou krwar dan larises nou kiltir ek lalang kreol e dan son reisit.  Mon pou demann tou Manm Onorab pou siport e vot anfaver sa Proze de Lwa.  Mersi Mr Deputy Speaker.

 

MR DEPUTY SPEAKER

Onorab Pierre.

 

HON DAVID PIERRE

Mersi Mr Deputy.  Mr Deputy, mon pa pou tro long.  Bokou in ganny dir lo sa Proze de Lwa.  Be koman en pei, nou devret kapab protez e promot nou lalang maternel e promouvwar son devlopman.  Se sa ki sa Act, sa Bill ki la devan nou pe dir nou e mwan koman en Seselwa, mon fyer mon langaz e mon krwar dan son devlopman e mon fermeman krwar ki i annan en rol dan devlopman laprantisaz nou bann zanfan up to en serten pwen.

Mr Deputy, mon komans koumsa akoz souvandfwa, i annan bokou dimoun ki pa krwar dan servi lalang kreol pou promot laprantisaz dan lekol.  I annan dimoun i annan sa konsept, i annan sa persepsyon ki kreol i en langaz ki pa kapab ganny servi dan nou lekol.  Les mwan eksplike e dan mon kote pour mwan, sa i enn bann pwen for ki mon krwar Lenstiti Kreol i devret kapab travay lo la an close kolaborasyon avek Minister Ledikasyon.  Mon konnen ki parfwa, mwan mon’n fer li e letan mon’n travay dan lekol, mon’n vwar li ganny fer a plizyer repriz.  Mon konnen ki bann Ansennyan i servi nou langaz maternel pou ede deblok serten konsept dan serten matyer, sirtou Mr Deputy, dan en size kot nou napa bokou Seselwa ki aprofondir zot konesans ladan e sa se dan Lasyans e osi dan Matematik.  Bann Ansennyan i servi langaz kreol pour ki en serten kategori nou bann zanfan i kapab konpran e metriz serten baz an relasyon ek sa bann konsept.  Konsept ki nou bezwen enstil dan nou bann zanfan dan sa bann size, avan ki nou kapab tir zot lo en serten nivo pou anmenn zot lo en lot nivo.

Mr Speaker, sa i enportan e mon krwar i en rol kle ki Lenstiti Kreol i bezwen angaz li ladan, akoz isi Sesel, parey bokou lezot pei, Gouvernman i envestir en gran sonm larzan on a yearly basis.  Letan nou met li lo baz nou GDP, en bon poursantaz nou GDP dan ledikasyon.  E sa ki nou anvi vwar i se ki nou return dan sa lenvestisman ki nou fer dan nou bann zanfan i enn ki o e pour nou kapab achieve sa, souvandfwa nou bezwen konnen ki fason nou ansenny nou bann zanfan.

Annefe Mr Deputy, resers in demontre, partou atraver lemonn ki i annan a very high positive coalision ant laprantisab konsept dan ou langaz maternel e kalite rezilta ki ou kapab anmennen.  E resers in osi demontre ki souvandfwa, ler en foreign language i ganny servi dan dizon bann size parey Lasyans, sa i kapab mars koman en baryer.  Nou konnen ki dan lekol, diferan group zanfan dan menm kategori laz i devlop a en diferan vites e parfwa, nou bezwen servi diferan medium pour nou kapab pous sa bann zanfan devan dan zot devlopman e dan laprantisaz serten sa bann matyer.  Donk, dan bokou ka, dan bann sitiyasyon spesifik, servis nou langaz i vin enn ki apropriye.  Alors, nou langaz maternel i annan en rol kle pou zwe dan laprantisaz.  Zisteman Mr Deputy, sa i donn mwan en rezon fondamantal e en rezon enportan pou mwan kapab siport sa Proze de Lwa oubyen siport sa Bill ki la devan nou ozordi.

Mr Deputy, i enportan pou note ki mon pe koz servis nou langaz dan laprantisaz serten konsept, dan serten sitiyasyon spesifik, pangar sa ki mon pe dir i kapab ganny mal enterprete par bann ki kapab trouv li apropriye pou fer cheap politics avek sa size.

De tout fason Mr Deputy, i pou enportan ki sa Lenstiti i travay an etrwat kolaborasyon ek Minister Ledikasyon akoz de tout fason, kreol i reste koman an matyer dan Primer e devlopman e laprantisaz sa langaz lo nivo Primer dan nou bann lekol, i bezwen ganny fer korekteman e alor, sa kolaborasyon ant Lenstiti e Minister i devret enn ki o nivo e enn ki efektiv.  I pou bezwen annan en tre bon lesanz teknik ant sa Minster e sa Lenstiti.

Mr Deputy, en lot laspe lenportans annan en tel Lenstiti i devret vin dan kalite sipor ki nou kapab donn nou bann ekriven Seselwa ki ekrir dan nou prop lalang, oubyen ki menm, si zot ekrir dan en lot lalang tel ki angle, zot anvi fer en tradiksyon dan nou lalang kreol.  Sa Lenstiti i a kapab donn sipor teknik e sipor finansyel, pou asir en travay de bon kalite e pour garanti ki en proze dan sa lalinny, dek ki i ganny konsevwar, i ganny tou sipor Lenstiti pour li kapab vin en realite.  Nou bezwen siport nou bann artis Seselwa.  Nou bezwen siport nou bann konpoziter Seselwa.  Nou bezwen siport nou bann ekriven Seselwa.

Lenstiti Mr Deputy i ava osi annan en rol kle vizavi devlopman literatir kreol e promosyon nou langaz e nou kiltir dan lemonn, sirtou dan lemonn kreolofonn.  Alors, pou sa bann rezon, i pou enportan pou nou annan en tel Lenstitisyon.  Me en Lenstitisyon ki profesyonnel e en Lenstitisyon ki pou marse.

Mr Deputy, mon osi anvi vitman refer sorti 4 lezot pwen an relasyon ek bann Lartik ki dan sa Bill. Premye pwen i Lartik 7, i fer provizyon pou en Board, lo ki pou annan pa mwens ki 5 dimoun apwente par Prezidan Larepiblik e Lartik 7(2) i fer provizyon pou Prezidan limenm apwent Chairperson sa Board. Mon pe mazinen ki si Prezidan i li sa dimoun ki pe apwent bann Manm sa Board, sa bann manm i bann dimoun ki i konnen e i kapab annan konfyans dan lentegrite e profesyonnalizm sa bann manm e donk, nou devret kapab, dan sa konteks les zot apwent zot prop Chairman, olye ki sa osi i ganny apwente par Prezidan Larepiblik.  Sa i en remark ki petet mon ti ava kontan si Minis i pronons son lekor lo la.

Dezyenm pwen Mr Deputy.  Mon apresye toudmenm ki Lartik 12 i fer provizyon pou donn sa Lenstiti lotonomi administrativ e finansyel, kot zot a kapab hire and fire. Sa i enportan akoz zot a kapab anploy bann dimoun ki zot santi sa Lenstitisyon pou bezwen, san okenn lenterferans a okenn nivo, san okenn lenterferans politik e amonavi, this is the way forward.  Zot a kapab negosye saler ki son travay sa bann dimoun e donk, zot a vwar zot dan en pozisyon kot zot a kapab ganny bann dimoun de kalite pou fer en travay de kalite pour sa Lenstiti, akoz zisteman, sa Lenstiti i devret enn de kalite.

Mr Deputy Speaker, Gouvernman i bezwen fer sir ki i donn bann resours apropriye sa Lenstiti e sa Lenstiti i bezwen fer sir ki i kapab servi sa bann resours dan en fason efektiv pou li kapab atenn bann gran lobzektiv ki nou vwar dan sa Bill.  Mon egalman, apresye e siport lefe ki Lartik 13 i fer provizyon ki tou bann anplwaye, travayer aktyel ki la ozordi pou ganny transfer otomatikman pou kontinny zot lanplwa ek sa Lenstiti lo bann menm kondisyon oubyen bann kondisyon ki pli favorab e non pa bann kondisyon ki mwen favorab.  Ozordi dan Sesel Mr Deputy, sekirite lanplwa pou en fanmiy i enn ki enportan akoz nou konnen poudir bokou fanmiy pe fer fas ek difikilte lavi.  E nou konnen pousir pri lavi Sesel i enn ki ase o.

Katriyenm pwen Mr Deputy.  Pou asire ki larzan ki ganny vote pou sa Lenstiti dan Bidze i ganny byen servi e i ganny servi dan lentere tou Seselwa, mon kontan ki Lartik 17(2)(3) i fer provizyon ki larzan Lenstiti i ganny odite par Oditer Zeneral, kot an retour, sa i a garanti oversight e scrutiny par sa Lasanble Nasyonal ki li an retour, i pou vot lo Bidze sa Lenstiti ki sorti kot Gouvernman.

Mr Deputy, amonavi, bokou in ganny dir.  Mon pa pou elabor plis me mon a dir poudir sa Act i pou enn ki bon.  I enn ki neseser e mon zis anvi vwar ki letan sa Lenstiti i ganny met anplas, letan sa Lalwa i pase, mon anvi vwar ki nou annan en Board ki pou for.  Nou annan en Lenstiti ki pou for e nou annan en Lenstiti ki pou kapab fer en travay de ot kalite, sirtou Mr Deputy, an relasyon avek son kontribisyon ki i kapab fer vizavi devlopman ledikasyon dan nou pei Sesel.

Mr Deputy, avek sa 2 pti mo, mon a dir ki mon pou siport sa Bill.  Mersi.

 

MR DEPUTY SPEAKER

Onorab Rose.

 

HON MARIE-ANTOINETTE ROSE

Mersi Mr Deputy.  Mr Deputy, mwan osi mon pa pou long akoz nou’n pran en apre midi antye pou debat lo sa Proze de Lwa ki devan nou, zisteman akoz i en Proze de Lwa ki enportan.  E mon krwar pou remet li an konteks, menm si sa Proze De Lwa pe koz lo kreasyon en Lenstiti, Lenstiti Kreol e pozisyonn li lo nivo enternasyonal, nou bann Manm, nou pe koz finalman lo kreol akoz nou vwar sa Lenstiti se zisteman pou promouvwar kreol e kreolite.  Mon pou koz en pti pe plis lo kreolite akoz mon krwar kreol koman en langaz, nou’n pas sa dernyen semenn Mr Deputy ant mon lofis e lofis Biro Prokirer Zeneral, lofis Minis, lofis PS, lofis Lenstiti Kreol pe debat e mon konnen Bills Committee in fer menm travay lo en definisyon pou kreol.  Lo ki savedir kreol.  E amonavi personnel mon krwar nou merit asize e annan en definisyon pou kreol.

Mr Deputy, mon pa pe koz lo amendments to the Bill me mon pe koz lo ki savedir kreol.  I enportan pou nou.  Apre midi nou’n koz lo fason ekrir.  Mon krwar Onorab Jeannevole in koz lo kreol koman en lalang fonetik.  Onorab Ghislain in koz lo tou bann diferan lekspresyon kreol.  Bann lezot Manm ki’n koze lo kote latab isi in koz lo pozisyon politik anver kreol ki tre enportan.  Mon krwar bokou in ganny dir lo tou keksoz, me ki savedir et kreol.  Me pli enportan, mon krwar Onorab Paye-Marie in koz lo kreol Seselwa ki pour nou, i pli enportan ozordi ki savedir kreol Seselwa.  Eski kreol i tou senpleman en langaz ozordi?  Non.  Eski kreol i tou senpleman en kiltir?  Ozordi, non.  Eski kreol i en fason fer?  en fason fer en pep.  En pep ki’n ganny enfliyanse par, a en pwen dan son listwar, in ganny enfliyanse par en lot kiltir e alors in annan sa melanz langaz.

Pour nou dan Lasanble, mon krwar i enportan ki nou konpran e nou pep i konpran ki kreol i en lidantite.  En lidantite ki nou’n erite par nou listwar sosyo-kiltirel politik, ekonomik.  Nou listwar nou pei me i en lidantite ki nou Parti, Parti Lepep in fer sir in prezerve.  Mon krwar pep Seselwa i bezwen konpran sa tre kler e levidans i la.  Levidans konkretize ozordi par sa Proze de Lwa ki pe non selman dir ki kreol i lidantite nou Nasyon me ki nou bezwen en Lenstiti pou prezervasyon e promosyon sa lidantite.  Pa zis langaz, pa zis fason fer me sa idantite.

Mr Deputy, fodre nou rapel ki remet an valer kreol e kreolite.  Mon krwar Onorab Payet-Marie ti dir, 1984 e ozordi dan nou Lasanble nou annan bann premye zenerasyon zonm ek fanm ki si ou oule ti pas atraver sa premye lenstriksyon kreol dan lekol, ki’n prouve ki nou’n vin en zenerasyon ki’n fer sikse atraver laprantisaz langaz kreol.  Me pli enportan ozordi mon krwar e Lenstiti Kreol e i marye byen ki ozordi, bann Zofisye Lenstiti Kreol, Departman Kiltir, Minis ek son PS ek bann Dirizan lokal i zwenn pou diskit sa size Mr Deputy.  I enportan akoz se zisteman kimannyer nou viv dan kominote.  Kimannyer nou viv nou kreolite dan kominote ki pou enportan ki lenpakt pou annan lo bann Polisi, lo bann pozisyon, lo bann papye resers, lo bann devlopman ki Lenstiti Kreol pou annan.

Ozordi, defi ki nou annan se ki nou riske perdi enpe sa lidantite kreol, kreol Seselwa an vi globalizasyon, an vi en nouvo stil lavi, an vi nouvo fason fer ki pe enfliyans nou kiltir.  E nou pa pe dir isi dan Lasanble ki nou pa devret adopte nouvo fason fer.  Nou pa pe dir annou fer en retour lo bann vye metod ki en lepok ti ok pou fer akoz sitiyasyon sosyo-ekonomik sa pei sa letan.  Nou pa pe dir sa me nou pe dir, Lenstiti Kreol i annan en gro latas pou evalye si nou pe perdi sa lidantite kreol avek devlopman.  E mon krwar sa i pou petet son premye latas pou evalye ki degre nou pe perdi lidantite kreol.  Ozordi fodre par egzanp nou konstate ki i annan zanfan ki sorti dan bann Fwaye ki manman ek papa i koz kreol, i viv kreol me zanfan pa koz sa langaz kreol akoz petet i dan en Lenstitisyon Skoler ki pa koz sa langaz.  I annan zanfan ki koz enn dan nou 3 langaz Nasyonal oubyen 2.  I en zanfan kreol, i en zanfan Seselwa me i koz 2 dan nou 3 langaz Nasyonal me i pa pe koz kreol.  I annan zanfan ozordi e toultan nou fer riye par sa joke ki i annan en etidyan ki ler ti demann li, konplet sa proverb.  ‘Lenz sal i lav…………..’  E i ti dir, ‘dan washing machine.’  E i fer ou fer en gran refleksyon lo lidantite kreol dan sa prosen zenerasyon.  I pou annan bokou lezot keksoz ki nou zanfan demen pou soke.  I zis parey ozordi an Zapon, bann zanfan Zaponnen, sa i ki mon’n lir, preski pa konnen kimannyer en poul i ete akoz zot krwar en poul i frozen.  Sa ki zot vwar dan freezer.  Ou konnen, i en keksoz ki mon’n lir sa.  Mon pa konnen si i vre.  Me fodre nou fer en zefor pou nou aprann e valoriz kreolite.  Pa zis langaz, me lafason ki nou viv.

E Mr Deputy, bomaten mon ti fer lentervansyon e i tonm byen.  Bomaten nou’n koz lo nou Konstitisyon, nou’n koz lo Lazournen Nasyonal nou Lendepandans e ozordi apre midi nou pe koz lo kreol e kreolite.  E tousala i annan pou fer avek en retour ver lepase me kimannyer ozordi nou pe marye lepase, pou nou annan en plan pou lavenir.  Pou nou konnen kote nou bezwen ale e pour mwan, nanm en pep se son lidantite.  Se son listwar.  Se son pase e se kimannyer i apresye son pase e valoriz son lidantite.  E ozordi e i annan en gran refleklsyon ki nou bezwen fer koman en Nasyon lo nanm nou pep.  Kote nou pe ale, kote nou anvi ale e i annan en kantite defi ozordi.  Par egzanp Mr Deputy, lafason viv.  Nou’n konstate e tanzantan nou koz lo la, ki lontan ti annan en fason viv ki ti bon, ki fodre nou remet an valer.  Mon konnen globalizasyon, presyon lavi e tou dimoun, devlopman.  Par egzanp, remet bann valer dan bann lakour.  Remet bann valer dan bann kominote, kot zanfan i zanfan.  E zanfan i konn son plas dan en kominote koman en zanfan.  Pa koman en zenn adilt.  Koman i pankor vin zanfan, in vin en zenn adilt e i pe dir bann parol e i pe fer bann fason fer ki pa kreol sa.  Amonavi i pa kreol.  Si en zanfan pa konn dir bonzour, i pa en fason fer kreol akoz nou gran paran ti dir nou kimannyer pou dir bonzour e pou respekte en granmoun e pou annan en stil lavi ki akseptab e ki bon pour sosyete.  Sa en pwen ki mon ti anvi fer Mr Deputy e i bon koman en pozisyon politik ki nou pe pran, nou Gouvernman, nou Gouvernman elekte pe pran serten desizyon politik ki pe vreman fer en retour lo sa bann valer dan sosyete.

Dezyenm pwen brefman Mr Deputy, se ki i kler ki avek lamannman sa Lalwa ki devan nou, Sesel pe ankor enn fwa e parey in toultan fer, pozisyonn li koman en Dirizan dan plizyer domenn parey nou’n fer dan lanvironnman, parey nou’n fer dan devlopman nou lekonomi, parey nou’n fer pou devlopman bann madanm e pozisyon bann madanm dan nou pei.  Valorizasyon nou langaz, nou lidantite.  Sesel pe met li koman en Dirizan.  Nou deza en Dirizan.  Deza, kapital lemonn kreolofonn i Sesel.  Deza, Lenstiti Kreol i sa Lenstiti, parey nou dir an angle.  E la mon napa en meyer mo an kreol pou sa, ekskiz mwan.  The Leading Institute. Sa meyer Lenstiti Kreol ki etidye lalang kreol.  E sa i al ankor dan kote nou anvi ale dan sa ‘Nouvo Sesel.’  Nou pa zis satisfe avek annan en Lenstiti isi pour nou, antre nou.  Nou satisfe ler nou diriz lezot pti pei zil.  Nou pe diriz lemonn dan en domenn.  E mon krwar mon bezwen felisit Departman Kiltir, Minis avek Lenstiti Kreol.  Dan sa demars ki nou pei pe fer, nou Gouvernman pe fer, pou fer nou toultan top. Pou fer nou toultan pe dirize.  Pou fer nou toultan pe sa legzanp pou lezot pei.

Sa i sel 2 pwen ki mon ti anvi abord lo la mr Deputy.  Mon’n propoz serten lamannman.  Parey mon’n dir, i malere ki definisyon kreol pa enn bann lamannman ki’n antre me mon asire ki Lenstiti Kreol pou rod en fason pou annan en definisyon pou kreol, kreol Seselwa e osi kreol an zeneral.  En definisyon ki ava akseptab pour sa Lenstiti e pour bann dimoun ki sa Lenstiti pou montre keksoz.

Avek sa Mr Deputy, mon pe propoz sa bann lamannman e mon espere ki i ava ganny aprouve.  Mersi.

 

MR DEPUTY SPEAKER

Bon.  Bann lamannman pou ganny konsidere anba Order 67(1) koman bann simple amendments e alor nou ok avek.  E avek sa, mon ava envit Minis pou donn son reaksyon.

 

MINISTER ALAIN ST ANGE

Mersi bokou Mr Deputy Speaker.  Mr Deputy Speaker, pour komanse menm mon krwar, apre ki mon’n ekout otan Manm dan nou Lasanble koze avek bokou lafyerte.  Bokou lafyerte lo sa mo kreol.  sa mo kreol Seselwa e sa proteksyon sa ki nou annan koman en pep Seselwa.  Nou langaz, nou kiltir e met li dan en landrwa kle e sa se dan nou Lenstiti Kreol, pour li kapab get son demars pou li swiv son devlopman.  Sesel i inik e i enportan ki, ozordi ler mon’n ekout zot tou.  Inik akoz nou en pei ki fyer.  Nou fyer nou lalang, nou fyer nou kiltir.  Nou fer sa promosyon sa lalang kreol nou lalang maternel.  I annan bokou pei ki claim ki zot kreol parey nou.  I annan zis nou ki met li alavan.  Zis nou ki’n inik pou kapab pran li e fer li sa ki nou, nou oule pou li vin enn nou lalang ofisyel, me lalang ki pli servi dan nou pei.

E plitar mon a repran 2 pwen ki enn de Manm in fer lo kimannyer nou pou promouvwar li enpe pli lwen.

Mon pa pou kapab antre dan tou detay lo tou pwen, menm mon ti a’n kontan fer li me i annan sitan Manm ki’n koze.  Mon pou tous lo detrwa pti pwen ki mon panse i relevan ler zot in demann en leklersisman.

MNA pour Anse Boileau Mr Arnephy li in demann nou, in koz plito lo sa divizyon ki ti ekziste dan lepase.  In koz lo inifikasyon nou pei ek nou pep e in koz kimannyer kreol e atraver kreol, kiltir i en mwayen pou nou inifye nou pep.  E la mon salye Onorab Arnephy.  I kler ki kiltir en pep i enn bann mwayen pli inifikater ki nou kapab annan e i en mwayen ki a la dispozisyon Gouvernman, a dispozisyon lepep Seselwa dan bouz alavan pou nou achieve sa ki nou bezwen achieve dan sa pei, pou nou vin en pep.  Napa 2 pep Seselwa.  I annan en pep Seselwa e nou bezwen mark li.  E napa fason pli, pou siport sa ki Prezidan Larepiblik in lanse.  Sa boul ki in lanse se kiltir ki pou vin alafen pou zwe sweeper dan sa lig dan World Cup.  Sweeper alaryer pou kapab anmenn inifikasyon sa pep akoz kiltir, nou tou nou koz menm keksoz.  Nou tou nou apresye menm keksoz e si bann ki ti pas Anse Royale Dimans, ti a vwar ki levennman ki kiltir i fer.  Mon ti la.  Mon ti vwar Onorab Marie-Payet, mon ti vwar Onorab Anse Royale.  Ti annan 3, 4 Onorab la.  Me i enportan ki ler nou dan milye kiltir, nou pe regard deroulman en levennman kiltirel, napa politik, napa divizyon.  Tou dimoun i ansanm e se sa ki nou bezwen met plis zefor pou nou inifye nou pep avek.

Lo pwen ki ou’n leve lo resi lontan pou nou pa perdi sa bann dikton.  Pou nou pa perdi sa bann resi ki ti annan lo radyo sirtou akoz ti napa televizyon sa letan.  Mon oule kapab enform lasanble Nasyonal e Onorab limenm.  Leritaz Nasyonal son seksyon oral i anmas sa bann dikton, i anmas sa bann interview ki nou fer.  I anmas zot byen e sa bann trezor i la kot nou dan larsiv e sa nou travay etrwatman avek Lenstiti Kreol dan kimannyer nou gard li e kimannyer nou pou fer li vin plis ouver pou dimoun ganny akse avek.  E enn bann travay ki nou pe fer konmela se gete kimannyer, avek letan nou kapab fer sa pli ouver pou pep ganny akse.  Si zot oule ekout Antoine Abel fer enn son bann poenm ki i ti ekrir, kote ou pou ale pou kapab tann sa.  E sa i enn bann keksoz ki Lenstiti Kreol i krwar ladan e zot pe regarde, sakenn a son tour pou arive.  Ozordi nou pe met Lenstiti Kreol, fer li vin endepandan.  Me sa ki ou’n leve i en keksoz ki pe ganny fer e La Bastille i en landrwa kot i annan de milye tirwar ki gard sa bann resi, sa bann poem, sa bann dikton, sa bann interview ki’n ganny fer dan lepase.

Rol CINEA, SEYMAS, bann Lasosiasyon Lanmizik eksetera.  I annan zis en keksoz ki nou kapab fer pou zot tou.  En keksoz ki Lenstiti Kreol i fer e ki Minister i fer.  E sa set en pwen referans.  Nou donn sa led kot nou bezwen donnen.  Mon pou vwar li enpe regretan si en mizisyen Seselwa pou sant an kreol, ki i pa konn sant kreol.  So, alors si i annan okenn led ki i bezwen se kot Lenstiti Kreol ki sa, tou baz i annan en dimoun ki la aplentan ki ed dimoun fer bann tradiksyon neseser, get bann mo neseser si i en mo ki pa vreman kreol, pou met li dan konteks sa ki nou pe sey fer.

Onorab Sebastien Pillay in koz lo sa sanzman e levolisyon.  In koz lo telefonn mobil koman en legzanp.  Me Lenstiti Kreol ek Minister in pro-aktif ladan.  In pro-aktif e nou’n swiv sa deroulman teknolozi ki lazenes i servi, ki pa neseserman ti la en bann lannen pase, me ozordi i la.  E nou bezwen bouz avek letan.  E la mon ti a kontan enform Lasanble poudir ozordi, ou kapab fer resers lo internet atraver Google an kreol.  E Lenstiti Kreol in fer en travay mazer, pour nou arive, ler ou tap Google, ou kapab rod langaz kreol e fer nou resers lo la dan lalang kreol.  Sesel i devret fyer.  Fyer pou en pti pei ki nou annan en Lenstiti Kreol ki’n travay etrwatman dan konteks Gouvernman pour nou annan sa e ki i la alaporte ozordi tou dimoun.

Onorab Payet-Marie in koz lo sa kontribisyon finansyel, si pou annan ki bann lezot zil larezyon ki afilye avek nou.  Larezyon e menm pli lwen, i pou gannyen pour sa resers ki zot fer.  Nou’n diskite ki lenfliyans larzan i kapab zwe ladan.  Nou’n prefere pa antre dan sa domenn.  Nou’n demann bann pei ki kreolofonn, pou regarde ki soutyen zot kapab fer.  Pa pou zot vin peye pou fer en resers.  Ni zot bann serser, ni zot bann dimoun akademik akoz ler zot servi Sesel koman zot baz referans, se Sesel ki alavan.  Se sa mo Sesel ki pran son plas koman baz vre referans kiltir kreol.  Sa ki nou nou’n demann bann zil e pre ek lwen, gete kimannyer zot kapab ed nou konsolid nou Lenstiti Kreol Enternasyonal.  Nou konnen nou bezwen fer en batiman administratif deryer, pour nou liber sa gran batiman Lenstiti Kreol e les li vin sa landrwa resers.  Sa landrwa kot ou asize.  Sa landrwa ki annan bann salon sak zil e refer en batiman lo menm stil kreol alaryer kot Landinistrasyon Lenstiti Kreol pou ete.  Sa nou ankor pe negosye avek bann diferan zil.  I annan lentere me i pa vin en sel kou akoz i kout.  I en sonm konsiderab ki nou bezwen pou fer en batiman a nef.  Defi ki ou’nleve, Onorab Payet-Marie lo resours imen.  Nou kapab asir ou poudir deza striktir in ganny soumet avek DPA e osito ki, si zot aprouv sa Proze de Lwa apre midi, la nou a kapab antre an diskisyon avek DPA pou get sa striktir neseser, pou nou kapab annan sa mendev apropriye, pour ki Lenstiti Kreol i kapab marse e mars byen, pou fer Sesel fyer ki nou annan en Lenstiti Kreol parey i ete.

Lo kote marketing. Wi, i annan en seksyon laba ki okip sa.  Me anplis ki sa, zot annan, vi ki i en Minister alafen, i pa pou re-envant lafarin.  I kapab pran soutyen Minister limenm e Board Touris, kot bann Departman Marketing e se sa lafors Board Touris.  I en Departman Marketing aplentan.  I kapab kontinnyen soutenir travay ki Lenstiti Kreol i bezwen fer.

Onorab Ghislain pour La Digue li in dir, lasezon kreol in refleri.  E lasezon kreol i refleri en fwa par an, apar ozordi dan Lasanble.  E ki toulezan, Sesel i 100 poursan kreol, ler nou antre dan Festival Kreol.  I vre i koumsa ozordi e sa i enn bann regre ki nou kot Minister nou annan.  Lasezon kreol i bezwen toulezour dan peryod Festival Kreol, la lasezon kreol i vin, konmdir an angle, en bloom total.  Me i bezwen fleri toulezour.  Nou bezwen kapab fyer sa ki nou ete e fer li fleri dan tou lotel, nou bezwen kapab vwar pla kreol e sa i enn bann challenge ki nou annan koman Minister.  E challenge ki nou annan, menm dan Victoria.  Ler nou regard, nou menm kapab dir akoz Lenstiti Kreol in propoze ki olye annan zis sa 3 zour festivite kreol, ki nou deklar mwan Oktob koman mwan kreol Sesel.  E la gete kimannyer nou kapab met enpe kiltir kreol dan Victoria pandan son mwan antye, pou nou kapab fer elarzi sa peryod kot nou santi nou sitan fyer sa ki nou ete.  So, nou pe travay lo la me nou swe koman Minister e Lenstiti Kreol se ki lasezon kreol i fleri 365 zour lannen e ki nou tou nou viv sa, nou respir sa e nou santi nou sa lafyerte ki la avek nou.

Onorab Fideria, Les Mamelles in koz lo sa, kimannyer nou kapab fer ki bann etidyan, tou i koz kreol.  Tou i santi zot konvenableman alaoter, kapab koz an kreol e ekrir an kreol.  Mon panse Minister Ledikasyon i annan sa koman enn son lobzektif.  Mon ti a kontan, kekfwa zot koman bann Onorab ki reprezant pep.  Ler nou ti pe vin isi ozordi apre midi, nou ti tann en reportaz lo radyo, kot ti pe koz lo legzanmen.  Legzanmen ki bann nouvo sitwayen i pase.  E sa legzanmen, zot ti dir nou taler letan nou ti dan radyo.  PS ti krwar, letan nou ti pe drive sorti Kempinski akoz ti annan COI ozordi ti pe rankontre.  Ti en legzanmen pou 2erdtan me tou dimoun ti’n fini dan 30 minit.  Si Seselwa i oule met en legzanmen, kekfwa enn bann konponan kle kote ki kreolite i antre ladan e eski sa legzanmen i an angle tousel, swa kreol i devret en parti ladan.  En parti kle.  Ozordi ou annan swa fer 1 dan 3.  Eski nou devret annan swa 1 dan 3, swa en bout i devret compulsory pou dir ou pou koz en bout an kreol.  Sa i kekfwa, pou repran pwen Onorab Fideria.  I en keksoz kot nou kapab pa zis fer ki nou zenn i konn koz kreol, me tou bann ki oule vin Seselwa i koz kreol zot osi.  Kekfwa nou rev enpe me mon panse i enportan.  Ozordi en zour kot nou devret fyer ki nou pe etablir en keksoz pou fitir.  A nou en pti bout reve ladan pa pou fer dimal.  Me langaz maternel, Onorab Fideria ti dir nou i enportan e i en drwa.  E la nou totalman lo menm avi ki li.

Onorab Valmont in dir nou ki larmoni kiltirel i partou.  E plis zefor pour bann zenn rekonnet zefor Lenstiti kreol e lenportans sa Lenstiti.  Wi, nou dakor avek ou e se la kot marketing ki Lenstiti Kreol a lanse, la prezan ki i en body endepandan, a ede pou nou ariv sa pwen ki ou’n met alavan.  Pou nou arive vreman fer sa vin en realite.

Onorab Jeannevole Mont Fleuri, ou’n dir nou drwa nou langaz.  E ler nou pa met sa drwa en langaz maternel, i en vyolasyon drwa imen.  Sesel nou kapab dir, dan sa bout nou pa pe fer okenn vyolasyon e ki langaz Seselwa, sa langaz kreol Seselwa i vreman ganny met alavan e pli alavan ki okennn lot pei kreolofonn pa’n arive mete.

Onorab Meggy Marie Anse Aux Pins i dir, akoz sa Act ki nou re-anmennen ozordi?  e son repons, in reponn limenm apre dan son lentervansyon, an dizan poudir se lendepandans Lenstiti Kreol.  Fer li vin en body otononm.  Sa body ki a debout e i tonm enpe anba parasol Minister, me ki i annan en travay kle pour li fer.  Mon totalman dakor ek ou kestyon e mon dakor ek ou repons osi ki ou’n donnen.

Onorab Leader Lopozisyon dan Lasanble Nasyonal, Onorab Pierre in vin lo detrwa pwen kle.  Protez e promot lalang maternel koman en pei.  Mon antyerman dakor.  Korperasyon Minister Ledikasyon avek Lenstiti Kreol i dan nou baz.  I ti menm dan mon prezantasyon.  Pwen ki mon anvi repran Mr Deputy Speaker, se sipor finansyel pou bann artis, pou liv, pou konpoziter, pou ekriven.  Sa enn Onorab Pierre, mon ti a demann ou.  Bidze pe vini.  Gete kimannyer ou kapab siport Lenstiti Kreol.  Ler Minis Finans i anmenn sa, dir ou’n propoze akoz ou’n fer en propozisyon.  E mon panse dan sa Komite ki regard Assurance, regard Onorab Pierre, in fer en propozisyon.  E si Onorab Pierre i demann pou annan sa larzan neseser akoz nou siporte sa ki ou pe dir, me ou mye plase ki mwan pou kapab anmenn sa akoz se isi ki zot aprouv sa Bidze.

Lo Prezidan apwent Chairman, i en provizyon ki dan sa Act e mon vreman pa kontan esey re-envant lafarin.  Dan tou Act Sesel, bann body Gouvernman, se Prezidan ki apwent son Chairman.  Nou travay, mwan avek PS e menm CEO kot Lenstiti e nou Management, se nou fer en lalis propozisyon kot Prezidan pour bann manm.  E la nou rod bann dimoun ki annan, pa en lenfliyans Sesel, me en lentere.  En lentere kler dan sa body ki nou pe propoz avek Prezidan.  Nou donn li en lalis e li i swazir ladan.  I dir, ok.  Mon dakor ek sa, mon pa dakor ek sa.  Me alafen, son Chairmainship, sa se prerogatif Prezidan Larepiblik ki son manda se fer sa e la li i gid nou lekel ki i krwar.  E i diskit avek nou ase souvan, me set en prerogatif ki Prezidan i annan e sa prerogatif mon panse i enportan akoz li i vwar pei an antye, ler nou kot Minister Touris e Kiltir nou vwar, Minister.  E i enportan ki i annan en dimoun ki annan sa overall concept ki pe pase dan pei.

Lo kote staff Onorab Pierre, ou’n lev nesesite ki CEO i annan prerogative manage son staff. Mon kapab asir ou ki tou bodies ki tonm anba Minister Touris e Kiltir se son bann CEO ki manage.  I pa travay ni mwan, ni PS pou al manageStaff i annan rekour si i annan en keksoz kot i annan unfairness, swa viktimizasyon pou vin vwar nou akoz nou parent Ministry me se pa nou ki al manage staff dan bann lorganis ki tonm avek nou.

En pwen ki bann bonnonm Legal in anvoy lo latab, i dir mwan ki, pou repran ankor pwen Onorab Meggy Marie.  I dir mwan sa Lenstiti ki ti kree avan.  Lenstiti Kreol ki ti la avan ti ganny set up koman en body Administratif e Egzekitif avek pouvwar Gouvernman.  Ozordi, sa nouvo body pe ganny set up par en Act. E la i vin dan Lasanble.  Avan pa ti bezwen Lasanble.  Ozordi se zot, koman reprezantan lepep ki pe anmenn en Act pou vreman met sa valer neseser lo sa ki nou dir nou ete.  Sa pep kreol avek en kiltir kreol.  Alor nou pe met anplas en Lenstitisyon kreol ki nou apel Lenstiti Kreol, pou vreman valoriz.  Zot tou zot in koz lo valorizasyon sa mo kreol e sa kiltir kreol e se pour la rezon ki nou pe annan sa body ki endepandan, ki ganny kree par Lasanble.  Reprezantan lepep Seselwa., pou met alavan sa kreolite.

Onorab Pierre in osi koz lo resours apropriye e sa mon revin lo la akoz i en pwen kle.  Lenstiti Kreol i kapab pa zis la vivote.  Sa Lenstiti Kreol i kapab vreman pran son vre plas.  E la ankor Onorab Pierre, dimoun, mon espere SBC a met sa lo Nouvel Vandredi, swa lo Nouvel ler i fer bann Highlights.  Dimoun in tann ou demann.  Dimoun in tande e nou kot Minister, nou vreman kontan sa lapros ki ou’n fer, me ed nou fer li vin en realite.  Anmenn en lamannman dan Bidze Minis Laporte ler i propoz son Bidze.  Demann en larzan sipleman sa Bidze neseser pou Lenstiti Kreol.

Onorab Rose, Leader of Government Business in koz lo lenportans kreol e kreolite.  E son lentervansyon in pas lo sa lenportans.  E i enportan.  I enportan ki Onorab Rose in met alafen, vi ki dernyen Manm ki ti koze pa pou neseserman zis get definisyon kreol, sa ki i ete, me pour nou apresye lenportans, dir ki nou en pep kreol.  Tanzantan nou kot Minister nou dir, bokou dimoun i koz lo nou kontan kreolite, nou kontan kreol.  Me konbyen fwa mwan ek PS nou asize nou dir, eski nou kontan vreman akoz ler ou vwar Festival Kreol, ler sa lasezon i fleri, konbyen dimoun ki dir mon pou donn en koudmen pou fer Festival Kreol grosi?  Ler nou fer Karnaval, akoz i annan en mo enternasyonal avek, mon demann bann pei lemonn ki oule vini, nou bezwen soutyen si nou oule sa Karnaval.  Me Lenstiti Kreol se nou.  I pou nou.  Si nou oule met li an valer, nou tou nou bezwen ralye pou met li an valer.  Minister i kontinnyen sey fer li grosi, me nou bezwen, tou Seselwa ki krwar ki sa mo kreol e sa kreolite ki nou ete i devret ganny valorize, nou bezwen donn en koudmen.  I pa travay Departman Lazenes, swa Departman Ledikasyon, swa DPA ki desann, swa en bann Ners.  Me i tou Seselwa.  Si i pour nou, nou tou nou bezwen ralye.

Lo son definisyon, i enportan ki i en keksoz ki nou koriz souvan.  Ler nou dir lakwizin kreol, i pa vre.  Nou annan en lakwizin kreol Seselwa.  Lakwizin kreol i kapab sorti New Orleans, i kapab sorti Haitii.  Tousala i lakwizin kreol.  Me pour nou, i lakwizin kreol Seselwa.  Dan tou brosir ki Minister i fer, swa dan Board Touris i fer, nou koriz sa sak fwa akoz mwan mon’n ganny en zournalis ki ti challenge mwan isi kot Marie-Antoinette.  I dir mwan, be oli Gambo? Akoz li laba New Orleans i manz sa dan lakwizin kreol.  Nou bezwen kler e i annan en dimoun taler ki ti dir, nou bezwen met nou mo Sesel, sa Seselwa avek.  Akoz sa enn i pour nou.  Sa i nou DNA sa enn.  Napa lot dimoun ki kapab claim sa.  Me ler nou zis met kreol e nou les li flote, tou dimoun i kapab claim. Morisyen osi i dir ou i kreol, La Reunion i dir ou i kreol, Martinique osi i kreol me pour nou, letan nou’n met Sesel, sa Seselwa avek, i annan zis nou ki kapab dir ki sa nou ete.

Me Onorab Rose in osi koz lo defi.  Lenfliyans ki ekziste.  E sa wi.  Onorab Rose i annan antyerman, antyerman rezon me mannyer nou pou protez li, mannyer nou pou fer sa proteksyon neseser e la set ankor Lenstiti Kreol.  Se li ki pou get bann mo angle ki antre ladan.  Se li pou gete kimannyer parfwa nou pe al lo bann bor ki nou a pli vreman kreol.  Esey fer nou tourn enpe dan sa semen drwat.  Sa Zedmo ki Onorab Rose in leve, nou tou nou’n riye me kekfwa en mark sa lenfliyans ki nou perdi sa ki nou ete.  I vre.  Sa garson pa ti tro bet.  Ler ou dir li, lenz sal i lav kote?  Dan washing machine, swa larivyer.  Me pour li, ou a dir en nouvo lekip dimoun ki pe monte.  I dir ou, mwan kot mwan, mon dan flat konmela.  Mon annan washing machine.  I pa ti osi bet me lenportans sa ki ti koz lo Zedmo pli boner, ki nou remet sa bann tradisyon, sa bann Zedmo ki nou annan alavan e fer sa marketing neseser pou li pran son plas.

Me Onorab Rose osi ki’n koz lo valorizasyon sa ki nou ete, akoz Sesel in ganny dirize ver sa.  E sa nou devret fyer.  Tou Seselwa i annan en devwar an limenm dir nou devret fyer ki koman en pei, nou’n arive anmenn alavan sa ki nou, nou ete.  Finalman se pep Seselwa.  Se sa pep kreol Seselwa, avek son kiltir kreol Seselwa e son lalang Seselwa.  Son langaz ki i annan ki kapab dir, se Sesel sa.

E Mr Deputy Speaker, pou mwan fini mon oule dir.  Bann ki annan en krwayans poudir an angle swa an franse ou a kapab eksprim nou enpe plis e ki i pa meyer mwayen ou medium pou kapb montre zanfan.  Mon rapel tre byen, en fwa Msye Albert Rene ti fer en Diskour dan laplenn.  Nou ti ankor Koloni Angle sa letan e i ti dir tou sa ki an angle i kapab dir an angle, swa en franse i kapab dir an franse, li i kapab dir an kreol.  E i kler.  Nou kapab dir sa e ozordi nou kapab menm azoute e nou kapab dir ankor plis ki en angle i kapab dir dan son prop langaz, nou, nou kapab dir li an kreol, avek tou lafyerte ki nou devret kapab annan.

Avek sa Mr Deputy Speaker, mon demann tou Manm Onorab, siport sa Bill e donn laprouvasyon pou kreasyon Lenstiti Kreol avek son lendepandans neseser.  Mersi bokou.

 

MR DEPUTY SPEAKER

Bon.  Nou pran en vot lo prensip e merit zeneral sa Bill. Tou manm ki anfaver?  Inanim.  Mon a ganny en Formal Second Reading.

 

MADAM DEPUTY CLERK

A Bill of an Act, to establish a Creole Institute of Seychelles, to be known as a “Lenstiti Kreol”, with a view to monitor, regulate and promote the development of the Seychellois creole language and culture, and to provide for its object, function and powers, and for matters connected therewith or incidental thereto.

 

MR DEPUTY SPEAKER

Avek sa mon a ganny en Mosyon pou sot staz Komite.

 

HON MARIE-ANTOINETTE ROSE

Mr Deputy, anba Order 91(1), mon move ki nou sot staz Komite.

 

MR DEPUTY SPEAKER

Okenn Manm ki segonde?

 

HON CHARLES DE COMMARMOND

Mosyon i ganny segonde Mr Deputy Speaker.

 

MR DEPUTY SPEAKER

Ki nou sot staz Komite.  Nou pran en vot.  Tou bann ki anfaver?  I inanim.  Mon a ganny en Motion for Third Reading.

HON MARIE-ANTOINETTE ROSE

Mr Deputy, mon move ki nou lir sa Bill en Trwazyenm fwa.

 

 

MR DEPUTY SPEAKER

Okenn Manm ki segonde?

 

HON CHARLES DE COMMARMOND

Seconded, Mr Deputy Speaker, Sir.

 

MR DEPUTY SPEAKER

Nou pran en vot final lo sa Proze de Lwa.  Tou bann ki anfaver, lev zot lanmen?  Inanim.  Proze de Lwa in ganny aprouve.  Mon a ganny en Third Reading.

 

MADAM DEPUTY CLERK

This Act may be cited as the Creole Institute of Seychelles Act, 2014.

 

MR DEPUTY SPEAKER

Avek sa nou’n fini avek Minis St Ange.  Nou ava remersi li e ekskiz li parmi nou.  E Lasanble osi pou adjourn ziska Mardi prosen le 15 Zilyet.

(ADJOURNMENT)

Last Updated on Monday, 14 July 2014 15:32